مراجعة موبايل سامسونج جالاكسي M21
سامسونج جالاكسي M21

كشفت سامسونج مؤخرًا عن ظهور موبايل جديد من سلسلة الـ M في مصر وهو سامسونج جالاكسي M21.

الموبايل اللى تم طرحه في الخارج في بداية عام 2020 واتأخر الموبايل جدًا لحد ما وصل للسوق المصري لكن بالرغم من تأخره إلا أنه قدر يقدم العديد من المميزات القوية وتم تسعيره بسعر مقبول جدًا بالنسبة لمواصفاته!

ودا اللى هنشوفه دلوقتي من خلال المراجعة دي… 

خلينا نكمل المراجعة مع موبايل سامسونج جالاكسي M21…

تصميم موبايل سامسونج جالاكسي M21:

أولا خامات الموبايل:

تم تصمم الموبايل بالكامل من البلاستيك البولي كاربونيت.

الخامة دى سهل جدًا تتخربش ودا حقيقي علشان كدا أنصحك لازم لما تشتري الموبايل دا أول حاجة متشيلوش من الجراب الشفاف اللي جاي معاه، تاني حاجة يفضل تركب له اسكرينه حماية علشان الخامة بتتخربش حتى وهو فى الجراب معرض للخربشة ومفيش غنى عن حماية اللسكرينه، وخلاصة الكلام يعيب سامسونج جالاكسيM21 أنه من البولي كربونيت أو البلاستيك بسبب فئته السعرية مش أكتر لأن معظم المنافسين أو كلهم حقيقي بالسعر دا بيقدموا خامات زجاج محترمة إنما كاستخدام بقى للبلاستيك دا مع الأبعاد الكبيرة ديه لو استخدامك مش قوي مش هيعمل أزمة لو الاستخدام قوي فكر كويس قبل ما تشتريه!

ثانيًا التصميم الخارجي:  

تصميم الكاميرات: 

الكاميرات مرصوصة في بوكس على شمال من فوق، متكونه من 3 كاميرات عمودية (محطوطه فوق بعض).

تصميم عادي جدًا ومفيش فيه أي شيء مميز وزي ما قولنا شبيه ببعض الموبايلات.

الموبايل بيقدم خامات خارجية مش الأفضل مع شكل تصميم مش حديث مُقارنة بموبايلات Huawei Y7a.

استخدمت سامسونج هنا طبقة حماية على الشاشة Corning Gorilla Glass 3 والموبايل متركب عليه اسكرينة بتييجي معاه في العلبة.

 

تصميم موبايل سامسونج جالاكسي M21
تصميم موبايل سامسونج جالاكسي M21

 

أبعاد الموبايل:

أما عن أبعاد الموبايل فهو بييجي بأبعاد 159×75.1×8.9 ملم.

ووزن الموبايل 188 جرام، ودا وزن مناسب يعني لا هو خفيف أوي ولا تقيل بمعني أصح مناسب ليك ومش هيبقي متعب.

شاشة موبايل سامسونج جالاكسي M21:

تم تصميم الشاشة بشكل النوتش المعتاد على هيئة الـ Water Drop، وهي من نوع Super AMOLED.

 علشان كدا بتكون الشاشة أكتر شيء مميز في موبايلات سامسونج عمومًا وفي الفئة دي خصوصًا، اتصممت بمساحة 6.4 إنش بجودة الـ FHD+، بدقة 1080×2340 بيكسل، بمعدل كثافة بكسلات 403 بكسل لكل إنش، وكمان تدعم الشاشة أبعاد العرض بنسبة 5:9، ومع طبقة الحماية الموجودة على شاشة الموبايل من نوع Corning Gorilla Glass من الجيل الثالث، ودا هيخلي الشاشة مقاومة شوية للخرابيش.

أيضًا في إمكانية تغيير أزرار التحكم واستخدام الإيماءات علشان تقدر تستخدم الشاشة بأكبر مساحة ممكنة وتدعم الشاشة الـ Dark Mode لتحويل الموبايل بالكامل إلى اللون الأسود، بالإضافة لدعم الشاشة إلى الـ Blue Light Filter، لحماية العين من الأشعة الزرقاء اللي ممكن تضر الإنسان لو تعرض ليها لفترات طويلة.

 

شاشة موبايل سامسونج جالاكسي M21
شاشة موبايل سامسونج جالاكسي M21

 

الشاشة بتقدم أداء مميز كما هو متوقع من شاشات سامسونج واللي بقت علامة مميزة خلاص لسامسونج في السوق، الألوان مميزة والتفاصيل حلوة تفتح نفسك على متابعة استخدام الموبايل.

كاميرات موبايل سامسونج جالاكسي M21:

الكاميرا الأمامية:

كاميرا السيلفي في الموبايل دا موجودة في ثقب السيلفي، بدقة 20 ميجا بيكسل، وفتحة عدسة F/2.2.

الكاميرات خلفية:

الكاميرا الخلفية في موبايل سامسونج جالاكسي M21 بتكون 3 كاميرات.

الكاميرا الأولى، بتييجي بدقة 48 ميجا بكسل، بفتحة عدسة F/2.0 (وايد)، مع إمكانية التركيز التلقائي PDAF.

الكاميرا الثانية، بتييجي بدقة 8 ميجا بكسل، بفتحة عدسة F/2.2 (ألترا وايد)، واللي بتتمكّن من التصوير من زاوية أوسع من الكاميرا الأساسية، وتصل زاوية التصوير إلى 123 درجة مع العدسة الألترا وايد.

أما الكاميرا الثالثة، بتييجي بدقة 5 ميجا بكسل، بفتحة عدسة F/2.2، واللي يمكن استخدمها لعمل العزل.

الكاميرات مزودة بالعديد من الأوضاع الحديثة، حيث تدعم الـ HDR، والبانوراما، واتصممت بفلاش LED فردي، كمان تقدر تستخدم الوضع الليلي علشان تاخد أفضل صور في الإضاءة الخافتة أو الليلية، كمان تقدر تستخدم الوضع الاحترافي (Pro Mode)؛ اللي من خلاله تقدر تحصل على صور شبيهة بالكاميرات الاحترافية، وتدعم الكاميرات الخلفية التصوير بجودة 4K بدقة 2160 بيكسل مع سرعة 30 فريم في الثانية.

 

كاميرات موبايل سامسونج جالاكسي M21
كاميرات موبايل سامسونج جالاكسي M21

الكاميرات هنا بتقدم أداء قوي والإضافات اللي سامسونج أضافتها هي إضافات عملاقة هتنقل سامسونج نقلة قوية في عالم الكاميرات في الفئة دي، الألوان والتفاصيل حلوة ولما جربنا الكاميرات كانت دايمًا بتشدنا من حلاوتها إننا نجرب تصوير حاجات تانية وحاجات أكتر بزوايا مختلفة وكل مرة كنا بنحب الصور والكاميرا أكتر.

معالجة الصور بتاعة سامسونج بقت كويسة جدًا في الواجهة بتاعة أندرويد 10، والصور طالعة حلوة جدًا والألوان مظبوطة بالظبط في معظم الصور اللي صورناها، وكمان الـ HDR حلو أوي يمكن بس ساعات العزل كان بيغلط حاجة خفيفة لو الصورة صعبة شوية وفيها تفاصيل كتير.

البصمة والزيادات:

البصمة: 

يدعم الموبايل مستشعر بصمة الإصبع التقليدي ودي هتلاقيها موجوده في ضهر الموبايل. 

المستشعرات: 

  1. مستشعر التقارب.
  2. مستشعر التسارع.
  3. مستشعر الإضاءة.
  4. مستشعر الـ Gyroscope.
  5. مستشعر البوصلة.
  6. مستشعر البصمات (أسفل الشاشة، ضوئي).

صوت الموبايل:

صوت الموبايل كويس مش وحش، وبيدعم كمان المايك الخاص بعزل الضوضاء عن الصوت أثناء الاستخدام سواء في المكالمات أو الأبلكيشنز المختلفة.

يدعم الموبايل وجود البلوتوث بالإصدار 5.0، مع خاصيتي الـ A2DP, LE.

أيضًا يدعم الموبايل رديو الـ FM، والـ NFC.

يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.

أما عن الواي فاي في موبايل سامسونج M21 فهو يدعمه بترددات الـ a/b/g/n/ac، كما يدعم الـ Dual-band, Wi-Fi Direct, hotspot.

الموبايل جاي بأحدث نظام تشغيل Android 10.0، مع واجهة سامسونج الأحدث الـ One UI 2.

ألوان الموبايل اللى بيتوفر بيها هي اللون الأسود، الأزرق، والأخضر.

يدعم الموبايل شبكات الـ 4G،والـ 3G، وكمان الـ 2G.

يدعم الموبايل منفذ الـ 3.5 ملم الخاص بسماعات الاذن.

أم بالنسبة لمنفذ الـ USB فييجي من النوع الأحدث واللى هو الـ Type C.

يدعم الموبايل امكانية تشغيل شريحتين اتصال في نفس الوقت، مع وجود كارت ميموري بسعة تخزينية تصل إلى 512 جيجا بايت.

أداء موبايل سامسونج جالاكسي M21:

هتلاقي هنا الموبايل بييجي بمعالج رئيسي من النوع Exynos 9611 ثماني النواة (بأنوية Cortex A73 بسرعة 2.3 جيجاهرتز الرباعي، و Cortex A53 بسرعة 1.7 جيجا هرتز الرباعي)، مع المعالج الرسومي Mali-G72 MP3، وهي نفس المعالجات اللي شوفناها في موبايل Samsung A51.

المعالج هنا بيقدم أداء متواضع مش الحلو أوي ولا الوحش أوي ولكن بالتأكيد سامسونج حاولت إنها تعلي الأداء شوية عن طريق الـ AI Game Booster الموجود في الموبايل كدعم للأداء في الألعاب، ولكن يظل مقبول في الفئة السعرية دي، ونظير جيد للمنافسين.

 

أداء سامسونج جالاكسي M21
أداء موبايل سامسونج جالاكسي M21

بطارية موبايل سامسونج جالاكسي M21:

بطارية الموبايل من نوع ليثيوم بوليمر، بحجم 6000 مللي أمبير، تدعم الشحن السريع بقوة 15 وات عن طريق منفذ USB Type C.

التركيبة هنا غريبة بالنسبة ليا، يعني البطارية العملاقة دي ليه الشحن بتاعها ميكونش أسرع من 15 وات؟

الـ 15 وات بالنسبة ليا هتشحن البطارية في مدة كبيرة ودا لأن البطارية كبيرة، ممكن سامسونج كانت بتلعب على سعة البطارية لأنها مهمة للفئة دي، ولكن التكامل بردو شيء مهم في الجهاز.

 

بطارية موبايل سامسونج جالاكسي M21
بطارية موبايل سامسونج جالاكسي M21

سعر موبايل سامسونج جالاكسي M21:

سعر الجهاز في السوق المصري حاليًا للنسخة الـ 64 جيجا مع 4 جيجا رام هو 3500 جنيه مصري.

محتويات علبة موبايل سامسونج جالاكسي M21:

  1. موبايل سامسونج M21.
  2. شاحن بقوة 15 وات.
  3. كابل الـ USB من نوع Type C.
  4. كتيب التعليمات مع الضمان.
  5. دبوس معدني لفتح مكان شريحتي الاتصال.
  6. هاند فري.

الرأي النهائي في موبايل سامسونج جالاكسي M21:

الموبايل بصراحة مدخلش دماغي أوي، سامسونج مصممة إنها تغلط غلطات صغيرة تخل بتوازن موبايلاتها، يعني الشاشة قوية جدًا فهتحتاج طبيعي لبطارية قوية فمن المنطقي إن أخلي الشحن قوي لأن الاستهلاك أكيد قوي، كمان الكاميرات كانت تجربة مميزة وعجبتني وكنت شايف قدام سامسونج الفرصة علشان تعلى بالموبايل دا بالذات ولكن للأسف، عالعموم هو تجربة حلوة مش وحشة لو هتقدر تتكيف مع عيوبه ولو مش فارقة معاك أوي، لكن لو حابب تجيب موبايل متوازن يلبي احتياجاتك فأنصحك تستخدم خدمة “اختار موبايلك” واللي بيقدمها موقعنا (ناس فـونــز) كل اللي عليك تعمله فيها هو إنك تقولنا ميزانيتك والمواصفات اللي محتاجها في الموبايل وإحنا هنرشحلك موبايل يلبي احتيجاتك دي زي ما طلبتها بالظبط من هنــــــا

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *