مراجعة موبايل سامسونج A51
سامسونج A51

مقدمة:

لاحظنا من فترة معينة كدا إن سامسونج كانت تقريبًا بطلت تنزل سلسلة الموبايلات اللي من الفئة المتوسطة في مصر، في حين إنها نزلت سلسلة Galaxy A-s برا مصر، وكان آخر موبايل ليها في مصر سامسونج M30s، لكن بعدها شركة سامسونج نزلت موبايل سامسونج A50 وكان فيه إقبال عليه بنسبة مش قليلة، وحقق نجاح ومبيعات عالية في مصر، ووقتها قامت سامسونج بإطلاق جيل جديد منه مع معالجة المشاكل القديمة الموجودة فيه، وبقى عندنا موبايل سامسونج A51s ومن غير خلاف طبعًا هيحقق الموبايل نجاح في مصر كعادة الأجهزة دي، بس هل سعره دا هيأثر في شيء وهيخلي المستخدمين يترددوا أنهم يشتروه أم لأ؟

خلينا نشوف المراجعة…

تصميم موبايل سامسونج A51: 

أولًا خامات الموبايل:

زي معظم موبايلات سامسونج في الفئة دي هنلاقي A51 مصنوع بالكامل من بلاستيك البولي كربونيت اللامع سواء الفريم أو الضهر المتزين بشوية نقوش، الخامة منقدرش نقول حلوة أو وحشة، ولكن هي مش الأفضل لأنها ممكن تتخربش خصوصًا إن اللمعة أصلًا بيظهر فيها الخرابيش جدًا لو محافظتش على الموبايل عن طريق جراب يحميه.

فيه خامات كتير كانت ممكن تكون أفضل أكيد ولكن مش هنطمع كتير في الفئة دي.

 

تصميم موبايل سامسونج A51
تصميم موبايل سامسونج A51

 

ثانيًا التصميم الخارجي:

تصميم الكاميرات:

الموبايل فيه أربع كاميرات جنب بعض في صورة مستطيل في شمال الموبايل من فوق، تصميم الموبايل منقدرش نقول عليه جديد، لكنه عصري وبدأنا نشوفه كتير مع اختلاف طبعًا بسيط في ترتيب أماكن الكاميرات.

أبعاد الموبايل:

  • أبعاد الموبايل 158.5×73.6×7.9 مم
  • وزنه خفيف، وده شيء مميز جدًا يعني الجهاز وزنه تقريبًا 172 جرام، يعني مش هتحس أنك شايل حاجة في إيدك تقريبًا حتى لو فضلت تستخدمه فترات طويلة سواء للألعاب أو التصفح، فخليك متأكد أنك هتكون مرتاح جدًا في مسكتك للموبايل طول الوقت.

شاشة موبايل سامسونج A51: 

شاشة الموبايل سوبر أموليد بحجم 6.5 بوصة، وبدقة 1080×2400 بيكسل، وجودتها FHD+ وكثافة البيكسلات 405 بيكسل لكل بوصة، وأبعاد عرض الشاشة 20:9، شاشته كاملة، والكاميرا الأمامية في الشاشة من فوق على شكل ثقب، وتقريبًا كدا شبه موبايل Galaxy Note 10 في التصميم.

 

شاشة موبايل سامسونج A51
شاشة موبايل سامسونج A51

 

هنا محتاجين نقف شوية ونتأمل عظمة الشاشة في الجهاز دا، وكمان نقول كلمة حق في موبايلات سامسونج اللي بتكون مخدومة ومتجمعة صح!

تخيل إن سامسونج بتحط شاشات بالعظمة دي في موبايل في الفئة دي، تجربة عظيمة بصراحة وألوان مشبعة جدًا وطبيعية، وكمان فيها كمية تفاصيل تخليك تحب الحاجة اللي بتتفرج عليها في الشاشة أكتر من الأول.

كاميرات موبايل سامسونج A51:

الكاميرا الأمامية:

موجود في الموبايل كاميرا واحدة للسيلفي، وموجودة في شكل ثقب في منتصف الشاشة واللي بيعتبر شكل عصري في الفترة الحالية، بتصور بدقة 32 ميجا بيكسل، وفتحة عدسة F/2.2 وبتدعم الـ HDR، وتصوير الفيديوهات بجودة الـ 4K*30fps ودي كانت أول مرة تحصل في فئة الموبايلات المتوسطة من سامسونج.

لما جربنا الموبايل لفترة لقينا إن كاميرا السيلفي الأمامية بتقدم تجربة ممتازة، الجهاز بيطلع صور خرافية من كاميرا السيلفي أثناء النهار أو الإضاءة القوية والمتوسطة، ولكن أثناء الليل كان سيء جدًا بالمقارنة بأجهزة تانية في نفس الفئة السعرية بتاعته.

الكاميرات الخلفية:

الموبايل متوفر فيه أربع كاميرات خلفية لكل واحدة فيهم دقة مختلفة في التصوير…

  • الكاميرا الأولى، دقتها 48 ميجا بيكسل، وبفتحة عدسة F/2.0.
  • الكاميرا التانية، واللي بتصور بدقة 12 ميجا بيكسل، وفتحة عدسة F/2.2، كمان بتدعم خاصية الـ Ultra Wide يعني التصوير العريض أو زي ما بيسموها كاميرا الزوايا العريضة واللي بقينا بنشوفها في معظم الموبايلات الحديثة.
  • الكاميرا التالتة، هي كاميرا ماكرو، واللي بتصور بدقة 5 ميجا، وفتحة العدسة F/2.4، وبتشتغل عكس الكاميرا التانية ومخصصة للتصوير من قريب ودي لهواة التفاصيل الصغيرة.
  • الكاميرا الرابعة والأخيرة، والمخصصة للعزل، واللي بتصور بدقة 5 ميجا بيكسل، بفتحة عدسة F/2.4.

تصوير الفيديوهات بجودة الـ 4K وبدقة 2160 بيكسل، والقدرة على تصوير 30 إطار في الثانية، ضيف كمان إمكانية التصوير الـ FHD بدقة 1080 بيكسل، وبمعدل تصوير 30 إطار في الثانية الواحده.

 

كاميرات موبايل سامسونج A51
كاميرات موبايل سامسونج A51

 

وهنا لازم نقول رأينا بكل حيادية في الكاميرات، والأوبشنز الموجودة فيها، بنلاقي إن الكاميرات الخلفية هي كاميرات ممتازة وتصلح جدًا جدًا للتصوير النهاري والتصوير الليلي لإن له دور في الإضاءات القوية أو المتوسطة ولكن مع الإضاءة الضعيفة أو التصوير الليلي بنلاقي الموضوع اختلف من ميزة لعيب، كل حاجة بتتغير وبتبقى تفاصيلها قليلة جدًا وألوانها مش حلوة، لو قررت بقى تعمل زوم مش هتشوف حاجة أصلا من الصور، ودا شيء مش كويس أتمنى سامسونج تعالجه قريب.

البصمة والزيادات:

البصمة: 

بصمة الموبايل مدفونة في الشاشة ودي ميزة بقت موجودة النهاردة في معظم الموبايلات الحديثة واللي طبعًا بتغنيك عن وجود بصمة الاصبع التقليدية في الموبايل وبتخلي شكله أنيق أكتر، بجانب إنها بتديك أداء أفضل عن الجيل القديم من السلسلة دي.

المستشعرات: 

  1. مستشعرات البصمة.
  2. مستشعر الدوران.
  3. مستشعر الضوء.
  4. مستشعر المكان.
  5. مقياس السرعة.
  6. مستشعر المغناطيسية الأرضية.

من ضمن المميزات اللي ضافتها سامسونج في الموبايل هي البصمة المدمجة مع الشاشة صحيح إن البصمة دي مش الأسرع في الفئة السعرية دي ولكن تعتبر إضافة كويسة من وجهة نظرنى.

ألوان الموبايل مختلفة منه الأسود، والأبيض، والوردي، واللون الأزرق بتخلي فيه مساحة كبيرة للمستخدم إنه يختار لونه المفضل بسهولة بدل ما تحصره في ألوان معينة ممكن متعجبوش.

 صوت الموبايل: 

من ضمن المميزات الجديدة في الفئة دي أن سامسونج A51 فيه ميكرفون إضافي بيعزلك صوت أي دوشة حواليك في التسجيل والمكالمات، وكان كويس إن سامسونج فضلت محافظة على مدخل السماعات التقليدي الــ 3.5 واللي كتير من الناس بيعاني إنه مش موجود في معظم الموبايلات الحديثة.

الموبايل يدعم تشغيل شريحتين اتصال في نفس الوقت، بالإضافة لوجود كارت ميموري لإمكانية زيادة المساحة التخزينية بسعة تصل إلى 1 تيرا بايت.

يدعم موبايل سامسونج A51 شبكات الجيل الثاني، و الثالث، والجيل الرابع الـ 4G.

كما يدعم تشغيل راديو FM، بالإضافة لدعمه الـ NFC.

البلوتوث بييجي بإصدار 5.0، كما يدعم خاصيتي الـ A2DP, LE.

أيضًا يدعم الواي فاي بترددات الـ a/b/g/n/ac، كما يدعم خاصية الـ Dual-band, Wi-Fi Direct, hotspot.

كما يدعم تحديد الموقع الجغرافي الـ GPS، وأنظمة الملاحة الأخرى مثل الـ A-GPS, GLONASS, GALILEO, BDS.

يدعم منفذ الـ USB واللى جاي من النوع الأحدث الـ Type C، كما يدعم خاصية الـ OTG.

الموبايل جاي بنظام تشغيل Android 10.0، مع واجهة سامسونج الـ One UI 2.

أداء موبايل سامسونج A51: 

  • معالج الموبايل بييجي من سامسونج إكسينوس، وهو Exynos 9611 ثماني النواة وبيعمل بدقة تصنيع 10 نانو ميتر، وقوته تصل إلى 2.3 جيجاهرتز.
  • المعالج الرسومي هو Mali-G72 MP3، والمعالج بيقدم نفس أداء Galaxy A50 السابق.
  • الموبايل بييجي بأندرويد 10 الجديد وبواجهة سامسونج الجديدة One UI 2.0.
  • مساحة التخزين مقبولة مع 128 جيجا بايت فهي مساحة مش وحشة في الوقت الحالي.
  • مع 6 جيجا رام، واللي بتخلي الموبايل يقدم أداء قوي.

 

أداء موبايل سامسونج A51
أداء موبايل سامسونج A51

 

كان لازم نوضح إن المعالج هنا هو تطوير لمعالج Exynos 9610 السابق من شركة سامسونج، وهو مبيختلفش عنه كتير أصلًا إلا في حاجات خفيفة جدًا لا تضيف إلى الأداء أو غيره!

وشايف إن المعالج هنا هو خطوة غير موفقة من شركة سامسونج بسبب ضعفه عن معالجات المنافسين في الفئة السعرية دي!

في المجمل الأداء هيكون كويس معاك مش وحش، وكمان وضع الـ Game booster هيساعدك أوي في تحسين تجربة اللعب على الموبايل لو أنت من هواة الألعاب.

بطارية موبايل سامسونج A51:

بييجي الموبايل ببطارية ليثيوم بوليمر بسعة كبيرة وهي 4000 مللي أمبير، البطارية بتدعم الشحن بقوة 15 وات عن طريق منفذ USB Type C صحيح مش أسرع حاجة بس السرعة هتكون مناسبة مع السعة بتاعة البطارية فمفيش قلق خالص من النقطة دي.

 

بطارية موبايل سامسونج A51
بطارية موبايل سامسونج A51

سعر موبايل سامسونج A51:

الموبايل طبعًا زي ما ذكرنا فوق نزل منه كذا نسخة في مصر وأسعارهم كالآتي:

نسخة الـ 128 جيجا بايت مع 8 جيجا رام، النسخة دي سعرها الحالي 4888 جنيه مصري.

نسخة الـ 128جيجا بايت مع 6 جيجا رام، النسخة دي سعرها الحالي 4188 جنيه مصري.

وده تسعير مقبول من سامسونج مع إن كنت أتمنى أشوفه في تسعير أقل شوية من كدا ولكن عمومًا الموبايل يستحق.

محتويات علبة موبايل سامسونج A51:

  1. موبايل سامسونج A51.
  2. اسكرينة من البلاستيك تم وضعها بشكل مسبق على الموبايل.
  3. شاحن بقوة 15 وات.
  4. كابل USB من نوع Type C.
  5. جراب ظهر لحماية الموبايل.
  6. كتيب التعليمات مرفق مع الضمان.
  7. دبوس معدني لفتح مكان الشريحة.
  8. هاند فري.

الرأي النهائي في موبايل سامسونج A51:

الموبايل تحفة فنية من سامسونج، وسامسونج بصراحة مقدمتش أي تنازلات في الموبايل ده خالص، تحس إنهم اهتموا بكل مشاكل السلسلة وظبطوها في الموبايل ده، طبعًا فيه حاجات كنت أتمنى أشوفها في الموبايل بس أكيد كانت هتزود تسعيره أكتر من كدا، ولكن نرفع القبعة لسامسونج على الموبايل ده ونرشحه كتجربة شرائية مش هتزعلك لو خضتها وحقيقي تستاهل التجربة.

بنفكرك إنك ممكن تبعتلنا ميزانيتك والحاجات اللي بتهتم بيها في الموبايل وإحنا هنساعدك تختار الموبايل اللي يناسب احتياجاتك من كاميرا وأداء وغيرها حسب الطلبات اللي بتطلبها مننا، وده عن طريق خدمة “اختار موبايلك” اللي بيقدمها موقع ناس فـــونز ليك واللي تقدر تستخدمها من هنــــــــــــــــــا

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *