مقدمة:

شركة سامسونج قامت بتفجير قنبلة قوية في عالم الموبايلات خصوصًا بعد اختفائها لفترة عن الفئة المتوسطة وقامت بالإعلان عن موبايل Samsung Galaxy A31 الجديد بشكل رسمي، ودايمًا بنلاقي سلسلة الـ A من سامسونج بتشغل اهتمامات ناس كتير ودا بيرجع للمبيعات القوية اللي حققتها سامسونج والانتشار الواسع اللي تم تحقيقه في الموبايل في جميع الأسواق العالمية وفي الأسواق المصرية بالأخص. 

فخلونا كدا نتعرف على الموبايل مع بعض…

تصميم موبايل samsung Galaxy A 31: 

أولا خامات الموبايل:  

بنشوف إن سامسونج أبدعت جدًا في طريقة اختيارها لخامة الموبايل فهنلاقي إن الموبايل مصنوع من البلاستيك البولي كاربونيت ودي خامة بنشوفها أفضل كتير جدًا من الخامة اللي اتعودت سامسونج تستخدمها في تصنيعها. 

ولكن الحلو مبيكملش الموبايل سهل جدًا إنه يتخدش أو يلم أتربة ودا في حالة لو أنت مستخدمتش الجراب الخاص بيه، فحاول يكون الموبايل دايمًا في مكان نضيف لأن الأتربة ممكن تتسبب في الخرابيش وغيرها لجسم الموبايل.

ثانيًا التصميم الخارجي:

تصميم الكاميرات: 

الكاميرات محطوطة في بوكس على شمال ضهر الموبايل وتصميمها مميز جدًا وهنا بشوف إن سامسونج طورت كتير في طريقة تصميمها للموبايل وغيرت طريقة تصميمها عن الشكل المعتاد والمألوف اللي كلنا بنشوفه في تصميماتها السابقة.

 

 

أبعاد الموبايل:

• الموبايل بييجي بأبعاد 159.3×73.1×8.6 ملم.
• وبوزن 185 جرام.

وزن الموبايل الخفيف ودا من المميزات القوية اللي مش سهل تلاقيها في موبايلات كتير واللي هيريحك لو مسكت الموبايل لفترات طويلة.

شاشة موبايل samsung Galaxy A 31:

• الشاشة جاية بشكل نوتش على هيئة الـ Water Drop أو زي ما بتسميها  سامسونج الـ infinity U، وكمان الشاشة جاية من نوع Super AMOLED، بمساحة 6.4 إنش بجودة الـ FHD+ بدقة 1080×2400 بكسل، بمعدل التقاط 411 بكسل لكل إنش، وأيضًا تحتل الشاشة نسبة كويسة من الواجهة الأمامية للموبايل وهي 84.9%، كما تدعم الشاشة أبعاد العرض الجديدة بنسبة 20:9، وبتدعم خاصية الـ Always on Display واللي بتقدر تعرض الإشعارات على شاشة الموبايل في حالة عدم الاستخدام، وكمان تقدر تلغي أزرار التحكم  وتستخدم الإيماءات، علشان تقدر تستمتع  بحجم الشاشة بالكامل.

  

 

وهنا بشوف إن الشاشة ممتازة ومن نوع Super AMOLED وبتشتغل بشكل قوي جدًا ومن الصعب إنك تلاقي شاشة أموليد بدقة FHD+ في الفئة دي، الشاشة بتقدم تجربة ألوان عميقة جدًا، بمعنى إن كل تفصيلة بتكون واضحة معاك وأنت بتتفرج مثلًا على حاجة أو بتلعب على الموبايل، فهتلاقي إن الشاشة مساعداك جدًا في الموضوع دا، عيبها الوحيد هو الحافة السفلية للشاشة والحافة كبيرة ولو أنت من هواة الشاشات الكاملة هتضايق منها.

كاميرات موبايل Samsung Galaxy A 31:

الكاميرا الأمامية: 

بيييجي الموبايل بكاميرا واحدة بس وهي موجودة أعلى الشاشة واللي جت بدقة 20 ميجا بكسل، بفتحة عدسة F/2.2.

وللأسف مش بيتوفر فيها تصوير ليلي.

الكاميرات الخلفية:

هنا بنشوف إن الكاميرات جت بنفس شكل وتصميم الكاميرات الخلفية لموبايل Samsung Galaxy A51 وجت بكاميرا رباعية.

هنتكلم عنهم بالتفصيل…

• الكاميرا الأولى، واللي بنشوف إنها بدقة 48 ميجا بكسل، بفتحة عدسة F/2.0، وهي الكاميرا الأساسية للموبايل.
• أما عن الكاميرا الثانية، اتصممت بدقة 8 ميجا بكسل، بفتحة عدسة F/2.2، وهي الخاصة بالتصوير الواسع.
• أما عن الكاميرا الثالثة، فهي جت بدقة 5 ميجا بكسل، بفتحة عدسة F/2.4، وهي الخاصة بتصوير المايكرو ودي لعشاق التفاصيل. 
• ولو هنتكلم عن الكاميرا الأخيرة، دي بقي جت بدقة 5 ميجا بكسل، بفتحة عدسة F/2.4، وهي الخاصة بعمل العزل والبورتريه.

الكاميرات بتدعم التقريب الديجيتال حتى 8x مع دعم عمل الـ Live Focus أثناء التصوير بالإضافة إلى فلاش أحادي من نوع ليد فلاش.

بس للأسف رغم كل المميزات دي إلا إنه مش بيدعم التصوير الليلي.

لكن دا ميمنعش إن الكاميرات جت بتصميم عالي وبجودة عالية وطريقة مميزة ومختلفة جدًا جدًا.

بالنسبة للفيديو:

دعم الموبايل لتصوير الفيديوهات بجودة الـ FHD، بدقة 1080 بيكسل، بمعدل التقاط 30 إطار في الثانية. 

دعم الموبايل لتصوير الـ HD، بدقة 720 بيكسل، بمعدل التقاط 30 إطار في الثانية.

 

 

بعد التجربة لفترة لقيت إن الكاميرات الخلفية كانت لا ترقى لتوقعاتي خالص، يعني الكاميرا مفيش فيها أي مميزات جديدة تميزها عن أي موبايل تاني، الأداء متواضع في الإضاءة النهارية وبليل التفاصيل كلها بتضيع حتى لو الإضاءة متوسطة، ودا شيء استغربت منه لأن أداء الكاميرا الأمامية هنا بيتفوق على أداء الكاميرا الخلفية بسهولة سواء في الإضاءة القوية أو الضعيفة.

البصمة والزيادات:

البصمة:

من أهم وسائل الأمان الموجودة في الموبايل، يدعم الموبايل مستشعر البصمة ودي مندمجه بالشاشة بالإضافة لدعمه لخاصية الـ OTG.

لكن للأسف البصمة هنا مدمجة بالشاشة وهي نفس البصمة في موبايلات سامسونج التانية منخفضة السعر… وبعتبرها غير عملية ومش بتقدم أداء سريع في الفئة دي وكنت أفضل لو كانت بصمة إصبع تقليدية ولكن هتقدم أداء أقوى.

المستشعرات: 

1. مستشعر التقارب.
2. مستشعر التسارع.
3. مستشعر البوصلة.
4. مستشعر الـ  Gyroscope.
5. مستشعر الإضاءة.
6. مستشعر البصمات (أسفل الشاشة، ضوئي).
7. مستشعر جيروسكوب الخاص بنظارات الواقع الافتراضي الـ VR.

 تقنيات الاتصال:

 بالنسبة لدعم الواي فاي فهو بييجي بترددات a/b/g/n/ac، مزدوج النطاق، مع دعم الواي فاي دايركت، والهوت سبوت.

 تقنية البلوتوث الموجودة بالموبايل هي 5.0، بال|إضافة إلى دعمه لخاصية الـ A2DP ،LE.

يدعم موبايل سامسونج راديوا FM، والـ NFC.

كما يدعم الموبايل تحديد الموقع الجغرافي الـ GPS، أيضًا يدعم أنظمة الملاحة الأخرى مثل الـ A-GPS, GLONASS, GALILEO, BDS.

الموبايل جاي بنظام تشغيل اندرويد 10، مع واجهة سامسونج الأحدث الـ One UI 2.0.

يتوفر الموبايل  باللون جميلة جدًا عجبتني أنا شخصيًا الصراحة، زي اللون الأزرق، واللون الأبيض، واللون الأسود، وكمان اللون الأحمر.

الذاكرة الصلبة جايةمن نوع eMMC 5.1، والذاكرة العشوائية تأتي من نوع LPDDR4X .

صوت موبايل:

من خلال تجربتي للموبايل في المكالمات بشوف إنه بيدعم الميكروفون الثانوي الخاص بعزل الضوضاء والضجيج أثناء استخدام الموبايل  بصفة عامة، ودا وفرلي تجربة استخدم مميزة لما جربت أتكلم منه مكالمة طويلة وأنا في طريقي للبيت وكان الطرف التاني سامعني بشكل كويس ومن غير أي مشاكل.

يدعم منفذ الـ 3.5 ملم الخاص بسماعات الأذن واللي كان مكانه غريب بالنسبة ليا بس خطوة كويسة إنه يكون موجود، وده لأن مكانه في الموبايل من تحت بجانب منفذ الـ USB.

كمان من مميزاته إنه بيدعم شريحتين اتصال من نوع Nano Sim.

أما عن دعمه لشبكات الإتصال فيدعم شبكات الجيل الثاني الـ 2G والجيل الثالث الـ 3G والجيل الرابع الـ 4G .

أداء موبايل samsung Galaxy A 31:

نيجي بقى للشيء المهم وهو الأداء…

• الموبايل اللي معانا بييجي بمعالج من شركة ميديا تيك من نوع Helio P65 بتكنولوجيا الـ 12 نانو.
•  مع معالج رسومي من نوع Mali-G52 MC2، وهو نفس المعالج الذي سبق وأن رايناه في هاتف الـ Vivo Y19 والـ Vivo S1.
• بيدعم وضع تعزيز أداء الألعاب عن طريق الـ Game Booster ودا عشان يقدر يقدم تجربة أفضل أثناء اللعب.

 

 

طبعًا الأداء ضعيف جدًا جدًا ودا بسبب المعالج السيء اللي قررت سامسونج تستخدمه هنا، المعالج هنا مش الأفضل في فئته وربما يكون الأسوأ كمان وبيقدم أداء ضعيف جدًا مقارنةً بالمنافسين المباشرين زي موبايلات شركة شاومي مثلًا في الفئة دي.

بطارية موبايل samsung Galaxy A 31:

هنا بشوف إن البطارية مش أفضل حاجة، بل بالعكس بنشوف إن سلبياتها أكتر من مميزاتها… 

البطارية جت هنا بسعة 5000 مللي أمبير وقوة الشحن الـ 15 وات، واللي كان غريب معايا إن بطارية بالحجم دا المفروض تقعد فترة أطول من اللي قعدتها معايا بساعة أو ساعتين ولكن معرفتش إيه السبب في إنها بتخلص بسرعة.

 

 

بتتميز بطارية الموبايل بأنها كبيرة بتدوم لوقت مقبول إلى حد ما ولكن مش الوقت المفترض المتعارف عليه في بطارية زي دي.

سعر موبايل samsung Galaxy A 31:

سعر الموبايل حوالي 3,699 جنيه لنسخة 128 جيجا مع 4 جيجا رام.

قبل ما تشوف رأينا النهائي حبينا نفكرك إننا ممكن نساعدك في اختيار موبايلك عن طريق خدمة “اختار موبايلك” واللي بيقدمهالك موقع ناس فونـــز كل اللي عليك إنك هتبعتلنا ميزانيتك والحاجات اللي تهمك في الموبايل من أداء أو صوت أو بطارية وهكذا، وإحنا هنرشحلك أفضل موبايل ممكن تشتريه ويكون مناسب للميزانية والمواصفات اللي طلبتها من هنـــــــــــــا.

محتويات علبة موبايل samsung Galaxy A 31:

1. موبايل سامسونج A31.
2. شاحن بقوة 15 وات.
3.  كابل من نوع Type C.
4. هاند فري وبتيجي بمنفذ التقليدي الـ 3.5 ملم.
5. كتيب التعليمات والضمان يوضح كيفية إستخدام الموبايل.
6. جراب ظهر شفاف لحماية الموبايل من أي خدوش.
7. دبوس معدني لفتح مكان الشريحة.

نكمل دلوقتي للرأي النهائي…

الرأي النهائي في موبايل samsung Galaxy A 31:

نقدر نقول إن سامسونج  مقدمتش فى الموبايل أي جديد ولا أي ميزة قوية، مرشحش الموبايل دا لأي سبب من الأسباب، صحيح ممكن تكون الشاشة فيه كويسة ولكن الشاشة مش كل حاجة والموبايل فيه متغيرات كتير جدًا المفروض كانت سامسونج تهتم بيها.