من فترة شركة سامسونج أعلنت بشكل رسمي عن أحدث إصداراتها موبايل سامسونج جالاكسي A71 وكان آخر إصدارات سامسونج في الأسواق المصرية هو Galaxy A 71، وبدأت سامسونج في إصدار الجيل الجديد من سلسلة الـ A في بداية عام 2020، وتوقعنا إن السلسلة دي هتُسيطر على مبيعات الموبايلات في الأسواق المصرية كعادة موبايلات سامسونج في الفئة دي.
ومن المعروف إن سامسونج من البراندات القوية اللي بتنال استحسان الشعب المصري والجمهور بسبب الصلة القوية ما بينهم، ولكن مش شرط يكون موبايل سامسونج بيقدملك كل اللي أنت محتاجه في كل الأوقات وأكيد بييجي وقت حابب تغير الموبايل فيه ومحتاج من الموبايل يكون موبايل قوي ويناسب ميزانيتك حتى لو صغيرة!
وقتها بننصحك تستخدم خدمة “اختار موبايلك” واللي بيقدمهالك موقع ناس فــونـــز علشان تختار الموبايل المناسب ليك عن طريق ترشيح الموبايل المناسب لميزانيتك واستخدامك، كل اللى عليك اضغط هنـــــــــــا…
بس دلوقتي خلينا نكمل المراجعة…
تصميم موبايل سامسونج جالاكسي A71:
أولا خامات الموبايل:
- مختلفتش كتير سامسونج في تطويرها لخامة الموبايل هنلاقيها هنا استخدمت البلاستيك كعادتها في تصنيع الفئة الجديدة وشايف إنها خطوة مش كويسة من سامسونج لأن كتير من المنافسين في الفئة دي بيستخدموا خامات أفضل بكتير جدًا من سامسونج وحتى كمان في فئات أقل.
- صممت سامسونج الموبايل من البلاستيك وعليه طبقة طلاء زجاجية خفيفة جدًا ولكن، الخامة الأساسية من البلاستيك، طبعًا الشكل هيكون كويس علشان الطبقة الزجاجية دي، ولكن في الأول والآخر هو بلاستيك بعيوب البلاستيك ولازم تشيله في كوفر علشان الحماية.
ثانيًا التصميم الخارجي:
- الشكل الخارجي للموبايل نقدر نقول مطابق لـ samsung galaxy A 31 مع اختلافات بسيطة.
- استخدمت طبقة حماية على الشاشة Corning Gorilla Glass
- والموبايل بييجي متركب عليه اسكرينة.
شاشة موبايل سامسونج جالاكسي A71:
الشاشة هنا سوبر أموليد بحجم كبير وهو 6.7 بوصة بالأبعاد الطويلة 20:9 والدقة هنا FHD+.
الشاشة واخدة الترند الجديد بتاع سامسونج في الفئة المتوسطة اللي شوفناه في الـ Galaxy A51، وبنشوفه هنا بردو في الـ سامسونج جالاكسي A71، وهي الشاشة الكاملة بثقب للسيلفي في أعلى منتصف الشاشة، ولكن الكاميرا هنا مختلفة عن الـ 51 A ودا بسبب جودة السيلفي الأفضل اللي هنتكلم عنها كمان شوية.
الثقب الكبير دا ممكن يضايقك شوية لو ركزت معاه ومش عارف تنساه وأنت بتتفرج على فيديوهات بس ممكن تلغي الثقب دا من SETTING الشاشة (إعدادات الشاشة) لو حابب تضيف شريطة سوداء فوق والثقب يكون مش ظاهر.
الشاشة أول ما تطلع الموبايل هتحس إنها مصفرة شوية علشان تحافظ على عينك.
اُدخل إعدادات الشاشة وخليها مائلة للأزرق وهتبقى مش مصفرة خالص.
كاميرات موبايل سامسونج جالاكسي A71:
الكاميرا الأمامية:
كاميرا سيلفي واحدة بدقة 32 ميجا بيكسل بفتحة عدسة F/2.2 تدعم HDR وتدعم تصوير فيديوهات بجودة مش بطالة.
الكاميرا الخلفية رباعية…
- الأولى بدقة 64 ميجا بيكسل بفتحة عدسة F/1.8
- والثانية بدقة 12 ميجا بيكسل بفتحة عدسة F/2.2 وهي Ultra Wide Angle للتصوير الواسع.
- والثالثه بدقة 5 ميجا بيكسل بفتحة عدسة F/2.4 وهي عدسة ماكرو.
- والكاميرا الرابعة بدقة 5 ميجا بيكسل بفتحة عدسة F/2.2 وهي مُخصصة للعزل.
- دا غير إنها بتدعم HDR Panorama وفلاش ليد وتصوير فيديوهات بجودة عالية.
- يدعم الموبايل تصوير الفيديوهات بجودة الـ 4K بدقة 2160 بكسل، بمعدل التقاط 30 إطار في الثانية الواحدة، كما يدعم التصوير بجودة الـ FHD بدقة 1080 بكسل، بمعدل التقاط 30 و240 إطار في الثانية الواحدة .
الكاميرات في الجهاز ده عمومًا ساسمسونج حاولت تحسنها والحقيقة نجحت بقوة في الموضوع ده، الكاميرا الأمامية أدهشتني لما طلعت الجودة والألوان دي في الإضاءة العادية النهارية ولكن أدهشتني أكتر لما حافظت على الأداء في الإضاءة الداخلية وكانت معالجة الصور ممتازة بصراحة، وكمان سامسونج جالاكسي A71 بييجي بمود تصوير ليلي وبيشتغل كمان على كاميرا السيلفي عادي جدا، وكمان حلو حتى لو الإضاءة مش أحسن حاجة!
سامسونج أثبتت إنها هنا للمنافسة وجاية تستعرض عضلاتها بالموبايل ده، العتاد في الكاميرات الخلفية كمان كان مدهش يعني سامسونج هنا قالت للماركات الصينية أنا وحش السوق، الكاميرات أداءها مدهش، ممكن يكون فيه بعض الملاحظات البسيطة على تصوير الفيديو زي إن المثبت الإلكتروني مش بيشتغل في كل أوضاع التصوير وجوداته، ولكن في المجمل الأداء حلو ومحدش يقدر ينكر ده.
الكاميرات طلعت ألوان خرافية طبعًا مع الشاشة السوبر أموليد فأكيد أنت بتتخيل معايا دلوقتي عمق الألوان والتفاصيل اللي أنا كنت عايش فيه أثناء التجربة!
البصمة والزيادات:
البصمة:
من أهم وسائل الأمان الموجودة في الموبايل، يدعم الهاتف مستشعر البصمة ودي مندمجة بالشاشة هتلاقيها موجوده في الجزء السفلي للشاشة.
المستشعرات:
- مستشعر التقارب
- مستشعر التسارع.
- مستشعر البوصلة.
- مستشعر الـ Gyroscope.
- مستشعر الإضاءة.
- مستشعر البصمات (أسفل الشاشة، ضوئي).
صوت الموبايل:
بالنسبة لصوت الموبايل فهو مش أعلى حاجة بس كويس إلى حدًا ما.
وبالنسبة لصوت سماعة المكالمات فكان ممتاز ومعتقدش جربت موبايلات كتير بالجودة دي في الفئة دي، وصوت سماعات الأذن بردو عالي وممتاز.
وبالنسبة لقوة الشبكة، استخدام سامسونج لمعالج سناب دراجون في الموبايل دا مخلي الشبكة كويسة جدًا، وحتى مع وجودي في أماكن مفيهاش شبكة بشكل متكرر مكنتش بواجه أي مشكلة معاه أثناء الاستخدام.
كما يدعم الموبايل بعض الممىزات التانية زي:
يدعم الموبايل وجود ميكروفون إضافي خاص بمنع الضوضاء وقت استخدامك للموبايل سواء وقت المكالمات أو التسجيل.
بييجي البلوتوث بالإصدار الخامس، مع خاصيتي الـ A2DP, LE.
يدعم الموبايل رديو الـ FM، والـ NFC.
بيتوفر في الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.
أما عن الواي فاي في موبايل سامسونج A71 فهو يدعمه بترددات الـ a/b/g/n/ac، كما يدعم الـ Dual-band, Wi-Fi Direct, hotspot.
يدعم الموبايل منفذ الـ 3.5 ملم الخاص بسماعات الاذن.
أم بالنسبة لمنفذ الـ USB فييجي من النوع الأحدث واللى هو الـ Type C، كما يدعم خاصية الـ OTG.
الموبايل جاي بأحدث نظام تشغيل Android 10، مع واجهة سامسونج الأحدث الـ One UI 2.
ألوان الموبايل اللى بيتوفر بيها هي اللون الأبيض، الأسود، البينك وكمان الأزرق.
يدعم الموبايل شبكات الـ 4G،والـ 3G، وكمان الـ 2G.
يدعم الموبايل امكانية تشغيل شريحتين اتصال في نفس الوقت.
أداء موبايل سامسونج جالاكسي A71:
وأخيرًا بعد معاناة استمرت لوقت طويل سامسونج قررت تلبي طلبات الجمهور وتتخلي عند معالجات إكسينوس بتاعتها واستخدمت معالج كوالكوم Snapdragon 730G بتكنولوجيا 8 نانو، وبصراحة حرف الـ G مبيفرقش أوي في أداء المعالج بس تحس سامسونج عاوزة تعمل أي حركة كدا.
سناب دراجون 730 هو أفضل معالج فئة متوسطة في 2019 ولكن فيه موبايلات كتير جدًا في الفئة دي بمعالجات أقوى بمراحل.
المعالج بيقدم أداء كويس جدًا ودا معروف عنه بس لما تستخدم واجهة سامسونج معاه اللي بالمناسبة هنا بتييجي بأندرويد 10 بردو، هتحس بتقل بسيط جدًا بيجي كل فين وفين ودي طبعًا أبرز عيوب واجهة سامسونج زي ما إحنا عارفين.
بالنسبة لتجربتي مع الأداء فالوضع بيتحسن شوية لما بتقفل أنيميشن الواجهة ودا بسبب الواجهة مش بسبب المعالج وأتمنى من سامسونج تشتغل شوية على الواجهة بتاعتها بس الحق يتقال الأداء هنا أفضل من A51 بمراحل ودا بسبب فرق قوة المعالج الأفضل في موبايل سامسونج جالاكسي A71.
بطارية موبايل سامسونج جالاكسي A71:
بطارية 4500 مللي أمبير مع الاستخدام الفعلي هتديك تجربة بطارية 4000 مللي.
بتدي شاشة مفتوحة من 6 لـ7 ساعات في يوم كامل من الاستخدام مفيهاش مشاكل.
الموبايل بيجي معاه شاحن سريع 25 وات زي بتاع السنة اللي فاتت بالظبط بيشحن البطارية بالكامل في ساعة وربع، ودي سرعة شحن كويسه جدًا من سامسونج بس متغيرتش كتير عن الـ A70 القديم.
سعر موبايل سامسونج جالاكسي A71:
سعر الموبايل حوالي 6000 جنيه مصري حاليًا للنسخة الوحيدة الموجودة واللي هي 128 جيجا مع 8 جيجا رام وينفع تركب كمان كارت ميموري لزيادة المساحة شوية.
محتويات علبة موبايل سامسونج A71:
- موبايل سامسونج A71.
- اسكرينة من البلاستيك تم وضعها بشكل مسبق على الشاشة الموبايل.
- شاحن بقوة 25 وات.
- كابل الـ USB من نوع Type C.
- جراب ظهر لحماية الموبايل.
- كتيب التعليمات مع الضمان.
- دبوس معدني لفتح مكان شريحتي الاتصال.
- هاند فري بمنفذ الـ 3.5 ملم.
الرأي النهائي في موبايل سامسونج جالاكسي A71:
رأيي النهائي في الـ سامسونج جالاكسي A71.
بالسعر دا الـA71 بيديلك شاشة كاملة قوية جدًا بثقب للسيلفي من نوع سوبر أموليد واللي مش هتلاقيها غير في سامسونج بصراحة، وكمان بيديك أداء كويس مش وحش لكنه مش الأفضل وسط المنافسين.
الكاميرا الخلفية كويسة جدًا في تصوير الصور وتنافس بقوة وسط منافسين كتير، البطارية والشحن السريع كويسين جدًا، صحيح مش الأفضل بس تجربة تحترم من سامسونج الحقيقة.
اللي معجبنيش بقى في الـA71 هو السيلفي بليل مش قد كدا تحت ظروف الإضاءة الضعيفة.
الخامات الخارجية البلاستيك لأن كل المنافسين بيقدموا زجاج حتى لو كان الموبايل هيبقى أتقل من كده شوية.