مراجعة موبايل Nokia 8.3 5G

جهاز النهاردة من شركة نوكيا، مواصفاته وسعره يحيروا جدًا، جهاز Nokia 8.3 5G، وهو من ناحية سعره غالي جدًا ومن ناحية إمكانياته مش أحسن حاجة بالنسبة للسعر دا…
فإحنا كالعادة هنوضح لكم كل مواصفات الجهاز دا بالتفصيل وكل مميزاته وعيوبه؛ علشان تقدر تحدد قيمته إيه بالنسبالك وهل يناسبك فعلًا جهاز بالسعر دا مع الإمكانيات دي ولا لأ!
وكمان علشان تقدر تفرق بينه وبين غيره من أجهزة الشركات المنافسة والأجهزة الأخرى من نفس الشركة.

فخلينا نبدأ مراجعتنا، بس قبلها خلوني أفكركم بخدمة تهمكم وهتساعدكم أكتر في اختيار الجهاز الأنسب ليكم وهي خدمة “اختار موبايلك” اللي بيقدمهالك موقع نــاس فــونز ودي خدمة هتساعدك تختار جهازك المناسب عن طريق ترشيحاتنا ليك بِناءًا على طلبك واللي انت عايزه يكون موجود في موبايلك من مواصفات، علشان ببساطة تكون قادر تختار الجهاز اللي اتعمل مخصوص لاحتياجاتك وعلى قد ميزانيتك الشرائية، من غير ما تندم في يوم على شرائه.

ويلا نبدأ مراجعتنا بتصميم الموبايل…

تصميم موبايل Nokia 8.3 5G:

أولًا الخامات:
خامات الجهاز هنا من الزجاج من الأمام والخلف، مع فريم من المعدن ما بيتغيرش لونه مع الاستخدام أبدًا، ودي عادة نوكيا في جودة ومتانة خامات أجهزتها.

ثانيًا التصميم الخارجي:
الجهاز يأتي بأبعاد 171.90×78.56×8.99 ملم.
وزن الجهاز يقدر بـ 220 جرام، ودا وزن تقيل جدًا بالنسبة لإصدارات الشركات المنافسة، لكن وزنه بالنسبة لحجمه الضخم مش بيحسسك إنه متعب لو شلته لفترات طويلة.

الشاشة عليها طبقة حماية Gorilla glass بس ما تعرفش تحدد نوعها إيه بالظبط، بالإضافة إلى توافر الجهاز بلون واحد بس للأسف، وهو الأزرق الغامق مع بروز بسيط للكاميرات الخلفية في الضهر، ولوجو Nokia في أسفل الشاشة من الامام.

شاشة موبايل Nokia 8.3 5G:

الشاشة هنا من نوع IPS LCD، بتيجي على شكل الثقب وشركة Nokia بتسميها Pure Display.
ومساحة الشاشة 6.81 إنش بجودة الـ FHD+ بدقة 1080×2400 بكسل، يعني بمعدل كثافة بكسلات 386 بكسل لكل إنش.
الشاشة هنا بتدعم أبعاد العرض الجديدة بنسبة 20:9 لعرض محتوى أكبر على شاشة الهاتف، سواء أثناء مشاهدة الفيديوهات أو لعب الألعاب.
المميز في الشاشة هنا، هو إن مساحتها كبيرة جدًا، وجودتها كويسة، ودا بيخلي محتوى عرض الأفلام والفيديوهات وكمان الألعاب كبير جدًا وواضح أكتر، لكن بالنسبة لسعرها ففيه شاشات Amoled و بترددات أعلى وبنفس السعر دا…

بس اللي لازم نوضحه، هو إن تشبع الألوان في الشاشة دي ممتاز وتقدر تتحكم في توازن الألوان فيها وفي الحرارة والبرودة من خلال السوفت وير وهكذا، عن طريق تفعيل خيارات زي الـ Dynamic Mode والـ HDR.

كاميرات موبايل Nokia 8.3 5G:

الكاميرا الأمامية:
دقتها 24 ميجا بكسل وفتحة عدستها F/2.0.
الكاميرا الخلفية كاميرا رباعية حيث:
الكاميرا الأولى: ودقتها 64 ميجا بكسل بفتحة عدسة F/1.9 ودي الكاميرا الأساسية للموبايل.
الكاميرا الثانية: دقتها 12 ميجا بكسل وفتحة عدستها F/2.2، وهي كاميرا خاصة بالتصوير الواسع.
الكاميرا الثالثة: بتييجي بدقة 2 ميجا بكسل وهي الخاصة بالتصوير الماكرو.
الكاميرا الرابعة: دقتها 2 ميجا بكسل وهي الخاصة بعمل العزل والبورتريه، بالإضافة إلى وجود فلاش ثنائي من نوع ليد فلاش.
بالنسبة لتصوير الفيديوهات:
فالجهاز بيدعم تصوير الفيديوهات بجودة الـ 4K بدقة 2160 بكسل بمعدل التقاط 30 إطار في الثانية.
دا إلى جانب دعمه التصوير بجودة الـ FHD بدقة 1080 بكسل، بمعدل التقاط 30 إطار في الثانية.
بشكل عام نقدر نقول إن أداء الكاميرات ممتاز جدا بالنسبة للفئة السعرية دي؛ لإن الكاميرا الأمامية التفاصيل فيها بتكون واضحة وطبيعية جدًا من غير مؤثرات تغير من شكل وتفاصيل الوجه الطبيعية.
أما الكاميرات الخلفية، فتشبع الألوان في أداء الكاميرا الأساسية فيهم بيكون هايل وحيوي وطبيعي أوي، بالإضافة إلى وضوح كل التفاصيل في الصورة حتى في الإضاءات الضعيفة، وبالتالي الأداء هنا حقيقي بيكون برده مبهر.
دا وبالإضافة إلى إن عدسات الكاميرات كلها من شركة Zeiss.
وبالنسبة لتصوير الفيديوهات، فنقدر نقول إن الجهاز بيقدم فيه أداء مقبول؛ ودا لإنه مش بيدعم التثبيت الإلكتروني عند تصوير الفيديوهات على الرغم من إن أغلب أجهزة الشركات المنافسة واللي بسعر أقل حتى فيها الخاصية دي وبتقدم تجربة تصوير فيديوهات أفضل الصراحة.

البصمة والزيادات:
مستشعر البصمة في الجهاز دا بييجي مدمج في زرار الباور، ونقدر نقول إنه لا هو سريع جدًا ولا هو بطيء…
يعني أداؤه مقبول.
الجهاز بيدعم عدة مستشعرات أخرى منها:
مستشعر التسارع.
مستشعر التقارب.
مستشعر البوصلة.
مستشعر الدوران.
مستشعر الجيروسكوب الخاص بتشغيل نظارات الواقع الافتراضي الـ VR.
منفذ الـ USB في الجهاز بييجي من النوع الحديث اللي هو الـ Type C بالإضافة لدعمه لخاصية الـ OTG.
الجهاز كمان بيدعم الواي فاي بترددات الـ a/b/g/n/ac، دا وبالإضافة إلى دعمه للـ Dual-band ،Wi-Fi Direct ،hotspot.
البلوتوث بييجي بإصدار 5.0 مع دعمه للـ A2DP ،EDR ،LE.
الجهاز بيدعم الـ GPS مع دعمه لأنظمة الملاحة الأخرى زي:
الـ A-GPS ،GLONASS ،BDS.
كمان بيدعم الاتصال قريب المدى الـ NFC والراديو الـ Fm.

الجهاز كمان بييجي بنظام التشغيل الأحدث Android 10، مع واجهة الأندرويد الخام الـ Android One.

الجهاز بيدعم مساعد جوجل الصوتي الـ Google Assistant، عن طريق زر في الجهة الشمال ودي حاجة ممكن تقيمها ميزة وممكن تقيمها عيب، حسب الاستخدام الشخصي لكل مستخدم.

يدعم الجهاز الجيل الرابع 4G والجيل الخامس الـ 5G.
بس للأسف، الجهاز ما بيدعمش لمبة الإشعارات ولا حتى متوفر أي بديل ليها.

صوت موبايل Nokia 8.3 5G:

الجهاز بيدعم منفذ الـ 3.5 ملم الخاص بسماعات الأذن، وبييجي في الجهة السفلية.

كما يدعم الجهاز الميكروفون الثانوي الخاص بعزل الضوضاء خلال الاستخدام، ودا بيدخل صوت معين بعيدًا عن باقي الأصوات حواليه سواء في المكالمات أو في تسجيل الفيديوهات.
بس الصوت هنا للأسف عادي مش استيريو، وسماعة الصوت بتيجي في الجهة السفلية للجهاز برده، جمب منفذ سماعات الأذن ولكن بشكل عام أداء الصوت حلو جدًا وعالي جدًا جدًا وهتستمتع بيه.

أداء موبايل Nokia 8.3 5G:

سعة ذاكرة الجهاز الصلبة 128 جيجابايت مع ذاكرة عشوائية بسعة 8 جيجا بايت، من نوع LPDDR4x.
دا وبالإضافة إلى دعم الجهاز لإمكانية زيادة المساحة التخزينية عن طريق كارت ميموري لحد 512 جيجابايت.
أما بالنسبة للأداء، فالمعالج ثماني النواة من شركة كوالكوم من نوع Snapdragon 765G بتكنولوجيا الـ 7 نانو، مع معالج رسومي من نوع Adreno 620.
أداء المعالج هنا قوي وجيد جدًا، وأهم مميزاته إنه بيوفر في استهلاك البطارية، بالإضافة إلى إن أداؤه في الألعاب ممتاز حتى الألعاب التقيلة، فلعبة زي بابجي بيدعمها على أعلى إعدادات ممكنة وبدقة وجودة فائقة، فا طول ما أنت بتلعب مستحيل تقابل أي تهنيج أو تقطيع في الفريمات.
وكمان لعبة زي لعبة call of duty، تجربتها من الجهاز دا حتى على وضع الـ High جرافيك، بتقدملك أداء وهمي وماتنساش إن حجم الشاشة الكبير بيساعد برده بصورة كبيرة في إن تجربة اللعب تكون أمتع.
لكن العيب اللي هنا في الشاشة، هو إن نظام التبريد مش أحسن حاجة وبالتالي الجهاز بيسخن بشكل كبير نوعًا ما لما بتستخدمه لفترة طويلة في الألعاب.

بطارية موبايل Nokia 8.3 5G:

البطارية سعتها 4500 مللي أمبير، بتدعم الشحن السريع بقوة 18 وات، لكنه للأسف، الجهاز ما بيدعمش الشحن اللاسلكي.
وبشكل عام نقدر نقول إن أداء البطارية محترم، وبتقدر تصمد لفترة طويلة بتوصل ليوم ونص من غير ما تفصل منك.

سعر موبايل Nokia 8.3 5G:

سعر الجهاز 9700 جنيه مصري، أي ما يعادل 520 دولار أمريكي.

الرأي النهائي في موبايل Nokia 8.3 5G:

المميزات:

• الموبايل بيجي ببطارية 4500 مللي امبير، و يدعم خاصية الشحن السريع بقوة 18W.
• تقدر تستخدام شريحتي اتصال، وكارت ميموري في وقت واحد.
• دعم الجيل الخامس.

العيوب:

•  السعر مرتفع جدًا.
• حافة الشاشة السفلية كبيرة.
• لا يأتي بكاميرا تيلفوتو تقريب.
• الصوت مش ستيريو.
• مقارنة بالسعر هنلاقي إن في موبيلات منافسة بشاشة من نوعية اموليد وبعدل تحديث 90 او 120 هرتز.
• يأتي مع الهاتف شاحن بقوة 18 وات فقط.
• الهاتف لا يدعم الشحن اللاسلكي.

الخلاصة:

بعد ما وضحنا كل إمكانيات ومميزات وعيوب الجهاز دا واتكلمنا عن مراجعته بالتفصيل، نقدر نقول إنه مش أحسن حاجة بالنسبة لسعره الغالي جدًا وكذلك مقارنةً مع الإصدارات المنافسة، هنلاقيها بسعر أقل من سعره وبإمكانيات تقريبًا نفسها وما تقلش ميزة عن مميزاته.