نبدأ بلقاء تمهيدي مع موبايل جديد وهو infinix Zero 8…
كلنا عارفين إن مكانة إنفنكس مش كل الناس بتتفق عليها…
إزاي وليه!
علشان فيه ناس شايفينها ما تستحقش المكانة اللي هي فيها وفيه ناس تانية شايفة إن إنفنكس بتقدم أفضل حاجة بسعر كويس، سواء كان في الفئة المتوسطة أو في الفئة الاقتصادية، وما بين دول ودول إنفنكس بتحاول كل شوية إنها تطور من إصداراتها علشان تحافظ على المكانة اللي هي فيها، واللي متفق عليها معظم المستخدمين.
النهاردة بقى معانا مع مراجعة جديدة لموبايل جديدة وهو infinix Zero 8 من فئة الـ Zero اللي غابت عننا كتير، بس لما رجعت حاولت تجيب معاها أفضل التطورات اللي ممكن تقدمها شركة في فئة الـ 4000، أو الـ 4500 جنيه مصري، تعالوا نشوف هل يا ترى إنفنكس فعلًا أضافت حاجة جديدة في الجهاز دا تميزه عن الأجهزة السابقة ليه ولا لأ!
بس قبل ما نبدأ مراجعتنا مع موبايل الـ infinix Zero 8، تعالوا أعرفكوا على خدمة بسيطة وعصرية مش هتلاقي حد غيرنا بيقدمهالك وهي خدمة “اختار موبايلك”، واللي بيقدمها مـــــــــوقـع نـــاس فــون واللي من خلالها بنحاول نوصل لرغبتك ونعرف احتياجك من الجهاز اللي ناوي تشتريه ونعرفك عن مميزاته وعيوبه أدق التفاصيل، بس كل اللي عليك إنك تكتب المواصفات والإمكانيات اللي نفسك تشوفها في الموبايل اللي عاوز تشتريه، وإحنا هنقدملك أنسب اختيار موبايل ليك بكل المواصفات والإمكانيات اللي محتاجها تكون في الموبايل بما يتناسب مع قدرتك الشرائية كمان، كل اللي عليك إنك تضغط هنــــــــا…
يلا بينا نبدأ المراجعة…
تصميم موبايل infinix Zero 8:
أولًا خامات الموبايل:
كعادة إنفنكس في تصميم موبايلاتها واللي مكنش من ضمن التغييرات اللي اتكلمنا عليها.
خامات موبايل infinix Zero 8 من البلاستيك اللامع المشابه للزجاج وطبعًا من غير كلام هو كشكل كويس بس كخامة، البلاستيك اللامع في أي موبايل بيقى سهل التجريح والتبصيم بس أكيد التصميم دا مقبول في الفئة السعرية دي.
ثانيًا التصميم الخارجي:
تصميم الكاميرات:
تصميم الكاميرات هنا اللي كان من ضمن التغييرات اللي إنفنكس عملتها في موبايل infinix Zero 8، واللي بتييجي من الخارج في شكل مربع مائل بارز عن جسم الموبايل، والكاميرات في المربع مرصوصة على شكل مثلث، وهما 4 كاميرات خلفية مع وجود فلاش رباعي من نوع ليد فلاش.
بالنسبة للكاميرا الأمامية، فهي مزدوجة يعني موجود منها 2، مع فلاش ثنائي من نوع ليد فلاش.
هنشرح الكاميرات بالتفصيل بعدين.
الأبعاد والألوان:
الموبايل بييجي بأبعاد 168.74×76.08×9.07 ملم.
ألوان موبايل infinix Zero 8، يُعتبر مفيش فيها اختلاف أوي لكن هي الصراحة عجبتنا أوي، ألوان الموبايل الأخضر، واللون الأسود، وكمان اللون الفضي.
وزن الموبايل 205 جرام، الوزن هنا تقيل شوية، ودا طبعًا هيكون متعب جدًا لما تستخدمه لفترات طويلة.
شاشة موبايل infinix Zero 8:
الموبايل بييجي بشاشة بشكل الثقب المزدوج، من نوع IPS LCD بمساحة 6.85 بجودة الـ FHD+ بدقة 2460×1080 بكسل.
الشاشة تدعم معدل التحديث الـ 90 Hz؛ علشان تقدر تحصل على أفضل أداء في لعب الألعاب وقت استخدام شاشة الموبايل، وكمان تقدر تتنقل بين الـ 90Hz أو الـ 60Hz أو تتنقل تلقائياً بينهم وقت استخدامك للموبايل بصفة عامة.
تدعم الشاشة وضع الـ Dark Mode، يعني تحويل الموبايل بالكامل إلى اللون الأسود من غير أي مشكلة، ودي ميزة كويسة جدًا معظم الناس أصبحت بتدور عليها، ومعنى إن الشركة اهتمت إنها تكون موجودة يبقى الشركة بتهتم برغبة المستخدمين، وأكيد الميزة دي هتساعدها في الاستحواذ على السوق في المنافسة الحرة.
تدعم الشاشة أكتر من وضع زي:
أول حاجة تدعم وضع الـ Eye Care؛ لحماية عينك بشكل أفضل من الأشعة الزرقاء وقت استخدام شاشة الموبايل لفترات طويلة خلال اليوم وخصوصًا في الليل وهكذا…
وكمان تقدر تلغي أزرار التحكم وتستخدام الإيماءات اللي بتمكنك من الحصول على مساحة أكبر وقت استخدامك للموبايل بصفة عامة.
بالنسبة للحواف، فهي كويسة وتُعتبر زي المنافسين، وبالنسبة للألوان فهي مقبولة بس مش الأفضل في الفئة السعرية دي.
نييجي بقي لسطوع الشاشة هو سطوع متوسط يعني مش بيوصل لدرجات عالية أوي تحت سطوع الشمس، وكمان الشاشة هنا كبيرة وبتردد عالي.
كاميرات موبايل infinix Zero 8:
الكاميرا الأمامية في موبايل infinix Zero 8 مزدوجة…
الكاميرا الأولى، بتييجي بدقة 48 ميجا بكسل، وهي الكاميرا الأساسية في الموبايل.
الكاميرا الثانية، بتييجي بدقة 8 ميجا بكسل، وهي كامير خاصة بالتصوير الواسع مع وجود فلاش ثنائي من نوع ليد فلاش.
الموبايل بييجي بـ4 كاميرا خلفية…
الكاميرا الأولى، هي كاميرا أساسية في الموبايل، بتييجي بدقة 64 ميجا بكسل، وبتييجي بمستشعر من نوع Sony IMX 686، بفتحة عدسة F/1.8.
الكاميرا الثانية، بتييجي بدقة 8 ميجا بكسل، وهي خاصة بالتصوير الواسع، بفتحة عدسة F\2.2.
الكاميرا الثالثة، بتيجي بدقة 2 ميجا بكسل، وبتساعد على التصوير الليلي بصورة أفضل.
الكاميرا الرابعة، هي خاصة بعمل العزل والبورتريه، وبتييجي بدقة 2 ميجا بكسل، مع وجود فلاش رباعي من نوع ليد فلاش.
يدعم الموبايل تصوير الفيديوهات بجودة الـ 4K، بدقة 2160 بكسل، بمعدل التقاط 30 إطار في الثانية، وكمان يدعم التصوير الـ FHD، بدقة 1080 بكسل، بمعدل التقاط 30 و 60 إطار في الثانية، وأيضًا يدعم التصوير بجودة الـ HD، بدقة 720، بكسل بمعدل التقاط 30 إطار في الثانية.
الكاميرات اللي في موبايل infinix Zero 8 متغيرة جدًا بالنسبة لمستوايات إنفنكس اللى جربتها، بس الفكرة كلها في معالجات ألوان الصور والـ HDR مش بيشتغلوا كويس في الإضاءات العالية، لكن من ناحية التفاصيل، فبتظهر في صورها تفاصيل كتيرة واضحة.
نييجي للتصوير الليلي، واللي هو يُعتبر أحسن حاجة في الموبايل من ناحية الألوان في الفئة السعرية دي.
بالنسبة لكاميرا السيلفي، فنفس الكلام اللي قلناه عن الكاميرا الخلفية ينطبق عليها، وكمان التجربة الليلية للسيلفي مميزة.
أما بالنسبة لتصوير الفيديوهات، فدي تُعتبر من أسوء الحاجات اللى في الموبايل، ودا علشان مفيش ثبات إلكتروني، تاني حاجة مفيش مايك إضافي علشان يعمل عزل للضوضاء وقت استخدامك للموبايل.
البصمة والزيادات:
البصمة:
الموبايل هنا يدعم مستشعر البصمة، واللي بتكون مدمجة في زرار الباور، ودي بتسهل كتير في استخدام الموبايل وكأداء، فالبصمة هنا سريعة.
كما يوجد بالموبايل خاصية الـ Face Unlock وليها مسمى تاني وهو بصمة الوجه، اللي أصبحت تعتبر حاجة أساسية في تصنيع أي موبايل، وهي الصراحة حاجة لطيفة جدًا وبتشتغل عن طريق الوجه.
الموبايل بيدعم بعض المستشعرات:
- مستشعر التسارع.
- مستشعر القرب.
- مستشعر البوصلة.
- مستشعر جيروسكوب الخاص بنظارات الواقع الافتراضي، واللي بيشتغل عن طريق السوفت وير.
يدعم الموبايل المنفذ الـ 3.5 الخاص بالهاند فري.
يدعم أيضًا البلوتوث بإصدار 5.0.
وكمان يدعم الموبايل تحديد الموقع الجغرافي الـ GPS، وأيضًا يعمل على دعم خاصية الـ A GPS.
يدعم الموبايل أيضًا الاتصال السريع بالواي فاي بترددات الـ a\g\b\n\ac، مع دعمه لخاصية الهوت سبوت.
بييجي منفذ الـ USB في موبايل infinix Zero 8 من النوع الأحدث للـ Type C.
الموبايل جاي بنظام تشغيل أندرويد 10، مع واجهة انفنكس XOS 7.
يدعم الموبايل وجود شريحتين اتصال من نوع الـ Nano Sim، بالإضافة إلى وجود كارت ميموري خاص لزيادة المساحة التخزينية بسعة تصل إلى 256 جيجا بايت.
يدعم الجهاز شبكات الجيل التانى، والتالت، والرابع.
المساحة التخزينية للموبايل 128 جيجا بايت مع 8 جيجا رام.
أداء موبايل infinix Zero 8:
الموبايل infinix Zero 8 بييجي بمعالج من شركة ميديا تيك Helio G90T، بتكنولوجيا 12 نانو، مع معالج رسومي من نوع Mali-G76، وهو نفس المعالج الموجود في الـ ريلمي 6.
أعلنت شركة إنفنكس عن إن الموبايل يدعم التبريد المائي الـ Liquid Cooling Technology؛ علشان يحافظ للمستخدم على ارتفاع درجة حرارة الموبايل بشكل كبير.
إلى جانب معالج infinix Zero 8 قوي وبيقدر يشغل الألعاب التقيلة زي PUBG بشكل كويس جداً، وكمان يُمكنك تعزيز أداء الألعاب عن طريق الـ Game Mode علشان تقدم أفضل أداء للألعاب.
موبايل infinix Zero 8 يُعتبر أسرع موبايل في التنقل بين التطبيقات وفتح البرامج.
بطارية موبايل infinix Zero 8:
سعة البطارية هنا 4500 مللي أمبير، ودا حجم كبير هيخلي البطارية تصمد معاك لفترة طويلة تكاد تكون 7 ساعات تقريبًا، ودا هيكون مناسب جدًا للفئة اللي هتستخدمه في الشغل، ودي عادة شركات إنفنكس في إصداراتها، وكمان قوة الشحن هنا سريعة بقوة 33 وات، يعني هيشحن من 0 إلى 100% في حوالي ساعة واحدة بس.
سعر infinix Zero 8:
سعر الموبايل 4200 جنيه مصري تقريبًا لنسخة 128 جيجا، مع 8 جيجا رام.
فتح علبة infinix Zero 8:
موبايل infinix Zero 8.
رأس الشاحن بقوة 33 وات، ودا هيخلي شحن الموبايل سريع.
اسكرينة بلاستيك مش حلوة نهائيًا.
كابل USB من نوع Type C.
هاند فري بمنفذ الـ 3.5 ملم.
كتيب الضمان والتعليمات الخاص يشرح كل التفاصيل عن الجهاز.
جراب شفاف، ودبوس معدني لفتح مكان الشريحة.
الرأي النهائي في موبايل infinix Zero 8:
المميزات:
يدعم الموبايل تصوير الفيديوهات بجودة الـ 4K.
مساحة 128 جيجا و8 جيجا رام.
يدعم الموبايل تشغيل شريحتين، وكارت ميموري في نفس الوقت.
بطارية الموبايل جاية بسعة كبيرة.
منفذ USB من النوع الأحدث الـ Type C، مع قوة شحن سريعة بقوة 33 وات، وهنا البطارية هتشحن شحن كامل في ساعة واحدة بس.
الموبايل بييجي مع أحدث نظام تشغيل، ومع أحدث واجهة XOS 7.
المعالج بيقدم أداء قوي، فهو قادر على تشغيل المهام اليومية، والألعاب الثقيلة بشكل ممتاز مع وجود تبريد مائى؛ للحفاظ على ارتفاع درجة حرارة الموبايل.
الكاميرا الخلفية الرئيسية بمستشعر سوني المحترم IMX 686، والمستشعر دا هيقدم أداء ممتاز في التصوير الليلي في موبايل infinix Zero 8.
العيوب:
لا يدعم الصوت الاستيريو بعكس الـ إنفنكس نوت 7، وعلى الرغم من ذلك، صوت الجهاز عالي ولكنه ينقصه بعض التجسيم.
مفيش ميكرفون إضافي خاص بعزل الضوضاء وقت تشغيل الموبايل.
مفيش لمبة إشعارات ولا متوفر بديل ليها.
جودة تصوير الفيديوهات ضعيفة بالرغم من التصوير بجودة الـ 4k
انخفاض جودة الكاميرا الخلفية من ناحية الألوان، والـ HDR في الاضاءات العالية، بالرغم من إن الكاميرا ممتازة في الإضاءات المنخفضة باستخدام السوبر نايت مود.
الموبايل سهل التعُِرض للتبصيم وكذلك للخرابيش بسبب إنه من البلاستيك.
الخلاصة:
احنا شايفين إن الموبايل كويس جدًا جدًا، وإن إنفنكس قدرت تقدم موبايل محترم جدًا يقدر ينافس الموبايلات التانية من الفئة المتوسطة اللي هو نازل فيها.