مراجعة موبايل Infinix Note 7
infinix Note 7

دايما إنفنكس بتهتم بتطوير فئة الـ X، وفئة الـ Note بس النهاردة معادنا مع Infinix Note 7.

اللي منكم متابع إنفنكس عارف إن أكتر سلسلة هي بتطور فيها هي سلسلة الـ Note، اللي كانت مميزة بقلم الكتابة على الشاشة التاتش المُصاحب للجهاز وقررت الشركة إنها تستغنى عنه، بعد ما كانت بتقدمه لفئة من الناس كان يهمها إنها تشيل الموبايل بالقلم دا بالرغم إنهم فئة صغيرة، بس ممكن إنفنكس قررت إنها تستغني عن القلم؛ علشان توقف تطوير حاجة مش بتفيد كل الناس وتتجه بدلًا منها إلى ميزات أو إضافات تانية تقدر تفيد فئة أكبر من المستخدمين.  

خلينا نبدأ مراجعتنا ونشوف إيه الجديد في موبايل 7 Infinix Note وياترى يستحق الشراء ولا لأ!

قبل ما أبدأ أي كلام في المراجعة تعالوا أعرفكم على أجدد التطورات والخدمات اللي بنقدمها، وهي خدمة “اختار موبايلك” واللي بيقدمها مـــــوقع نـاس فـون، بكل بساطة إحنا في الخدمة دي بنحاول نقدم لك شرح كامل عن كل حاجة تخص الموبايلات عمومًا، بس كل اللي عليك إنك تكتب المواصفات والإمكانيات اللي عايز تشوفها في الموبايل اللي نفسك تشتريه، وإحنا هنقدم لك شرح مفصل عن أنسب موبايل ليك بالمواصفات والإمكانيات اللي بتحتاجها في شغلك أو في استخدام الموبايل عمومًا، بس اضغط هنـــــــــــــــا…    

تصميم موبايل Infinix Note 7:

بالرغم من إن كل التصميمات قربت إنها تكون شبه بعض إلَا إن كل شركة بتحاول إنها تقدم حاجة جديدة في الموبايل بتاعها…

 تعالوا بينا نشوف إيه الجديد في تصميم الموبايل Infinix Note 7!

أولًا خامات الموبايل:

كعادة شركة إنفنكس في الفئة الاقتصادية دي، بتنتج الشركة موبايلاتها بخامات من البلاستيك اللامع اللي بيدي فرصة كبيرة لتبصيم الموبايل وتجريحه؛ وعلشان كدا لازم تستخدم جراب يحافظ لك على الموبايل من كل احتمالات الضرر دي والمتوقعة تحصل لجهازك إذا كان هو Infinix Note 7.

تصميم الكاميرات:

تصميم كاميرات Infinix Note 7 بتييجي المرة دي بشكل مختلف شوية، وكمان جاي بارز عن جسم الموبايل.

الكاميرات الخلفية في موبايل Infinix Note 7 بتييجي رباعية يعني 4 كاميرات خلفية.

كل مرة الكاميرات كانت بتيجي في شكل فريم مستطيل، بس المرة دي الموضوع مختلف شوية علشان الكاميرات بتييجي في شكل دائرة بارزة عن جسم الموبايل، ودا هيخليها معرضة أكتر للجروج والخدوش بس طبعًا لو أنت عايز تحافظ على شكل الموبايل هتحطه في جراب، ودا هيساعدك في حماية الموبايل عمومًا سواء كان لحماية الكاميرات أو لتفادي تبصيم ضهر الموبايل.

أما بالنسبة للكاميرا الأمامية، فهي موجودة في ثقب صغير أعلى يسار الشاشة.

 

تصميم موبايل Infinix Note 7
تصميم موبايل Infinix Note 7

 

الأبعاد والألوان:

الموبايل بييجي بأبعاد كبيرة وهي 173.4x79x8.75، واللى متقدرش من خلالها إنك تمسك الموبايل وتستخدمه بإيد واحدة.

وزن الموبايل هنا 206 جرام، وهو وزن تقيل ودي حاجة إحنا مش متعودين عليها من شـــركة إنفنكس، بمعني إنه هيكون متعب جدًا لما تستخدمه لفترات طويلة من الوقت سواء كان في شغلك أو وأنت بتلعب على الموبايل.

إنفنكس هنا لعبت بالألوان اللى موجودة في ضهر الموبايل؛ لإن الموبايل هنا بيدي انعكاسات عجبتني الصراحة وتُعتبر مختلفة شوية وحلوة، وكمان مُلفتة للانتباه وتحس كده إن جهازInfinix Note 7 مايل لأجهزة الطبقة الراقية والأغلى منه في السعر.

الموبايل متوفر بألوان جذابة زي اللون الأخضر، واللون الأسود، وكمان الأبيض.

شاشة موبايل Infinix Note 7:

الشاشة هنا بتييجي بشكل الثقب الـ infinity O اللي شفناه قبل كدا في موبايل إنفنكس S5، وكمان بتييجي كاملة بثقب في أعلى الشاشة من نوع IPS LCD بمساحة 6.95 إنش، بجودة الـ HD+ بدقة 720×1640 بكسل، بمعدل كثافة بكسلات 258 بكسل.

لو أنت مش حابب أزرار التحكم ممكن تلغيها من الإعدادات وتستخدام الإيماءات بدلًا منها، ويُطلق إنفنكس عليها الـ Intuitive Gestural Navigation.

تدعم الشاشة إمكانية تحويل الموبايل بالكامل إلى اللون الأسود عن طريق الـ Dark Theme، ودا اللي معظم الناس أصبحت بتدور عليه وخصوصًا بعد ما جربته  في بعض التطبيقات ودا طبعًا بيبين قد إيه الشركة مهتمة برغبة المستخدمين مما يساعدها في الاستحواذ على السوق في المنافسة بين الشركات التانية.

 

شاشة موبايل Infinix Note 7
شاشة موبايل Infinix Note 7

 

نسبة استحواذ الشاشة في موبايل Infinix Note 7 تصل إلى 91.5%.

موبايل عملاق يعني شاشة عملاقة وخصوصًا لما تكون بالأبعاد الجديدة واللى هي بنسبة 20.5:9 علشان تقدر تعرض أكبر محتوي ليها سواء كان عند مشاهدة الفيديوهات أو الألعاب وغيره…

إضاءة الشاشة في موبايل Infinix Note 7 كويسة وكمان تقدر تستخدمها في مشاهدة المحتوى المرئي، ودا هيبقى مناسب جدًا بالنسبة للناس اللي بتحب تتفرج على الفيديوهات الكتير أو غيره، فهي هتستمتع بحجم الشاشة العملاق.

الشركة هنا عملت حاجة حلوة أوي وهي إنها عملت ضمان 100 يوم تقريبًا علشان حجم الشاشة العملاق، وحجم الموبايل نفسه اللي مش هتقدر تستخدمه بإيد واحدة، وعلشان كدا قررت إنها تعمل 100 يوم ضمان علشان لو الشاشة اتكسرت، الشركة تكون مسؤولة عن تصليحها ببلاش.

دقة الشاشة هنا قليلة بالنسبة لحجم الشاشة العملاق، وكنت أتمنى إن جودة الشاشة هنا تكون FHD+ أعتقد إنه كان هيبقى أفضل.

كاميرات موبايل Infinix Note 7:

الكاميرا الأمامية: 

الكاميرا الأمامية بتييجي هنا بدقة 16ميجا بكسل، بفتحة عدسة F\2.0.

الكاميرات Infinix Note 7 الخلفية 4 كاميرات… 

الكاميرا الأولى، بتييجي بدقة 48 ميجا بكسل، وهي الكاميرا الأساسية للموبايل، بفتحة عدسة F\1.8.

الكاميرا الثانية، موجودة بدقة 2 ميجا بكسل، وخاصة بتصوير الماكرو، بفتحة عدسة F\2.4.

الكاميرا الثالثة، وهي خاصة بعمل العزل والبورتريه، وبتييجي بدقة 2 ميجا بكسل، بفتحة عدسة F\2.4.

الكاميرا الرابعة والأخيرة، هي عبارة عن Low light QVGA، بمعنى إنها خاصة بالتصوير في الإضاءات الضعيفة والمنخفضة، مع وجود فلاش رباعي من أربع قطع من نوع ليد فلاش.

وكمان الموبايل يدعم تصوير الفيديوهات بجودة الـ FHD، بدقة 1080  بكسل بمعدل إلتقاط 30 إطار في الثانية الواحدة، وأيضًا بجودة الـ HD بدقة 720 بكسل بمعدل التقاط 30 إطار في الثانية مع تحسين في ثبات الفيديو وقت التصوير.

 

كاميرات موبايل Infinix Note 7
كاميرات موبايل Infinix Note 7

 

بالنسبة لأداء الكاميرا السيلفي، فهو كان حلو أوي في ضوء النهار وخصوصًا لما جربنها بعيد عن ضوء الشمس، وجودة الكاميرا السيلفي هنا كانت ممتازة، لكن أما جربتها في ضوء الشمس كانت النتيجة إن الألوان وضحت أوي وبالتالي ملامح الوجه مكنتش باينة أوي.

أما بالنسبة للكاميرات الخلفية، فالكاميرا الأساسية أداءها كان كويس جدًا وخصوصًا على وضعية الـ 48 ميجا بكسل، وهتلاقي فيها تفاصيل كتيرة بجودة كويسة، بس الحاجة اللي عجبتني أوي في الجهاز هي الكاميرا الماكرو الصراحة ما توقعتش إن صورها تطلع بدرجة الجودة الحلوة أوي كدا.

بالنسبة لوضعية الـ Super Night Mode، يعتبر التصوير بيها مقبول إلى حدٍ ما.

البصمة والزيادات:

البصمة:

البصمة هنا بتييجي بشكل جديد ومختلف عن شكلها التقليدي، ويمكن إنفنكس أول مرة تقدمها بالشكل دا واللي بقى ماشي مع الترند في الوقت الحالي.

البصمة موجودة جنب الموبايل مدمجة مع زرار الباور وهي سريعة جدًا وبمجرد لمسك ليها، الجهاز بيفتح على طول.

زرار الباور هنا مش بس وظيفته فتح الموبايل، ولكن ليه 4 وظائف تانية ممكن تظبطها من الإعدادات زي:

  1. تقدر تاخد بيه صور بمجرد إنك تفتح الكاميرا.
  2. لو استقبلت مكالمة تقدر ترد عليها بمجرد لمسك لمستشعر البصمة.
  3. وقت المكالمة تقدر برده بلمسة واحدة إنك تشغل تسجيل المكالمات.
  4. الوظيفة الرابعة والأخيرة تقدر تفصل المنبة منه.

وكمان الموبايل يدعم خاصية الـ Face Unlock، يعني فتح الموبايل عن طريق الوجه.

يدعم الموبايل بعض المستشعرات زي:

1.مستشعر التقارب.

2.مستشعر التسارع.

3.مستشعر البوصلة.

4.مستشعر الجيروسكوب اللي بيشتغل عن طريق السوفت وير، الخاص بتشغيل الواقع الافتراضي الـ VR. 

شركة إنفنكس مقدمة حاجة جديدة جدًا ولأول مرة الموبايل ييجي بسماعتين خارجية وبتقنية صوت الـ Dts، وهنا سماعة المكالمات بتشتغل مع السماعة الخارجية علشان تقدم لك صوت ستيريو مع تقنية الـ Dts، اللي بتحسن شوية من جودة الصوت…

 وبعد تجربة السماعتين دول، لقينا إن صوتهم وتقنية الـ Dts  بتفرق لما تشغلها، بس جودة الصوت هنا متوسطة لما تتفرج على فيديوهات أكشن أو موسيقى عالية، فهتضطر إنك تقلل درجة الصوت شوية علشان تسمع بوضوح مع جودة كويسة. 

يدعم الموبايل راديو الـ FM.

الجهاز يدعم وجود شريحتين اتصال من النوع Nano Sim،

وكذلك يدعم وجود كارت ميموري، يعمل على زيادة المساحة التخزينية.

بالإضافة إلى إن الموبايل يدعم شبكات الجيل الثاني، الثالث، والرابع.

ويعمل بنظام تشغيل أندرويد 10، مع واجهة إنفنيكس الـ XOS 6.0 .

كمان الموبايل يدعم الاتصال السريع بالواي فاي بترددات الـ b/g/n\a\ac، ويدعم أيضًا خاصية الهوت سبوت.

كما يدعم البلوتوث بإصدار 5.0.

ويدعم موقع تحديد الـ GPS، بالإضافة إلي دعمه للـ A-GPS.

منفذ الـ USB بييجي من النوع التقليدي كالعادة، وهو الـ Micro USB مع دعمه لخاصية الـ OTG لتشغيل أي USB Driver على موبايلك.

بطارية موبايل Infinix Note 7:

البطارية اللي موجودة في الموبايل العملاق دا أكيد لازم تكون عملاقة زيه، البطارية الموجودة هنا 5000 مللي أمبير، وكمان بتدعم الشحن السريع بقوة تصل إلى 18 وات، بتقنية الـ Super charge 3.0، والحقيقة إن الأداء بتاعها حلو جدًا يعني تقدر تقعد معاك لمدة يومين تقريبًا وأنت مرتاح، ودي طبعًا نقطة مميزة من شركة إنفنكس؛ لإن في الفئة الاقتصادية دي المستخدم لما يييجي يستخدم موبايله ما بيحبش يضطر لشحنه كل شوية، خصوصًا لو المستخدم كان خارج البيت.

 

بطارية موبايل Infinix Note 7
بطارية موبايل Infinix Note 7

 

أداء موبايل infinix S5 Pro:

الموبايل بييجي بمعالج ميديا تيك من نوع Helio G70، بتكنولوجيا 12 نانو، مع معالج رسومي Mali-G52 2EEMC2، فهو نفس المعالج الموجود

في الـ ريلمي C3 الأحدث من ريلمي.

 

أداء موبايل infinix S5 Pro
أداء موبايل Infinix Note 7

 

المعالج الموجود في الموبايل دا، هو معالج مخصص للألعاب وأكيد مُحبي الألعاب هيحسوا بالفرق اللى في المعالج دا عن المعالجات القديمة اللى إنفنكس كانت بتحطها قبل كدا، بس المرة دي قررت إنها تضيف للجهاز معالج قوي إلى حدٍ ما للألعاب اللي بيلعبوها، وفيه حاجة لاحظتها وهي إن موجود في الجهاز دا أيقونة للأكس بوي في السوفت وير، تقدر من خلال تشغيلها تفتح الكاميرا وتحدد مكان على سطح المكتب وتصور الأكس بوي وهو بيعمل حركات، أنصحكم تجربوها علشان إنفنكس مصمماها بجودة حلوة أوي، بس الأكيد إن كل دا هيأثر على المستخدمين اللي ملهمش في الألعاب.

فتح علبة هاتف Infinix Note 7:

موبايل Infinix Note 7.

هاند فري.

كتيب ضمان وتعليمات يشرح كيفية استخدام الموبايل.

اسكرينة بلاستيك لحماية الموبايل لحد ما تجيب واحدة أفضل منها.

رأس شاحن بقوة  18 وات.

دبوس معدني لفتح مكان الشريحة والكارت الميمورى.

جراب موبايل شفاف.

كابل USB من نوع Micro USB ودا نوع قديم. 

سعر موبايل Infinix Note 7:

سعر الموبايل حوالي 2700 جنيه مصري لنسخة 128 جيجا، مع 6 جيجا رام.

والإصدار التاني اللي هو 64 جيجا مع 4 جيجا بحوالي 2450 جنيه مصري.

الرأي النهائي في موبايل Infinix Note 7:

المميزات:

  • يدعم الموبايل تشغيل شريحتين إتصال وكارت ميموري .
  • تصميم الموبايل ممتاز وعصري.
  • شاشة كبيرة جدًا، أيضا كاملة مع ثقب للسيلفي.
  • يدعم وجود لمبة اشعارات.
  • البطارية تبقي لفترة طويلة خلال اليوم، وتكفي استخدامك اليومي حتى ولو كان بشكل مكثف.
  • قوت الشحت سريعة.
  • يتميز صوت عالي ستريو قد يكون الأعلى في هذه الفئة السعرية.
  • بصمة مدمجة بزر الباور سريعة.
  • المعالج يقدم أداء جيد في الألعاب.

العيوب:

  • دقة الشاشة منخفضةفهي بتييجي بدقة الـ HD+.
  • تصميم الهاتف مميز ولكن ينقصه ان يكون من الزجاج.
  • حجم الموبايل كبير مع وزن ثقيل.
  • منفذ الـ USB قديم.
  • يفتقد الموبايل الي عدسة وايد انجل، أو كاميرا للتصوير بزاوية واسعة.
  • أداء الكاميرا الخلفية متواضع جدًا.

الخلاصة:

احنا شايفين إن الموبايل صفقة كويسة جدًا من ناحية كل حاجة فيه، سواء كانت البطارية أو المساحة أو الأداء وغيره…

دا طبعًا بالنسبة لسعر الجهاز المعروض وبالنسبة للفئة الاقتصادية اللي هو فيها.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *