مراجعة موبايل infinix Smart 5
infinix Smart 5

يلا نبدأ مراجعة جديدة لموبايل جديد لسه نازل هنا في مصر في الفترة الأخيرة، وهو موبايل infinix Smart 5، واللي نازل في أقل فئة سعرية ممكن يكون موجود فيها موبايلات سمارت، وأغلب مستخدمي الفئة دي من الموبايلات بتكون أهم حاجة عندهم هي البطارية الكبيرة، والشاشة الكبيرة، ودي حاجة متوفرة هنا في الموبايل دا؛ علشان تكمل مسيرة النجاح اللي حققه infinix Smart 4، وهنا اهتمت الشركة بإحداث تطوير كبير في البطارية.

خلونا نتعرف بصورة أوضح من كدا علي الجهاز، ونعرف إيه هي مميزاته وعيوبه، وهو دا الجهاز اللي لما نفكر نجدد نجيبه ولا لأ!

بس قبل ما أبدأ في مراجعة الموبايل خلوني أفكركم إننا بنقدم خدمة اسمها “اختار موبايلك”،واللي بيقدمها مـــــوقع نـــاس فــون، ودي هتلاقي فيها كل التفاصيل اللى ممكن تكون بتسأل عليها قبل ما تشتري أي موبايل جديد، بس أنت اللي عليك أنك تكتب المواصفات والإمكانيات اللي عايز تشوفها فى الموبايل اللى عايز تشتريه وإحنا هنقدملك أنسب موبايل ليك من هنـــــــــا… 

تصميم موبايل infinix Smart 5:

أولًا خامات الموبايل:

كعادة شركة إنفنكس في الفئة دي، خامات التصنيع هنا من البلاستيك بالكامل بالرغم من إنه جاي في الفئة السعرية دي إلا إن التصميم شكلة جميل جدًا، بس مع الأسف البلاستيك هنا لامع يعني هيدي فرصة كبيرة لتبصيم الموبايل، لكن ممكن نحافظ عليه بالجراب اللي جاي في العلبة، أو بأي جراب تاني.

ثانيًا التصميم الخارجي:

تصميم الكاميرات:

شكل الكاميرات هنا، هو الشكل المعتاد في الفترة الأخيرة، والكاميرات الخلفية في الموبايل دا 3 كاميرات مرصوصين في شكل مستطيل مع وجود فلاش ثلاثي من نوع ليد فلاش، وهنتكلم بشرح مفصل عن الكاميرات بعدين.

أما عن الكاميرا الأمامية، فهي موجودة في ثقب أعلى الشاشة وكمان فيه فلاش ثنائي من نوع ليد فلاش.

 

تصميم موبايل infinix Smart 5
تصميم موبايل infinix Smart 5

 

أبعاد الموبايل:

الموبايل بييجي بأبعاد 165.4×76.4×8.8 ملم. 

وزن 183 جرام، وزن الموبايل هنا خفيف جدًا يعني مش هيتعبك لو قررت تمسكه طول اليوم سواء كان في شغلك، أو أنت بتلعب على الموبايل.

ألوان الموبايل هنا هي المتكررة في معظم الموبايلات، يعني ما شفتش فيها أى حاجة مميزة الصراحة، الموبايل جاي بألوان الأسود، والأزرق، وكمان الأخضر.

شاشة موبايل infinix Smart 5:

الشاشة هنا بتييجي بشكل النوتش على شكل الـ Waterdrop، واللي بقي ترند في الفئة الاقتصادية.

الشاشة من نوع IPS LCD، بمساحة 6.6، وجودة الـ HD فقط ودي للأسف جودة قليلة، بدقة 720×1600 بكسل، ومعدل كثافة بكسلات 266 بكسل لكل إنش.

دا غير إن الشاشة بتدعم أبعاد العرض الجديدة بنسبة 20:9؛ علشان تعرض أكبر محتوى ممكن على الشاشة سواء كان في مشاهدة الفيديوهات أو اللعب على الموبايل.

كما تقدر تخفي النوتش من خلال الإعدادات لو إنت مش حابب شكلة.

بالنسبة لحواف الشاشة الجانبية والسفلية، فتعتبر مقبولة جدًا بالنسبة للفئة السعرية دي.

 

infinix Smart 5
شاشة موبايل infinix Smart 5

 

أداء الشاشة هنا كويس بس طول ما أنت بتستخدمه في المهام اليومية، وكمان استخدامك ليها في الألعاب، بس هنا درجة السطوع مش أفضل حاجة، لكن خلونا نرجع نقول إن دا شيء متوقع في الفئة السعرية دي.

 كاميرات موبايل infinix Smart 5:

الكاميرا الأمامية: 

بتييجي بدقة 8 ميجا بكسل، مع فلاش ثنائي من نوع ليد فلاش.

الكاميرا الخلفية 3 كاميرات:

الأولى، هي الكاميرا الأساسية للموبايل، وبتييجي بدقة 8 ميجا بكسل. 

أما الثانية، فهي بتييجي بدقة QVGA.

الكاميرا الثالثة والآخيرة، فهي شكل بس، مكتوب عليها A1 بمعنى إن الموبايل بيدعم خاصية الذكاء الاصطناعي، بالإضافة إلى وجود فلاش ثلاثي من نوع ليد فلاش.

أيضًا يدعم الموبايل تصوير الفيديوهات بجودة الـ FHD، بدقة 1080 بكسل، ومعدل التقاط 30 إطار في الثانية الواحدة، ويدعم التصوير بجودة الـ HD، بدقة 720 بكسل، ومعدل التقاط 30 إطار في الثانية الواحدة.

 

 كاميرات موبايل infinix Smart 5
كاميرات موبايل infinix Smart 5

 

الكاميرات هنا  بارزة شوية عن ضهر الموبايل، ودا هيدي فرصة أكبر لتجريح الكاميرا، بس فيه جراب جاي مع الموبايل، ودا هيساعد شوية في الحفاظ عليها.

أما بالنسبة لأداء الكاميرات الخلفية، فالنتائج اللي بتطلع منهم تعتبر كويسة طول ما أنت بتستخدمها في إضاءة النهار، وبيكون فيها تفاصيل إلى حدٍ ما كويسة، بس التفاصيل وجودة الصور هنا هتبدأ تقل لو استخدمتها في الإضاءات المنخفضة.

ونفس الكلام ينطبق على الكاميرا الأمامية.

 البصمة والزيادات:

البصمة:

البصمة هنا موجودة بشكلها التقليدي الموجود في أغلبية الموبايلات، واللى بتكون في ضهر الموبايل، وكمان الموبايل يدعم خاصية Face Unlock يعني بيفتح بواسطة الوجه.

الموبايل بيدعم بعض المستشعرات زي:

1.مستشعر التقارب.

2.مستشعر التسارع.

الموبايل يدعم منفذ الـ 3.5 ملم الخاص بالهاند فري، ويوجد في أعلى الموبايل.

الموبايل يدعم راديو الـ FM.

ويدعم أيضًا وجود شريحتين اتصال من نوع Nano Sim، مع وجود كارت ميموري؛ لزيادة المساحة بسعة تصل إلى 256 جيجا بايت.

كما يدعم شبكات الجيل الثاني، الثالث، والرابع.

يتوفر الموبايل بنظام تشغيل أندرويد 10 بالإصدار المخفف الـ Go edition XOS.

يدعم الجهاز الاتصال بالواي فاي بترددات الـ b/g/n\a\ac، ويدعم أيضًا خاصيتي الـ Wi-Fi Direct, والهوت سبوت.

يدعم البلوتوث بإصدار 4.2.

كما يدعم موقع تحديد الـ GPS؛ ليسهل معرفة الأماكن لدى البعض، وأيضًا يدعم أنظمة الملاحة الـ A GPS, Glonass, Beidou.

بطارية موبايل infinix Smart 5:

البطارية جاية بسعة عالية وممتازة وهي 5000 مللي أمبير، ودا حجم ضخم جدًا كعادة إنفنكس في تصميم موبايلاتها، وكمان الموبايل هيفضل شغال معاك اليوم كامل من غير ما يفصل، فهيبقي حلو أوي وميزة لو محتاج تستخدمه في شغلك أو بتلعب لفترات طويلة.

 

بطارية موبايل infinix Smart 5
بطارية موبايل infinix Smart 5

 

أداء موبايل infinix Smart 5:

جهاز إنفنكس بييجي بمعالج من شركة ميديا تيك من نوع Helio A20 MT6761D، بتكنولوجيا الـ 12 نانو.

وكمان بييجي بمعالج رسومي من نوع PowerVR GE8320.

 

أداء موبايل infinix Smart 5
أداء موبايل infinix Smart 5

 

لما نييجي نتكلم عن أداء الموبايل بشكل عام، فالموبايل هيقدم أداء كويس بالنسبة لاستخدامه في المهام اليومية زي استخدام السوشيال ميديا، ومشاهدة اليوتيوب وغيره…

وكما أداء الموبايل في الألعاب هيبقي كويس، بس في الألعاب الخفيفة إنما بالنسبة للألعاب التقيلة زي بابجي، فالأداء هنا مش هيبقي مرضي بس ممكن تشغل النسخة الـ Lait علشان تشتغل معاك كويس.  

فتح علبة موبايل infinix Smart 5:

موبايل infinix Smart 5.

هاند فري.

كتيب ضمان وتعليمات يشرح كيفية استخدام الجهاز.

اسكرينة تم وضعها بشكل مسبق على الموبايل، وبتكون من البلاستيك، يعني هتشيلها وتجيب واحدة كويسة؛ علشان تعرف تحافظ على الموبايل بتاعك من الخدوش والتجريح.

الشاحن بقوة 10 وات، ودا هيخلي شحن الموبايل بطيء نسبيًا.

دبوس معدني لفتح مكان الشريحة.

جراب موبايل شفاف.

كابل USB من نوع Micro USB، ودا نوع قديم بالإصدار الثاني. 

سعر موبايل infinix Smart 5:

السعر الموبايل هنا 1550 جنية مصري لنسخة 32 جيجا مع 2 جيجا رام.

الرأي النهائي في موبايل infinix Smart 5:

المميزات:

يدعم الهاتف مستشعر البصمة.

الموبايل ليه شاشة كبيرة على هيئة النوتش بتقدم أداء مقبول بالمقارنة بسعر الموبايل.

كما يدعم الجهاز شريحتين اتصال، وكارت ميموري في نفس الوقت.

بطارية الموبايل كبيرة وكافية ليومك بالكامل من غير أي مشكلة كعادة شركة إنفنكس.

العيوب:

المعالج يؤدي أداء متواضع، ودا مقبول بالنسبة لسعر الجهاز.

بعض المستخدمين لا يفضلون إصدار الأندرويد الـ GO.

لا يدعم  الجهازالميكروفون الثانوي الذي يعمل على منع العزل والضوضاء وقت استخدام الموبايل.

قوة الشحن بطيئة بالنسبة لسعة البطارية.

خامة التصنيع من البلاستيك اللامع، اللي بيتسبب في وجود بصمات على الجهاز عند الاستخدام.

الخلاصة:

الموبايل كشكل وتصميم شيك، ولو مش مهتم بالتصوير أو لعب الألعاب، فالموبايل هيكون فرصة كويسة جدًا من ناحية البطارية، والمساحة نظرًا إلى سعره المعروض.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *