مراجعة موبايل مي نوت 10 لايت
مي نوت 10 لايت

 موبايل شاومي مي نوت 10 لايت حصلت عليه ضجة كبيرة أوي وفعلًا يستاهلها، جهاز محترم وجاي بإمكانيات عالية أوي، وده اللي واضح جدًا في التصميم.

تُعتبر شاومي من الشركات اللي بتحاول تلعب دايمًا على طموح المستخدم، علشان كده سياسة شاومي في الموبايل ده متغيرة جدًا، وبقت بتركز على حاجات لأول مرة تركز عليها في الفئة المتوسطة دي، إزاي بقى!

هنعرف دلوقتي في مراجعة موبايل مي نوت 10 لايت بالتفصيل…

تصميم موبايل مي نوت 10 لايت:

 

تصميم موبايل مي نوت 10 لايت
تصميم موبايل مي نوت 10 لايت

 

أولًا خامات الموبايل:

الموبايل من أفخم موبايلات الفئة المتوسطة اللي ممكن تمسكها في إيدك، ضهره زجاجي ومحمي بطبقة Corning Gorilla Glass الجيل الخامس، مع فريم مصنوع من المعدن، الخامات مع بعضها بتديك إحساس بالفخامة في الموبايل خصوصًا لما يتركب له الجراب بتاعه.

التصميم الخارجي

تصميم الكاميرات: 

  • الموبايل فيه أربع كاميرات في الضهر، في نافذة واحدة الشكل البيضاوي مش شكل المستطيل؛ علشان تناسب الانحناءات اللي في الموبايل، بروز الكاميرات على ضهر الموبايل بسيط جدًا وبيختفي بشكل كلي لما تركب الجراب الخاص بالموبايل.

أبعاد الموبايل:

حجم الموبايل تقيل شوية ووزنه 204 جرام صحيح الوزن كبير شوية، بس مش هتحس إنك ماسك الجهاز في إيدك ويمكن ده بفضل الانحناءات الكتيرة اللي في الجهاز، بس فيه حاجة لازم تاخد بالك منها كويس أوي؛ إن الموبايل مع وزنه وضهره الزجاجي بيعرضه للكسر مع أقل وقعة، فبالتالي هيحتاج منك عناية شويتين في الاستخدام.

شاشة موبايل مي نوت 10 لايت:

  • الشاشة حجمها 6.5 بوصة من نوع سوبر أموليد.
  • دقة الشاشة FHD+ وبتردد عادي 60 هيرتز، وبتدعم الـ HDR 10.
  • الشاشة عليها طبقة حماية Corning Gorilla Glass الجيل الخامس.
  • أطراف الشاشة منحنية كده في إيدك، وواخدة شكل الإيدج بتاع سامسونج، هي ممكن تكون حاجة مختلفة، وممكن تكون حاجة تخوفك برده شوية لأن الشاشة معرضة للكسر أكتر بسبب المنحنيات دي.

 بالتالي مينفعش يكون الموبايل بيتخبط منك كتير، تصميم الشاشة بالمنحنيات دي كان بيديني إحساس بالفخامة وإني ماسك موبايل غالي بس هو فئة متوسطة، وللعلم إن مفيش شاشة منحنية في الفئة دي أصلًا.

 

شاشة موبايل مي نوت 10 لايت
شاشة موبايل مي نوت 10 لايت

 

تجربة الشاشة تحت الشمس كانت كويسة، الأيقونات كانت ظاهرة وواضحة وبستخدمه بسهولة جدًا.

قولنا فوق إن نوع الشاشة سوبر أموليد، ده بيعرفك إن درجات ألوان الشاشة مشبعة جدًا ومفرقعة، ولو أنت من اللي بيحبوا يتفرجوا على أفلام ويوتيوب هتلاقي التفاصيل واضحة أكتر مع تصميم الشاشة المنحني، يعني حاجة ممتازة ومفيش كلام عليها، بس نرجع نقول إنها محتاجة استعمال بعناية شوية، بسبب التصميم الكلي للموبايل.

كاميرات موبايل مي نوت 10 لايت:

الكاميرا الأمامية:

  • كاميرا السيلفي بتيجي بدقة 16 ميجا بكسل بفتحة عدسة F/2.5، بمستشعر من سامسونج، وتقريبًا نسخة من كاميرا سيلفي نوت 9s.

خرجت صور ممتازة بالكاميرا دي، والفيديو كان ممتاز جدًا، ممكن تشغل البيوتي مود أو توقفه وتلاقي الصور طبيعية جدًا.

الكاميرات الخلفية:

الموبايل فيه أربع كاميرات خلفية:

  • الكاميرا الأولى وهي الكاميرا الأساسية دقتها 64 ميجا بكسل بفتحة عدسة F/1.9 بمستشعر سوني IMX 686.
  • الكاميرا التانية دقتها 8 ميجا بكسل بفتحة عدسة F/2.2 للتصوير الواسع Ultra Wide.
  • الكاميرا التالتة دقتها 5 ميجا بكسل بفتحة عدسة F/2.4 للتصوير الـ Macro.
  • الكاميرا الرابعة والأخيرة بتصور بدقة 5 ميجا بكسل بفتحة عدسة F/2.4 ومخصصة للعزل.

تجربة الكاميرات الأربعة معايا كانت كالتالي:

الكاميرا الرئيسية بتصور بجودة ممتازة، صور مشبعة بالألوان والديناميك رينج بتاعها كويس جدًا، كنت بلاحظ أوقات إن اللون الأبيض بيطلع مشبع أكتر من اللازم، لكن في معظم الحالات الصور بتطلع ممتازة جدًا ومفيهاش أي مشاكل.

كاميرا الزوم بتطلع صور ممتازة بس لو زومت أكتر من 2 زوم هتلاقي تفاصيل الصورة مش واضحة.

على عكس المتوقع في كاميرات الماكرو، لقيت جودة صور عالية من الكاميرا دي ووضوح كويس جدًا للتفاصيل الصغيرة، فلو أنت من عشاق تصوير التفاصيل الصغيرة هتتبسط أوي من تجربة الكاميرا دي.

كاميرا العزل كويسة جدًا وأنصحك بتجريبها في تصوير الأشخاص خصوصًا، بتعمل عزل كويس أوي.

تصوير الفيديو كان كويس أوي بفضل التثبيت الإلكتروني، بيطلع الفيديو مش مهزوز كده في التصوير حتى وأنت ماشي.

في النايت مود بتاع شاومي لاحظت إن مش كويس أوي، وأتمنى من شاومي تشتغل عليه أكتر في التحديثات الجديدة.

الكاميرات مفيش عليها تعليقات كتيرة، بس في المجمل أقدر أقول إنها كاميرات ممتازة وبتطلع الصور كأنك واحد محترف في التصوير ودي حاجة أشهد لها حقيقي ومكنش ينفع أعديها.

 

كاميرات موبايل مي نوت 10 لايت
كاميرات موبايل مي نوت 10 لايت

 

البصمة والزيادات:

البصمة:

  • الموبايل مزود ببصمة مدمجة في شاشة الموبايل، مكانها فوق شوية في الشاشة بس ده علشان توصلها بسهولة وأنت ماسك الموبايل بإيد واحدة، أدائها سريع وتمام، لكن حصلت معايا مرات قليلة أوي وكانت بتعلق وبتحتاج اللمسة تبقى تقيلة شوية على الشاشة علشان تستجيب.
  • بالنسبة لـ face unlock كان أداؤه سريع وكويس أوي وملقيتش منه أي مشاكل.

المستشعرات:

    • مستشعر التقارب.
    •  مستشعر الضوء المحيط.
    •  مستشعر تسارع.
    • جيروسكوب.
    •  بوصلة رقمية.
    •  مستشعر البصمة.
  •  IR Blaster.

يدعم الموبايل شريحتين اتصال من نوع Nano Sim.

يدعم شبكات الجيل التاني الـ 2G والجيل التالت الـ 3G والجيل الرابع الـ 4G.

الواي فاي بترددات الـ a/b/g/n/ac بالإضافة لدعمه الـ Dual-band, Wi-Fi Direct, hotspot .

البلوتوث بأحدث إصدار وهو الإصدار الخامس مع دعمه لخاصيتي الـ A2DP, LE, aptX HD, aptX Adaptive .

الموبايل يدعم ميزة تحديد الموقع الجغرافي الـ GPS مع دعمه لأنظمة الملاحة المختلفة زي الـ A-GPS, GLONASS, GALILEO, BDS.

منفذ الـ USB من النوع الأحدث الـ Type C.

الموبايل بيبجي بأحدث نظام تشغيل أندرويد 10 مع واجهة شاومي الأحدث الـ MIUI 11.

الموبايل بيدعم خاصية الـ NFC مفيش تنازل عن النقطة دي في الموبايلات الجديدة طبعًا، وكانت من ضمن مميزات موبايل ريدمي نوت 9 برو.

بالنسبة لتسجيل المكالمات، فالموبايل جاي زي معظم موبايلات شاومي اللي بتنزل دلوقتي مش بيدعم خاصية تسجيل المكالمات للأسف.

صوت موبايل مي نوت 10 لايت:

الصوت بييجي من سماعة واحدة في الفريم من تحت على الشمال، صوت عالي ومجسم جدًا، وكذلك صوت سماعات المكالمات ممتاز، تجربة الصوت كلها على بعضها كانت ممتازة ومفيش منها أي مشاكل.

أداء موبايل مي نوت 10 لايت:

 

أداء موبايل مي نوت 10 لايت
أداء موبايل مي نوت 10 لايت

 

  • معالج سناب دراجون 730G.
  • دقة تصنيع 8 نانو متر وبتردد بيوصل لحد 2.2 جيجا هيرتز
  • معالج رسومي ادرينو 618.
  • رامات 6 جيجا مع ذاكرة مساحتها 128 جيجا.
  • رامات 8 جيجا بايت مع ذاكرة مساحتها 128 جيجا.

المعالج اللي في موبايل مي نوت 10 لايت بيقدم أداء متوازن في الفئة المتوسطة، يعتبر هو الأفضل في الفئة المتوسطة، هو مش وحش ولا حاجة، لكن مش عظيم ولا مبهر أوي ولا أكتر حاجة مميزة في الموبايل ده.

 لقيت إن استعمال الموبايل مستقر مفيش تقطيعات ولا تهنيجات كتيرة زي اللي كانت بتقابلني في ريدمي نوت 9s اللي راجعناه قبل كده بردو.

الأداء الرسومي سلس جدًا، لعبة PUBG كانت شغالة معايا كويس جدًا بتشتغل 50 فريم في الثانية بدون مشاكل وبشكل سهل وبدون أي تقطيعات، فأنت لو جيمر أحب أقولك إن الموبايل ده بتاعك، وبالنسبة للانحناءات اللي في الشاشة مكانتش مضايقاني ولا مأثرة على اللعب خالص برده.

لاحظت وقت استخدام الموبايل في مرات كتيرة بسخونة خفيفة كده جنب الكاميرا الخلفية، بس دا كان خلال استخدام الموبايل لفترة طويلة.

بطارية موبايل مي نوت 10 لايت:

البطارية 5260 مللي أمبير، وهي الأفضل والأعلي في الفئة المتوسطة دي.

البطارية ضخمة جدًا زي ما أنتو شايفين الرقم، لو أنت بتحب تلعب جيمز كتير على الموبايل متقلقش من ناحية البطارية، حتى لو خلصت هتقدر تشحنها بالشاحن السريع في وقت قليل.

كمان الشاحن المرفق 30 وات، ودا بيشحن البطارية بالكامل في ساعة أو ساعة وخمس دقايق بالكتير أوي.

البطارية وصلت معايا لحد 8-9 استخدام فعلي لشاشة الموبايل كأقوى أداء بطارية في الفئة دي.

 

بطارية موبايل مي نوت 10 لايت
بطارية موبايل مي نوت 10 لايت

 

فتح علبة موبايل مي نوت 10 لايت:

  • موبايل Mi Note 10 Lite.
  • رأس الشاحن بقوة 30 وات.
  • سلك USB من نوع Type C.
  • جراب ظهر شفاف.
  • دبوس معدني.
  • دليل الاستخدام وضمان الهاتف.

سعر موبايل مي نوت 10 لايت:

  • النسخة الأولى برامات 6 جيجا بايت مع مساحة 128 جيجا بايت سعرها 5555 جنيه مصري.
  • النسخة التانية برامات 8 جيجا مع مساحة 128 جيجا، سعرها 5888 جنيه مصري.

الرأي النهائي في موبايل مي نوت 10 لايت:

المميزات:

منفذ Type C مع شحن سريع بقوة 30 واط فيتم شحن البطارية في ساعة واحدة بالكامل.
البطارية تأتي بسعة كبيرة تقدم أداء جيد فهي تصمد للعمل لفترة طويلة خلال اليوم بأكمله.
يدعم التصوير بجودة الـ 4K مع تثبيت إلكتروني جيد جداً.
تقدم الكاميرا الخلفية صور بتفاصيل ممتازة.
تصميم عصري بخامات ممتازة من الزجاج كعادة شاومي.
يدعم خاصية الـ Always on Display لعرض ايقونات اشعارات البرامج على الشاشة المغلقة.
شاشة بمساحة كبيرة من نوع AMOLED بدقة FHD+ مع حواف منحنية فنادراً ما نجد شاشة منحنية في هذه الفئة .
المعالج يقدم أداء جيد ولكنه ليس الأقوي فتوجد هواتف أقوى في الاداء مثل Honor 20.

العيوب:

  • وزن الهاتف ثقيل نسبًيا .
  • لا يدعم إمكانية تركيب كارت ميموري .
  • العلبة لا تحتوى على سماعات الأذن .
  • تفتقد الشاشة إلى معدل تحديث أعلى مثل الـ 90Hz أو الـ 120Hz.
  • كنا نطمح أن تأتي الشاشة بشكل الثقب.
  • بسبب قدوم الهاتف من الزجاج يعرضه لتبصيم والكسر بصورة أكبر.
  • سماعة الهاتف الخارجية بالأسفل على اليسار وهو المكان المعرض للكتم عند لعب الألعاب.
  • انخفاض جودة الكاميرا السيلفي في الاضاءات الضعيفة.
  • لا يعد الهاتف تطوير كبير من ناحية الأداء لأن هاتف شاومي السابق في نفس الفئة Mi 9T كان يأتي بنفس المعالج .

الخلاصة:

شايف إن سعر الموبايل ممتاز جدًا بالنسبة لأسعار موبايلات المنافسين في الفئة المتوسطة دي، غير إن الموبايل بيديك إمكانيات عالية وحلوة جدًا…

 عندك الشاشة السوبر أموليد منحنية وكويسة جدًا، وشاحن سريع وبطارية كبيرة جدًا، وكاميرات بتديك صور بجودة عالية أوي، وخامات خارجية روعة وفخمة جدًا…

كل دي مميزات موجودة في موبايل مي نوت 10 لايت بتخليه يتفوق على الموبايلات المنافسة له، والصراحة الموبايل مستواه تحسه أعلى من سعره ألفين جنيه أو أكتر.

ولكن لو لسة متردد في اختيار موبايلك القادم فحيرتك دي خلاص هتنتهي مع خدمة “اختار موبايلك” اللي بيقدمها موقع نــاس فــونــز وتقدر من خلال الخدمة دي تضيف ميزانيتك والمواصفات اللي أنت محتاجها وإحنا هنرشحلك الموبايل المناسب ليك.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *