مراجعة موبايل سامسونج S10+
سامسونج S10+

النهاردة في “ناس فونز” هنراجع موبايل مميز في سلسلة الـ S وهو موبايل سامسونج S10+

أول موبايل في موبايلات سامسونج في سلسلة جالاكسي بالذات بييجي بكاميرا أمامية ثنائية، الموبايل بييجي بنفس شاشة موبايل سامسونج نوت 9، بس بوزن أقل وبأبعاد أصغرشوية.

البطارية اللي كله بيراهن عليها والأداء اللي بنسمع إنه كويس جدًا، فهل دا حقيقي والموبايل يستاهل إنك تاخد خطوة وتشتريه؟!

دا اللي هنعرفه في المراجعة دي…

تصميم موبايل سامسونج S10+:

أولًا خامات الموبايل:

  • جودة التصنيع واضحة جدًا في الموبايل سواء من ضهر الموبايل المصنوع من الزجاج واللي عليه طبقة حماية من النوع Gorilla Glass من الجيل الخامس زي اللي على شاشة الموبايل.
  • والفريم المعدني اللي بييجي من الألومنيوم.
  • غير إن فيه نسخة تانية ضهرها مصنوع من السيراميك.

التصميم الخارجي:

تصميم الكاميرات:

الموبايل فيه كاميرا ثلاثية خلفية، مرتصة بجانب بعضها بعرض الموبايل بشكل مستطيل، وتقريبًا واكله الجانب الفوقاني كله للموبايل، وبتغطيهم طبقة زجاج، وصراحة أنا شايف التصميم غريب شوية ومش مألوف بس حلو في نفس الوقت وعجبني، دايمًا الابتكار في تصميم الكاميرات بيكون حاجة كويسة وبيورينا أشكال مختلفة ولكن التصميم العملي يظل هو المفضل عند الجمهور.

 

تصميم موبايل سامسونج S10+
تصميم موبايل سامسونج S10+

 

أبعاد الموبايل:

  • أبعاد الموبايل 157.6×74.1×7.8 ملم.
  • بييجي بوزن 175 جرام، وهو كدا أخف من موبايل سامسونج S9 بلس.

وكون الموبايل خفيف فدي ميزة عجبتني في الموبايل لإني بحب أي حاجة عملية متاخدش مني مجهود في مسكها!

طبعًا نسخة السيراميك أتقل شوية ووزنها 198 جرام وده بيرجع لكون السيراميك أصلا تقيل وبردو الوزن في المعقول مش تقيل أوي.

شاشة موبايل سامسونج S10+:

شاشة الموبايل بتيجي بتجربة جديدة الـ Infinity O وهي كاميرتين أماميتين مش واحدة بس، كمان الشاشة هنا واخدة كيرف جانبي واللي بتقدر تتحكم فيه، وبتيجي الشاشة من نوع Dynamic AMOLED.

مساحة الشاشة 6.4 وجودتها QHD+ بدقة 1440×3040 بكسل، يعني معدل كثافة كل إنش واحد من الشاشة بيعادل 522 بكسل.

الشاشة بتمثل حوالي 87.5% من واجهة الموبايل الأمامية كلها، وأبعاد عرضها 19:9، وبتدعم تقنية الـ HDR10+ والـAlways on  display.

كما أن الشاشة مزودة بطبقة حماية من Corning Gorilla Glass الجيل السادس.

 

شاشة موبايل سامسونج S10+
شاشة موبايل سامسونج S10+

 

الشاشة بصراحة هنا قوية، وألوانها مشبعة ومعالجة كويس وطبعًا شاشات سامسونج هي الفرس الرابح في معظم أجهزتها وهنا كمان الشاشة ممتازة وبتقدم تجربة مميزة من تفاصيل عميقة لألوان مميزة، غير إنك ممكن تخفي الكاميرات الأمامية عن طريق شريط أسود بيغطيها بالكامل.

كاميرات موبايل سامسونج S10+:

الكاميرات الأمامية:

لأول مرة نشوف موضوع الكاميرا الأمامية الثنائية في موبايلات سامسونج في موبايل سامسونج S10 بلس، الكاميرا الأولى دقتها 10 ميجا بكسل بتقنية الـ Dual Pixel لجودة أفضل في التصوير مع فتحة عدسة F/1.9.

أما الكاميرا التانية فدقتها 8 ميجا بكسل مع فتحة عدسة F/2.2، ومزودة بخاصية الـ Live focus.

 تجربة التصوير بالكاميرات كانت ممتازة جدًا، وتصوير الفيديوهات كان ثابت جدًا؛ لوجود مثبت بصري في الكاميرات، ودي ميزة حلوة لكل اللي بيحبوا تصوير الفيديوهات والاستوريز على الانستجرام، والتيك توك والبرامج اللي زي دي.

الكاميرات الخلفية:

الموبايل مزود بـ 3 كاميرات خلفية.

  •  الكاميرا الأولى والأساسية بتصور بدقة 12 ميجا بكسل مع فتحة عدسة f/1.5 – 2.4.
  • الكاميرا التانية بتصور بدقة 12 ميجا بكسل مع فتحة عدسة f/2.4 ودي الكاميرا الخاصة بالزوم Telephoto 2x zoom.
  • أخيرًا، الكاميرا التالتة دي لكل محبين التصوير في الأماكن المفتوحة والمناظر الطبيعية وهي كاميرا ألترا وايد بدقة 16 ميجا بكسل بفتحة عدسة f/2.2.
  • أما عن تصوير الفيديو فالموبايل بيدعم التصوير بجودة الـ 4K بدقة 3840×2160.
  • معدل التقاط 60 إطار في الثانية وتدعم التصوير بجودة الـ FHD بدقة 1920×1080 بمعدل التقاط 60 إطار في الثانية وتدعم التصوير بجودة الـ HD بدقة 1280×720 بمعدل التقاط 30 إطار في الثانية.
  • كما يدعم الهاتف التصوير الـ Slow motion بجودة الـ FHD بدقة 1080 بمعدل 240 إطار في الثانية ويدعم التصوير الـ Super Slow motion بجودة الـ HD بدقة 720 بمعدل 960 إطار في الثانية ويدعم التصوير الـ Hyperlapse بجودة الـ FHD بدقة 1080.

 

كاميرات موبايل سامسونج S10+
كاميرات موبايل سامسونج S10+

 

تجربة الكاميرات كانت تجربة مميزة، الألوان والتفاصيل كانت ممتازة، ولكن التصوير بالليل مكانش الأفضل وأداء كاميرات الموبايل خيب أملي بصراحة، المنافسين كلهم تقريبا عندهم نايت مود لكن سامسونج معندهاش!

الكاميرا الأمامية جودتها معجبتنيش في الإضاءة الضعيفة ولا الداخلية وللأسف نقدر نقول إن دي كاميرا حلوة بس تحت ظروف خاصة.

البصمة والزيادات:

البصمة: 

الموبايل مزود بمستشعر بصمة مدفون في الشاشة، ولأول مرة بنشوف المستشعر دا أصلًا في أجهزة سامسونج علشان كدا متوقعتش منه فعالية عالية، وكتجربة أولية فهو حلو ولكن هننتظر إن سامسونج تظبطه أكتر في الموبايلات اللي جاية.

بصمة الوجه هنا هتكون مهمة جدًا لأن ناس كتير هتعتمد عليها وتسيب البصمة اللي في الشاشة.

المستشعرات 

  • مستشعر الضغط.
  • مستشعر التسارع.
  • مستشعر الضغط الجوي.
  • مستشعر جيروسكوب.
  • مستشعر بوصلة.
  • مستشعر التقارب.
  • مستشعر بصمة الأصابع في الشاشة. 

صوت موبايل سامسونج S10+:

سماعات الموبايل سماعات ستيريو قوية بتقدم صوت نقي ومجسم، والموبايل فيه مايك للعزل بيعزل أي أصوات جانبية أثناء المكالمات أو التسجيل والتصوير.

الموبايل مزود بمدخل الـ 3.5 مللي للسماعات وتقدر تشحن وتستخدم السماعات في نفس الوقت. 

دعم الموبايل شريحتين إتصال من نوع Nano Sim وبييجي منفذ شرائح الإتصال من نوع Hybrid Sim.

يدعم أيضًا جميع شبكات الإتصال الـ 2G، الـ 3G، وشبكات الجيل الرابع الـ 4G.

كما يدعم جميع ترددات الواي فاي الـ a/b/g/n/ac/ax، بالإضافة إلى دعمه لـ Dual band, Wi-Fi Direct, hotspot.

منفذ الـ USB بييجي بنفس المنفذ الموجود في الـ Samsung Galaxy S9 Plus السابق فهو من نوع الـ Type-C 3.1، مع دعمه إلى لـ OTG.

الموبايل بييجي بأحدث نظام تشغيل وهو Android 9 Pie، مع واجهة الـ One UI الجديدة.

أما عن تجربة الصوت فكما هو معتاد سيكون من AKG، ويدعم الموبايل الصوت الـ Dolby Atmos، والاستيريو.

يدعم البلوتوث بأحدث إصدار وهو الخامس، مع دعمه لـ A2DP, LE, aptX.

يدعم الموبايل نظام تحديد الموقع الجغرافي الـ GPS، مع دعمه لأنظمة الملاحة الأخرى الـ A-GPS, GLONASS, BDS, GALILEO.

كما يدعم الإتصال قريب المدى الـ NFC، بالإضافة إلى دعمه لـ Samsung Pay والـ Samsung DeX كما هو معتاد في هواتف سلسلة الـ S.

الموبايل بييجي بعدة ألوان زي، اللون الأبيض الزجاج، واللون الأبيض للسيراميك، واللون الأسود الزجاج، وباللون الأسود السيراميك، واللون الأخضر للزجاج.

أداء موبايل سامسونج S10+:

  • دقة التصنيع 8 نانومتر Exynos أو 7 نانومتر Snapdragon حسب النسخة.
  • الإصدار الأول من الموبايل بمعالج من شركة سامسونج نفسها من نوع Exynos 9820 Octa بتقنية 8nm بمعالج رسومي من نوع Mali-G76 MP12 وهو المعالج اللي هيتم توفيره في الشرق الأوسط ومصر.
  • الإصدار التاني بمعالج من شركة كوالكوم الأحدث والأقوى من نوع SDM855 Snapdragon 855 بتقنية 7nm مع معالج رسومي من Adreno 640 وهو المعالج اللي هيتوفر في المستقبل في أمريكا ودول أوروبا.
  • الإصدار الأول مساحة ذاكرته 128 جيجا بايت مع رامات 8 جيجا بايت.
  • الإصدار التاني مساحة ذاكرته 512 جيجا بايت مع رامات 8 جيجا بايت.
  • الإصدار التالت سعته تيرابايت مع رامات 12 جيجا بايت.
  • الذاكرة الصلبة نوعها UFS 2.1 والذاكرة العشوائية  نوعهاLPDDR4X.

 

أداء موبايل سامسونج S10+
أداء موبايل سامسونج S10+

 

أداء الموبايل سلس جدًا ومكنش بيهنج معايا خلال فترة الاستخدام اللي استخدمت الموبايل فيها، الرامات هنا سعتها ممتازة وهتخلي التنقل في الأبلكيشنز معاك سلس جدًا، البروسيسور كنت أتمنى يكون سناب دراجون ولكن سامسونج مصرة إنها تستخدم المعالجات بتاعتها في كل الفئات وبالتالي دا بيقتل موبايلات كتير.

بطارية موبايل سامسونج S10+:

البطارية من ضمن مميزات الموبايل، بطارية ضخمة سعتها 4100 مللي أمبير، أكبر من بطارية موبايل سامسونج النوت 9، وبتدعم خاصية الشحن السريع.

سامسونج طورت الشحن اللاسلكي شوية وبقى بتقنية الـ Quick Charge 2.0 بقوة 15 وات.

بيدعم الموبايل الشحن العكسي بقوة 9 وات والشحن العكسي لشحن الأجهزة التانية لاسلكيًا.

 

بطارية موبايل سامسونج S10+
بطارية موبايل سامسونج S10+

 

سعر موبايل سامسونج S10+:

النسخة 128 جيجا مع 8 جيجا رام في مصر حاليا بسعر 10500 جنيه بظهر سيراميك.

النسخة 512 جيجا مع 8 جيجا رام بسعر 13000 جنيه بظهر سيراميك.

النسخة الكبرى 1 تيرا مع 12 جيجا رام بسعر 14000 جنيه بظهر سيراميك.

محتويات علبة موبايل S10+:

  1. موبايل سامسونج  S10+.
  2. شاحن بقوة 15 وات.
  3. كابل الـ USB من نوع Type C.
  4. كتيب التعليمات مع الضمان يشرح كيفية استخدام الموبايل.
  5. دبوس معدني لفتح مكان شريحتي الاتصال، والكارت الميمورى.
  6. هاند فري من نوع AKG.
  7. منفذ  USB OTG لاستخدام أي USB Driver على موبايلك.
  8. جراب ضهر شفاف لحماية الموبايل.
  9. لاصق حماية موجود على الشاشة.

الرأي النهائي في موبايل سامسونج S10+:

الموبايل رغم إنه قديم شوية إلا إنه بيقدم تجربة حلوة، وشكل وتصميم متميز وبريميم جدا، طبعًا الموبايل كان صفقة رابحة جدًا وقت ما نزل ولكن حاليًا مش بعتبره من الحاجات القوية في السوق لأسباب كتير وضحتها فوق، لكن لو أنت وصلت لهنا وكنت بتفكر تشتري الجهاز ده فده معناه إنك مش متابع السوق كويس ومحتاج مساعدة في اختيار موبايلك الجاي، علشان كدا بنقدملك خدمة “اختار موبايلك” الخدمة اللي بنساعدك عن طريقها في اختيار الموبايل المناسب ليك واللي بيلبي احتياجاتك، كل اللي عليك تعمله هتبعتلنا الميزانية المتوقعة وتقولنا الحاجات اللي بتهتم بيها في الموبايل، وسيب الترشيح علينا.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *