مراجعة موبايل سامسونج S20 FE
سامسونج S20 FE

من فترة جالي واحد صاحبي وقالي إنه بيفكر يشتري موبايل سامسونج S20 FE، وهو بطبيعته بيحب موبايلات سامسونج علشان شاشتها وكاميراتها ودول أكتر حاجتين مميزين فيها فعلًا؛ قولتله بس قبل ما تشتري سيبني أعمل مراجعة للموبايل وأشوف النسخة اللي نزلت مصر الـ Exynos الـ 4G، وأعرف إيه مميزاته وعيوبه ويستاهل فعلًا تشتريه ولا لأ!

خلينا نشوف المراجعة…

تصميم موبايل سامسونج S20 FE:

أولًا خامات الموبايل:

عملنا مراجعة قبل كدا لموبايل سامسونج نوت 20، أهو سامسونج S20 FE جاي بنفس التصميم، ضهره من البلاستيك المطفي اللي بيحمي الموبايل من الخدوش شوية على عكس الزجاج اللي بيتأثر بأي حاجة بس نرجع في الأخر نقول إن شكل الفخامة والشياكة اللي بيظهر بيه الضهر الزجاج أجمل بكتير في إيدك الاختيار بين الشكل والمتانة في الأخر، والفريم مصنوع من المعدن.

 ثانيًا التصميم الخارجي:

تصميم الكاميرات:

كاميرات الموبايل الموجودة في الضهر مرصوصة في شكل مستطيل بارز من ضهر الموبايل، وكل كاميرا على شكل دايرة بتغطيهم طبقة من الزجاج بتحميهم من أي عوامل خارجية زي الأتربة أو الماء.

أبعاد الموبايل:

وزن الموبايل معقول مش تقيل أوي ولا خفيف حوالي 190 جرام، وسمكه كمان معقول تقدر تتحكم فيه بسهولة بحوالي 8.4 ملم.

البروز الخارجي للكاميرات هنا كبير وعلشان كدا برشح استخدام جراب مع الموبايل علشان يحميه من الخدوش اللي ممكن يتعرض ليها بسهولة طول اليوم.

 

تصميم موبايل سامسونج S20 FE
تصميم موبايل سامسونج S20 FE

 

شاشة موبايل سامسونج S20 FE:

شاشة الموبايل مقاس 6.5 بوصة، من نوع Super AMOLED، بدقة FHD+، وبتردد 120 هيرتز، فيها ثقب صغير لتصوير السيلفي.

الشاشة بتمثل حوالي 84.8 % من جسم الموبايل كله.

شاشة الموبايل دا مختلفة عن معظم موبايلات سامسونج الرائدة، ودا بيظهر في الحجم الأكبر للحواف، فلو كانت أصغر من كدا بنسبة بسيطة كانت هتفرق جدًا مع شريحة كبيرة من المستخدمين.

الموبايل هنا مش بيدعم خاصية الـQHD+ ودي مش عارف أحطها في باند العيوب ولا المميزات الحقيقة، يعني البطارية كدا مش هتخلص بسرعة بس في نفس الوقت اللي كان بيدور على الـ QHD+ مش هيلاقيه في الموبايل ده.

الميزة بقى اللي عجبتني جدًا هي الـ120 هيرتز واللي سامسونج مش بتشغلها غير مع الـFHD+.

 

شاشة موبايل سامسونج S20 FE
شاشة موبايل سامسونج S20 FE

 

بالرغم إن الموبايل يُعتبر واحد من موبايلات سامسونج الرائدة إلا إن شاشته هتحس بإنها مطفية شوية ودا طبعًا بيخلي الشاشة في طريقها لشاشات الفئة المتوسطة، يعني مش الممتازة أوي ولا الوحشة اللي تخليك كاره الموبايل.

عندي تعليق صغير كمان على سطوع الشاشة، أنه مش بيوصل لأعلى درجات السطوع اللي متعودين نلاقيها في موبايلات سامسونج الرائدة، فلو هتستخدمه في الشمس مثلًا مش هيكون أفضل شيء ومش هيقدملك التجربة اللي بتستناها.

كاميرات موبايل سامسونج S20 FE:

الكاميرا الأمامية:

كاميرا السيلفي للموبايل بتصور بدقة 32 ميجا بكسل، بفتحة عدسة F/2.2 في ثقب الشاشة الصغير، والكاميرا كويسة جدًا بتطلع صور السيلفي كويسة أوي في الشمس.

الكاميرات الخلفية:

موجود في الموبايل 3 كاميرات خلفية:

الكاميرا الأولى، هي الكاميرا الأساسية للموبايل، بدقة 12 ميجا بكسل، مع فتحة عدسة F/1.8 بمثبت بصري.

الكاميرا التانية، بتييجي بدقة 8 ميجا بكسل، بفتحة عدسة F/2.4، وخاصة بالزوم 3X حقيقي وبيوصل 30X بالسوفت وير ديجيتال زوم مع مثبت بصري.

الكاميرا التالتة والأخيرة في الموبايل، دقتها 12 ميجا بكسل، مع فتحة عدسة F/2.2، وهي مخصصة للتصوير الواسع.

 

كاميرات موبايل سامسونج S20 FE
كاميرات موبايل سامسونج S20 FE

 

الكاميرات الحقيقة كانت أفضل حاجة في الموبايل دا، تخيل معايا كدا كاميرات فلاجشيب في موبايل زي السامسونج S20 FE الكاميرات بتقدم جودة صور ممتازة بألوان مشبعة بفضل تقنيات معالجة الصور من ساسمونج، الصور اللي بتطلع من الموبايل هنا بتكون صور مش محتاجة أي تعديلات أو إضافات بالعكس، أنت هتحب الصور الطبيعية من الموبايل مباشرةً أكتر.

كاميرا السيلفي كانت ممتازة في الشمس مع أداء أقل شوية في الإضاءات المنخفضة، النايت مود بقى هنا بيقدر يتدخل علشان ينقذ شوية صغيرين من الموقف ولكن لا يعتمد عليه بشكل كامل في التصوير الليلي منخفض اللإضاءة.

بالنسبة بقى لتصوير الفيديوز بالموبايل دا فالموبايل يعتبر معاه كاميرات Flagship حقيقية…

الموبايل بيصور 4K مع 60 فريم أو 30 فريم.

بيصور بجودة 1080p، مع 60 فريم بردز، وبيقدر يصور Super Slow-Motion… 

البصمة والزيادات:

البصمة:

الموبايل بييجي ببصمة تحت الشاشة ولكن للأسف مشوفناش من سامسونج أي تطور في المستشعر بتاع البصمة دي، لسة بطيء زي ما هو زي الموبايل اللي فات من سلسلة الـ S مفيش أي تغيير، بالتالي كان لازم إن أنا أعتمد على بصمة الوجه أثناء مدة استخدامي وتجربتي للموبايل، بصمة الوجه هنا كذلك مش أفضل بصمة وجه قابلتها في الموبايلات الرائدة، وحتى كمان فيه موبايلات الفئة المتوسطة تقدر إنها تتغلب عليها بسهولة!

المستشعرات:

  • مستشعر البصمة.
  • مستشعر تسارع.
  • مستشعر تقارب.
  • مستشعر جيروسكوب.
  • مستشعر بوصلة.
  • مستشعر بارومتر.

صوت الموبايل:

الموبايل بيقدم تجربة صوت ستيريو مميزة باستخدام سماعة المكالمات كداعم مع السماعة الرئيسية، اللي ضايقني هنا إن الموبايل مقتبس دور الموبايلات الرائدة وشايلين منه مدخل الـ 3.5 ملي بتاع الهاند فري!

الموبايل فيه مايك لعزل الضوضاء المحيطة أثناء المكالمات علشان لو بتتكلم وجنبك دوشة أو صوت عالي يوصل صوتك بدرجة نقية للطرف التاني دون تشويش.

يدعم الموبايل الاتصال قريب المدى الـ NFC.

يدعم تشغيل شريحتين إتصال من نوع Nano Sim.

يدعم الموبايل الميكروفون الثانوي الخاص بعزل الضوضاء وقت إستخدام الموبايل بصفة عامه.

لا يدعم الموبايل مدخل سماعات 3.5 ملم، علشان كدا يستخدم وصلة تحويل من Type C لـ 3.5 ملم.

يدعم البلوتوث بإصدار 5.0، مع دعمه لخاصيتي الـ A2DP, LE.

أيضًا يدعم تحديد الموقع الجغرافي الـ GPS، بالإضافة لدعمه إلى الـ A-GPS, GLONASS, BDS, GALILEO.

يدعم الموبايل الواي فاي بترددات الـ a/b/g/n/ac/ax، وكمان بيدعم الـ Dual-band, Wi-Fi Direct, hotspot.

منفذ الـ USB بييجي من النوع الأحدث الـ Type C، مع دعمه إلى خاصية الـ OTG.

الموبايل بييجي بنظام التشغيل الأحدث أندرويد 10، مع واجهة سامسونج الـ One UI 2.5.

ألوان الموبايل المتوفر بيها هي اللون الكحلي، وباللون اللافندر، وكمان باللون النعناعي، البرتقالي، واللون الأحمر.

أداء موبايل سامسونج S20 FE:

  • النسخة الموجودة في مصر واللي راجعناها هي نسخة الـ 4G بمعالج Exynos 990.
  • التردد 120 هيرتز.
  • رامات 8 جيجا بايت.
  • ذاكرة مساحتها 128 جيجا بايت من نوع UFS 3.1.

 

أداء موبايل سامسونج S20 FE
أداء موبايل سامسونج S20 FE

 

الأداء هنا فيه جزئين، جزء كويس وجزء سيء!

الكويس إن الموبايل بيقدم أداء رسومي قوي في الألعاب والتاسكات الكتيرة والتقيلة بسهولة ومفيش أي مشكلة حتى وقت تشغيل الـ 120 هيرتز.

السيء بقى إن البروسيسور دا بيسخن وبيسخن بشكل كبير، ولو نفتكر في مراجعة نوت 20 ألترا قولنا إن البروسيسور دا سخان ولومنا سامسونج على نظام التبريد السيء للموبايل، لكن هنا السخونية أهدى شوية بسبب التصميم البلاستيكي اللي بيشتت الحرارة من ضهر الموبايل بسرعة أكبر من سرعة التشتت في الضهر الزجاج بتاع الساسمسونج نوت 20 ألترا!

كمان بالرغم إن الموبايلين فيهم نفس المعالج بنفس الـ 120 هيرتز فأنا لاحظت قصور في الأداء في موبايل سامسونج S20 FE يعني أداءه أقل شوية من النوت ودا مش فاهمه بصراحة ولا فاهم سببه.

بطارية موبايل سامسونج S20 FE:

أول حاجة بنركز عليها في البطارية هو حجمها، وبطارية سامسونج S20 FE، حجمها كبير 4500 مللي أمبير.

بس عاوز أقولك إن الـ 4500 دول بيطيروا من الموبايل بسرعة جدًا!

البروسيسور اللي سامسونج اعتمدت عليه هنا وهو إكسينوس 990 للأسف بيسحب بطارية بطريقة كبيرة وكمان لأنه بيسخن أوي فاستهلاكه استهلاك ضخم، ضيف على دا كله الـ 120 هيرتز!

نروح بقى للشحن اللي بيزود المشكلة بإنه مش سريع أوي 25 وات، وفوق كدا بقى الشاحن اللي هتلاقيه في علبة الموبايل 15 وات بس، فالموبايل بياخد من ساعة لساعة ونص أو أكتر علشان يوصل لـ 100% ودا وقت كبير بالنسبة لموبايل بيستهلك البطارية بسرعة.

الموبايل بيدعم الشحن اللاسلكي بقوة 15 وات، كمان بيدعم الشحن اللاسلكي العكسي بقوة 4.5 وات.

 

بطارية موبايلسامسونج S20 FE
بطارية موبايلسامسونج S20 FE

سعر موبايل سامسونج S20 FE:

نسخة 128 جيجا مع 8 جيجا رام حاليا في مصر بـ 10440 جنيه مصري.

محتوايات علبة موبايل سامسونج S20 FE:

  1. موبايل سامسونج S20 FE، وعليه لاصقة حماية على الشاشة.
  2. شاحن بقوة 15 وات.
  3. اسكرينة بلاستيك تم وضعها بشكل مسبق على الشاشة.
  4. كابل الـ USB وبييجي من نوع Type C.
  5. كتيب التعليمات والضمان.
  6. دبوس معدني لفتح مكان شريحتي الاتصال.

الرأي النهائي في موبايل سامسونج S20 FE:

مميزات الموبايل:

  • الكاميرات قوية وبتصور بجودة عالية، والعيوب اللي فيها اتكلمنا عنها ولكن لا تزال المميزات أكتر من العيوب.
  • شاشة الموبايل سلسة جدًا في الاستعمال وممتازة وطبعًا دا بيرجع للـ 120 هيرتز.
  • تصميم الموبايل شيك جدًا وشكله حلو في الإيد.
  • دعم الشحن الـ Wireless.
  • الموبايل يقدر يقاوم المياه والأتربة.

عيوب الموبايل:

  • الحواف الخاصة بالشاشة حجمها كبير وكانت هتفرق لو كانت أصغر شوية.
  • درجة سطوع الشاشة مش الأفضل بين فئتها ولا الفئات الأقل كمان.
  • سرعة استهلاك البطارية، وبتاخد وقت مش قليل في الشحن.
  • هتلاقي الموبايل بيسخن في إيدك مع الاستعمال الكتير.
  • مدخل الـ 3.5 مللي مش موجود.
  • المعالج الخاص بالموبايل مش الأفضل.

سامسونج هنا كانت بتحاول تعمل توليفة من حاجات قوية مع بعضها ولكن للأسف ضيعت أجزاء كتير كانت ممكن تكون أفضل باهتمام بسيط خالص من الشركة، فأنا مرشحش الموبايل دا غير للناس اللي مقتنعة بيه اقتناع تام وعارفة هي رايحة تشتري إيه!

وبعد ما صديقي شاف مراجعتي للموبايل اللي كان عاوز يجيبه اتضايق وقالي طيب أنا هجيب إيه دلوقتي؟

قولتله متقلقش، وقتها عرفته إن إحنا بنقدم خدمة جديدة اسمها “اختار موبايلك”  واللي بيقدمها موقع ناس فونـــز الخدمة دي بتقدر من خلالها إنك تبعتلنا ميزانيتك والمتطلبات اللي محتاجها في موبايلك الجديد وإحنا بنرشحلك الموبايل المناسب لاحتياجاتك في أسرع وقت، لمعرفة هذه الخدمة إضغط هنـــــــــــا

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *