مراجعة موبايل سامسونج نوت 10+
سامسونج نوت 10+

على غير العادة هنا بنشوف سامسونج نوت 10+، ودا لأن سامسونج قررت تعمل المرة دي نسختين مش نسخة واحدة بس في سلسلة النوت، وكانت النسخة التانية من الموبايل Samsung Note 10 بحجم شاشة أقل، ودا المعتاد من سامسونج في فئة النوت، وبالفعل سامسونج  

وفرت الإصدارين Samsung Note 10 ،Samsung Note 10 Plus بحجمين مختلفيين.

كل التساؤلات والمخاوف اللي أنت بتفكر فيها هنوضحهالك بكل التفاصيل من خلال المقالة دي…

لكن لو محتاج حاجة سريعة أو ترشيح سريع لموبايل معين في فئة معينة فأنا برشحلك خدمة “اختار موبايلك”، واللي بيقدمها موقعنا ناس فونــز وهي خدمة بنقدمها بشكل حصري عن طريقنا واللي من خلالها بنعرف اهتماماتك والحاجات المهمة بالنسبة ليك في الموبايل، وكمان الميزانية بتاعتك وبنرشحلك بعد كدا الموبايل المناسب ليك على حسب الداتا اللي بعتهالنا، وتقدر تستخدم الخدمة دي من هنـــــــــــــا

تصميم موبايل سامسونج نوت 10+:

أولًا خامات الموبايل:

تصميم الضهر زجاجي بالكامل مع فريم معدني من الستانلس ستيل، وبييجي بطبقة حماية جوريلا جلاس على الضهر للحفاظ على الموبايل من الخارج.

ثانيًا التصميم الخارجي: 

تصميم الكاميرات:

تصميم الكاميرات المستطيل مع جوانب مستديرة موجودة في ضهر الموبايل، والتصميم ده كان مطابق للتصميم اللي شوفناه قبل كدا في التسريبات.

 

تصميم موبايل سامسونج نوت 7+
تصميم موبايل سامسونج نوت 10+

 

أبعاد الموبايل:

الموبايل بييجي بأبعاد 162.3*77.2*7.9 ملم.

وزن الموبايل خفيف جدًا ومناسب ومش متعب للإيد ودا لأن حجمه 168 جرام.

شاشة موبايل سامسونج نوت 10+:

شاشة سامسونج نوت 10+ هي شاشة مميزة جدًا من سامسونج، وهي 6.8 بوصة من نوع Dynamic AMOLED، بدقة QHD عالية مع دعم HDR+.

الجديد في تصميم الشاشة هو الـ Punch Hole أو ثقب الشاشة اللي متواجد فيه الكاميرا السيلفي للمرة الاولى موجود في نصف الشاشة بالظبط علشان يديلك شكل متماثل واستغلال للشاشة أحسن وحواف الشاشة أقل ما يمكن، وهي ممتازة بالنسبة لسلسلة النوت من سامسونج.

لما جربنا الشاشة كانت التجربة متميزة جدًا ووقتها قررت أخلي الموبايل دا موبايلي الشخصي لأنه كان أقوى حاجة مسكتها وكمان قدملي تجربة متكاملة!

 

شاشة موبايل سامسونج نوت 10 بلص
شاشة موبايل سامسونج نوت 10+

 

فيما يخص الشاشة بقى، كانت ألوانها مش هقول مميزة بس لأن هكون ظلمتها، ولكن الألوان هنا أقل ما يمكن نقوله إنها عملاقة!

الألوان دي بقى، مع التفاصيل اللي عودتنا عليها سامسونج بتعمل مزيج قوي، المزيج دا هيخليك تصور الحاجات من الحقيقة وتشوفها على الموبايل من حلاوة الشاشة وهتبطل تستخدم التليفزيون والشاشات خلاص وهتركز مع الموبايل 24 ساعة!

كاميرات موبايل سامسونج نوت 10+:

الكاميرا الأمامية:

كاميرا السيلفي بتييجي بدقة 10 ميجا بيكسل، مع فتحة عدسة F/2.2.

الكاميرا الخلفية:

بييجي الموبايل بكاميرا رباعية مميزة، الكاميرات 3 منهم موجودين على ضهر الموبايل في مستطيل زجاجي غير بارز، وكاميرا واحدة مع الفلاش في الضهر مباشرة.

  1. الكاميرا الرئيسية في سامسونج نوت 10+، هي 12 ميجا بيكسل، بفتحة عدسة متغيرة من F/1.5 إلى F/2.4، مع مثبت بصري OIS.
  2. الكاميرا الثانية، بتييجي بدقة 12 ميجا بيكسل، مع فتحة عدسة F/2.1.
  3. الكاميرا الثالثة، دقتها 16 ميجا بيكسل، مع فتحة عدسة F/2.2، وهي خاصة بالتصوير الواسع.
  4. كاميرا إضافية رابعة TOF لحسابات العمق والعزل.

مع دعم تصوير فيديوهات بجودة 4K، بمعدل 60 إطار لكل ثانية، وكمان تقدر تصور فيديو Live Focus بمعنى إنك تحدد شخص وأنت بتصور فيديو هيركز عليه وهيعمل Blurre على باقي الخلفية، ودي ميزة حلوة جدًا في تصوير الفيديوهات بسامسونج نوت 10+ الجديد.

 

كاميرات موبايل سامسونج نوت 10+
كاميرات موبايل سامسونج نوت 10+

 

لما جربت الكاميرات في الموبايل دا كانت تجربة مميزة جدًا، الكاميرا الأساسية تفاصيلها تتدرس، والألوان مظبوطة بشكل خيالي، طبعًا مع تجربة الشاشة الأموليد اللي في الموبايل مش هتتخيل شكل الصور من غير ما تشوفها بنفسك!

المثبت البصري بقى في الموبايل دا حكاية تانية، عارف لما تقعد تصور 20 صورة ويطلعوا كلهم مهزوزين بردو؟

السبب ساعتها ممكن يكون صاحبك اللي بيصورك، بس مع سامسونج نوت 10+ لو لقيت الصور مهزوزة فالسبب فعلًا هيكون صاحبك لأن الموبايل دا من تجربتي ليه طول الفترة دي مطلعش صورة واحدة مهزوزة.

الكاميرا في الوضع الليلي كويسة وبتقدم تجربة مش بطالة ولكن معجبتنيش أوي، لما جينا نجرب الفيديوز في الموبايل لقينا تجربة عملاقة من الكاميرات الحقيقة!

بالذات في السوبر ستيدي مود كانت تجربة ممتازة لأن أنا كنت بصور وأنا بتحرك وكان الموبايل بيتهز بشكل كبير ولكن الصورة كانت مظبوطة مع هزة بسيطة جدًا.

البصمة والزيادات:

البصمة: 

البصمة مدمجة بالشاشة Ultra-sonic، ودي تجربة لطيفة بالنسبة ليا لأن البصمة هنا كانت أسرع بكتير من موبايلات سامسونج في الفئة المتوسطة، كمان تجربة بصمة الوجه هنا كانت مرضية جدًا بالنسبة ليا وسريعة ومش بتعلق زي معظم الموبايلات.

المستشعرات: 

  1. مستشعر التقارب.
  2. مستشعر التسارع.
  3. مستشعر البوصلة.
  4. مستشعر الإضاءة.
  5. مستشعر البصمات. 
  6. مستشعر الجيروسكوب الخاص بنظارات الواقع الافتراضي الـ VR.

صوت الموبايل:

من خلال تجربتي بشوف إن صوت الموبايل في المكالمات نقي ومميز، لكن للأسف تم ازالة مدخل سماعات الـ 3.5 مم لأول مرة في سلسلة النوت، طبعًا أنا من الناس اللي بيفرق معاها جدًا وجود منفذ الـ 3.5 واتضايقت إنه مش موجود بس دا هو الاتجاه الجديد اللي ماشية فيه معظم الشركات دلوقتي وأعتقد مش هنشوف المدخل دا كتير الفترة الجاية.

ومع ذلك شركة سامسونج أضافت سماعة بمدخل Type C في علبة سامسونج نوت 10+ وأنا شايف دا في مصلحة المستهلك بالرغم إن معظم الشركات بطلت تحط سماعة في العلبة.

تجربة السماعات الخارجية في الموبايل كانت مميزة، ودا بيرجع لأن الموبايل بييجي بسماعات ستيريو سبيكرز قوية بتقدم أداء جبار.

يدعم موبايل سامسونج Note 10 Plus الميكروفون الإضافي الخاص بمنع الضوضاء وقت استخدامك للموبايل سوات وقت المكالمات أو التسجيل.

بييجي البلوتوث بالإصدار الخامس، مع دعمه لـ خاصية الـ A2DP، aptX، والـ LT.

يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.

أما عن الواي فاي في موبايل سامسونج Note 10 Plus فهو يدعم ترددات الـ ac/a/ax/b/g/n، كما يدعم الـ Dual-band, Wi-Fi Direct, hotspot.

الموبايل جاي بأحدث نظام تشغيل Android 9.0 pie، مع واجهة سامسونج الأحدث الـ One UI.

ألوان الموبايل اللى بيتوفر بيها هي اللون الأبيض، الأسود، والأزرق، وكمان الأبيض المتدرج.

يدعم الموبايل شبكات الـ 4G،والـ 3G، وكمان الـ 2G.

يدعم الموبايل امكانية تشغيل شريحتين اتصال في نفس الوقت من نوع Nano Sim.

أداء موبايل سامسونج نوت 10+:

الموبايل بييجي بمعالج Exynos 9825، وهو دا الإصدار اللي نزل في مصر حاليًا، وبييجي المعالج بتقنية 7 نانو، ومعالج رسومي من نوع Mali-G76 MP12

أداء المعالج هنا قريب من أداء معالج Snapdragon 855 واللي هيقدملك أداء متميز وسلس.

 

أداء موبايل سامسونج نوت 10+
أداء موبايل سامسونج نوت 10+

 

الموبايل بيوفر تجربة أداء فريدة من نوعها، يعني الألعاب على الموبايل دا بتشتغل بدون أي مشكلة خالص حتى لو مشغلها على إعدادت عالية فأنت مش هتواجه أي مشكلة مع الأداء، ببجي وكول أوف ديوتي كانوا بيشتغلوا بشكل ممتاز وعلى إعدادات عالية، لما جربت فورت نايت وقولت أكيد هتقطع الموبايل أثبتلي العكس ومقطعتش فعلًا وكانت تجربة مميزة الحقيقة.

الموبايل بييجي بنسختين نسخة 512 جيجا مع 12 جيجا رام.

النسخة التانية بتيجي بـ 256 جيجا مع 12 جيجا رام.

وممكن تضيف كارت ميموري لحد 1 تيرا وبيتحط مكان الشريحة التانية.

بطارية موبايل سامسونج نوت 10+:

البطارية بتيجي بسعة 4300 مللي أمبير، مع دعم شحن سريع لحد 45 وات، ولكن للأسف الشاحن المرفق 25 وات بس ودي حركة كويسة من سامسونج علشان تقلل التسعير شوية والشاحن الـ 25 كافي جدًا ومش وحش لشحن الموبايل.

 

بطارية موبايل سامسونج نوت 10+
بطارية موبايل سامسونج نوت 10+

 

تجربة البطارية هنا عجبتني بصراحة يعني لو أنت ناوي تستخدم الموبايل طول اليوم البطارية هتقعد معاك ومش هتحتاج تشحنها كتير، لكن لو أنت هتستخدمه استخدام تقيل ممكن تحتاج تشحنها.

سعر موبايل سامسونج نوت 10+:

السعر الرسمي في مصر 13 ألف جنيه مصري للنسخة 256 جيجا مع 12 جيجا رام.

والنسخة التانية غير متوفرة بالسوق المصري.

محتويات علبة موبايل سامسونج نوت 10+:

  1. موبايل سامسونج نوت 10+.
  2. شاحن بقوة 25 وات.
  3. كابل الـ USB من نوع Type C.
  4. كتيب التعليمات مع الضمان يشرح كيفية استخدام الموبايل.
  5. دبوس معدني لفتح مكان شريحتي الاتصال.
  6. هاند فري من نوع AKG.
  7. قلم الـ S Pen.
  8. منفذ OTG.
  9. جراب ضهر من السيلكون.
  10. اسكرينة بلاستيك.

الرأي النهائي في موبايل سامسونج نوت 10+:

الموبايل فيه شوية عيوب، وفيه شوية مميزات ولكن يظل موبايل محترم بيقدم تجربة قوية وتجربة فلاجشيب من شركة زي سامسونج هي تجربة محترمة جدًا.

عيوب الموبايل:

  • علبة الهاتف لا تأتي مشتملة على الشاحن الـ 45 وات.
  • الهاتف لا يدعم منفذ الـ 3.5 ملم لأول مرة في سلسلة النوت ولكن سامسونج قدمت سماعة من تايب سي في العلبة.

مميزات الموبايل:

  • وزن الهاتف أصبح أخف مقارنةً بالـ Note 9 السابق، ودا بيخلي مسكته مريحة أكتر.
  • أداء المعالج ممتاز أوي بالأخص مع الذاكرة الـ UFS 3.0 اللي بتخلي الأداء أسرع.
  • تحسين وتطور كبير بشكل غير مسبق في القلم الـ S Pen اللي بقى بيدعم المستشعرات زي التقارب والجيروسكوب ودا اللي بيخليه يقدر يشتغل كريموت للموبايل عن طريق حركات معينة.
  • الشاشة العملاقة اللي بتقدملك أداء مش بيتغير حتى تحت ضوء الشمس المباشر.
  • البطارية تقدم أداء ممتاز مع دعمها للشحن السريع بقوة 25 وات.
  • ألوان متعددة مع تصميم عصري مقارنةً بالهواتف السابقة.

رأيي إن الموبايل صفقة ممتازة لأي حد عاوز يعيش تجربة الفلاجشيب بكل أركانها بدون تنازلات، الموبايل ممتاز ويستحق الشراء وأرشحه بقوة وسط المنافسين حتى بعد ما عدا عليه وقت فأداءه لسة مقبول في فئته وبيقدم تجربة قوية.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *