مراجعة موبايل Oppo A93
Oppo A93

الجهاز دا بمثابة تحديث أو تطوير لنسخة Oppo A92 من حيث التصميم المتميز، والشاشة وأداء الكاميرات والبصمة كمان، فهو أعلى جهاز في سلسلة الـ A من Oppo حاليًا في السوق.

وكالعادة هنعرف كل حاجة عن جهاز Oppo A93 بالتفصيل من حيث إمكانياته وأداؤه ومميزاته وعيوبه عشان نعرف الفرق بينه وبين نسخة الـ A92 اللي كانت قبله، وعلشان تقدر بكل سهولة تميز بينه وبين أي إصدار تاني سواء من نفس الشركة أو من الشركات المنافسة.

وقبل ما ندخل في المراجعة خليني أقترح عليك خدمة من الخدمات اللي بنقدمها وهي خدمة “اختار موبايلك” واللى بيقدمها مــوقــع نـاس فــونــز، الخدمة دي عن طريقها هنرشحلك الموبايل المناسب لاحتياجاتك ببساطة علشان تلاقي أفضل موبايل وسط الموبايلات الكتير اللي في السوق حاليًا، كل اللي عليك تعمله اضغط هنــــا… وابعتلنا ميزانيتك والمواصفات اللي بتعوزها في الموبايل وإحنا هنرشحلك الجهاز المناسب ليك.

خلينا ندخل في المراجعة…

تصميم موبايل Oppo A93:

أولًا الخامات:

 خامات الجهاز دا كعادة السلسلة دي من Oppo من البلاستيك اللامع العصري من نوع بولي كاربونيت ودا ميزته إنه عملي جدا وأنيق في نفس الوقت، ممكن يكون بيبصم شوية بس دي مشكلة ممكن تتحل بجراب بكل سهولة.

ثانيا التصميم الخارجي:

 

تصميم موبايل Oppo A93
تصميم موبايل Oppo A93

 

أبعاد الجهاز:

  • الجهاز بييجي بأبعاد 160.14×73.77×7.48 ملم.
  • مع وزن 164 جرام.

وده وزن خفيف جدًا، وهتلاقيه مريح جدا في الإيد حتى لو استخدمته لفترات طويلة خلال اليوم.

الموبايل هنا فيه ميزة عجبتني ودي حاجة بشوفها حلوة بصراحة، وهي إن الموبايل ده بييجي باختيارات متعددة في الألوان يعني تقدر تختار اللون المناسب ليك بسهولة عكس موبايلات كتير بتكون إصداراتها محدودة

يتوفر الجهاز باللون الأبيض، اللون الأسود، واللون الأزرق اللي بتسميه أوبو الأزرق الساحر.

شاشة موبايل Oppo A93:

  • الشاشة هنا من نوع AMOLED أجود أنواع الشاشات وده مكانش نفس نوع شاشات باقي السلسلة دي من Oppo.
  •  الشاشة فيها ثقبين للسيلفي و مساحتها 6.43 إنش بجودة الـ FHD+ بدقة 1080×2400 بكسل، يعني بمعدل كثافة بكسلات 409 بكسل لكل إنش.
  •  نسب أبعاد العرض في الشاشة 20:9 وبتشغل نسبة 90.67% من الواجهة الأمامية للجهاز ودي بردو شايفها ميزة كويسة للناس اللي بتحب الشاشة الكاملة.
  • معدل التحديث في الشاشة للأسف 60 هرتز فقط ولكنه مقبول.

لكن كتقييم عام الشاشة الـ AMOLED في الجهاز دا بتقدم أداء ممتاز من حيث الحدة والسطوع وتشبع الألوان ودا المعروف عن شاشات أموليد عمومًا وبتمنى أشوف التوجه ده من أوبو دايمًا في الشاشات، وكمان أوبو في الموبايل دا بتكون مركبة سكرين لحماية الشاشة أول ما تفتح الجهاز هتلاقيها عليه وهو في العلبة، ولكن هنا أنا حسيت إنهم بيداروا موضوع إن الشاشة مفيش عليها طبقة حماية زي غوريلا جلاس مثلًا حتى لو جيل قديم بموضوع الاسكرينة ده، بس ممكن نبلعها خصوصًا في الفئة دي.

 

شاشة موبايل Oppo A93
شاشة موبايل Oppo A93

كاميرات موبايل Oppo A93:

الكاميرا الأمامية:

 يأتي بكاميرا ثنائية: 

 الكاميرا الأولى: بتييجي بدقة 16 ميجا بكسل بفتحة عدسة F/2.4 بمستشعر من نوع Sony IMX 471.

  الكاميرا التانية: بتييجي بدقة 2 ميجا بكسل بفتحة عدسة F/2.4 بمستشعر من نوع GC02M1B ودي بتكون خاصة بعمل العزل والبورتريه.

الكاميرا الخلفية:

عبارة عن أربع كاميرات مع بعض في بوكس واحد مع الفلاش، تصميمها جذاب وشيك عاجبني شخصيًا…

وفيه بروز بسيط جدا لكاميرات الموبايل في الضهر.

 الكاميرا الأولى: بتييجي بدقة 48 ميجا بكسل بفتحة عدسة F/1.7 بمستشعر من نوع Samsung GM1ST وهي الكاميرا الأساسية طبعًا.

 والكاميرا الثانية: ودي بتييجي بدقة 8 ميجا بكسل بفتحة عدسة F/2.2 وهي الخاصة بالتصوير الواسع.

  الكاميرا الثالثة: دي بقا دقتها 2 ميجا بكسل بفتحة عدسة F/2.4

 الكاميرا الرابعة: دقتها 2 ميجا بكسل بفتحة عدسة F/2.4 بالإضافة إلى فلاش من نوع ليد فلاش.

الكاميرات هنا بتيجي بفلاش أحادي من نوع الليد فلاش علشان يساعد شوية في الإضاءات الضعيفة.

 

كاميرات موبايل Oppo A93
كاميرات موبايل Oppo A93

 

بالنسبة لتصوير الفيديوهات:

 فالموبايل بيدعم تصوير فيديوهات الـ 4K بدقة الـ 2160 بكسل بمعدل التقاط 30 إطار في الثانية 

بالإضافة إلى إنه يدعم:

  • التصوير بجودة الـ FHD بدقة 1080 بكسل بمعدل التقاط 30 إطار في الثانية.
  • التصوير بجودة الـ HD بدقة 720 بكسل بمعدل التقاط 30 إطار في الثانية، كما يدعم التصوير الـ Slow Motion بجودة الـ FHD بدقة 1080 بكسل بمعدل التقاط 120 إطار في الثانية.
  • التصوير الـ HD بدقة 720 بكسل بمعدل التقاط 240 إطار في الثانية. 

الكاميرات هنا تركيبة غريبة وغير مفهومة على الإطلاق على الأقل بالنسبة ليا أنا، يعني مفهمتش ازاي الموبايل بيقدم تجربة سيلفي تسبق فئته بس بشرط التصوير يكون في إضاءة عالية وإلا هتاخد صورة بدون تفاصيل خالص لو جربت حتى تتصور في إضاءة متوسطة أو عادية.

على الجانب الآخر الكاميرات الخلفية كانت كارثة حقيقية بكل المقاييس، الألوان والتفاصيل المفروض إمكانيات الكاميرا تسمح بيهم عادي بشكل طبيعي لأن الكاميرا على الورق مش وحشة، بس اللي بيحصل إن غالبا السوفت وير بتاع أوبو بيحاول يطلعلك الصور بشكل معين فبيروح مبوظها وماسح منها الألوان والتفاصيل بدون سبب عقلاني.

البصمة والزيادات:

البصمة هنا مدمجة في شاشة الجهاز ودي أوبو استخدمت فيها مستشعر محترم وسريع ومكانش عندي أي مشاكل معاه الحقيقة، كمان بصمة الوجه شغالة بكفاءة وبتأدي المطلوب منها بشكل كويس.

بالإضافة إلى دعم الجهاز لعدة مستشعرات أخرى مثل: 

  • مستشعر التسارع.
  • مستشعر القرب.
  • مستشعر البوصلة.
  • مستشعر الجيروسكوب.

الواي فاي هنا بيجي بترددات الـ a/b/g/n/ac بالإضافة إلى أنه يدعم الـ Dual-band, Wi-Fi Direct, hotspot.

الجهاز يدعم أيضًا الـ GPS بالإضافة إلى دعمه أنظمة الملاحة الأخرى مثل الـ A-GPS, GLONASS, GALILEO, BDS, QZSS. 

الموبايل بيدعم تركيب شريحتين اتصال من نوع Nano Sim.

Oppo A93 يدعم شبكات الاتصال الجيل الثاني الـ 2G، والجيل التالت الـ 3G، والجيل الرابع الـ 4G.

البلوتوث بييجي بإصدار الـ 5.1، وبيدعم الـ A2DP, LE, aptX HD.

منفذ الـ USB اللي في الموبايل من النوع الأحدث الـ Type C، بالإضافة إنه بيدعم خاصية الـ OTG.

Oppo A93 بييجي بنظام تشغيل أندرويد 10 مع واجهة  Oppo الأحدث الـ Color OS 7.2.

صوت موبايل Oppo A93:

يدعم الموبايل الميكروفون الإضافي الخاص بعزل الضوضاء ودا للناس اللي بتحب تسجل ريكوردات أو تصور فيديو أو حتى بتعمل مكالمة، المايك ده هيعزل أي دوشة أو أي صوت تاني جنبك.

الموبايل بييجي بمنفذ الـ 3.5 ملم الخاص بسماعات الأذن، لكن للأسف صوت الهاتف أصبح عادي مش استريو زي ما كان في Oppo A92 ودي نقطة حقيقي مفهمتهاش اللي هو أنت بتتقدم بالموبايل ولا بتتأخر!

عالعموم نقدر نقيم أداء الصوت بصفة عامة بإنه عالي، مش حلو أوي ولكن جودته كويسة نوعًا ما.

أداء موبايل Oppo A93:

  • الموبايل بييجي بمساحة 128 جيجابايت تأتي من نوع UFS 2.1 مع ذاكرة عشوائية بسعة 8 جيجا بايت من نوع LPDDR4.

بالإضافة إلى دعم الموبايل إمكانية زيادة المساحة التخزينية عن طريق كارت ميموري.

  • نظام التشغيل في الجهاز هو الأحدث android 10 مع واجهة Oppo الأحدث الـ Coloros 7.2.
  • الهاتف يأتي بمعالج من شركة ميديا تيك من نوع Helio P 95 بتكنولوجيا 12 نانو فهو نفس معالج هاتف Oppo Reno 3 Pro.
  •  وبالنسبة للمعالج الرسومي، فيأتي من نوع PowerVR GM 9446 

 ويدعم الـ Hyper Engine  لتقديم أداء أفضل ولتحسين تجربتك أثناء اللعب.

لكن على الرغم من إن الأداء ممتاز في معظم المهام اليومية زي التصفح والتاسكات أو حتى الألعاب الخفيفة، إلا إنه في الألعاب مش جيد للدرجة اللي تخليك تجيبه مخصوص للألعاب زي بابجي وغيرها، فهو مش مناسب للجيمرز بصفة عامة ولا للألعاب بصفة خاصة.

 

أداء موبايل Oppo A93
أداء موبايل Oppo A93

 

بطارية موبايل Oppo A93:

البطارية سعتها 4000 مللي أمبير ودي سعة قليلة بالنسبة لسعة البطاريات اللي في نفس السلسلة دي من Oppo مع دعم الموبايل للشحن السريع بقوة 18 وات.

سعة البطارية القليلة ميزت الجهاز بصغر حجمه وخفة وزنه، لكن بالنسبة لأدائها وأداء الشحن فهو مش أحسن حاجة خصوصًا إن البطارية عشان تشحن بتاخد مدة طويلة جدا بتوصل لساعتين ومقارنةً بالإصدارات القديمة فيعتبر مفيش أي جديد.

 

بطارية موبايل Oppo A93
بطارية موبايل Oppo A93

 

فتح علبة موبايل Oppo A93:

  • موبايل Oppo A93.
  • سكرين تم وضعها بشكل مسبق على شاشة الهاتف.
  • رأس الشاحن بقوة 18 وات.
  • سماعات الأذن.
  • جراب ظهر شفاف لحماية الهاتف.
  • دبوس معدني.
  • كتيب التعليمات يوضح كيفية استخدام الهاتف.
  • كابل USB من نوع Type C.

سعر موبايل Oppo A93:

السعر في السوق المصري حاليًا حوالي 4800 جنيه مصري واللي بشوفه سعر مبالغ فيه بصراحة.

الرأي النهائي النهائي لموبايل Oppo A93:

المميزات:

  • يدعم التصوير الـ 4K.
  • وزن الهاتف خفيف ومع التخانة النحيفة فهو جيد جدًا في الاستخدام.
  • يدعم تشغيل شريحتين وكارت ميموري في نفس الوقت.
  • مستشعر البصمة المدمج بالشاشة يعمل بشكل مقبول وسريع كما هو معتاد من أوبو في هواتفها.
  • شاشة AMOLED تقدم أداء مميز من حيث مستوى الرؤية والسطوع فهي من أفضل أنواع الشاشات .

العيوب:

  • توجد هواتف أخرى منافسة بخامات زجاجية.
  • البطارية أقل في السعة.
  • صوت الهاتف أصبح عادي و ليس استريو كما كان في Oppo A92.
  • كنا نطمح أن يأتي الهاتف بقوة شحن أفضل وأن يتم إستخدام الـ VOOC.

الخلاصة:

بالنسبة لمميزات الجهاز ما نقدرش ننكر إنها كتيرة وعيوبه متساوية مع مميزاته، لكن لما نيجي نقارن ما بينه وما بين أجهزة الشركات المنافسة، هنلاقي إن الإصدار دا بإمكانياته دي سعره غالي جدًا…

خصوصًا بالنسبة لأداء البطارية وقوة الشحن والخامات فلو كان بسعر أقل كان هيبقى أحسن ويقدر ينافس الإصدارات التانية بشكل أقوى، فلو بتسألني وعاوز تشتري الجهاز ده فأنا أقدر أقولك بكل أريحية، متشتريش Oppo A93 خالص.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *