قدرت شركة Oppo بالإصدار دا إنها تحقق أعلى مبيعات من بين كل إصدارتها، طب هل دا معناه إن جهاز Oppo A92 فيه مميزات كتير للدرجة دي ومافيهوش ولا عيب؟!
هل هو أحسن إصدار في سنته لشركته وللشركات المنافسة؟
دا اللي هنعرفه دلوقتي لأننا كالعادة هنوضح كل تفاصيل، وإمكانيات الجهاز، ومميزاته وعيوبه عشان تقدر تعرف قيمة الجهاز دا بالنسبالك إيه وليه هو حقق كل المبيعات العالية دي؟
وقبل ما ندخل في المراجعة خليني أقترح عليك خدمة من الخدمات اللي بنقدمها وهي خدمة “اختار موبايلك” واللى بيقدمها مــوقــع نـاس فــونــز، الخدمة دي عن طريقها هنرشحلك الموبايل المناسب لاحتياجاتك ببساطة علشان تلاقي أفضل موبايل وسط بحر الموبايلات اللي في السوق حاليًا، كل اللي عليك تعمله اضغط هنا… وابعتلنا ميزانيتك والمواصفات اللي بتعوزها في الموبايل وإحنا هنرشحلك المناسب ليك.
خلينا ندخل في المراجعة…
تصميم موبايل Oppo A92:
أولًا خامات الموبايل:
هنبدأ بخامات الجهاز اللي هي من البلاستيك اللامع البولي كاربونيت، عالي الجودة مع فريم من الألومونيوم اللامع أيضًا، ومع إنها خامات مش من الزجاج الفخم زي خامات الإصدارات المنافسة، إلا إن جودتها عالية وشكلها شيك وحلوة جدًا.
ثانيًا التصميم الخارجي:
أبعاد الموبايل
بييجي الموبايل بأبعاد 162×75.5×8.9 ملم.
مع وزن يقدر بـ 192 جرام.
وده وزن يعتبر متوسط مش تقيل ولا خفيف.
يتوفر الجهاز باللون الأبيض، الأسود، والبنفسجي وأفضلهم اللون الأبيض فهو أكتر لون بيدَي شكل أنيق للجهاز.
شاشة موبايل Oppo A92:
- الشاشة عليها طبقة حماية من نوع غوريلا جلاس الجيل التالت.
- الشاشة في الجهاز دا من نوع IPS LCD وبتيجي على شكل الثقب وOppo بتسميها Neo Display، وبتدعم 16 مليون لون بالإضافة لخاصية اللمس المتعدد.
- مساحة الشاشة 6.5 إنش بجودة الـ FHD+ بدقة 1080×2400 بكسل، يعني بمعدل كثافة بكسلات 405 بكسل لكل إنش.
- الشاشة أبعاد العرض فيها بنسبة 20:9، وأعلنت الشركة إن شاشة الجهاز تحتل نسبة 90.5% من الواجهة الأمامية، ودي حاجة أنا بشوفها ممتازة لأني بفضل الشاشة الكاملة، مع إمكانية إلغاء أزرار التحكم واستخدام الإيماءات بدلًا منها علشان تستمتع بتجربة الشاشة على أكمل وجه.
- كمان بتدعم الشاشة وضع Eye Care للحفاظ على عينك خلال استخدام الجهاز لفترات طويلة في اليوم، بالإضافة لدعمه وضع الـ Dark Mode لتحويل شاشة الهاتف بالكامل إلى اللون الأسود.
تجربة الشاشة بقى، التجربة هنا كانت عالية جدا، الألوان كانت مشبعة وواخدة حقها، فبتحس إنك بتشوف الحاجة قدامك على الحقيقة
يعني نقدر نقول إن الشاشة بتقدم أداء وكوالتي فوق الممتاز، بالإضافة إلى إن سطوعها حتى تحت أشعة الشمس حقيقي كويس جدًا بغض النظر عن كونها شاشة LCD مش Amoled ولكن تعتبر شاشة كويسة مش وحشة بين شاشات الـ LCD المنتشرة في السوق.
ده إلى جانب دعم الشاشة لـ 16 مليون لون جعلوا تجربة الشاشة ساحرة، حيوية طبيعية، فائقة الوضوح والنقاء فعلًا…
وفي نفس الوقت فيها كل المميزات والإضافات اللي تخليها مُريحة للعين.
وماننساش إنها تميزت بعرض أي محتوى سواء أفلام أو فيديوهات بشكل واضح، أوسع، وكمان أكبر من المعتاد.
لكن بردو في النهاية وعلى الرغم من مميزاتها مانقدرش نقول أحسن حاجة بالنسبة للسعر من حيث النوع والأداء لكن هي تعتبر من الأفضل في فئتها.
كاميرات موبايل Oppo A92:
الكاميرا الأمامية:
- بتصور بدقة 16 ميجا بكسل بفتحة عدسة F/2.0.
الكاميرا الخلفية:
عبارة عن أربع كاميرات مع بعض في بوكس مع الفلاش، تصميمها كويس وشيك جدًا.
وبالمناسبة الكاميرات الخلفية بالذات بتقدملك أداء قوي وممتاز، عجبتني جدا وتفاصيلها حلوة حتى لما بنعمل زوم، وكان الأداء حلو جدا جدا لما استخدمنا الكاميرا الـ48 ميجا.
الألوان بتطلع مظبوطة جدا وجودتها حلوة في الظروف العادية، والإضاءة كمان لو كانت قليلة ده مش هيأثر بشكل كبير على الصور وده عجبني بصراحة في الكاميرات.
بس تعالى نتكلم عنهم بالتفصيل بردو…
الكاميرا الأولى: بتصور بدقة 48 ميجا بكسل بفتحة عدسة F/1.7 وهي الكاميرا الأساسية جودتها جيدة جدًا.
والكاميرا الثانية: ودي دقتها 8 ميجا بكسل بفتحة عدسة F/2.2 وهي الخاصة بالتصوير الواسع الـ Ultra Wide للتصوير من أي بُعد أو مسافة.
الكاميرا الثالثة: ودقتها 2 ميجا بكسل بفتحة عدسة F/2.4 ودي بتكون خاصة بالعزل.
الكاميرا الرابعة: بدقة 2 ميجا بكسل بفتحة عدسة F/2.4 وهي الكاميرا الخاصة بالتصوير الأبيض والأسود الـ Mono مع فلاش أحادي من نوع ليد فلاش مع دعم الكاميرا للتصوير الـ Ultra Night Mode 2.0.
بالنسبة لتصوير الفيديوهات: يدعم الجهاز التصوير للفيديوهات بجودة الـ 4K بدقة 2160 بكسل بمعدل التقاط 30 إطار في الثانية.
كما يدعم التصوير بجودة الـ FHD بدقة 1080 بكسل بمعدل التقاط 30 و120 إطار في الثانية.
وكمان التصوير بجودة الـ HD بدقة 720 بكسل بمعدل التقاط 30 إطار في الثانية.
مفيش شك إن جودة الكاميرات هنا كويسة جدًا، لكن تقدر تستخدم للكاميرا أبلكيشن google camera ودا حرفيًا هيخلي أداء الكاميرات فوق الممتاز، وهتلاقي جودة ونقاء صور الكاميرا معاك أصبحت أفضل بكتير…
أما بالنسبة للتصوير في الإضاءات المنخفضة أو الضعيفة، فالكاميرا هنا بتضمن لك صور بجودة ساحرة، فائقة الوضوح والدقة حتى في أي أجواء معتمة.
البصمة والزيادات:
البصمة هنا مدمجة بزرار الباور، ودا بيخليها سريعة وعملية جدًا وسهلة.
المستشعرات
مستشعر التسارع.
مستشعر القرب.
مستشعر البوصلة.
للأسف مش بيتوفر فالجهاز دا لمبة إشعارات ولا حتى بديل ليها.
الموبايل هنا فيه ميزة حلوة جدًا وهي قوة أداء الشبكات فائقة الجودة وعالية جدًا ويمكن دا من أهم أسباب إقبال الناس على الإصدار ده.
الجهاز بيدعم الموقع الجغرافي الـ GPS مع دعمه لأنظمة الملاحة الأخرى مثل:
الـ A-GPS, GLONASS, GALILEO, BDS
الواي فاي بتردد a/b/g/n/ac، وكمان الموبايل بيدعم dual-band, Wi-Fi Direct, hotspot.
منفذ الشحن بييجي من نوع Type C، بالإضافة لخاصية الـ OTG.
الموبايل بيدعم تركيب شريحتين اتصال من نوع Nano Sim.
يدعم شبكات الاتصال الجيل التاني الـ 2G، والجيل التالت الـ 3G، والجيل الرابع الـ 4G.
يدعم الواي فاي بترددات الـ a/b/g/n/ac بالإضافة لدعمه الـ Dual-band, Wi-Fi Direct, hotspot.
Oppo A92 بييجي بنظام تشغيل اندرويد 10 مع واجهة Oppo الـ Coloros 7.1.
صوت موبايل Oppo A92:
الجهاز للأسف مبيدعمش المايك الإضافي العازل للضوضاء
لكن في المقابل، الموبايل بييجي بصوت ستيريو بيخرج من السماعة السفلية وسماعة المكالمات مع بعض!
الحاجة اللي اتغيرت كمان في الإصدار دا عن باقي إصدارات Oppo هي إن الجهاز بقا يستخدم أبلكيشن المكالمات من google واللي بالتالي أدى إلى اختفاء ميزة تسجيل المكالمات.
بس تجربة الصوت عمومًا مضمونة بجودة وكفاءة عالية جدًا هنا ومش موجودة كتير في الموبايلات المنافسة من نفس الفئة السعرية دي ولا حتى في الفئات السعرية الأعلى.
أداء موبايل Oppo A92:
- الموبايل بييجي بمساحة تخزينيه عالية 128 جيجا بايت من نوع UFS 2.1 مع ذاكرة عشوائية بسعة 8 جيجا بايت من نوع LPDDR4X،
- بالإضافة لدعم الموبايل إمكانية زيادة المساحة التخزينية عن طريق كارت الميموري بمنفذ مخصص.
- أما عن الأداء، فالجهاز المعالج فيه ثماني النواة من شركة كوالكوم، نوعه Snapdragon 665 بتكنولوجيا 11 نانو، مع معالج رسومي من نوع Adreno 610، دا وبالإضافة لدعم الموبايل خاصية الـ Hyper Boost ودي طبعًا بتحسن أداء الجهاز جدا وبتزود كفاءة أدائه في الألعاب.
نظام تشغيل الجهاز هو أحدث نظام تشغيل Android 10 مع واجهة Oppo الـ coloros 7.2.
المعالج اللي في الجهاز ده نقدر نقول عليه متواضع، لأنه موجود في أجهزة من شركات تانية بنص سعر الجهاز دا تقريبًا، لكن بردو دا مش معناه إن أداؤه سيء أوي ولكن ببساطة مش الأفضل.
بطارية موبايل Oppo A92:
البطارية تأتي بسعة 5000 مللي أمبير وتدعم الشحن السريع بقوة 18 وات.
كان طبعًا من الأفضل استخدام شاحن أسرع من 18 وات؛ لأنه بيشحن البطارية في ساعتين وربع، ودا زمن كبير نسبيًا على سعر الجهاز مقارنةً بالإصدارات المنافسة اللي غالبًا كلها بتشحن في أقل من ساعة.
فتح علبة موبايل Oppo A92:
- موبايل Oppo A92 مع طبقة حماية تم وضعها بشكل مسبق.
- رأس الشاحن بقوة 18 وات.
- كابل USB من النوع الأحدث الـ Type C.
- دبوس معدني.
- سماعات الأذن وتأتي بمنفذ الـ 3.5 ملم.
- كتيب التعليمات يوضح كيفية استخدام الهاتف بالإضافة لضمان الهاتف.
- جراب ظهر لحماية الهاتف.
سعر موبايل Oppo A92:
سعر الجهاز في السوق المصري حاليًا 4400 جنيه مصري.
الرأي النهائي في موبايل Oppo A92:
المميزات:
- يدعم تصوير الفيديوهات بجودة الـ 4K ولكن بدون ثبات إلكتروني.
- شبكات اتصال ممتازة.
- السماعات الخارجية تدعم الصوت الاستيريو.
- يدعم إمكانية تشغيل شريحتين وكارت ميموري في نفس الوقت.
- البطارية تصمد لفترة طويلة خلال اليوم.
- مستشعر البصمة المدمج بزر الباور يعمل بشكل سريع وموثوق.
- شاشة بشكل الثقب الأحدث بجودة الـ FHD+ تقدم أداء جيد مع استغلال جيد للحواف.
العيوب:
- يفتقد الهاتف إلى لمبة الاشعارات.
- لا يقدم الأداء والمواصفات القوية مقابل سعره.
- لا يدعم ميكروفون إضافي لعزل الضجيج.
- كان من الأفضل استخدام شاحن أسرع من 18 وات.
- لا جديد على التصميم بالمقارنة مع الـ Oppo A52.
- تصميم الهاتف من البلاستيك كان يفضل أن يكون من الزجاج.
- لا يقدم الهاتف أداء قوي من الكاميرات.
الخلاصة:
الموبايل بصراحة تصميمه شيك جدًا وطبعًا مميزات الجهاز كتيرة جدًا زي ما وضحنا واللي تعتبر قدام عيوبه لا تذكر، لكن كان ممكن يكون الجهاز دا بسعر أقل؛ لأن بالنسبة للمعالج، وقدرة الشحن الخاص بيه، ونوع الشاشة، فهو مش واصل لمستوى ممتاز مقارنةً بالإصدارات المنافسة، لكن نقدر نقول أنه موبايل عملي وشيك بالنسبة لإمكانياته وسعره مقبول نوعًا ما ولكن مبرشحوش لو أنت بتدور على أداء قوي أو موبايل للجيمز نهائي، وبقولك خليك في البدائل اللي بتيجي ببروسيسور أعلى حتى لو على حساب حاجات تانية، في الأول والآخر لازم تكون محدد أولوياتك.