مراجعة موبايل Oppo A52
oppo A52

يصنف جهاز Oppo a52 من أجهزة الفئة المتوسطة المتميزة جدًا بسعر ممتاز، وأداء هايل، وسعة بطارية ضخمة… 

ودا اللي ميز الجهاز ده عن باقي إصدارات سلسلة الـ A من Oppo، وعشان نعرف بالظبط المميز فيه هنوضح كل تفاصيل وإمكانيات الجهاز وأيضًا كل المميزات والعيوب اللي فيه عشان تقدر تقرر قيمته بالنسبالك إيه وهل يستحق تشتريه ولا لا ؟

وقبل ما ندخل في المراجعة خليني أقترح عليك خدمة من الخدمات اللي بنقدمها وهي خدمة “اختار موبايلك” واللي بيقدمها مــــوقع ناس فونـــــــز والخدمة دي عن طريقها هنرشحلك الموبايل المناسب لاحتياجاتك ببساطة علشان تلاقي أفضل موبايل وسط بحر الموبايلات اللي في السوق حاليًا، كل اللي عليك تعمله اضغط هنـــــــــا… وابعتلنا ميزانيتك والمواصفات اللي بتعوزها في الموبايل وإحنا هنرشحلك المناسب ليك.

خلينا ندخل في المراجعة…

تصميم موبايل Oppo A52:

أولًا الخامات:

 خامات الجهاز هنا كعادة Oppo في السلسلة دي من البلاستيك اللامع البولي كاربونيت عالي الجودة، واللي للأسف بيكون معرض للخدش والتبصيم بسهولة مع فريم معدني مميز حوالين الكاميرات الخلفية.

ثانيًا التصميم الخارجي:

أبعاد الموبايل:

  • الجهاز بييجي بأبعاد 162×75.5×8.9 ملم.
  • وزنه 192 جرام.
  • يتوفر الجهاز باللون الأسود واللون الأزرق الفاتح.

وده طبعًا وزن متوسط مش تقيل أوي ولا خفيف أوي.

الموبايل فيه بروز بسيط في الضهر للكاميرات الخلفية على شكل حرف L وزي ما قولنا بيحيط فريم معدني ببوكس الكاميرات.

مكانش فيه أي إعلان رسمي عن وجود طبقة حماية على الشاشة ولا حتى بييجي معاه في العلبة سكرين الحماية العادية.

 

تصميم موبايل Oppo A52
تصميم موبايل Oppo A52

 

شاشة موبايل Oppo A52:

  • الشاشة من نوع LTPS IPS LCD.
  •  مساحتها 6.5 إنش بجودة الـ FHD+ ودقتها 1080×2400 بكسل يعني بمعدل كثافة بكسلات 405 بكسل لكل إنش، وبتيجي طبعًا على شكل الثقب مع إنحناء في الأطراف.

وتدعم الشاشة أبعاد العرض الجديدة بنسبة 20:9 بالإضافة لأنها بتشغل نسبة 91% من الواجهة الأمامية للجهاز ودي نسبة استحواذ بشوفها ممتازة جدا للناس اللي بتحب الشاشات الكاملة.

وتدعم الشاشة وضع حماية العين من الأشعة الزرقاء بالإضافة لدعمها لوضع الـ Dark Mode لتحويل شاشة الهاتف بالكامل إلى اللون الأسود. 

كما يمكنك إلغاء أزرار التحكم واستخدام الإيماءات للاستمتاع بحجم شاشة أكبر ومحتوى عرض أوضح.

 تجربة الشاشة بقي نقدر نقول هنا إن أداء الشاشة ممتاز بالنسبة لفئتها ووضعها بين شاشات الـ LCD، فهي بتدعم خاصية اللمس المتعدد بالإضافة لإن تشبع الألوان فيها حلو جدًا بيخليك تحس إنك بتشوف الحاجة قدامك علي الحقيقه، وكمان وضوح وحدة التفاصيل والأيقونات فيها محترمة… 

دا وبالإضافة لتميزها بدرجة سطوع ممتازة تحت أشعة الشمس المباشرة مع زوايا رؤية فائقة الوضوح وألوانها مابتتغيرش مهما اتغير اتجاه نظرك ليها وبدقة ممتازة.

 

شاشة موبايل Oppo A52
شاشة موبايل Oppo A52

كاميرات موبايل Oppo A52:

الكاميرا الأمامية:

  • بتصور بدقه 16 ميجا بكسل، وفتحة عدستها F/2.0.

الكاميرا الخلفية:

 الموبايل بييجي ب4 كاميرات خلفية:

الكاميرا الأولى: بدقة 12 ميجا بكسل بفتحة عدسة F/1.8 وهي الكاميرا الأساسية. 

الكاميرا الثانية: بتتيجي بدقة 8 ميجا بكسل بفتحة عدسة F/2.2 وهي الخاصة بالتصوير الواسع.

الكاميرا الثالثة: دقتها 2 ميجا بكسل بفتحة عدسة F/2.4 وبتكون خاصة بالتصوير الماكرو.

 الكاميرا الرابعة: بتيجي بدقة 2 ميجا بكسل بفتحة عدسة F/2.4 وهي خاصة بالعزل، بالإضافة طبعًا إلى فلاش أحادي من نوع ليد فلاش علشان يساعد شويه في الإضاءة الضعيفة.

 

كاميرات Oppo A52
كاميرات موبايل Oppo A52

 

  • بالنسبة لتصوير الفيديوز:

– فبيكون بجودة الـ 4K وبدقة 2160 بكسل بمعدل التقاط 30 إطار في الثانية. 

– كما يدعم التصوير بجودة الـ FHD بدقة 1080 بكسل بمعدل التقاط 30 و 60 إطار في الثانية.

– بالنسبة لتصوير الـ HD بدقة 720 بكسل بمعدل التقاط 30 إطار في الثانية دا وبالإضافة لدعمه التصوير الـ Slow Motion بجودة الـ FHD بدقة 1080 بكسل بمعدل التقاط 120 إطار في الثانية.

والتصوير الـ HD بدقة 720 بكسل بمعدل التقاط 120 إطار في الثانية. 

للأسف أداء الكاميرات في الجهاز هي أقل حاجة فيه، فالتصوير خلال النهار في الإضاءات العالية بيكون نوعًا ما كويس وفي الإضاءات الضعيفة مقبول.

أما أداء تصوير الفيديوهات فبيكون مميز شوية عن تصوير الصور لإن فيه مثبت إلكتروني بيخلي جودة التصوير واضحة ودقيقة في الإضاءات العالية.

بشكل عام نقدر نقول إن أداء الكاميرات هينفع لصور السوشيال ميديا والرحلات بشكل جيد ولكن متتوقعش أداء احترافي أو متوسط حتى من كاميرات الموبايل ده.

البصمة والزيادات:

البصمة:

  • بصمة الجهاز مدمجة بزرار الباور وده بيخليها أسرع، وأسهل، وعملية أكتر فبتفتح بمجرد لمس زرار الباور.
  • الجهاز كمان بيدعم خاصية الـ Face Unlock ودي بتكون عن طريق الكاميرا الأمامية.

الجهاز كمان بيدعم عدة مستشعرات أخرى زي:

  •  مستشعر التسارع. 
  • مستشعر التقارب.
  • مستشعر البوصلة. 
  • مستشعر الجيروسكوب.

الزيادات:

ترددات الجهاز هنا في الواي فاي a/b/g/n/ac دا وبالإضافة لدعمه لـ Dual-band ،Wi-Fi Direct ،hotspot.

البلوتوث بيدعم خاصية ال LE، وA2DP دا وبالإضافة لإنه بييجي بالإصدار الخامس.

الجهاز بيدعم الـ GPS بالإضافة لدعمه لأنظمة الملاحة الأخرى زي الـ A-GPS, BDS.

أما عن منفذ الـ USB فيأتي من نوع Type C بالإضافة لعمه لخاصية الـ OTG.

الموبايل بيدعم شبكات الاتصال الجيل التاني الـ 2G والجيل التالت الـ 3G والجيل الرابع الـ 4G.

نظام التشغيل بييجي بالنوع الأحدث أندرويد 10 مع واجهة Oppo الـ ColorOS 7.1.

الجهاز مبيدعمش لمبة الاشعارات ولا فيه بديل ليها للأسف.

صوت موبايل Oppo A52:

السماعات الخارجية تأتي بصوت ستيريو ودي حاجة نادرة جدًا في أجهزة الفئة السعرية دي.

بالإضافة لدعمه منفذ الـ 3.5 ملم الخاص بسماعات الأذن.

وأيضًا دعمه للميكروفون العازل للضوضاء اللي بيدخل صوت معين بعيدًا عن باقي الأصوات حواليه.

في العموم نقدر نقول عن تجربة أداء الصوت بالنسبة للسعر حقيقي هايلة ومتميزة جدًا. 

أداء موبايل Oppo A52:

  • سعة الذاكرة الصلبة في الجهاز 128 جيجابايت من نوع UFS 2.1 مع ذاكرة عشوائية من نوع LPDDR 4x بسعة 4 جيجابايت.
    دا وبالإضافة لإمكانية زيادة السعة التخزينية عن طريق كارت ميموري في منفذ مخصص.
  •  معالج ثماني النواة من شركة كوالكوم من نوع Snapdragon 665 بتكنولوجيا 11 نانو، طبعًا مع معالج رسومي من نوع Adreno 610 يعني الأداء هيكون ممتاز. 

دا بجانب دعم الجهاز لإمكانية تعزيز أداء الألعاب عن طريق الـ Game Boost 2.0.

نقدر نقول إن الجهاز قدملنا تجربة أداء محترمة جدًا في الاستخدام اليومي من حيث تصفح تطبيقات السوشيال ميديا أو مشاهدة الافلام والفيديوهات ولكن لو فكرت بس مجرد التفكير تعلى بالمهام اللي أنت عاوزها من الجهاز أو تتقل عليه شوية فمش هيعجبك.

أداء الجهاز في الألعاب الخفيفة عادي وبيقدم تجربة لطيفة مش هتزعلك لو بتلعب من باب التسلية، لكن لو أنت جيمر وبتفكر في جهاز يساعدك على اللعب ويقدملك أداء قوي فمنصحكش خالص بالجهاز ده لأنه كل اللي هيعمله إنه هيخليك تكره اللعبة اللي هتلعبها.

 

أداء Oppo A52
أداء موبايل Oppo A52

 

بطارية موبايل Oppo A52:

سعة البطارية ضخمة 5000 مللي أمبير مع شحن سريع بقوة 18 وات.

البطارية أدائها حلو جدًا بالنسبة لجهاز من الفئة السعرية دي، كمان بتكمل معاك لفترة طويلة خلال اليوم وبيتم شحنها في ساعتين تقريبًا.

 

بطارية موبايل Oppo A52
بطارية موبايل Oppo A52

 

فتح علبة موبايل Oppo A52:

  • موبايل Oppo A52.
  • رأس الشاحن بقوة 18 وات.
  • كابل USB من نوع Type C.
  • دبوس معدني.
  • سماعات الأذن.
  • كتيب التعليمات يوضح كيفية إستخدام الهاتف بالإضافة لضمان الهاتف.
  • جراب ظهر لحماية الهاتف.

سعر موبايل Oppo A52:

السعر في السوق المصري حاليًا حوالي 3990 جنيه مصري للنسخة 128 جيجا مع 4 جيجا رام وده سعر بشوفه غالي بصراحة وسط المنافسين.

الرأي النهائي:

المميزات:

  • يدعم الموبايل التصوير الـ 4K.
  • تصميم عصري بألوان ممتازة.
  • السماعات الخارجية تأتي بصوت ستيريو.
  • بطارية بسعة كبيرة تصمد للعمل لفترة طويلة خلال اليوم مع دعم شحن سريع 18 وات.
  • يدعم تشغيل شريحتين إتصال وكارت ميموري في نفس الوقت.
  • مستشعر بصمة مدمج بزر الباور عملي و سريع.
  • شاشة كبيرة بشكل الثقب بدقة الـ FHD+ تعطي أداء جيد مع حواف قليلة بخلاف الحافة السفلية.

العيوب:

  • لا يدعم لمبة الاشعارات .
  • يمكنك الحصول على معالج بأداء أقوى بنفس السعر من هواتف أخرى مثل Xiaomi Redmi Note 9s.
  • الموبايل معرض للخدش بسهولة بسبب قدومه من البلاستيك اللامع.
  • لم تعلن شركة اوبو بشكل رسمي حول وجود طبقة حماية على شاشة الموبايل.
  • الكاميرات سواء خلفية أو أمامية لن تقدم أفضل أداء في فئة الهاتف السعرية .
  • بشكل عام يعتبر Oppo A52 تطوير على Oppo A5 2020 القديم في شاشة بشكل أحدث ( ثقب للسيلفي ) وبدقة أعلى FHD+ مع دعم للشحن السريع 18 وات والبصمة على زر الباور بدلا من ظهر الهاتف.
  • بشكل عام لا يقدم الموبايل قيمة قوية مقابل سعره.

الخلاصة:

مميزات الجهاز بالنسبة لفئته السعرية ضعيفة جدا، الموبايل حرفيًا كل المميز فيه إن شكله حلو!

حاليًا الناس كلها بتدور في الفئات القليلة على مبدأ القيمة مقابل السعر، وبتفكر كل جنيه هتدفعه هيروح فين وخلاص كل واحد بقى قادر على تحديد أولوياته واحتياجاته قبل ما يشتري موبايل، والشركات لازم تراعي النقطة دي ومتعتمدش على قوة الاسم في السوق لأ لازم يكون فيه تطور ملموس في الأجهزة علشان تقدر الشركة تستمر.

لو بتفكر تشتري الموبايل ده فأنا منصحكش بصراحة كتقييم عام ولكن لو الموبايل لسة عاجبك بعد المراجعة دي فأنت تقدر تشتريه بكل بساطة وتجرب بنفسك. 

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *