مراجعة موبايل Oppo A73
oppo a73

شركة Oppo قدرت تخلي الجهاز اللي هنتكلم عنه النهاردة أرخص أجهزتها في سلسلة الـ A، على الرغم من إن Oppo A73 شاشته Amoled وكمان قدرة الشحن الخاصة بيه بقت متطورة جدًا وسريعة عن بعض إصدارات السلسلة دي… 

ولأن دي حاجة غريبة شوية على أوبو في إصداراتها في السلسلة دي، هنوضح لكم كل حاجة عن الجهاز ده من جميع إمكانياته ومميزاته وعيوبه؛ علشان تقدر تفرق بينه وبين غيره من باقي الإصدارات سواء من نفس الشركة أو من شركات منافسة.

وقبل ما ندخل في المراجعة، خليني أقترح عليك خدمة من الخدمات اللي بنقدمها وهي خدمة: “اختار موبايلك” واللى بيقدمها مــوقــع نـاس فــونــز، الخدمة دي عن طريقها هنرشح لك الموبايل المناسب لاحتياجاتك ببساطة علشان تلاقي أفضل موبايل وسط بحر الموبايلات اللي في السوق حاليًا…

 كل اللي عليك تعمله اضغط هنــا… وابعت لنا ميزانيتك والمواصفات اللي بتعوزها في الموبايل وإحنا هنرشح لك المناسب ليك.

خلينا ندخل في المراجعة يلا…

تصميم موبايل Oppo A73:

أولًا خامات الموبايل:

 أول حاجة مختلفة في الجهاز دا هي الخامات، فهي مازالت من البلاستيك لكن المختلف فيها أن ملمسها، وشكلها بيديك إحساس إنها من الجلد وده طبعًا بيوفرلك مظهر مميز وجذاب وبيخلي شكل الموبايل بريميم معاك.

ثانيًا التصميم الخارجي:

أبعاد الموبايل: 

 الجهاز أبعاده 159.8×72.9×7.45 ملم.

 ووزنه يقدر بـ 163 جرام.

 أبعاد الموبايل ممتازة، ووزنه الخفيف هنا هيخليك تحب تستعمله لفترات طويلة من غير ما يتعب إيدك أو يخليك محتاج راحة كل شوية زي موبايلات تانية كتير، والشاشة عليها طبقة حماية من نوع جوريلا جلاس الجيل التالت.

 

تصميم موبايل Oppo A73
تصميم موبايل Oppo A73

شاشة موبايل Oppo A73:

  • الشاشة Amoled علي شكل نوتش من نوع الـ water drop  notch، ودا نوتش بحجم قطرة الماء على الحواف العليا للشاشة وبنشوفه في موبايلات كتير في فئات مختلفة.
  • مساحة الشاشة 6.44 بجودة الـ FHD ودقتها 1080×2400 بكسل، يعني بمعدل كثافة بكسلات 409 بكسل لكل إنش.
  • ترددها 60 هرتز ودا تردد عادي للشاشة. 
  • أبعاد العرض فيها 20:9 ودي الأبعاد الجديدة اللي بتخلي محتوى العرض أكبر وأوضح، بالإضافة إلى إن الشاشة تشغل نسبة 90.7% من الواجهة الأمامية، ودي نسبة استحواذ بشوفها ممتازة جدا للناس اللي بتحب الشاشات الكاملة يعني محتوى الفيديوهات أو الألعاب أو أيًا كان بيكون أوضح وأكبر.
  • بالإضافة إلى دعم الجهاز خاصية الـ Always on Display.

تجربة الشاشة بقى، التجربة هنا كانت عالية جدًا، الألوان كانت مشبعة وواخدة حقها، التفاصيل كانت عميقة وتحس إنك بتشوف الحاجة قدامك على الحقيقة وده طبعًا يرجع لكون الشاشة من نوع أموليد واللي بتفرق كتير جدًا في الاستخدام.

 

شاشة موبايل Oppo A73
شاشة موبايل Oppo A73

كاميرات موبايل Oppo A73:

الكاميرا الأمامية:

  •  بتصور بدقة 16 ميجا بكسل بفتحة عدسة F/2.0.
  • الكاميرا مزودة بمستشعر من نوع Sony IMX 471.

الكاميرا الخلفية:

 الموبايل بييجي بـ3 كاميرات خلفية…

  1.  الكاميرا الأولى: بدقه 16 ميجا بكسل وفتحة عدسة F/2.2 ومزودة بمستشعر من نوع OV16A10 وهي الكاميرا الأساسية طبعًا.
  2. الكاميرا الثانية: بتيجي بدقة  8 ميجا بكسل بفتحة عدسة F/2.2 وبتكون خاصة بالتصوير الواسع. 
  3.  الكاميرا الثالثة: بدقة 2 ميجا بكسل بفتحة عدسة F/2.4، ودي للماكرو.
  4. الكاميرا الرابعة: بدقة 2 ميجا بكسل بفتحة عدسة F/2.4 وهي للعزل، بالإضافة إلى فلاش من نوع ليد فلاش.

 

كاميرات موبايل Oppo A73
كاميرات موبايل Oppo A73

 

وبالنسبة لتصوير الفيديو الكاميرا بتصور بجودة FHD ودقتها 1080 بكسل بمعدل التقاط 30 إطار في الثانية.

وبتدعم التصوير بجودة الـ HD بدقة 720 بكسل بمعدل التقاط 30 إطار في الثانية.

كما تدعم لتصوير الـ Slow Motion بجودة الـ HD ودقة 720 بكسل بمعدل التقاط 120 إطار في الثانية الواحدة.

بالنسبة لتجربة الكاميرات، فكنت متوقع أداء مختلف بصراحة لكن أداء الكاميرات هنا ما طلعش أفضل حاجة وكنت محتاج أشوف تفاصيل أكتر في الصور أو حتى معالجة أفضل للألوان، ولكن نرجع ونقول إن التسعير بيحكم الشركات بإمكانيات للأسف مش بتكون الأفضل وبالتالي مش بناخد موبايل متكامل غير في فلتات في الفئة دي.

أما الفيديوهات، فالكاميرا بتدعم التثبيت الإلكتروني الـ EIS يعني فيديوهات ثابتة، بجودة مقبولة، وأداء كويس. 

البصمة والزيادات:

بصمة الجهاز دا بتيجي أسفل الشاشة ودا بيخليها عملية وسريعة نوعًا ما. 

أما بصمة الوجه، طبعًا خلاص بقت شيء ثابت في الموبايلات وهي حاجة لطيفة جدًا لو مش عاوز تعتمد على مستشعر بصمة الإصبع.

الجهاز ما بيدعمش لمبة الإشعارات، بس تم تعويض النقص ده بخاصية الـ Always on Display.

الزيادات:

الجهاز بيدعم الـ GPS زي أي جهاز في فئته مع دعمه أيضًا لأنظمة الملاحة الأخرى الـ A-GPS, GLONASS, GALILEO, BDS. 

الموبايل بيدعم شريحتين اتصال من نوع Nano Sim.

شبكات الاتصال اللي في الموبايل بتكون الجيل التاني الـ 2G، والجيل التالت الـ 3G، والجيل الرابع الـ 4G.

بيدعم الواي فاي بترددات الـ a/b/g/n/ac، غير إنه بيدعم الـ dual-band, Wi-Fi Direct, hotspot.

البلوتوث بييجي بإصدار 5.1 وبيدعم الـ A2DP, LE, aptX.

الموبايل جاي بنظام تشغيل أندرويد 10 مع واجهة Oppo الأحدث الـ Coloros 7.2.

 USB من النوع الأحدث الـ Type C، والموبايل كمان بيدعم خاصية الـ OTG، لتشغيل أي USB Driver على موبايل.

صوت موبايل Oppo A73:

من أفضل الحاجات اللي ممكن تلاحظها وأنت بتعمل مكالمة أو بتسجل ريكورد، المايك الثانوي الموجود في الجهاز واللي بيعزل أي دوشة أو صوت تاني حواليك.

بالإضافة لدعمه منفذ الـ 3.5 ملم الخاص بسماعات الأذن.

وتجربة أداء الصوت هنا عمومًا مش الأفضل صحيح لكن تقييمها جيد مش وحش.

أداء موبايل Oppo A73:

مساحة الموبايل بتيجي 128 جيجابايت، مع ذاكرة عشوائية بسعة 6 جيجابايت من نوع LPDDR 4X، بالإضافة إلى دعم الموبايل لإمكانية زيادة المساحة التخزينية عن طريق كارت ميموري. 

أما المعالج فهو ثماني النواة من شركة كوالكم من نوع Snapdragon 662 بتكنولوجيا الـ 11 نانو مع معالج رسومي من نوع Adreno 610، والمعالج هنا أداؤه قوي، لكن هتلاحظ إنه مش الأمثل بالنسبة للألعاب وبالنسبة بردو للسعر، لكن بالنسبة للسعة التخزينية فهي ممتازة بالنسبة لجهاز من الفئة دي.

طبعا المعالج خذلني في الجهاز ده وحط عليه كمان الكاميرات اللي مش متميزة بأي شيء، يبقى الموبايل ده صعب ينافس للأسف في الفئة دي وسط الوحوش الموجودة حاليًا بإمكانيات ضخمة وأسعار متقاربة!

 

أداء موبايل Oppo A73
أداء موبايل Oppo A73

 

بطارية موبايل Oppo A73:

البطارية تأتي بسعة 4015 مللي أمبير، مع دعمها للشحن السريع  بقوة 30 وات.

وهي نوعًا ما كحجم وأداء قوية، ودا مقارنةً بسعة وأداء الأجهزة المنافسة، وكمان بتشحن في ساعة أو أقل من ساعة وده بيخليها مقبولة أو ميزة في الجهاز ده مع عيوبه التانية.

 

بطارية موبايل Oppo A73
بطارية موبايل Oppo A73

 

فتح علبة موبايل Oppo A73:

  • موبايل Oppo A73.
  • سكرين تم وضعها بشكل مسبق على شاشة الموبايل.
  • رأس الشاحن بقوة 30 وات.
  • كابل USB من نوع Type C.
  • دبوس معدني.
  • كتيب التعليمات.
  • سماعات الأذن.
  • جراب ظهر شفاف.

سعر موبايل Oppo A73:

سعر الجهاز حاليا في السوق المصري حوالي 3850 جنيه مصري وهو سعر بقى غالي مع وجود المنافسين الضخم وظهور موبايلات زي Poco M3 بإمكانيات أعلى في فئة أقل!

الرأي النهائي لموبايل Oppo A73:

المميزات:

  • يدعم الشحن السريع بقوة 30 وات.
  • يدعم الموبايل تشغيل شريحتين وكارت ميموري في نفس الوقت.
  • وزن خفيف مع تصميم مميز من أوبو.
  • شاشة AMOLED تقدم أداء مميز.
  • بصمة مدمجة بالشاشة سريعة وعملية.
  • كاميرا سيلفي مميزة من أوبو كالعادة.
  • الذاكرة الصلبة والذاكرة العشوائية كبيرة جدًا فهي أكثر من كافية لجميع ملفاتك وتطبيقاتك.

العيوب:

  • لا يدعم التصوير بجودة الـ 4K بعكس المنافسين.
  • الكاميرا الخلفية ليست الأقوى في الفئة السعرية من حيث الدقة.
  • حجم بطارية الهاتف ليس الأكبر.
  • المعالج ما زال يقدم أداء مقبول ولكنه ليس الأقوى حالياً في فئته السعرية.

الخلاصة:

تصميم الموبايل لطيف وشكله حلو، ولكن في 2021 أنت مش بتشتري الموبايل علشان شكله، حاليًا عصر القيمة مقابل السعر، يعني أنا عاوز إيه من الموبايل وهدفع فيه كام!

لو جاوبت على السؤالين دول هقدر بكل بساطة إن أنا أشتري موبايل جديد وأنا مستريح وبدون حيرة لأن أنا عارف إيه المطلوب من الجهاز اللي هشتريه وإيه المطلوب مني!

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *