شركة Oppo قررت تنزل بجهاز اقتصادي وهو Oppo A53 بأعلى معدل تحديث 90 هرتز، ببطاريته الضخمة وسعره الاقتصادي، وهو بيتميز عن غيره من باقي الإصدارات من نفس الشركة ومن الشركات المنافسة…
وهنعرف ليه دلوقتي بعد ما نوضح كل تفاصيله، وإمكانياته، ونتكلم عن مميزاته وعيوبه عشان تقدر تعرف هو ده الموبايل المناسب ليك ولا لأ!
بس قبل ما ندخل في المراجعة خليني أقترح عليك خدمة من الخدمات اللي بنقدمها وهي خدمة “اختار موبايلك” واللى بيقدمها مــوقــع نـاس فــونــز، الخدمة دي عن طريقها هنرشح لك الموبايل المناسب لاحتياجاتك ببساطة؛ علشان تلاقي أفضل موبايل وسط بحر الموبايلات اللي في السوق حاليًا، كل اللي عليك تعمله بس اضغط هنا… وابعتلنا ميزانيتك والمواصفات اللي بتعوزها في الموبايل وإحنا هنرشح لك المناسب ليك.
خلينا ندخل في المراجعة يلا…
تصميم موبايل Oppo A53:
أولًا الخامات: خامات الجهاز هنا من البلاستيك بجودة ومتانة عالية مع فريم من البلاستيك أيضًا.
ثانيًا التصميم الخارجي:
الكاميرات الخلفية بارزة قليلًا عن ظهر الهاتف بتصميم أنيق وعصري عمومًا، وبألوان الأسود والأزرق، ويصدر الموبايل بأبعاد 163.9×75.1×8.4 ملم مع وزن 186 جرام وزن نوعًا ما تقيل.
وبالنسبة للشاشة، فهي عليها طبقة حماية من نوع Corning Gorilla Glass الجيل الثالث، بالإضافة لاسكرين سميكة جدًا مش زي الورقية اللي هي من البلاستيك، وكمان جودة الكوفر السيليكون اللي بيجي معاه ممتازة جدًا ومش هتلاقي كوفر زيه في أي مكان بنفس الجودة دي.
شاشة موبايل Oppo A53:
الشاشة هنا من نوع IPS LCD، مساحتها 6.5 إنش وجودتها HD+ بدقة 720×1600 بكسل يعني معدل كثافة بكسلات 270 بكسل لكل إنش، والشاشة بتيجي على هيئة الثقب كعادة أغلب إصدارات Oppo.
كما تدعم الشاشة معدل التحديث الأعلى الـ 90Hz، بالإضافة إلى دعمها أبعاد العرض الجديدة بنسبة 20:9.
على الرغم من إن نوع الشاشة مش من أحسن وأفضل أنواع الشاشات، بس أدائها بصراحة سريع ومستقر جدًا خلال لعب الألعاب ومشاهدة الفيديوهات…
دا وبالإضافة إلى إن عرض المحتوى فيها بيكون أكبر وأوضح؛ بسبب نسب أبعاد العرض فيها وبسبب احتلالها نسبة 89.2% من الواجهة الأمامية، ودي طبعًا نسبة كبيرة نوعًا ما.
كاميرات موبايل Oppo A53:
الكاميرا الأمامية: دقتها 16 ميجا بكسل وفتحة عدستها F/2.0.
الكاميرا الخلفية كاميرا ثلاثية
الكاميرا الأولى: دقتها 13 ميجا بكسل بفتحة عدسة F/2.2 بمستشعر من نوع OV13B وهي الكاميرا الأساسية طبعًا.
الكاميرا الثانية: ودي دقتها 2 ميجا بكسل بفتحة عدسة F/2.4 وبتكون خاصة بالتصوير الماكرو.
أما الكاميرا الثالثة: فدقتها 2 ميجا بكسل بفتحة عدسة F/2.4 ودي خاصة بالعزل، دا وبالإضافة إلى فلاش أحادي من نوع ليد فلاش كالعادة.
وبالنسبة لتصوير الفيديوهات: فالكاميرا تدعم تصوير الفيديوهات بجودة الـ FHD و بدقة 1080 بكسل بمعدل التقاط 30 إطار في الثانية.
لكن الكاميرا مابتدعمش التصوير بجودة الـ 4K أو حتى الـ slow motio، وكمان مفيش أي دعم للوضع الليلي سواء في تصوير الصور أو الفيديوهات…
يعني نقدر نقول إن أداء الكاميرات هنا من مقبول لجيد نوعًا ما سواء بالكاميرا الأمامية أو الخلفية.
البصمة والزيادات:
يدعم الجهاز مستشعر البصمة بسرعة وسهولة؛ لأن كمان من أهم ميزات البصمة هناـ هي إنها سريعة الاستجابة على عكس مستشعرات البصمة من الفئة والنوع دا؛ لأنها بتيجي في ضهر الجهاز،
دا وبالإضافة لدعم الموبايل خاصية الـ face unlock عن طريق الكاميرا الأمامية.
الجهاز يدعم عدة مستشعرات أخرى منها:
مستشعر التقارب.
مستشعر البوصلة.
مستشعر الجيروسكوب ودا بيكون خاص بتشغيل نظارات الواقع الافتراضي الـ VR.
الموبايل يدعم شبكات الاتصال الجيل التاني الـ 2G، والجيل التالت الـ 3G، وطبعًا الجيل الرابع الـ 4G.
شبكات الجهاز دا وكعادة شبكات كل إصدارات Oppo عمومًا بتيجي أعلى من شبكات أجهزة شاومي والأيفون، بمعدل إشعاع أقل من 1 وات، فحرفيًا الجهاز دا بيجيب شبكة في الأماكن اللي كل الأجهزة مابتجيبش فيها شبكة.
بالإضافة إلى دعم الموبايل للـ Gps بجودة هايلة ودقيقة أوي ويُعتمد عليه فعلًا، ودي حاجة غريبة على جهاز بالسعر دا وميزة تنافسية ممتازة فيه طبعًا.
نظام تشغيل الجهاز هو النظام الأحدث Android 10 مع واجهة Oppo الأحدث الـ ColorOS 7.2.
منفذ الـ USB يأتي من النوع الأحدث الـ Type C كما يدعم خاصية الـ OTG.
الموبايل بيدعم تركيب شريحتين اتصال من الجيل الرابع.
الواي فاي بييجي بترددات الـ a/b/g/n/ac بالإضافة إنه بيدعم الـ dual-band, Wi-Fi Direct, hotspot.
البلوتوث في الموبايل بيكون بإصدار 5.1 وبيدعم الـ A2DP, LE, aptX.
أيقونة غلق الشاشة بدلًا من زرار الباور، ودي من أكتر المميزات السهلة والسريعة جدًا واللي بتحافظ على خصوصية الموبايل، فبضغطة واحدة عليها بتحل محل زرار الباور في غلق الشاشة وبضغطتين عليها، الشاشة بتفتح.
صوت موبايل Oppo A53:
الصوت ستيريو اسبيكر، بالإضافة إلى إنه بيطلع متماثل من السماعات السفلية والعلوية ودي ميزة حلوة جدًا مش بنشوفها كتير في إصدارات Oppo خصوصًا اللي من الفئة السعرية دي، وبشكل عام نقدر نقيم أداء الصوت ونقول إنه جيد على الرغم إنه مش عالي بس تفاصيل وضوحه حلوة جدًا خصوصًا سماعة المكالمات.
كمان الجهاز بيدعم منفذ الـ 3.5 ملم الخاص بسماعات الأذن وبتخرج صوت ميال للتضخيم زي الاسبيكر ودا اللي يخلينا نقول إن تجربة الصوت مُرضية فعلًا.
أداء موبايل Oppo A53:
سعة الذاكرة الصلبة للجهاز للنسخة الأولى 64 جيجابايت من نوع UFS 2.1 مع ذاكرة عشوائية بسعة 4 جيجا بايت من نوع LPDDR4x.
بالإضافة إلى وجود نسخة تانية أعلى مساحتها 128 جيجابايت مع 6 جيجا بايت رام.
كمان الجهاز بيدعم إمكانية زيادة المساحة التخزينية عن طريق كارت ميموري حتى سعة 256 جيجابايت.
أما عن الأداء، فالمعالج هنا ثماني النواة من شركة كوالكوم من نوع Snapdragon 460 بتكنولوجيا الـ 11 نانو، مع معالج رسومي من نوع Adreno 610
والمعالج دا بالنسبة لسعر الجهاز يعتبر من أهم مميزات الإصدار طبعًا لأن أداؤه ممتاز.
بطارية موبايل Oppo A53:
البطارية تأتي بسعة 5000 مللي أمبير، مع دعمها للشحن السريع بقوة 18 وات.
ودي بطارية بحُكم الحجم جيدة جدًا، لكن بحكم سحب المعالج فهتأدي نفس أداء بطارية 4000 مللي أمبير دا غير إنها بتشحن في مدة طويلة جدًا بتوصل لساعتين تقريبًا.
فتح علبة موبايل Oppo A53:
- موبايل Oppo A53.
- سكرين تم وضعها بشكل مسبق على شاشة الهاتف.
- رأس الشاحن بقوة 18 وات.
- كابل USB من نوع Type C.
- دبوس معدني.
- كتيب التعليمات.
- جراب ظهر شفاف.
- سماعات الأذن.
سعر موبايل Oppo A53:
سعر النسخة الـ 64 جيجا مع 4 جيجا رام حوالي 3050 جنيه مصري، أي بما يعادل تقريبًا 195 دولار أمريكي.
والنسخة الـ 128 جيجا مع 6 جيجا رام بسعر 3450 جنيه مصري، أي بما يعادل 210 دولار أمريكي.
الرأي النهائي في موبايل Oppo A53:
المميزات:
- يدعم الشحن السريع بقوة 18 وات.
- بطارية كبيرة لن تحتاج إلى شحنها أكثر من مرة خلال اليوم.
- شبكات اتصال قوية جدًا.
- السماعات الخارجية تدعم الصوت الاستيريو.
- يدعم الهاتف استخدام شريحتين وكارت ميموري في نفس الوقت ذاته.
- أحد أرخص الهواتف التي تأتي بشاشة بمعدل تردد 90Hz.
العيوب:
- لا يدعم لمبة الاشعارات ولا يوجد ما يعوضها.
- شاشة HD+ بدلاً من FHD+ بعكس الـ Oppo A52 السابق.
- لم نجد الوضع الليلي في كاميرات الهاتف.
- المعالج ليس الأقوى في فئته السعرية وتوجد هواتف أفضل منه بكثير ولكن الاداء الفعلي للهاتف مقبول جدًا في الاستخدام اليومي وثابت ومستقر بسبب السوفت وير الخفيف.
- لا يدعم الميكروفون الثانوي الخاص بعزل الضوضاء والضجيج أثناء استخدام الهاتف.
- الكاميرا الخلفية ليست الأفضل في الفئة السعرية وأيضا لا تدعم التصوير الـ 4K أو حتى الـ Slow Motion.
- لا يدعم عدسة تصوير بزاوية واسعة للأسف.
الخلاصة:
بعد ما وضحنا إمكانيات الجهاز، ومميزاته، وعيوبه بالنسبة لسعره الاقتصادي، دلوقتي أنت تقدر تحدد إن كان الإصدار دا يناسبك أو لا!
وإيه أكتر حاجة فيه مميزة تخليك تقرر…
هل هو دا الجهاز المناسب ليك وفيه كل اللي محتاجه من بين كل الإصدارات الأخرى من نفس الشركة والشركات المنافسة ولا لأ!