مراجعة موبايل Nokia C1
Nokia C1

جهاز النهاردة من نوكيا هو أرخص إصدار smart phone أطلقته نوكيا خلال الفترة الأخيرة، وأكيد مش هتلاقي أي إصدار منافس ليه بنفس السعر دا، جهاز Nokia C1 بخاماته المتينة وشاشته وأداؤه الحلو جدًا، قدر ينافس إصدارات أغلى منه في السعر كمان…

ولأنه فعلًا جهاز عملي جدًا بمواصفات ومميزات كتير، هنعمل مراجعة شاملة عليه؛ علشان نعرف كل تفاصيله وإمكانياته ونقدر نفرق بينه و بين الإصدارات التانية اللي في نفس الفئة السعرية دي…

بس قبلها حابين نفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك” اللي بيقدمها موقع نــاس فــونــز ودي خدمة هتساعدك في إنك تختار الجهاز المناسب ليك، عن طريق ترشيحاتنا اللي بتكون بِناءًا على طلبك واللي انت عايزه ومحتاجه في جهازك؛ وعلشان تكون ببساطة قادر تختار الجهاز اللي اتعمل لإشباع احتياجاتك ويتناسب مع ميزانيتك من غير قلق ولا حيرة.

ويلا نبدأ مراجعتنا بتصميم الموبايل…

تصميم موبايل Nokia C1:

أولًا الخامات: 

  • خامات ضهر الموبايل والفريم من البلاستيك كعادة نوكيا وبتكون من البلاستيك المتين.

ثانيًا التصميم الخارجي:

 

تصميم موبايل Nokia C1
تصميم موبايل Nokia C1

 

  •  الجهاز بيبجي بأبعاد 147.6×71.4×8.7 مم.
  •  وزن الجهاز 155 جرام.

توجد طبقة حماية على الشاشة بس مش مُعلن هي من أي نوع .

الجهاز متوفر بألوان الأسود والأحمر، مع بروز في الضهر جنب السماعات كدا؛ علشان الصوت يفضل واضح حتى لو الموبايل بقى على ضهره.

شاشة موبايل Nokia C1:

  • الشاشة من نوع IPs LCD كابستيف، وتدعم خاصية اللمس المتعدد بالإضافة إلى دعمها 16 مليون لون.
  • الشاشة بتيجي بمساحة 5.45 بوصة بمعدل كثافة 197 بكسل لكل بوصة.

أداء الشاشة حلو جدًا وسطوعها تقريبًا زي سطوع أي شاشة من نوع أعلى في أجهزة أغلى، وأنت فعلًا هتلاحظ دا أول ما تبدأ تستخدمها وتبص عليها من أكتر من زاوية.

 

شاشة موبايل Nokia C1
شاشة موبايل Nokia C1

 

كاميرات موبايل Nokia C1:

أولًا الكاميرا الأمامية:

  •  بتييجي بدقة 5 ميجا بكسل وفلاش من نوع ليد فلاش.

ثانيًا الكاميرا الخلفية:

  •  ودي دقتها 5 ميجا بكسل وبدقة f\2.4، مع ضبط تلقائي للصور وفلاش من نوع ليد فلاش.

ثالثًا تصوير الفيديوهات: 

تدعم الكاميرا تصوير الفيديوهات، بدقة 720 بكسل، في 30 لقطة في الثانية.

وكتقييم للكاميرا، موبايل في الفئة السعرية دي مأعتقدش هتكون محتاجه للتصوير، ومع ذلك تفاصيل وجودة الصور والفيديوهات معقولة وحلوة جدًا، بالإضافة إلى إن الكاميرا فيها إعدادات حلوة هتساعدك تاخد صور واضحة نوعًا ما وتفي بالغرض المطلوب.

 

كاميرات موبايل Nokia C1
كاميرات موبايل Nokia C1

 

البصمة والزيادات:

الجهاز لا يدعم مستشعر البصمة، لكن بيدعم مستشعرات أخرى زي:

  • مستشعر التقارب.
  • مستشعر التسارع.

نظام تشغيل الجهاز android 9.0 Go-edition، وعلى الرغم من كدا أول ما تشغل الجهاز هتلاقي فيه آنميشن بسيط في الأندرويد نفسه، يعني مش هتحس باختلاف بينه وبين الأندرويد العادي.

منفذ الـ USB بييجي من النوع القديم Micro USB.

الجهاز بيدعم الـ GPS مع دعمه للـ A-GPS.

الواي فاي بييجي بترددات a\b\g\n، مع دعمه لخاصية الـ hotspot.

صوت موبايل Nokia C1:

الجهاز يدعم منفذ الـ 3.5 مللي الخاص بسماعات الأذن، بالإضافة إلى دعمه للراديو FM.

أما بالنسبة للسماعات الخارجية، فصوتها عالي وأفضل بكتير من صوت أجهزة سعرها أغلى وبجودة متوسطة إلى حد ما.

أداء موبايلNokia C1:

 

أداء موبايلNokia C1
أداء موبايلNokia C1

 

سعة الذاكرة الصلبة للجهاز 16 جيجا بايت، مع ذاكرة عشوائية 1 جيجا رام.

بالإضافة إلى إمكانية زيادة السعة التخزينية بكارت ميموري لحد 64 جيجا بايت.

أما بالنسبة للأداء، فالمعالج رباعي النواة بسرعة 1.3 جيجا هرتز.

ونقدر نقول إنه أداء مقبول في الاستخدامات الخفيفة أو اليومية العادية وهيكون مُرضي بشكل كبير للمستخدم، أما الاستخدامات التقيلة، كالألعاب والتطبيقات التقيلة فما تنساش إن الجهاز بييجي بـ بروسيسور ضعيف، وبالتالي الجهاز هيقطع معاك ويهنج منك والأحسن بلاش تستخدمه استخدام تقيل أصلًا. 

بطارية موبايل Nokia C1:

البطارية من نوع ليثيوم أيون قابلة للإزالة بسعة 2500 مللي أمبير، وبتقدم أداء حلو وتقدر تصمد لفترة كويسة خلال اليوم وفي إيدك تغيرها بكل سهولة لو حصلها أي ضرر.

 

بطارية موبايل Nokia C1
بطارية موبايل Nokia C1

 

سعر موبايل Nokia C1:

سعر الجهاز 900 جنيه مصري، أي ما يعادل حوالي 58 دولار أمريكي.

فتح علبة موبايل Nokia C1:

  • موبايل Nokia C1.
  • بطارية نوكيا بسعة 2500 ملّي أمبير.
  • شاحن أصلي من نوكيا.
  • سماعات ستيريو من الشركة.
  • دليل المستخدم والضمان.

الرأي النهائي في موبايل Nokia C1:

المميزات:

  • سعره غير مكلف .
  • يدعم شبكات الاتصال الجيل الرابع الـ 4G وهو يعتبر من أرخص الهواتف بدعم شبكات جيل رابع.
  • يدعم تشغيل شريحتين اتصال وكارت ميموري في وقت واحد.
  • الشاشة ما زالت تؤدي عملها فهي تأتي بدقة الـ HD+ .
  • البطارية يمكن إزالتها فيمكنك تركيب أكثر من بطارية بسهولة.
  • لعل أبرز ما يميز نوكيا هي التحديثات الدورية السريعة من جوجل مباشرةً.
  • خامات التصنيع جيدة جداً فمن النادر أن تجد خامات محترمة في هذا السعر.

العيوب:

  • لا يدعم مستشعر البصمة ولكن دا طبيعي في  الفئة السعرية دي باستثناء موبايل itel P36 .
  • تصميم قديم مع حواف كبيرة.
  • سعة البطارية صغيرة فكنا نفضل أن تأتي بسعة أكبر.
  • لا يدعم الميكروفون الثانوي الخاص بعزل الضوضاء.
  • قوة الشحن ضعيفة ولكن ستؤدي الغرض فسعة البطارية ليست كبيرة.

الخلاصة:

بعد ما وضحنا إمكانيات الجهاز دا واتكلمنا عن كل مواصفاته، نقدر نقول إن الجهاز هيكون مناسب جدًا للناس اللي استخدامهم خفيف وثانوي، زي مثلًا الأطفال وكبار السن، أو لو هيكون مش الموبايل الأساسي ليك، وطول ما الاستخدام عليه خفيف مش هتحس بفرق أوي بينه وبين الأجهزة التانية وهيكون مُرضي ليك إلى حدٍ ما كبير.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *