مراجعة موبايل ريلمي C3
ريلمي C3

سمعنا إن شركة ريلمي نزلت موبايل من الفئة الاقتصادية، وجاي بمعالج قوي جدًا بأداء ممتاز في الألعاب والاستخدام العادي، دا غير وجود البطارية الضخمة، والشاشة الكبيرة، وكل دا مع سعر قليل، يا ترى إيه هو الموبايل دا؟

موبايل ريلمي C3 واللي قررنا نعمله مراجعة عن طريق النسخة اللي نزلت مصر والوطن العربي، واللي بتيجي بمساحة تخزين 64 جيجا مع رامات 3 جيجا بايت، ونعرف مميزات الموبايل وعيوبه…

قبل ما نبدأ المراجعة خليني أفكرك بخدمة “اختار موبايلك” واللي بيقدمها موقــــع ناس فـــونـــز، الخدمة دي باختصار بنقدمها لأي شخص محتاج يشتري موبايل جديد ومحتار بين الماركات والإصدارات اللي منتشرة في الأسواق. 

كل اللي عليك تعرفنا بالتفاصيل اللي يهمك في الموبايل اللي بتدور عليه من مميزات محتاجها، وعيوب بتحاول تتجنبها، وطبعًا السعر اللي يناسبك، وبناء على كل التفاصيل دي هنرشحلك الموبايل الأنسب ليك. 

نرجع للموبايل اللي هنعمله المراجعة النهاردة وهو ريلمي  C3، ونبدأ بتصميم الموبايل…

تصميم موبايل ريلمي C3: 

أولًا خامات الموبايل: 

زي ما احنا متعودين إن معظم موبايلات الفئة الاقتصادية بتيجي من البلاستيك، بنلاقي إن ريلمي  C3 كمان جاي بتصميم من البلاستيك من الضهر والفريم.

لما تمسك الموبايل في إيدك هتلاقي تصميم حلو كدا ومختلف، ودا تصميم الـ Sunrise، واللي بيكون واخد شكل أشعة الضوء اللي خارجه من نافذة الكاميرا الخلفية ومساحتها بتزيد لنهاية الفريم، شايفه تصميم لطيف ومميز بالنسبالي.

الموبايل جاي بتقفيل كويس، ومقاوم لقطرات المياه فقط.

ميزة الضهر إن التبصيم مش بيبان فيه، ومقاوم نوعًا ما للخدوش.

ثانيًا التصميم الخارجي: 

تصميم الكاميرات: 

  • كاميرا السيلفي في منتصف نوتش الشاشة، وواخدة شكل حرف الـ U كدا. 
  • الكاميرا الخلفية عبارة عن 3 كاميرات خلفية فوق بعض في نافذة طولية بارزة شوية عن الضهر.

 

تصميم موبايل ريلمي C3
تصميم موبايل ريلمي C3

 

أبعاد الموبايل: 

  • ابعاد الموبايل 164.4x75x9 مم.
  • الموبايل وزنه 195 جرام، وسمكه 9 مللي. 

بالرغم من السمك الكبير للموبايل بسبب البطارية الضخمة اللي فيه، إلا إن مسكة الموبايل في الإيد مريحة، ومش هتحس بتقل في إيدك. 

شاشة موبايل ريلمي C3: 

شاشة الموبايل من نوع الـ IPS LCD، نوع شاشات تقليدي ومنتشر في أغلب موبايلات الفئة الاقتصادية. 

حجم الشاشة 6.5 إنش، حجم الشاشة كبير وكويس أوي في فئة الموبايلات الاقتصادية وساعد على تجربة أفضل في مشاهدة الفيديوهات، غير إنك تقدر تقسم الشاشة وتشتغل على 2 أبليكيشن بسهولة في نفس الوقت. 

دقة الشاشة  HD+ والأفضل طبعًا لو كانت  FHD+، بس في الآخر الموبايل من الفئة الاقتصادية ومينفعش نطلب شاشة أفضل من كدا من غير ما تزود سعر الموبايل. 

الشاشة عليها طبقة حماية Corning Gorilla Glass من الجيل التالت، ومتركب عليها سكرينة جاهزة، لزيادة حماية الشاشة من الخدش وغيره. 

 

شاشة موبايل ريلمي C3
شاشة موبايل ريلمي C3

 

حواف الشاشة كبيرة شوية خصوصًا الحواف السفلية، زي ما احنا متعودين من موبايلات الفئة دي.

الموبايل بيدعم الـ  Dark mode، تجربته منقدرش نقول إنها ممتازة ودا بسبب الجودة المتوسطة للشاشة الـ IPS LCD، بس كويس إنه موجود في الأخر.

بالنسبة لسطوع الشاشة فهو مش أفضل حاجة ومش عالي أوي، بس لما تحب تستخدم الموبايل تحت الشمس مش هتواجه مشاكل وهتقدر تستخدمه بسهولة نوعًا ما. 

كاميرات موبايل ريلمي C3:

الكاميرا الأمامية:

  • كاميرا السيلفي بدقة 5 ميجا بكسل وبفتحة عدسة ضيقة F/2.4.

أداء الكاميرا مش ممتاز، بتطلع صور عادية ومقبولة نوعًا ما لو بتصور في إضاءة قوية، ودا شيئ متوقع من أداء كاميرات في الفئة السعرية دي.

بالنسبة لتصوير البورتريه من السيلفي لقيت إن تفاصيل كتير من الصورة بتختفي وبتكون مش واضحة وتحس إن الصورة بهتانة كدا.

الموبايل بييجي بكاميرا خلفية ثلاثية وتفاصيلهم كالآتي:

  • الكاميرا الأولى: هي الكاميرا الأساسية بدقة 12 ميجا بكسل، وبفتحة عدسة F/1.8.
  • الكاميرا التانية: هي العدسة الخاصة بالتصوير الماكرو، بدقة 2 ميجا بكسل وبفتحة عدسة  F/2.4.
  • الكاميرا التالتة: هي الكاميرا الخاصة بعمل العزل في الصورة، دقتها 2 ميجا بكسل بفتحة عدسة F/2.4.

الموبايل بيدعم خاصية التصوير البطيء Slow motion، وتصوير الفيديوهات بجودة الـ FHD بدقة 1080 بكسل بمعدل التقاط 30 إطار في الثانية.

 

كاميرات موبايل ريلمي C3
كاميرات موبايل ريلمي C3

 

الكاميرات الخلفية بتطلع صور عادية جدًا وبتفاصيل قليلة، خصوصًا لما تصور في إضاءة ضعيفة، غير إن الموبايل أصلًا مفيهوش ميزة النايت مود.

أما بالنسبة لـ الديناميك رينج كان مظبوط جدًا مع ألوان قريبة من الطبيعية، ودي حاجة بحبها في موبايلات ريلمي.

البصمة والزيادات: 

البصمة

معلومة كدا حابب أوضحها إن فئة الـ C اللي بتقدمها ريلمي كانت بتنزل من غير بصمة، بس نزلت موبايل ريلمي C3 ببصمة خلفية، وكمان مزود بخاصية الـ Face Unlock لزيادة الأمان، والاتنين كان أدائهم كويس ومقبول جدًا ومفيش منهم تقصير.

المستشعرات: 

الموبايل بيدعم مستشعرات تانية غير مستشعر البصمة زي:

  •  مستشعر التسارع.
  • مستشعر التقارب.
  • مستشعر البوصلة.

 الموبايل بيدعم خاصية الواي فاي بتردد b/g/n، وكمان بيدعم hotspot.

البلوتوث بييجي بالإصدار الخامس، وبيدعم الـ A2DP, LE, aptX.

بيدعم إمكانية تحديد الموقع الجغرافي الـ GPS، ودي خاصية مهمة جدًا وناس كتير بتحتاجها في شغالها، وكمان الموبايل بيدعم أنظمة الملاحة زي الـ A-GPS, GLONASS, BDS.

منفذ الـ USB من النوع التقليدي الـ Micro USB مش Type C زي الموبايلات المنافسة، وبيدعم خاصية الـ OTG.

 نظام تشغيل الموبايل Android 10.0 مع واجهة ريلمي الجديدة الـ Realme UI 1.0.

الموبايل بيدعم إمكانية تركيب شريحتين اتصال من نوع Nano Sim.

للأسف مش هتلاقي لمبة إشعارات في الموبايل ولا حتى بديل عنها.

الموبايل فيه سماعة واحدة في الفريم من تحت على اليمين.

بالنسبة لتجربة الصوت عادية جدًا، ووجود سماعة وحيدة في الموبايل خلى الصوت يخرج ضعيف، أما سماعة المكالمات وسماعة الأذن صوتها كان مقبول جدًا وواضح ومفيش منه مشاكل.

الموبايل فيه منفذ الـ 3.5 ملم الخاص بسماعات الأذن.

أداء موبايل ريلمي C3:

الموبايل بييجي بمعالج ميديا تيك الجديد الـ Helio G70 بتكنولوجيا الـ 12 نانو.

 معالج رسومي من نوع Mali-G52 2EEMC2.

بالنسبة للنسخة اللي نزلت مصر مساحة الذاكرة فيها 64 جيجا بايت مع رامات 3 جيجا بايت. 

نوع الذاكرة الصلبة eMMC 5.1 والذاكرة العشوائية من نوع LPDDR4X.

الموبايل فيه منفذ لزيادة مساحة الذاكرة الصلبة حتى 256 جيجا بايت بكارت ميموري.

سلسلة G في ميديا تيك مهتمة جدًا بأداء الألعاب القوي…

 

أداء موبايل ريلمي C3
أداء موبايل ريلمي C3

 

الخلاصة إن أداء الموبايل في الألعاب محترم جدًا، وكمان لعبة PUBG  بتشتغل على دقة جرافيك عالية، ومكنتش بلاحظ تقطيع في الفريمات كتير، وكمان في الاستخدام العادي أداء المعالج كان كويس أوي ومفيش منه تقصير، بس ممكن تلاحظ سخونة الموبايل مع الاستخدام التقيل خصوصًا في الألعاب.

حقيقي صعب تلاقي موبايل بأداء محترم كدا وبالسعر دا.

بطارية موبايل ريلمي C3: 

حجم البطارية 5000 مللي أمبير، بطارية ضخمة وحجمها كويس جدًا جدًا.

بصراحة البطارية أدائها ممتاز في الفئة دي وتقدر تعتمد عليها سواء في شغل أو ألعاب.

استخدمت البطارية بشكل مكثف أوي وفضلت معايا حوالي 10 ساعات ودي فترة مش قليلة خالص، ولو استخدامك خفيف ممكن البطارية تفضل معاك يومين تقريبًا.

 

بطارية موبايل ريلمي C3
بطارية موبايل ريلمي C3

 

محتويات علبة موبايل ريلمي C3: 

موبايل ريلمي C3.

سكرين لحماية الشاشة تم وضعها بشكل مسبق على شاشة الموبايل وبتكون من البلاستيك.

رأس الشاحن بقوة 10 وات.

كابل الـ USB من نوع Micro USB.

جراب ظهر شفاف لحماية الموبايل من الخرابيش.

دبوس معدني.

كتيب التعليمات يوضح كيفية إستخدام الموبايل.

سعر موبايل ريلمي C3: 

سعر النسخة الـ 64 جيجا مع رامات 3 جيجا بايت 2290 جنيه مصري.

الرأي النهائي في موبايل ريلمي C3: 

 المميزات:

  • يدعم تشغيل شريحتين، وكارت ميموري في نفس الوقت.
  • ذاكرة صلبة وعشوائية كبيرة جداً تكفي ملفاتك وتطبيقاتك بصورة ممتازة.
  • شاشة كبيرة بشكل النوتش مع طبقة حماية لحمايتها بشكل أفضل من الكسر والخدش .
  • تصميم جذاب وعصري.
  • بييجي  بأحدث نظام تشغيل Android 10.
  • يدعم بصمة في ظهر الموبايل.
  • أداء المعالج جيد جدًا في المهام اليومية، وفي الألعاب أيضًا، فأخيرًا سنرى أداء رسومي جيد في هذه الفئة، فهو يكاد يكون قريب جدًا أو أفضل حتى من أداء سناب دراجون 665، وبسعر أقل.
  • بطارية مذهلة وقد تكون بالسعة الأكبر في هذه الفئة السعرية، وتصمد البطارية لفترة طويلة من العمل المكثف.

العيوب:

  • لا يدعم وجود لمبة الاشعارات.
  • مفيش هاند فري.
  • صوت الموبايل ضعيف نسبيًا، ولكنه مقبول بالنسبة لسعر.
  • منفذ الـ USB من نوع Micro USB. 
  • الشاحن بقوة 10 وات فقط.

الخلاصة:

الخلاصة إن ريلمي قدمت موبايل بمميزات حلوة في الفئة الاقتصادية ومنها الأداء الكويس جدًا خصوصًا في الألعاب ويمكن مش بنشوفه غير في فئة أعلى، والبطارية الكبيرة اللي هتساعدك تستخدم الموبايل براحتك، غير الشاشة الـ 6.5 إنش، اللي هتخليك تعيش تجربة مشاهدة فيديوهات ولعب أفضل، والبصمة اللي تُعتبر من ضمن الزيادات اللي مكنتش موجودة في فئة الـ  C من ريلمي قبل كدا وضافتها في موبايل ريلمي C3، بس الموبايل مش خالي من العيوب طبعًا وكان فيه تعليق على صوت الموبايل الضعيف، وأداء الكاميرا اللي العادي نوعًا ما، بس موبايل بالسعر دا مع الإمكانيات دي أقدر أقولك إنه اختيار كويس أوي.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *