مراجعة موبايل ريلمي 7i
ريلمي 7i

بعد ما أعلنت شركة ريلمي عن موبايل Realme 7i وبشكل رسمي، بقى من أكتر الموبايلات اللي استناها كتير من المستخدمين، دا باعتبار إنه التطور الجديد للأجيال السابقة له والمنافسة القوية اللي دخلوا فيها بعد نزولهم مصر، خلينا نعرف في المراجعة دي إيه السر اللي كان ورا انتظار كتير من المستخدمين نزول ريلمي 7i مصر، ونبدأ بأول حاجة بناخد بالنا منها وهو تصميم الموبايل…

تصميم موبايل ريلمي 7i:

 

تصميم موبايل ريلمي 7i
تصميم موبايل ريلمي 7i

 

أولًا خامات الموبايل:

الموبايل جاي بتصميم من بلاستيك البولي كاربونيت، سواء الضهر أو الفريم، ممكن تحس إن الفريم معدني لإنه مطفي كدا، بس هو بلاستيك، وهتلاحظ وجود خط في ضهر الموبايل من فوق كدا، كإنه بيقسم ضهر الموبايل لتصميمين مختلفين عن بعض.

ثانيًا التصميم الخارجي:

  • تصميم الكاميرات:

كاميرا السيلفي واخدة شكل الثقب في نوتش الشاشة من الشمال.

الكاميرات الخلفية في مستطيل بارز شوية عن الضهر، ولما تركب جراب الموبايل هيظبط بروز الكاميرات دا أكتر، وهتلاقي إن الكاميرات عليها طبقة من الزجاج لحماية الكاميرا.

أبعاد الموبايل:

  • الموبايل بييجي بأبعاد 164.1×75.5×8.9 ملم.
  •  وزن الجهاز 188 جرام.

الموبايل وزنه مش تقيل وكمان متوزع كويس، وفيه curve كدا في ضهر الموبايل من الأطراف لطيف أوي وهيديك إحساس إنك ماسك موبايل غالي وحلو.

شاشة موبايل ريلمي 7i:

 

شاشة موبايل ريلمي 7i
شاشة موبايل ريلمي 7i

 

  • الشاشة بتيجي بشكل الثقب من نوع IPS LCD. 
  • مساحة الشاشة كويسة جدًا 6.5 إنش، وبتمثل حوالي 90٪ من الواجهة الأمامية من الموبايل.
  • جودة الشاشة HD+، وكنت أتمنى لو الشاشة تيجي بجودة الـ FHD+ على الأقل زي المنافسين، وبدقة 720×1600 بكسل بمعدل كثافة بكسلات 270 بكسل لكل إنش، وبتدعم الشاشة أبعاد العرض بنسبة 20:9.
  •  موجود طبقة حماية على الشاشة من نوع Corning Gorilla Glass بس شركة ريلمي محددتش من أي جيل. 

معدل تردد الشاشة بيوصل لـ90Hz، ويُعتبر ريلمي 7i من أرخص الموبايلات اللي بتدعم التردد دا، معدل كويس جدًا وهتلاقي أداء سلس نوعًا ما وتجربة أفضل سواء كان في الألعاب أو مشاهدة فيديوهات أو استخدام الموبايل عمومًا. 

الشاشة بتدعم وضع الـ Eye Comfort، وضع لطيف أوي ويُعتبر ميزة حلوة كدا، علشان تحمي عينك من أضرار الاستخدام الطويل للموبايل، خصوصًا لو بتحب تستخدم الموبايل بالليل.

ألوان الشاشة واضحة ودرجة تشبعها مقبولة، وكمان سطوعها في الشمس كويس، وتقدر تستخدمها بسهولة.

كاميرات موبايل ريلمي 7i:

كاميرات ريلمي 7i تُعتبر أكتر حاجة بتميز الموبايل، وريلمي ركزت على أداء الكاميرات دي كويس جدًا، يلا بينا نتعرف عنها بالتفصيل.

الكاميرا الأمامية:

  • كاميرا السيلفي بدقة 16 ميجا بكسل وبفتحة عدسة F/2.1 بمستشعر من نوع Sony IMX471.

كاميرا السيلفي كويسة جدًا، وبتطلع صور بيظهر فيها أدق التفاصيل تقريبًا خصوصًا مع الإضاءات القوية وبالنهار، والألوان كويسة مش بهتانة كدا.

الكاميرات الخلفية:

ريلمي 7i بييجي بكاميرا خلفية رباعية.

  • الكاميرا الأساسية بتيجي بدقة 64 ميجا بكسل بفتحة عدسة F/1.8.
  • الكاميرا التانية بتيجي بدقة 8 ميجا بكسل بفتحة عدسة F/2.3، ودي الكاميرا الخاصة بالتصوير الواسع “Ultra wide”.
  • الكاميرا التالتة بدقة 2 ميجا بكسل بفتحة عدسة F/2.4، ودي الكاميرا الماكرو. 
  • وأخيرًا، الكاميرا الرابعة بدقة 2 ميجا بكسل، وبفتحة عدسة F/2،  ودي العدسة المخصصة لتصوير البورتريه وعمل عزل في الصور، مع فلاش أحادي من نوع ليد فلاش.

نروح بقى لتصوير الفيديوهات، وبنلاقي إن ريلمي 7i بيصور الفيديوهات بدقة الـ FHD بجودة 1080 بمعدل التقاط 30 فريم في الثانية، وبتدعم الكاميرات التصوير بدقة الـ HD بجودة 720 بمعدل التقاط 30 و60 فريم في الثانية.

دا غير التصوير البطيء الـ Slow Motion بجودة الـ 720 بكسل بمعدل التقاط 120 فريم، مع دعم خاصية تثبيت الفيديوهات عن طريق الـ UIS Max Video Stabilization.

تجربة التصوير بالكاميرات الخلفية كانت حلوة جدًا، تفاصيل واضحة وألوان حلوة، والكاميرات هنا فيه ميزة كويسة جدًا وهي إن التجميل أو التعديل في الصور مش بيكون عالي زي ما بنشوف في كاميرات موبايلات ريلمي، بالعكس الصورة بتكون مليانة تفاصيل واقعية، يعني هتعيش تجربة تصوير بشكل احترافي نوعًا ما، وتوثق أهم الذكريات بصور بجودة عالية وبنفسك.

إجمالًا أقدر أقول إن كاميرات موبايل ريلمي 7i كويسة جدًا، ويمكن تكون تفوقت على أداء كاميرات موبايلات في فئة سعرية أعلى ولشركة ريلمي كمان.

 

كاميرات موبايل ريلمي 7i
كاميرات موبايل ريلمي 7i

 

البصمة والزيادات:

البصمة

  • الموبايل مزود ببصمة خلفية، أدائها سريع وكويس أوي ومفيش تعليق سلبي عليها خالص.

المستشعرات:

الموبايل بيدعم مستشعرات تانية وهما: 

  • مستشعر التسارع. 
  • مستشعر التقارب. 
  • مستشعر البوصلة.
  • وأخيرًا، مستشعر الجيروسكوب.

الواي فاي بترددات الـ a/b/g/n/ac، والموبايل بيدعم كمان الـ Dual-band, Wi-Fi Direct, hotspot.

البلوتوث بييجي بإصدار 5.0 مع خاصيتي الـ A2DP, LE.

خاصية الـ GPS اللي بيدعمها الموبايل مع أنظمة ملاحة تانية زي الـ A-GPS, GLONASS, BDS.

بالنسبة لمنفذ الـ USB بييجي من النوع الأحدث الـ Type C مع دعمه لخاصيتي الـ OTG.

الموبايل بييجي بنظام تشغيل أندرويد 10 مع واجهة ريلمي الـ Realme UI 1.0.

الموبايل بيدعم إمكانية تركيب شريحتين اتصال من نوع Nano Sim، وبيدعم شبكات الجيل التاني الـ 2G والجيل التالت الـ 3G والجيل الرابع الـ 4G.

الموبايل بييجي من سماعة وحيدة من الأسفل ومش ستيريو طبعًا، ومينفعش تتوقع أكتر من كدا في الفئة السعرية دي بصراحة، بس صوت السماعة مقبول وواضح نوعًا ما.

الموبايل يدعم منفذ الـ 3.5 ملم الخاص بسماعات الأذن، وللأسف مش مرفق مع الموبايل سماعات أذن وهتضطر تشتريها.

الموبايل مش مزود بمايك ثانوي لعزل الضوضاء، واللي بنحتاجه كتير لو بنتكلم أو بنسجل في مكان فيها دوشة وناس كتير حواليك، وكنت أتمنى من ريلمي توفره في الموبايل.

أداء موبايل ريلمي 7i:

 

أداء موبايل ريلمي 7i
أداء موبايل ريلمي 7i

 

  • معالج كوالكم من نوع Snapdragon 662 بتكنولوجيا الـ 11 نانو.
  •  معالج رسومي من نوع Adreno 610.
  • الموبايل بييجي بذاكرة صلبة من نوعUFS 2.1 بسعة تخزين 128 جيجا، مع ذاكرة عشوائية نوعهاLPDDR4X بسعة 8 جيجا بايت، الذاكرة العشوائية كبيرة، وتجربة القراءة  والكتابة هتكون حلوة جدًا.
  • الموبايل بيدعم إمكانية تركيب كارت ميموري وزيادة المساحة التخزينة لـ 256 جيجا بايت.

بصراحة أداء الموبايل بالنسبة لسعره كويس أوي، سواء في الألعاب زي لعبة كول أوف ديوتي وغيرها، كانت شغالة كويس ومفيش منها مشاكل، وبعيدًا عن الألعاب أداء الموبايل في الاستخدام اليومي كويس كمان.

إجمالًا أداء الموبايل كويس نوعًا ما ومقبول.

البطارية ضخمة بسعة 5000 مللي أمبير.

شاحن بيدعم الشحن السريع  بقوة 18 وات.

البطارية كبيرة وهتفضل معاك وقت طويل، سواء في ألعاب أو استخدام يومي للموبايل، والشاحن مش سريع أوي بس متقلقش مع حجم البطارية دي هتقدر تعتمد عليها.

محتويات علبة موبايل ريلمي 7i: 

موبايل ريلمي 7i.

إسكرينة لحماية الشاشة تم وضعها بشكل مسبق على شاشة الموبايل وبتكون من البلاستيك.

رأس الشاحن بقوة 18 وات.

كابل الـ USB  نوع الـ Type C.

جراب ظهر شفاف لحماية الموبايل من الخرابيش.

دبوس معدني.

كتيب التعليمات يوضح كيفية إستخدام الموبايل.

سعر موبايل ريلمي 7i:

سعر النسخة الـ 128 جيجا بايت مع رامات 8 جيجا بايت حوالي 4000 جنيه مصري.

الرأي النهائي في موبايل ريلمي 7i:

المميزات:

  • منفذ USB من النوع الأحدث الـ Type C.
  • بطارية كبيرة تصمد للعمل لفترة طويلة خلال اليوم، بالإضافة للشحن السريع الـ 18 وات.
  • يدعم الموبايل شريحتين إتصال، وكارت ميموري في نفس الوقت.
  • المعالج يقدم أداء مقبول.
  • شاشة كبيرة على هيئة الثقب مع إستغلال الحواف بشكل ممتاز بالإضافة لدعمها لمعدل التردد الـ 90Hz. 
  • ذاكرة صلبة من نوع UFS 2.1، وذاكرة عشوائية كبيرة.

العيوب:

  • لا يدعم تصوير الفيديوهات بجودة الـ 4K.
  • لا يوجد هاند فري.
  • لا يدعم لمبة إشعارات.
  • لا يدعم الميكروفون الثانوي الخاص بعزل الضوضاء.
  • الشاشة HD+ فقط.
  • ارتفاع سعر الموبايل بالنسبة لمواصفاته.

الخلاصة:

بالنسبة لرأينا في موبايل ريلمي 7i فهو موبايل فيه مميزات حلوة، زي الكاميرات واللي تُعتبر أقوى ميزة في الموبايل، والبطارية الضخمة اللي هتفضل معاك وقت طويل خلال اليوم ودي مميزات ممكن تغري ناس معينة تشتري الموبايل، بس أرجع أقولك إن نقطة الشاشة الـ  HD+ ممكن تأثر على رأينا، وبلاش تعتبر إن تردد الشاشة الـ 90 هيرتز نقطة تقدر ريلمي تنافس بيها، لا إنت تقدر تحصل على موبايل بشاشة FHD+ وبتردد 90 هيرتز من ريلمي بردو، وبالنسبة للأداء فالمعالج الخاص بالموبايل هيقدملك أداء كويس جدًا، كمان تقدر تستفيد من خدمة “اختار موبايلك” واللي بيقدمها موقــــع ناس فـــونـــز، ودي خدمة بنقدمهالك لو عايز تعرف أنسب موبايل ليك، كل المطلوب منك تعرفنا المميزات والعيوب ورينج السعر اللي يناسبك، واحنا نرشحلك الموبايل الأقرب للمواصفات اللي بتدور عليها.

 

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *