أول موبايل قدمته شركة سامسونج في سلسلة الـ M لسنة 2020 هو موبايل سامسونج M31 بنفس المميزات اللي كانت موجودة في موبايل سامسونج M30s القديم زي البطارية وبتصميم مختلف في الشكل مع كاميرات بجودة أفضل وأعلى، خلينا نشوف كل تفصيلة في الموبايل ونحكم عليه…
بس قبل ما نعمل كدا خلينا نعرفكوا على أجدد خدماتنا وهي خدمة “اختار موبايلك” واللي بيقدمها موقع ناس فــونـــز الخدمة دي بتدور عن طريقها إنك تبعتلنا ميزانيتك المتوقعة مع المواصفات اللي بتحتاجها في موبايلك وإحنا هنرشحلك الموبايل اللي بنشوفه مميز أكتر من غيره واللي يتناسب مع طلباتك، بس كل اللي عليك أنك تضغط هنـــــــــــــا…
نرجع لمراجعتنا بقى…
تصميم موبايل سامسونج M31:
أولًا خامات الموبايل:
الموبايل مصنوع من البلاستيك زي عادة سامسونج في الفئة الـ M، وهتلاقيه واخد نفس الخامات بتاعة الـ M30s بالظبط مع نفس التصميم واللون حتى.
ثانيًا التصميم الخارجي:
تصميم الكاميرات:
في ضهرالموبايل أربع كاميرات في بوكس واحد بتغطيهم طبقة من الزجاج، الكاميرات مفيهاش بروز ودا شيء كويس جدًا، وكمان متصممة بشكل حرف الـ L مقلوب ومتفهمش إيه سر حرف الـ L اللي سامسونج بهدلته معاها دا.
تصميم الموبايل قديم شوية شبه تصميم معظم الموبايلات المتوسطة اللي نزلت في 2019، ودا أثر على قوة منافسة سامسونج M31 مع باقي الموبايلات اللي نزلت في 2020.
أبعاد الموبايل:
الموبايل بييجي بأبعاد 159.2×75.1×8.9 ملم.
الموبايل وزنه تقيل تقريبًا، حوالي 191 جرام، والارتفاع 159، العرض 75.1، والسمك 9 مليمتر، بمعنى إن الموبايل مش سميك أوي ويريحك في الاستعمال لفترات طويلة.
شاشة موبايل سامسونج M31:
بييجي موبايل سامسونج M31 بشاشة سوبر أموليد حجمها 6.4 بوصة.
دقة الشاشة 1080×2340 بيكسل، وبجودة FHD+ مع أبعاد عرض 19.5:9، وكثافة بيكسلات 411 بيكسل لكل بوصة مع نوتش Infinity U واللي موجود فيها من فوق، بالإضافة لوجود طبقة حماية Corning Gorilla Glass 3 على شاشة الموبايل.
أيضًا الشاشة بتمثل 80.9 % من جسم الموبايل.
طبعًا شاشات سامسونج غنية عن التعريف وتستحق الإشادة والإعجاب كل مرة مهما قولنا، لأن فعلًا بتقدملك تجربة شاشة ممتازة جدًا جدًا من ألوان وتفاصيل واستخدام وسلاسة مش هتلاقيها غير في سامسونج من الآخر.
كاميرات موبايل سامسونج M31:
النسخة الجديدة في السلسلة دي استخدمت سامسونج فيها كاميرات بأرقام أعلى لجودة تصوير أفضل وبتييجي الكاميرات دي كالتالي…
الكاميرا الأمامية:
الكاميرا الأمامية بتصور بدقة 32 ميجا بكسل، بفتحة عدسة F/2.0، وبتدعم خاصية الـ Slow Motion، وإمكانية تصوير الفيديوهات بنفس الجودة والسرعة اللي بتصور بيها الأربع كاميرات الأساسية.
الكاميرات الخلفية:
الموبايل فيه أربع كاميرات خلفية، خلينا نشوفهم ونعرف تفاصيل كل كاميرا.
الكاميرا الأولى، دقتها 64 ميجا بكسل، بفتحة عدسة F/1.8، بمستشعر سامسونج GW1.
الكاميرا التانية، Ultra Wide علشان تعيش تجربة التصوير العريض، وبتصور بدقة 8 ميجا بكسل، بفتحة عدسة F/2.2.
الكاميرا التالتة، دقتها 5 ميجا بكسل، بفتحة عدسة F/2.4، وهي مخصصة للعزل.
أما الكاميرا الرابعة، فهي بتصور بدقة 5 ميجا بكسل، وبفتحة عدسة F/2.4، وهي كاميرا ماكرو للتصوير القريب.
الكاميرات بتدعم تصوير الفيديوهات بجودة الـ 4K، بدقة 2160 بكسل، بمعدل التقاط 30 إطار، وكمان بتدعم التصوير بجودة الـ FHD، بدقة 1080 بكسل، بمعدل التقاط 30 إطار في الثانية.
الكاميرات هنا فعلًا بقي فيها تطور حقيقي وكبير عن سامسونج M30، والأداء بصراحة رائع وعجبني جدًا، لاحظت إن معالجة الصور اتحسنت كتير جدًا عن النسخة القديمة من السلسلة ويمكن دا يرجع للسوفت وير بتاع سامسونج وتطويره أكتر في الواجهة الجديدة، وكمان الأداء في الإضاءة الضعيفة بقى كويس، لكن للإسف النايت مود معجبنيش أوي بس خطوة كويسة ومرضية من الكاميرات من حيث الأداء.
البصمة والزيادات:
البصمة:
الموبايل هنا بييجي ببصمة وجه مع مستشعر بصمة الإصبع التقليدي في ضهر الموبايل وللأسف البصمة مفيش فيها أي جديد خالص ولا حتى بقت أسرع.
المستشعرات:
- مستشعر البصمة.
- مستشعر الدوران.
- مستشعر المغناطيسية الأرضية.
- مستشعر المكان.
- مستشعر الضوء.
- مستشعر درجة القرب.
الموبايل نزل منه أكتر من لون زي، الأزرق، والأسود، والأحمر، بالإضافة إلى شوية زيادات زي:
بييجي البلوتوث بالإصدار 5.0، مع دعم خاصيتي الـ A2DP, LE.
يدعم الموبايل رديو الـ FM، والـ NFC.
بيتوفر في الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.
يدعم أيضًا الواي فاي بترددات الـ a/b/g/n/ac، كما يدعم الـ Dual-band, Wi-Fi Direct, hotspot.
أم بالنسبة لمنفذ الـ USB فييجي من النوع الأحدث واللى هو الـ Type C، كما يدعم خاصية الـ OTG.
الموبايل جاي بأحدث نظام تشغيل Android 10، مع واجهة سامسونج الأحدث الـ One UI 2.
يدعم الموبايل شبكات الـ 4G،والـ 3G، وكمان الـ 2G.
يدعم الموبايل امكانية تشغيل شريحتين اتصال في نفس الوقت من نوع Nano Sim.
صوت الموبايل:
نروح لتجربة الصوت في سامسونج M31، الموبايل مزود بمايك ثانوي، لما كنت بسجل الصوت أو أعمل مكالمة كان المايك بيعزل أي دوشة جنبي.
مدخل السماعات المعتاد (3.5 مم).
وصوت الموبايل كان عالي ومجسم لما جربته من غير سماعة والحقيقة كان تجربة مميزة.
أداء موبايل سامسونج M31:
- معالج Exynos 9611 ثماني النواة Cortex A73، بتردد 2.3 جيجا هيرتز.
- التصنيع 10 نانو ميتر والمعالج الرسومي هو Mali-G72 MP.
- مساحة تخزين الموبايل كبيرة عبارة عن 128 جيجا.
- الذاكرة الصلبة بتييجي من نوع UFS 2.1، والذاكرة العشوائية بتييجي من نوع LPDDR4x.
المعالج هنا قديم للأسف وشوفناه في موبايلات قديمة من سامسونج ومش أقوى حاجة في الفئة السعرية دي، وفيه معالجات كتير تتغلب عليه في الأداء بسهولة، غير إن واجهة سامسونج البطيئة بتجهد المعالج لأنها بتسيب كل حاجة شغالة في الخلفية ومبتقفلش حاجة من نفسها، فدا بيسبب إن المعالج ميقدمش أداء قوي وهو مضغوط.
بطارية موبايل سامسونج M31:
سامسونج M31 بييجي ببطارية ممتازة تشتغل معاك طول اليوم، وتُعتبر أكبر بطارية تقدر تحصل عليها وهي نفس البطارية الموجودة في الـ M30.
بطارية الموبايل سعتها 6000 ملي أمبير،، وهي من نوع الليثيوم بوليمر، ومزودة بتقنية الشحن السريع برأس شاحن قوته 15 وات، يعني الموبايل كان بيتشحن معايا بسرعة نسبيًا، وكنت مقضيها عليه فيديوهات وتصفح على النت طول اليوم، يعني البطارية نقطة إيجابية جدًا وفرقت معايا كتير، ولكن لو كان الشحن أسرع شوية كان هيفرق جدًا في الاستخدام.
سعر موبايل سامسونج M31:
سعر الموبايل للنسخة الـ 128 جيجا مع 6 جيجا رام هو 4040 جنيه مصري حاليًا.
محتويات علبة موبايل سامسونج M31:
- موبايل سامسونج M31.
- شاحن بقوة 15 وات.
- كابل الـ USB من نوع Type C.
- كتيب التعليمات مع الضمان.
- دبوس معدني لفتح مكان شريحتي الاتصال.
- هاند فري بمنفذ الـ 3.5 ملم.
الرأي النهائي في موبايل سامسونج M31:
الخلاصة إن شركة سامسونج قدمت موبايل سامسونجM31، ودخلته في فئة كلها سفاحين وكان عندها أمل تنافس بيه بس للأسف مش لاقي موبايل واحد سامسونج تقدر تتفوق عليه في الفئة دي، لو تمت المقارنة بين أدائه مع موبايلات تانية زي نوت 9 برو، وريلمي هيتفوقوا عليه، خصوصًا أنهم نفس الفئة السعرية تقريبًا.
لكن لو أنت بتحب سامسونج فان فأعتقد إنك هتحب تجيب الموبايل دا وهو بيقدم تجربة محترمة من سامسونج والشاشة بتاعته متتعوضش في موبايل تاني في الفئة دي.