مراجعة موبايل realme C15
realme C15

مراجعة جديدة ومعلومات أكتر عن موبايل realme C15

شركة realme أعلنت عن جهازها الأحدث ضمن سلسلة أجهزتها من الفئة السعرية المتوسطة أو الاقتصادية، وهو realme C15 ودا يعتبر التطوير المباشر للإصدار اللي كان قبله realme C11

فهل هو فعلًا الأحدث وهل فيه بينه وبين باقي الإصدارات الاختلافات اللي تخليك تفضله عن غيره سواء من شركته أو من الشركات المنافسة ولا لأ!

دا اللي هنعرفه من خلال مراجعتنا الشاملة للموبايل دا دلوقتي، واللي هنوضح فيها كل إمكانيات ومواصفات الجهاز.

بس قبلها خلونا نفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك“، واللي بيقدمها موقــــع ناس فـــونـــز، ودي خدمة هتساعدك في إنك تختار الجهاز المناسب ليك، عن طريق ترشيحاتنا، واللي بتكون بِناءًا على طلبك، واللي أنت عايزه ومحتاجه في جهازك؛ ودا علشان تكون ببساطة قادر تختار الجهاز اللي اتعمل لإشباع احتياجاتك ويتناسب مع قدرتك الشرائية من غير أي تردد.

ويلا نبدأ مراجعتنا بتصميم الموبايل…

تصميم موبايل realme C15:

أولًا خامات الموبايل: 

الخامات في realme c15 من البلاستيك بالكامل المقاوم للبصمات، سواء في الضهر أو في الفريم، وتُقل وزن الجهاز هنا بيأكد لك على جودة ومتانة الخامات مش بس سعة البطارية الكبيرة.

ودي أول حاجة مُمكن تشدك ناحية الموبايل د، على قد ما التصميم بسيط إلا إنه مُلفت وجديد، ومفيش حد هيتوقع إن دا موبايل اقتصادي من التصميم بتاعه.

التصميم الخارجي، بييجي شبه تصميم الـ realme c11 أوي، بس مع اختلاف واحد وهو مستشعر البصمة اللي بييجي في ضهر الموبايل.

ثانيًا التصميم الخارجي:

تصميم الكاميرات:

بالنسبة لكاميرات الموبايل الخلفية فهي 4 كاميرات مرصوصين في شكل مربع بارز شوية عن ضهر الموبايل، بالإضافة إلي وجود فلاش أحادي من نوع ليد فلاش موجود خارج مربع الكاميرات.

أما بالنسبة للكاميرا الأمامية فهي موجودة في شكل نوتش أعلى شاشة الموبايل.

 

تصميم موبايل realme C15
تصميم موبايل realme C15

 

أبعاد الوبايل:

الجهاز بييجي هنا بأبعاد 164.5×75.9×9.8 ملم.

وزن الجهاز 209 جرام، وهو وزن تقيل جدًا، ولكن الأبعاد دي بتخلي الجهاز مريح جدًا في إيدك وأنت ماسكه حتى لو استخدمته لفترات طويلة.

الجهاز متوفر باللون الفضي، واللون الأزرق وتصميمه عصري وأنيق بكاميرا رباعية خلفية، لأول مرة في أجهزة الفئة السعرية دي وبتيجي بشكل المربع.

شاشة موبايل realme C15:

الشاشة من نوع IPS LCD، وبتيجي بشكل النوتش الـ water drop notch، ودي بتكون بحجم قطرة الماء، ومش بتاخد حيز كبير من الشاشة اللي مساحتها 6.5 إنش بجودة الـ HD، وبدقة 720×1560 بكسل، يعني بمعدل كثافة بكسلات 270 بكسل لكل إنش.

الشاشة هنا بتدعم أبعاد العرض الجديدة بنسبة 20:9، بالإضافة إلى إنها بتشغل من مساحة الواجهة الأمامية حوالي 88.7%، ودا بيخلي محتوى العرض فيها أكبر وأوضح.

وجود طبقة حماية من نوع Corning Gorilla Glass على الشاشة، بس مفيش حد حدد هي من أي جيل.

وكمان تقدر تلغي أزرار التحكم وتستخدم الإيماءات للاستمتاع بأكبر مساحة ممكنة للشاشة، دا بجانب دعم الشاشة لوضع الـ Dark Mode، اللي بيحول شاشة الجهاز بالكامل إلى اللون الأسود، وبالتالي بيساعد الوضع دا العين على إنها ترتاح أكتر.

 

شاشة موبايل realme C15
شاشة موبايل realme C15

 

نقدر نقول إن الشاشة هنا كأداء مش أحسن حاجة بالنسبة لشاشات الفئة السعرية دي، لكن حجمها الكبير وسطوعها الممتاز، هيخلي تجربة مشاهدة الفيديوهات والأفلام، أو أي محتوى عمومًا حاجة مُرضية جدًا وحقيقي تجربة مُمتعة ومُريحة.

كاميرات موبايل realme C15:

أولًا الكاميرا الأمامية:

ودي بتيجي بدقة 8 ميجا بكسل، وبفتحة عدسة F/2.0.

ثانيًا الكاميرا الخلفية وهي كاميرا رباعية حيث:

الكاميرا الأولى، دقتها 13 ميجا بكسل، وبفتحة عدسة F/2.2، ودي الكاميرا الأساسية. 

الكاميرا الثانية، فبتيجي بدقة 8 ميجا بكسل، وبفتحة عدسة F/2.3، ودي بتكون خاصة بالتصوير الواسع.

الكاميرا الثالثة، دقتها 2 ميجا بكسل، ودي للتصوير الأبيض والأسود.

الكاميرا الرابعة والأخيرة، فدقتها 2 ميجا بكسل، وفتحة العدسة فيها F/2.4، وهي الخاصة بعمل العزل، وطبعًا مع فلاش ليد أحادي من نوع ليد فلاش.

الكاميرا تدعم تصوير الفيديوهات بجودة الـ FHD، وبدقة 1080 بكسل، بمعدل التقاط 30 إطار في الثانية.

بالإضافة إلى دعمها للتصوير بجودة الـ HD، بدقة 720 بكسل، بمعدل التقاط 30 إطار في الثانية.

 

كاميرات موبايل realme C15
كاميرات موبايل realme C15

 

وطبعًا لاحظنا إن لأول مرة في إصدارات الفئة الاقتصادية دي، الجهاز يكون بخمس كاميرات ودي ميزة حلوة جدًا، خصوصًا إن أداء التصوير هنا حقيقي كويس جدًا…

فتشبَُع الألوان والحدة في الصور بيعلي أداء التصوير معاك أوي، خصوصًا لو في الإضاءات الخارجية، وهتلاقي كمية تفاصيل ووضوح مقبولين في الصور بشكل كبير، وحتى التصوير في الإضاءات الليلية أو الضعيفة هتقدر الكاميرا تقدم لك تجربة أداء مضمونة؛ لإنها بتدعم وضع التصوير الليلي الـ Night mode.

وأما بقا بالنسبة للأداء في تصوير الفيديوهات، فالكاميرا تدعم جودة تصوير فيديوهات بدقة FHD، يعني جودة ووضوح ودقة مضمونين في تصوير فيديوهاتك وبشكل مُرضي كمان.

البصمة والزيادات:

البصمة:

الجهاز يدعم مستشعر البصمة وبتيجي البصمة في ضهر الجهاز هنا، دا بالإضافة إلى دعم الموبايل لخاصية الـ Face unlock عن طريق الكاميرا الأمامية.

الجهاز كمان يدعم عدة مستشعرات أخرى، زي:

  • مستشعر التسارع.
  • مستشعر التقارب.
  • مستشعر البوصلة.

أما الواي فاي، فبييجي بترددات b/g/n، بالإضافة إلى دعمه لخاصية الـ hotspot.

والبلوتوث يأتي هنا بالإصدار الأحدث الـ 5.0، بالإضافة إلى دعمه للـ A2DP ،LE ،aptX. 

الجهاز طبعًا بيدعم الـ GPS بسرعة ودقة كويسين جدًا ، بالإضافة إلى دعمه لأنظمة ملاحة تانية زي A-GPS GLONASS ،BDS.

وبالنسبة لنظام التشغيل هنا، فهو الأحدث android 10، مع واجهة ريلمي الجديدة الـ Realme UI 1.0.

أما بالنسبة لمنفذ الـ USB، فبييجي من النوع التقليدي القديم اللي هو الـ Micro USB، مع دعمه للـ OTG.

الجهاز هنا بيدعم منفذ الـ 3.5 ملم الخاص بسماعات الأذن، لكن الغريب إنه مابيجيش معاه في علبته سماعات أذن، ودا معناه إنك هتشتري سماعة خارجية من نوع يناسبك.

للأسف الجهاز لا يدعم الميكروفون الثانوي الخاص بعزل الضوضاء.

وهنا بشكل عام سماعات الصوت الخارجية بتقدم جودة صوت حلوة أوي، لكن للأسف صوتها مش عالي بشكل كافي…

ودا لدرجة إنك ممكن ما تقدرش تسمع الصوت لو كنت بعيد عنه أو لو كنت في مكان فيه دوشة حواليك وأصوات كتير، دا بالإضافة إلى عدم دعم الجهاز للميكروفون الثانوي الخاص بعزل الصوت خلال المكالمات، فنقدر نقيَِم لك أداء الصوت ونقول إنه كويس إلى حدٍ ما، بس طبعًا مش أحسن حاجة في الفئة السعرية دي.

أداء موبايل realme C15:

الجهاز realme C15 متوفر بنسختين:

النسخة الأولي، ودي بتيجي بذاكرة 64 جيجا بايت، مع ذاكرة عشوائية بسعة 4 جيجا رام.

النسخة الثانية، بتكون سعة ذاكرتها 128 جيجا بايت، مع ذاكرة عشوائية بسعة 4 جيجا رام. 

دا وبالإضافة إلى دعم الجهاز لإمكانية زيادة السعة التخزينية عن طريق كارت ميموري لحد 256 جيجا بايت.

أما بالنسبة لأداء الجهاز،  فالمعالج هنا ثماني النواة من شركة ميديا تيك من نوع Helio G35، وبييجي بتكنولوجيا الـ 12 نانو مع معالج رسومي من نوع PowerVR GE8320.

بالإضافة إلى دعم الموبايل لتعزيز أداء الألعاب عن طريق الـ Game Space.

 

أداء موبايل realme C15
أداء موبايل realme C15

 

بشكل عام تركيبة المعالج مش أحدث حاجة موجودة، لكن فعلًا بتقدم لنا أداء هايل في الاستخدامات اليومية الخفيفة، زي تصفح السوشيال ميديا أو مشاهدة الأفلام والفيديوهات..

أما الاستخدامات التقيلة زي الألعاب مثلًا، فهتشتغل معاك بأداء ممتاز من غير أي  تهنيج أو تقطيع في الفريمات، وكمان مش

هتقابل أي سخونة وأنت بتلعب حتى لفترات طويلة على الجهاز.

بطارية موبايل realme C15:

سعة البطارية 6000 مللي أمبير وهي أكبر سعة بطارية في أجهزة الفئة المتوسطة، دا بجانب دعم البطارية للشحن السريع بقوة 18 وات.

البطارية بتشحن من 0 لـ 100% في مدة لا تقل عن ساعة، لكن دي تُعتبر مدة شحن طويلة بالنسبة لشاحن 18 وات.

بس إحدى أهم مميزات البطارية هنا، هي دعمها لخاصية الشحن العكسي “reverse charging” عن طريق الـ OTG، اللي بتمكنك من استخدام الجهاز كباور بانك أو كمصدر للطاقة.

 

بطارية موبايل realme C15
بطارية موبايل realme C15

 

فتح علبة موبايل realme C15:

موبايل realme C15.

اسكرينة تم وضعها بشكل مسبق ع الجهاز وبتكون من البلاستيك.

رأس شاحن بقوة 18 وات.

كابل الـ USB L من نوع Micro USB.

دبوس معدني لفتح مكان الشريحة.

كتيب التعليمات والضمان.

سعرموبايل realme C15:

  • سعر الجهاز للنسخة 64 جيجا مع 4 جيجا رام 2650 جنيه مصري، أي ما يعادل تقريبًا 170 دولار أمريكي.
  • سعر النسخة 128 جيجا مع 4 جيجا رام، فهو 2950 جنيه مصري، أي ما يعادل 190 دولار أمريكي.

الرأي النهائي في موبايل realme C15:

المميزات:

يدعم الموبايل تشغيل شريحتين، وكارت ميموري في نفس الوقت.

بطارية كبيرة جدًا.

يدعم الموبايل الشحن السريع 18 وات.

يدعم مستشعر البصمة ليتفوق بذلك على هاتف Realme C11.

أحدث نظام تشغيل متوفر حالياً، مع واجهة ريلمي المطورة بشكل مباشر من العلبة.

أداء الكاميرات سواء الأمامية أو الخلفية بتقدم أداء كويس جدًا.

من أرخص الهواتف الداعمة لعدسة تصوير بزاوية واسعة زي موبايل ريدمي 9.

شاشة كبيرة بسطوع عالي تقدم أداء مرضي.

العيوب:

مفيش لمبة للأشعارات.

لا يدعم الميكروفون الثانوي الخاص بعزل الضوضاء أثناء استخدامك للموبايل بوجه عام.

لا تحتوى علبة الموبايل على سماعات الاذن أو جراب لحماية الموبايل.

سمك وتخانة الموبايل كبيرة جدًا لذلك ستعاني لبعض الوقت لحين التعود على استخدامه.

منفذ الـ USB بييجي من النوع القديم الـ Micro USB.

الخلاصة:

جهاز realme C15 حقيقي قدم لنا صفقة متوازنة جدًا كقيمة مقابل سعر اقتصادي، وبالتالي تقدر تعتمد عليه كجهاز أساسي ليك وأنت ضامن أداء وبطارية وكاميرات ممتازين…

وإحنا بالنسبة لنا بنرشحه من ضمن أفضل إصدارات الفئة المتوسطة سواء من شركته أو من الشركات المنافسة؛ ودا لإنه بيناسب استخدام كل فئات المستخدمين…

حتى الجيمرز المحترفين يقدروا يعتمدوا عليه، وأداؤه بالنسبالهم في العموم هيكون مُرضي إلى حدٍ ما كبير. 

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *