كل جهاز موبايل أيًا كانت ماركته ليه مميزات وليه عيوب حسب كل شخص محتاج إيه من الجهاز اللي هيشتريه، والجهاز اللي هنتكلم عن مراجعته وتفاصيله النهاردة هو Oppo find X2 pro، فالجهاز دا من أغلى إصدارات Oppo في السوق المصري بكاميرته الوهمية، وأداؤه الجبار…

طلعت بيه الشركة لمستوى تاني خالص مختلف عن كل إصدارات السنة، وطبعًا كالعادة هنوضح كل مواصفات، وإمكانيات الجهاز من حيث كل حاجة فيه بالتفصيل عشان تقدر تشوف الجهاز وتعرف الفرق بينه وبين الإصدارات التانية…

بدايةً خليني أعرفك على خدمة “اختار موبايلك” واللى بيقدمها مــوقــع نـاس فــونــز، واللي بتقدملك تجربة متميزة جدا بتوفر عليك الحيرة اللي ممكن تقابلك في السوق المصري حاليا لما تفكر تشتري موبايل جديد، عن طريق الخدمة دي هتقدر إنك تدخل ميزانيتك والإمكانيات اللي أنت عاوزها في الموبايل وإحنا هنرشحلك الموبايل المناسب ليك.

خلينا دلوقتي نرجع لمراجعة الموبايل دا…

تصميم موبايل Oppo find X2 Pro:

 

 

أولًا خامات الموبايل:

الموبايل ده بييجي بتصميم بريميم من السيراميك باللون الأسود، الخامة دي شكلها وملمسها مميزين جدا، الوزن قد يكون العيب الوحيد لأنه طبعًا بيكون أتقل من المعتاد، طبعًا الموبايل ده ليه إصدار تاني جلدي بلون برتقالي مميز.

ثانيًا التصميم الخارجي:

يوجد في تصميمه الخارجي طبقة حماية على الشاشة من نوع Corning Gorilla Glass الجيل السادس. 

الجهاز أبعاده 165.2×74.4×8.8 ملم.

 ووزنه217 جرام للنسخة السيراميك.

و200 جرام للنسخة الجلد.

ودا وزن تقيل لجهاز من غير أي COVER وهايكون صعب شوية إنك تستخدمه أو تشيله لفترات طويلة ولكن إحساس الخامات هينسيك إنه تقيل.

تصميم الجهاز دا ليه نظام حماية مميز، فهو بييجي مقاوم للماء والغبار بشهادة IP68، ودا مش للحوادث والصدمات البسيطة وتعرضه للرذاذ مثلًا، لا دا لحد متر ونصف تحت المايه لمدة 30 دقيقة كاملين.

شاشة موبايل Oppo find X2 Pro:

الشاشة الجهاز دا من نوع AMOLED.

بتيجي على شكل الثقب المعتاد ومنحنية من الجوانب، ومساحتها 6.7 إنش بجودة الـ QHD+ بدقة 1440×3168 بكسل، يعني بمعدل كثافة بكسلات 513 بكسل لكل إنش.

والشاشة هنا بتدعم الـ HDR10+ بالإضافة لدعمها لمعدل التحديث الـ 120H، وبتمكنك من الاستمتاع بالدقة الكاملة للشاشة حتى مع استخدام وضع الـ 120Hz، ودا طبعًا بعكس سلسلة سامسونج الرائدة الـ Galaxy S20 بإصداراتها المختلفة واللي اتكلمنا عنها قبل كدا بالتفصيل، مساحة الشاشة بالنسبة للواجهة تقريبًا بتشغلها بنسبة 93.1% للجهاز ودا بيخلي عرض أي محتوى يكون أوضح وأكبر.

الميزة الإضافية في الشاشة دي كمان إن مع دعمها لمعدل التحديث الـ  120Hz بتدعم دقة الـ QHD وبتكون قادر تشغلهم مع بعض.

شركة Oppo بتطلق على الشاشة دي اسم  الـ Ultra Vision Screen…

 

 

ودا للتعبيرعن الأداء الوهمي للشاشة، سواء من حيث الألوان أو التشبع أو حدة التفاصيل، الشاشة معاها مليار لون حقيقي وده بيخليك شايف كل حاجة بصورة طبيعية قدامك، دا غير إن الشاشة أصلا amoled من أجود وأفضل أنواع الشاشات وفي الجهاز دا بالذات الشاشة كانت تجربة حقيقي خيالية.

كاميرات موبايل Oppo find X2 Pro:

بالنسبة للكاميرا الأمامية:

فهي كاميرا أحادية دقتها 32 ميجا بكسل وفتحة عدستها F/2.4، يعني السيلفي بيها جودته هتكون فوق الممتاز بالإضافة لخاصية التجميل بالذكاء الاصطناعي ووضع التعبئة الذكية للضوء إللي بيخلي أداء الكاميرا الأمامية خرافي.

أما عن الكاميرا الخلفية، فهي كاميرا ثلاثية حيث: 

 الكاميرا الأولى: دقتها 48 ميجا بكسل فائقة الاتساع بفتحة عدسة F/1.7 وتدعم المثبت البصري الـ OIS بمستشعر من نوع Sony IMX689، وهي الكاميرا الأساسية للجهاز طبعًا.

 الكاميرا الثانية: فتأتي بدقة 13 ميجا بكسل بعدسة بيرسكوبية وفتحتهاF/3.0، وهي الخاصة بالتقريب وتدعم المثبت البصري الـ OIS مع دعمها للتقريب البصري حتى 5 مرات من غير ما تخسر حاجة من جودتها، ودا طبعًا بالإضافة للتقريب الرقمي (الديجيتال) لحد 60 مرة.

 الكاميرا الثالثة: ودقتها 48 ميجا بكسل بفتحة عدسة F/2.2 بمستشعر من نوع Sony IMX 586، ودا بجانب إن الفلاش ثنائي من نوع ليد فلاش.

 

 

تصوير الفيديوهات في الموبايل دا تجربة لازم تشوفها!

 بتصور بجودة 4K ودقتها  2160 بكسل بمعدل التقاط 30 و60 إطار في الثانية الواحدة.

 كمان بتدعم الكاميرا تصوير الفيديوهات بجودة الـ FHD بدقة 1080 بكسل بمعدل التقاط 30 و60 إطار في الثانية الواحدة، بالإضافة إلى أنها بتدعم تصوير الـ HD بدقة 720 بكسل بمعدل التقاط 30 و60 إطار فيما لا يتجاوز الثانية الواحدة.

ومع خاصية الفيديو فائق الثبات ولوغاريتمات التثبيت المطورة، الكاميرا بتقدم تجربة سينمائية ديناميكية لكل فيديو تقوم بتسجيله بأداء فوق الممتاز. 

وكمان أداء الكاميرات الأمامية والخلفية وهمي بمعني الكلمة، وبالتحديد الكاميرا الخاصة بالتصوير الواسع، اللي تقدر تاخد بيها لقطات صور ملحمية حرفيًا من أي مسافة وكمان تكون باليل أو في أي أجواء إضاءتها ضعيفة وأدائها هيكون فائق الجودة والدقة.

البصمة والزيادات: 

ماسح البصمة في الجهاز دا هو بصمة إصبع (مدمج في الشاشة) والمستشعر ده بعد التجربة سريع جدا وبيقدم تجربة محترمة من أوبو وسرعة عملية بتقنية عصرية، بالإضافة لدعم الجهاز دا للـ  face unlock (بصمة وجه) عملية واستخدامها سهل جدًا.

الجهاز بيدعم مستشعرات منها:

 مستشعر التسارع. 

مستشعر التقارب.

مستشعر البوصلة.

 ومستشعر الجيروسكوب، ودا بيكون خاص بتشغيل نظارات الواقع الافتراضي الـ VR.

عجبني في الجهاز موضوع حماية العين بالذكاء الاصطناعي، وده بيحصل بشكل أوتوماتيكي إن الجهاز بيختار نظام لحماية العين من الضوء تلقائيًا عن طريق اختيار درجة حرارة اللون المثالية ودرجة السطوع بالنسبة لمحيط المستخدم علشان تلاقي الجهاز بيحاكي الإضاءات المختلفة اللي ممكن تقعد فيها. 

الجهاز للأسف مابيدعمش لمبة الإشعارات، ولكن أوبو عوضتها عن طريق إضافة الحواف في أطراف الشاشة زي معظم أجهزة سامسونج اللي بتيجي بانحناء في الشاشة وبتسميه سامسونج “إيدج”، الحواف دي بقى بتنور في حالة تلقي إشعار مثلا، وزي سامسونج ما بتعمل في معظم موبايلاتها مع خاصية Always On Display بتقدر تستغني عن لمبة الإشعارات بسهولة.

يدعم الهاتف شبكات الاتصال، الجيل التاني الـ 2G والجيل التالت الـ 3G والجيل الرابع الـ 4G والجيل الخامس الـ 5G.

الموبايل بيدعم إمكانية تركيب شريحتين من نوع Nano Sim.

ميزة كمان في الموبايل إنه بيدعم خاصية الـ GPS، بالإضافة لأنظمة الملاحة التانية زي الـ Dual-band A-GPS, GLONASS, BDS, GALILEO، لتحديد الموقع بشكل أدق وأسرع.

منفذ الـ USB بييجي من النوع الأحدث الـ Type C مع دعمه لخاصية الـ OTG.

الموبايل بييجي بنظام التشغيل الأحدث الـ Android 10 مع واجهة Oppo الأحدث الـ Coloros 7.1.

بالنسبة للبلوتوث بيُدعم بالإصدار الـ 5.1 مع دعمه لخاصيتي الـ A2DP, LE.

الموبايل بيدعم الواي فاي بترددات الـ a/b/g/n/ac/ax بالإضافة لدعمه الـ Dual-band, Wi-Fi Direct, hotspot.

صوت موبايل Oppo find X2 Pro:

السماعات الخارجية تدعم الصوت الستيريو وصوت الهاتف عالي وممتاز، لكنه للأسف مابيدعمش منفذ الـ 3.5 ملم الخاص بسماعات الأذن.

يدعم الجهاز الميكروفون الثانوي الخاص بعزل الضوضاء والضجيج أثناء استخدامه، ودا ميكروفون موجود عشان يدخل صوت محدد بعيدًا عن باقي الأصوات حواليه زي أصوات الهوا مثلًا.

 بالإضافة لدعمه للتسجيل في وضع الصوت ثلاثي الأبعاد ودا بيمكَن المستخدم من توضيحه لصوت معين في فيديو عن الصوت الآخر… يعني الفكرة تشبه خاصية القرب والبعد في الكاميرا بس دي مع الأصوات.

حقيقي أداء الصوت هنا في الجهاز دا فاقت كل مراحل الجودة والوضوح، فمُكبَرات الصوت العلوية والسفلية الكبيرة والمتكاملة بتدي المستخدم إحساس بعمق الصوت والجهير الصوتي، يعني أداء صوتي خرافي ومُبهر.

أداء موبايل Oppo find X2 Pro:

 

 

نيجي لمربط الفرس ونقطتي المفضلة في أي جهاز!

المعالج في Oppo find X2 Pro هو معالج جبار من شركة كوالكوم ثماني النواه من نوع Snapdragon 865 بتكنولوجيا 7 نانو، مع معالج رسومي من نوع ADRENO 650.

المساحة التخزينية للجهاز دا هنا ضخمة أوي، فسعتها لوحدها 512 جيجابايت من نوع UFS 3.0، دا وبالإضافة لذاكرة عشوائية بسعة 12 جيجا بايت من نوع LPDDR 5، ودي أضخم سعة ذاكرة على مستوى جميع الفئات والأجهزة، بس في المقابل مفيش إمكانية لزيادة السعة التخزينية دي من خلال كارت ميموري، واللي ماعتقدش هيكون فيه حاجة ليه أصلًا.

نظام التشغيل في الجهاز هو الـ Android 10 ودا أحدث نظام تشغيل طبعًا وقت إطلاق الجهاز، مع واجهة Oppo الأحدث الـ Coloros 7.1.

تجربة المعالج كانت تجربة ملحمية بالنسبة ليا، لأن أنا لما بقابل معالج قوي مع عتاد داخلي من العيار التقيل بكون عاوز أجيب آخره وأشوف الإضافات بتاعة الشركات في السوفت وير واللي ممكن تخدم على أداء المعالج وأشوف ممكن يوصلني لفين!

لما جربت ألعب ألعاب على الموبايل ده بدأت بالثلاثي المدمر “فورت نايت، ببجي، كول أوف ديوتي” وأنا مرتبهم من الأقوى للأضعف لأني جربتهم بالترتيب ده، الموبايل في فورت نايت قدملي أداء منافس وقوي جدا جدا بعكس موبايلات كتير في السوق واستمر معايا لفترة كويسة مش قصيرة ومش كتير في نفس الوقت بس ده طبعًا بيرجع لاستهلاك اللعبة الجبار لمعظم موارد الموبايل، بس كتقييم كلي كنت مبسوط بالأداء.

ببجي كانت عيل صغير بالنسبة للموبايل، فريم ريت ثابت مبيتهزش مع ألوان وتجربة محترمة من الشاشة وتفاصيل تساعد على اللعب أصلا فكنت بصراحة مبسوط جدا من التجربة دي، وطبعًا كول أوف ديوتي لو فكروا ينزلوا جودة أعلى من كدا فهكون مستنيهم بالموبايل وهيشغلها بردو فمفيش قلق من النقطة دي.

بطارية موبايل Oppo find X2 Pro: 

سعة بطارية الجهاز دا 4260 مللي أمبير، وطبعًا دا بيخليها تصمُد لفترة مقبولة نوعًا ما خلال اليوم، والسبب الأساسي بردو هو إن المعالج موفر جدًا في استهلاك البطارية.

بالإضافة لإن الجهاز بيدعم الشحن السريع للبطارية بقوة 65 وات بتقنية الـ Super VOOC 2.0؛ اللي بتمكن المستخدم من الشحن خلال وقت قصير جداً يصل إلى حوالي 38 دقيقة فقط للبطارية كاملة و10 دقايق لشحن 40% منها، ودا يعتبر وقت قياسي، لكن للأسف الجهاز لا يدعم الشحن اللاسلكي.

 

 

فتح علبة موبايل Oppo find X2 Pro:

• موبايل Oppo Find X2 Pro وعليه سكرين
• حماية على الشاشة.
• الشاحن بقوة 65 وات.
• كابل USB من نوع Type C.
• سماعات أذن عالية الجودة Type C.
• جراب شفاف لحماية ظهر الهاتف.
• دبوس معدني.
• كتيب التعليمات والضمان.

سعر موبايل Oppo find X2 Pro:

سعر الجهاز في السوق حاليًا 16000 جنيه مصري.

الرأي النهائي في موبايل Oppo find X2 Pro:

المميزات:

• أحد أقوى الهواتف التي يمكنك الحصول عليها حاليًا فالمعالج يقدم أداء ممتاز.
• يدعم الـ 5G .
• البطارية تصمد لفترة مقبولة خلال اليوم فالمعالج موفر في استهلاك البطارية.
• يدعم الشحن السريع بقوة 65 وات لتتمكن من الشحن خلال وقت قصير جداً حوالي نصف ساعة فقط .
• يأتي الهاتف مقاوم للماء والغبار بشكل رسمي.
• خامات رائدة جدًا مع تصميم شيك و مختلف خصوصًا نسخة الجلد.
• السماعات الخارجية تدعم الصوت الاستيريو وصوت الهاتف عالي وممتاز.
• عوامل أمان سريعة جدًا.
• شاشة AMOLED تقدم أداء أكثر من هائل مع وجود طبقة حماية عليها مع دعمها لمعدل التحديث الـ 120Hz بالإضافة لدعمها دقة QHD+ و يمكنك تشغيل الـ 120Hz مع الـ QHD+ معًا.
• كاميرا خلفية ممتازة مع كاميرا زوم ممتازة مع كاميرا سيلفي ممتازة أيضًا .. فكاميرات هذا الهاتف تعد واحدة من أفضل الكاميرات التي يمكنك تجربتها في هاتف في 2020 .
• مساحة كبيرة 512 جيجا مع 12 جيجا رام .

العيوب:

• سعر مرتفع .
• لا يدعم الشحن اللاسلكي في حين أن الـ Samsung Galaxy Note 20 يدعم ذلك .
• وزن الهاتف ثقيل نسبيًا .
• لا يدعم الهاتف التصوير الـ 8K.
• لا يدعم إمكانية تركيب كارت ميموري ولكن لن تحتاجه فمساحة التخزين 512 جيجا.
• لا يدعم منفذ الـ 3.5 ملم الخاص بسماعات الاذن .
• لا يدعم الهاتف لمبة الاشعارات ولكن يمكنك التعويض عن طريق الحواف فهي تضئ في حالة تلقى إشعار ومع خاصية Always On Display مثل هواتف سامسونج.

الخلاصة:

طبعًا إمكانيات الجهاز وصفاته المتميزة والفريدة من نوعها من حيث الأداء والكاميرا والصوت وغيرهم من الإمكانيات إللي وضحناها بالتفصيل؛ بتبرر سبب ارتفاع سعر الجهاز للدرجة دي…

والأكيد إني برشحه لأي شخص مهتم بتفاصيل التصميم الأنيق والراقي والإمكانيات الجبارة على الرغم من ارتفاع سعره؛ لإن أكيد عيوبه لا تُذكر بجانب كل المميزات اللي وضحناها فيه!

وأنا شخصيًا بعتبر ده من الأجهزة اللي ممكن ندرجها في الصفقات الممتازة في السوق في الفترة دي لأنك بتاخد جهاز متكامل مش مجرد مميزات معينة على حساب حاجات تانية.