مراجعة موبايل infinix S5 Pro
infinix S5 Pro

خلونا نبدأ مراجعة النهاردة مع موبايل infinix S5 Pro

إحنا طبعًا متفقين على إن كل موبايل ليه مميزاته وليه عيوبه أيًا كانت ماركته إيه سواء إنفنكس أوغيرها، فإحنا بناخد الموبايل وبنحاول إننا نشرح كل تفاصيله وبياناته، عيوبه ومميزاته اللي تهمك معرفتها قبل ما تقرر تشتري الموبايل.

ملاحظين إن إنفنكس بتحاول تطور من نفسها اليومين دول ونازلة بموبايلين جداد، وهما الـ S5 Pro والـ Note 7 خلينا دلوقتي نسيب الـ Note7؛ لأن دا ليه مراجعة تانية لوحده، وتعالوا دلوقتي نتكلم عن موبايل إنفنكس S5 Pro، وطبعًا إحنا عارفين إن كل موبايل بيكون نازل مهتم بحاجة معينة ومركز عليها، فالموبايل دا نازل مركز على كام حاجة أهمها الشاشة الكبيرة الكاملة، والكاميرا الأمامية اللي على شكل POP UP.

المهم دلوقتي عايزين نعرف إمتي أقرر أشترى الموبايل دا وامتى اتراجع!

كل دا هتعرفه من خلال مراجعتنا دلوقتي، ويلا بينا نبدأ المراجعة ونشوف إيه هي مميزات وعيوب موبايل infinix S5 Pro!

بس فيه حاجة بسيطة عايز أقول لك عليها الأول، وهي خدمة جديدة بنقدمهالك، خدمة حصرية من خلالنا إحنا وبس يعني مش موجودة لحد دلوقتي في أي مكان تاني وهي خدمة “اختار موبايلك”، واللي بيقدمها مـــوقع نـاس فــــون،  في الخدمة دي هتقدر تعرف أي حاجة إنت عايز تعرفها عن أي موبايل بس كل اللي عليك تعمله، هو إنك تكتب المواصفات والإمكانيات اللي عايز تشوفها في الموبايل اللي نفسك تشتريه وإحنا هنقدملك أنسب موبايل ليك بالمواصفات والإمكانيات اللي حابب إنها تكون متوفرة في الموبايل بتاعك، بس كل اللي عليك الضغط هنـــــــــــــــــــا… 

تصميم موبايل infinix S5 Pro:

أولًا خامات الموبايل:

كعادة إنفنكس في الفئة السعرية دي إنها بتصصم الموبايل بخامات من البلاستيك سواء كان  بالنسبة لضهر الموبايل أو في الإطار، بس طبعًا عارفين إن الموبايل كدا هيكون معرض للخرابيش والجروح وكمان للتبصيم، فلازم نستخدم جراب لحماية ضهر الموبايل وللمحافظة عليه من كل دا.

تصميم الكاميرات:

الكاميرا الأمامية بتييجي بشكل مختلف شوية وهو شكل الـ POP UP، اللى يُعتبر ميزة كويسة علشان من خلال الشكل دا الشاشة بتييجي كاملة من غير أي نوتش، ودي هنتكلم عنها بالتفصيل بعدين. 

أما بالنسبة للكاميرا الخلفية، فالموبايل بييجي بثلاث كاميرات موجودة في فريم واخد شكل المستطيل والفريم دا بيوصل لأعلى حافة الموبايل، مع وجود فلاش ثنائي من نوع ليد فلاش.

 

تصميم موبايل infinix S5 Pro
تصميم موبايل infinix S5 Pro

 

الأبعاد والألوان:

الموبايل بييجي بأبعاد 162.5×76.88×8.95 ملم.

وزن الموبايل 195جرام، ودا أكيد وزن خفيف ومش هيبقى متعب لو استخدمته لفترة طويلة ودي أحيانا بتكون ميزة مهمة لبعض الناس.

أما عن ألوان الموبايل، فهو متوفر بألوان حلوة جدًا وجذابة بس تُعتبر نفس الألوان اللي متعودين نشوفها ومفيش فيها تغيير ملحوظ، زي اللون الأخضر، واللون البنفسجي.

شاشة موبايل infinix S5 Pro:

شاشة موبايل infinix S5 Pro بتييجي كاملة من غير نوتش، ودا علشان كاميرا السيلفي بتييجي بشكل الـ POP UP زي ما قولنا، والشاشة كمان من نوع IPS LCD، بمساحة 6.53 إنش، وبجودة الـ FHD+ بدقة 1080×2340 بكسل، بمعدل كثافة بكسلات 395 بكسل لكل إنش.

تدعم الشاشة الأبعاد الجديدة وهي 19.5:9، بالإضافة إلى دعمها الـ Dark Mode يعني تحويل النظام بالكامل إلى اللون الأسود، ودا اللي بقى بيدور عليه أغلب المستخدمين خصوصًا بعد ما جربوه على بعض التطبيقات، زى الفيسبوك والواتساب وعلشان كدا اهتمت مؤخرًا شركات المحمول بإنها تخلي الواجهة كلها Dark، ودا بيوضح قد إيه الشركات دي بتهتم بتجربة ورغبة المستخدمين وكمان بيبين قد إيه المنافسة الكبيرة بين الشركات دي للاستحواذ على السوق!

تحتل الشاشة نسبة 91% من الواجهة الأمامية للموبايل مع تحسين السطوع بشكل أفضل من شاشة الـ S5 السابق، بس بردو أحنا شايفين إن دا مش الأفضل وهنوضح دا بالتفصيل بعدين.

 

شاشة موبايل infinix S5 Pro
شاشة موبايل infinix S5 Pro

 

تجربة الشاشة هنا حلوة والألوان كويسة، بس الحاجة اللي كانت نقصاها كالعادة هي درجة السطوع اللي أقصي حاجة فيها مش عالية أوي، بمعنى إنك هتعاني منها تحت أشعة الشمس، فلازم تكون متقبل إنك واخد شاشة كبيرة وجودة كويسة بس مع درجة سطوع مش عالية، لكن خلينا نكون متفقين إن طبعًا محدش بياخد كل حاجة في الفئة الاقتصادية دي.

كاميرات موبايل infinix S5 Pro:

الكاميرا الأمامية: 

الكاميرا الأمامية بتييجي هنا بدقة 32 ميجا بكسل، بفتحة عدسة F\2.0.

الكاميرات infinix S5 Pro الخلفية 3 كاميرات…

الكاميرا الأولى، بتييجي بدقة 16 ميجا بكسل، وهي الكاميرا الأساسية للموبايل، بفتحة عدسة F\1.8.

الكاميرا الثانية، موجودة بدقة 2 ميجا بكسل، وخاصة بعمل العزل والبورتريه.

الكاميرا الثالثة، هي عبارة عن Low light camera، بمعنى إنها خاصة بالتصوير في الإضاءات الضعيفة والمنخفضة، مع وجود فلاش ثنائي من نوع ليد فلاش.

وكمان الموبايل يدعم تصوير الفيديوهات بجودة الـ FHD، بدقة 1080  بكسل بمعدل التقاط 30 إطار في الثانية الواحدة، وتُعتبر هي هي نفس الجودة والدقة الموجودة في كل موبايلات الفئة الاقتصادية دي. 

 

كاميرات موبايل infinix S5 Pro
كاميرات موبايل infinix S5 Pro

 

أول عيب في كاميرات infinix S5 Pro، هو بروزها بشكل كبير واللي هيخليها معرضة أكتر للجروح والخرابيش بس أكيد زي ما بيقولوا إن كل حاجة وليها حل، بمعنى إنك تقدر تستخدم الجراب اللي جاي مع الموبايل أو تجيب واحد تاني لو إنت مش حابب دا؛ علشان تقدر تحافظ على كاميرا الموبايل من أي حاجة على الموبايل، وعمومًا علشان هو كدا كدا خاماته مصنوعة من البلاستيك اللامع فأكيد هيحتاج إنك تحافظ عليه أكتر من إنه يكون مصنوع من الزجاج.

نيجي لأداء الكاميرات، بالنسبة للكاميرا الأمامية فهي كويسة جدًا وبتطلع صور حلوة وتفاصيل أكتر والصراحة أداءها كان مُرضي، وأحنا شايفين إنها كويسة وخصوصًا في الفئة الاقتصادية دي.

أما بالنسبة للكاميرات الخلفية، تجربة الكاميرا الخلفية هنا كانت أفضل من موبايل الـ S5 القديم بس مفيش فرق كبير أوي يعني ما زالت الصور باهتة شوية من ناحية الألوان، والبورتريه ساعات مبيحددش الأطراف كويس، وكمان مفيش Night mode في الموبايل، يعني أداء الكاميرات يُعتبر كويس بالنسبة للفئة الاقتصادية دي بس برده مش أفضل حاجة موجودة في السوق. 

البصمة والزيادات:

البصمة:

البصمة موجودة بشكلها التقليدي في ضهر الموبايل، ودي أصبحت عادة في تصميم أي موبايل ومفيهاش أي ابتكار، لكن بالنسبة لسعر الموبايل فيُعتبر شكل البصمة التقليدي دا مقبول. 

يدعم الموبايل أيضًا بصمة الوجه، اللى من خلال تجربتنا ليهم الـ2 لقينا إن الأداء كان متوسط.

الموبايل بيدعم بعض المستشعرات:

1.مستشعر التقارب.

2.مستشعر التسارع.

3.مستشعر البوصلة.

4.مستشعر الجيروسكوب اللي بيشتغل عن طريق السوفت وير، الخاص بتشغيل الواقع الافتراضي الـ VR. 

يدعم الموبايل راديو الـ FM.

كما يدعم وجود شريحتين اتصال من النوع Nano Sim، وكذلك يدعم وجود كارت ميموري، ويعمل على زيادة المساحة التخزينية بسعة تصل إلى 256 جيجا بايت.

بالإضافة إلى إن الموبايل يدعم شبكات الجيل الثاني، الثالث، والرابع.

الموبايل يعمل بنظام تشغيل أندرويد 10.0، مع واجهة إنفنيكس الـ XOS 6.0.

كمان الموبايل يدعم الاتصال السريع بالواي فاي بترددات الـ b/g/nويدعم أيضًا خاصية الهوت سبوت.

كما يدعم البلوتوث بإصدار 5.0، ويدعم موقع تحديد الـ GPS.

بطارية موبايل infinix S5 Pro:

البطارية هنا مفيهاش أي جديد عن الـ S5 القديم هي نفس السعة الـ 4000 مللي أمبير، ودا حجم مقبول يعني الموبايل هيفضل شغال معاك حوالي 7 ساعات تقريبًا، بس مع قوة شحن 10 وات يعني مش هتبقى كويسة؛ لإنها هتاخد مدة شحن حوالي 3 ساعات تقريبًا ودي مدة طويلة الصراحة.

 

بطارية موبايل infinix S5 Pro
بطارية موبايل infinix S5 Pro

أداء موبايل infinix S5 Pro:

الموبايل بييجي بمعالج من شركة ميديا تيك من نوع Helio P35، بتكنولوجيا الـ 12 نانو.

أما بالنسبة للمعالج الرسومي، فهو بييجي من نوع PowerVR GE8320، وهو نفس معالج الموجود في موبايل الـ Huawei Y6s والـ oppo As5، وكمان الموبايل بيدعم وضع تعزيز أداء الألعاب عن طريق الـ Game Mode.

 

أداء موبايل infinix S5 Pro
أداء موبايل infinix S5 Pro

 

بالنسبة لتجربة الأداء، فهو أفضل بنسبة لا تزيد عن 10% من أداء موبايل إنفنكس S5 بس بردو في المهام اليومية زي استخدام السوشيال ميديا، مشاهدة الفيديوهات وكمان المكالمات ويمكن اللي جعل التجربة أفضل، هو وجود السوفت وير الجديد بتاع إنفنكس واللي اسمه دولفن المبني على أندرويد 10.

نييجي للمعالج الرسومي واللي مفيهوش أي جديد يعني هيديك أداء كويس في استخدام الألعاب الخفيفة، إنما لو استخدمته في الألعاب التقيلة زي بابجي، فأنت هتحتاج تشغل اللعبة على أقل إعدادات علشان متحسش بأي تهنيج أو سخونة في الموبايل، يعني لو يهمك الألعاب أوي منصحكش إنك تجيب الـ S5 Pro وأنصحك بالـ Note 7 أو إنك تفكر في بدائل تانية غير إنفنكس.

فتح علبة هاتف infinix S5 Pro:

موبايل infinix S5 Pro.

هاند فري.

كتيب ضمان وتعليمات يشرح كيفية استخدام الموبايل.

اسكرينة بلاستيك لحماية الموبايل لحد ما تجيب واحدة أفضل منها.

رأس شاحن بقوة 10 وات، ودا هيخلي شحن الموبايل  بطيء نسبيًا.

دبوس معدني لفتح مكان الشريحة والكارت الميمورى.

جراب موبايل شفاف.

كابل USB من نوع Micro USB، ودا نوع قديم. 

سعر موبايل infinix S5 Pro:

سعر الموبايل حوالي 2500 جنيه مصري للنسخة 64 جيجا، مع 4 جيجا رام.

الرأي النهائي في موبايل infinix S5 Pro:

المميزات:

يدعم الموبايل تشغيل شريحتين اتصال، بالإضافة إلى وجود كارت ميموري بسعة تصل إلى 256 جيجا بايت.

تصميم الموبايل عصري بألوان ممتازة يشبه الموبايلات الأغلى منه في السعر.

أحدث نظام تشغيل مع واجهة إنفنكس الـ XOS 6.

يدعم وجود لمبة إشعارات.

كاميرا السيلفي أداءها مقبول في الفئة الاقتصادية دي.

الشاشة كاملة من غير أي نوتش بدقة الـ FHD+ بتددي أداء كويس في مشاهدة الفيديوهات وفي التنقل بين التطبيقات وكذلك أثناء استخدام السوشيال ميديا.

المعالج يقدم أداء مقبول في المهام اليومية المختلفة.

العيوب:

السماعات الخارجية موجودة ناحية الشمال يعني يسهل كتمها وقت اللعب على الموبايل.

خامات الموبايل من البلاستيك اللامع، ودا هيدي فرصة كبيرة لتبصيم الموبايل.

انخفاض درجة سطوع الشاشة.

المعالج هو هو نفس معالج  P22، اللي  كان موجود في موبايل infinix S5.

الشحن بقوة 10 وات.

منفذ Micro USB من النوع القديم، ودي حركة متكررة جدًا في الموبايلات اللي نزلت السنة دي.

مفيش في الجهاز ميكروفون ثانوي، وبالتالي الجهاز لا يعمل على منع الضوضاء وقت استخدام الموبايل.

الخلاصة:

لو بتدور على موبايل بشاشة كاملة وفي ذات الوقت سعره رخيص مع بطارية كويسة وتصميم شيك يبقى موبايل إنفنكس S5 Pro، يُعتبر صفقة كويسة جدًا ليك.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *