يلا نبدأ مراجعة النهاردا مع موبايل infinix Note 8…
عالم الأجهزة الاقتصادية والمتوسطة بيتلخص في 3 حاجات…
الأولى، شاشة موبايل حجمها كبير، ودا علشان رؤية أكبر وأوضح.
تاني حاجة، حجم البطارية الكبير والشحن السريع، وهنا تعتبر ميزة كويسة لأن دايمًا إنفنكس مهتمة بحجم البطارية الكبير.
تالث حاجة بقى، وهي مساحة الموبايل وأداؤه المستقر، وممكن نضيف عليهم كمان كاميرات متعددة مع شكل حلو…
النهاردة معادنا مع موبايل جديد من سلسلة الـ Note ، وهو infinix Note 8.
كلمة الـ Note منتشرة كتير في بعض الشركات بس مفيش غير الـ Note اللي بقلم من إصدارشركة سامسونج، بس لما شركة إنفنكس حبت إنها تعمل نفس الخطوة وعملتها فعلًا لسنوات قليلة، رجعت تاني وتوقفت عنها وتوجهت لتطوير حاجات تانيه في الموبايل، ودا علشان إنها شافت إن الموضوع مكلف جدًا وبيحتاج تطوير كبير، وكمان النوع دا من الفئة مش بتهتم بالحاجات دي هي بتهتم بحاجات تانية زي ماقولنا قبل كده زي الشاشة وغيرة…
يلا بينا نبدأ مرجعتنا ونشوف إيه هي مميزات وعيوب infinix Note 8، وهل يستحق الشراء ولا لأ.
بس قبل ما نقول أي حاجة تعالوا أوضحلكوا خدمة بسيطة وعصرية اسمها خدمة “اختار موبايلك”، واللي بيقدمها مــــوقع نـاس فــــون، واللي من خلالها تقدر تشتري موبايل في الفئة الشرائية المناسبة ليك، بس كل اللي عليك إنك تدخل تكتب الإمكانيات والمواصفات اللي نفسك تشوفها في الموبايل اللي عايز تشتريه و احنا هنقدملك أنسب موبايل ليك بكل التفاصيل والإمكانيات اللي عايزها تكون في الموبايل بتاعك، بس كل اللي عليك إنك تضغط هنـــــــــــــــــا…
تصميم موبايل infinix Note 8:
أولًا خامات الموبايل:
خامات تصنيع موبايل infinix Note 8 من البلاستيك اللامع زي ما إتعودنا من شركة إنفنكس، بس طبعًا عارفين إن البلاستيك اللامع بيساعد على التبصيم الكتير وكمان معرض للخرابيش، بس أكيد تقدر تحافظ على الموبايل بأنك تستخدم جراب للحفاظ عليه من كل دا سواء كان التبصيم أو الخرابيش.
ثانيًا التصميم الخارجي:
تصميم كاميرات:
الكاميرات الموجودة في موبايل ده 6 كاميرات…
بالنسبة للكاميرا الأمامية وهي مزدوجة، وهي موجودة أعلى يسار الشاشة في نوتش، مع وجود فلاش أمامي من نوع ليد فلاش.
أما بالنسبة للكاميرات الخلفية فهما 4 كاميرات مرصوصين في فريم مستطيل بارز شوية عن جسم الموبايل، مع وجود فلاش رباعي من نوع ليد فلاش.
هنتكلم عن شرح الكاميرات بالتفصيل بعدين.
الأبعاد والألوان:
الموبايل بييجي بأبعاد 175.3×78.76×8.95 ملم.
ألوان موبايل infinix Note 8 هي الأزرق، والأخضر، واللون الرمادي.
الألوان هنا تعتبر هي هي الألوان اللي في معظم موبايلات الفئة السعرية دي، بس الصراحة هي ألوان حلوة تحس كدا إنها مائلة للموبايلات الأغلى منه في السعر.
شاشة الموبايل infinix Note 8:
شاشة موبايل infinix Note 8 بتييجي على شكل الثقب المزدوج، من نوع IPS LCD.
مساحة الشاشة 6.95 إنش مع جودة الـ HD+ بدقة 720×1640 بكسل، مع كثافة بكسلات 258 بكسل لكل إنش، وكمان فيه طبقة حماية من نوع Corning Gorilla Glass، ودا علشان تحمي الموبايل من الكسر والخدش بشكل عملي أكتر، وهي نفس شاشة الـ Infinix Note 7 السابق مع اختلاف بسيط في مساحة ثقب الشاشة.
تدعم الشاشة أبعاد العرض بنسبة 20.5:9 علشان تقدر تعرض محتوى أكبر وقت مشاهدة الفيديوهات أو لعب الألعاب على الموبايل.
طبعًا احنا متفقين إن من أكتر الحاجات اللي بتهم بيها الفئة الاقتصادية أو المتوسطة هي حجم الشاشة الكبير، وشاشة infinix Note 8 حجمها كبير جدًا، وأكيد شاشة كبيرة يعني محتوى أكبر ومتعة أكتر في مشاهدة المحتوى وسهولة أكتر في الرؤية.
كاميرات موبايل infinix Note 8:
الكاميرا الأمامية كاميرا مزدوجة…
- الكاميرا الأولى، بتييجي بدقة 16 ميجا بكسل، وهي كاميرا أساسية في الموبايل، مع وجود فلاش أمامي مزدوج من نوع ليد فلاش.
- الكاميرا الثانية، هي كاميرا خاصة بعمل العزل والبورترية، وبتييجي بدقة 2 ميجا بكسل.
الموبايل بييجي بـ 4 كاميرا خلفية…
الكاميرا الأولى، هي كاميرا أساسية في الموبايل، بتيجي بدقة 64 ميجا بكسل.
الكاميرا الثانية، بتيجي بدقة 2 ميجا بكسل، وهي خاصة بتصوير الماكروا.
الكاميرا الثالثة، بتيجي بدقة 2 ميجا بكسل.
الكاميرا الرابعة، تدعم الذكاء الإصطناعي، وبتييجي بدقة 2 ميجا بكسل، مع وجود فلاش رباعي من نوع ليد فلاش.
بالنسبة لأداء الكاميرا السلفي فهو يعتبر أداء متواضع والصراحة معجبناش أوي، ودا لأن الخلفية بتطلع باهته سواء كان في الكاميرا الأساسية أو البورتريه، ممكن دا علشان مفيش معالجة للصور أو دينمك رينج.
بالنسبة لكاميرات الخلفية مش هتاخد صور بجودة عالية، أداء الكاميرا بيطلع لنا صور مقبولة، بردو مفيهاش تفاصيل كتير وما زالت الخلفية مشوشة، أعتقد إن إنفنكس محتاجة تطور من كاميراتها في إصدارتها الجديدة المتعددة، لأن جودة الكاميرا مش بتتقيم بأرقام البيكسلات، ولكن يتم تقييمها على حسب أداء الكاميرا، وجودة الصورة.
يدعم الموبايل تصوير الفيديوهات بجودة الـ 2K، بدقة الـ 1440 بكسل، وبمعدل التقاط 30 إطار في الثانية.
وكمان يدعم التصوير بجودة الـ FHD، بدقة 1080 بكسل بمعدل التقاط 30 إطار في الثانية.
أعلنت شركة إنفنكس عن تثبيت الفيديو لأعلى مستوى ليها وهو الـ ،Super Stable Videos، بتكنولوجيا الـ Vidhance Stabilization لمنع اهتزاز الفيديو بشكل أفضل من الاصدار السابق، لكي تحصل على أفضل تثبيت ممكن بالإضافة لتصوير الـ Slow Motion.
بالنسبة للتصوير الليلي فهو أكتر حاجة عجبتنا الصراحة، لأنة بيحسن جودة الصور نسبيًا، وتفاصيل أكتير، والصور فيه ألوانها واضحة، وجميلة.
البصمة والزيادات:
البصمة:
الموبايل هنا يدعم مستشعر البصمة، واللى بتكون موجودة في الجانب الأيمن من الموبايل مدمجة مع زر الباور، وبالنسبة لأداء البصمة فهي سريعة، وتقدم أداء مرضي جدًا.
كما يوجد بالموبايل خاصية الـ Face Unlock، وليها مسمى تاني وهو بصمة الوجه، اللي أصبحت تعتبر حاجة أساسية في تصنيع أي موبايل وهي الصراحة حاجة لطيفة جدًا.
الموبايل بيدعم بعض المستشعرات:
- مستشعر التسارع.
- مستشعر القرب.
- مستشعر البوصلة.
- مستشعر الجرسيكوب اللي بيشتغل عن طريق السوفت وير، وهو خاص بنظارات الواقع الإفتراضي.
بالنسبة لسماعات الموبايل فهما 2…
الأولى بتكون الأساسية موجودة تحت ناحية اليمين.
الثانية هي سماعة المكالمات واللي بتشتغل مع السماعة التانية علشان تديلك صوت قوي وعالي جدًا، ودي ميزة كويسة جدًا علشان بيزود متعة المشاهدة.
يدعم الموبايل المنفذ الـ 3.5 الخاص بالهاند فري.
يدعم أيضًا البلوتوث بالإصدار 5.0.
وكمان يدعم الموبايل تحديد الموقع الجغرافي الـ GPS وأيضًا يعمل على دعم خاصية الـ A GPS.
يدعم الموبايل الاتصال السريع بالواي فاي بترددات الـ a\g\b\n\ac مع دعمه خاصية الهوت سبوت.
بييجي منفذ الـ USB في موبايل infinix Note 8 من نوع Type – C، بالإضافة إلى لدعمه خاصية الـ OTG لتشغيل أي USB Driver على موبايلك.
يتوفر الموبايل بنظام تشغيل أندرويد 10، مع واجهة XOS 7.1.
يدعم الموبايل تشغيل شريحتين اتصال، وكارت ميموري لإحتمالية زياد المساحة التخزينية.
أداء موبايل infinix Note 8:
أما عن الأداء الموبايل فهو بييجي بمعالج من شركة ميديا تيك من نوع Helio G80، بتكنولوجيا الـ 12 نانو.
المعالج رسومي من نوع Mali-G52 MC2، هو نفس معالج الـ Huawei Y9a والـ Xiaome Readmi 9 والـ Realme 6i، وكمان أعلنت الشركة بأن المعالج دا أقوى بنسبة 14% من الجيل السابق الـ Note 7، بالإضافة لدعم المعالج لخاصية الـ Hyper Engine لتقديم أفضل أداء ممكن وقت اللعب على الموبايل.
وطبعًا المعالج قوي يعني هيخلي أداء الموبايل أكثر استقرارًا وأكثر ثباتًا.
بطارية موبايل infinix Note 8:
سعة البطارية هنا 5200 ميللي أمبير، ودا حجم ضخم هيدوم معاك لفترة طويلة تكاد تكون يوم كامل، ودا هيكون مناسب جدًا للفئة اللي هتستخدمه في الشغل أو اللعب بردو، ودي عادة شركة إنفنكس في إصداراتها، بالإضافة أن قوة الشحن هنا 18 وات، واللى نقدر نقول عليه إنه سريع، يعني هيشحن من 0 إلى 100% في حوالي ساعة تقريبًا.
سعر infinix Note 8:
سعر الموبايل هو 3500 جنيه مصري لنسخة 128 جيجا مع 6 جيجا رام.
فتح علبة موبايل infinix Note 8:
موبايل infinix Note 8.
رأس الشاحن بقوة 18 وات، ودا هيخلي الموبايل يشحن بسرعة.
اسكرينة بلاستيك مش حلوة نهائيًا.
كابل USB من نوع Type C.
هاند فري.
كتيب الضمان والتعليمات الخاص بشرح كل التفاصيل عن الجهاز.
جراب شفاف لحماية ضهر الموبايل.
الرأي النهائي في موبايل infinix Note 8:
المميزات:
يدعم الموبايل الشحن السريع بقوة 18 وات.
تم استخدام منفذ USB من النوع الأحدث الـ Type C.
بطارية الموبايل تعمل لفترة طويلة خلال اليوم بأكمله.
يدعم وجود شريحتين اتصال، وكارت ميموري في نفس الوقت.
بصمة مدمجة بزر الباور سريعة ومكانها مناسب جدًا.
تم تحسين الكاميرات الخلفية بالمقارنة مع موبايلها السابق الـ Infinix Note 7 من حيث الدقة ولكن ما زالت معالجة ألوان الصور تحتاج إلي تحديث.
السماعات الخارجية تأتي بشكل مزدوج لتقديم تجربة صوتية أقوى كالمعتاد ولكن التجسيم هنا ليس الأفضل.
أحد أهم ما يميز إنفنكس في هواتفها هو الاهتمام بسعة الذاكرة الصلبة والذاكرة العشوائية الكبيرة بسعر رخيص، ودا أحد أهم النقاط اللى بيبحث عنها معظم المستخدمين .
المعالج بيقدم أداء جيد وبيقدر يشغل ببجي على High HD بكل كفاءة .
العيوب
الحافة السفلية للشاشة ما زالت كبيرة.
ما زال الموبايل يفتقد إلى كاميرا التصوير الواسع.
خامات الموبايل من البلاستيك اللامع.
كنا نأمل في الموبايل دا استخدام شاشة FHD بدلًا من الـ HD المستخدمة .
العدسة الثانوية للسيلفي ملهاش وظيفة فعلية فكان من الأفضل عدم استخدامها ويبقى ثقب واحد بحجم صغير بدلًا من الثقب المزدوج .
لا يدعم ميكرفون إضافي لعزل الضوضاء .
الخلاصة:
احنا شافين إن الموبايل حلو جدًا من ناحية الشاشة والبطارية والأداء، وأعتقد إنه صفقة كويسة جدًا لو أنت مش مهتم بالكاميرات، وخاصتًا بالنسبة لسعرة المعروض في الفئة السعرية دي.