مراجعة موبايل infinix HOT 10 
Infinix Hot 10

يلا بينا نبدأ المراجعة مع موبايل جديد وهو infinix HOT 10

عالم الموبايلات في 2020 ممل شوية بس أكتر حاجة مُفرحة فيه، هي إنهم اهتموا بمعالجات الفئة الاقتصادية، وطوروا فيها كتير الصراحة…

جه الدور بقى علي إنفنكس اللي دايمًا شغالة علي نفسها كويس جدًا، وبدأت بالاستغناء عن كل المعالجات القديمة، وداخلة السوق بموبايل اقتصادي جديد ميقلش أي حاجة عن المنافسين اللي في السوق، وهو إنفنكس هوت 10 اللي أحب أطمنك وأقولك إنه بييجي بمعالج جيمينج وهو G70 وبسعر اقتصادي مناسب جدًا.

يلا بينا نبدأ المراجعة ونشوف مواصفات الموبايل دا، ونتعرف على  إمكانياته وعيوبه…

بس قبل ما قول أي حاجة، وقبل ما أدخل في أي تفاصيل، أحب أقولكم إن كل التفاصيل والشرح اللي بتشوفوه هنا، هي عبارة عن خدمة بنقدمهالك اسمها “اختار موبايلك”، واللي بيقدمها مـــــــوقع نــــــاس فــــــون، إحنا مش طالبين منك أي حاجة غير إنك تكتب أنت حابب تشوف مواصفات وإمكانيات إيه في الموبايل اللي عايز تشتريه وبس، وسيب الباقي علينا وإحنا هنقدملك كل التفاصيل اللي تهمك معرفتها وهنقولك إيه هو أكتر موبايل مناسب ليك من هنـــــــا

تصميم موبايل infinix HOT 10:

أولًا خامات الموبايل:

خامة تصنيع الموبايل هنا كلها من البلاستيك، ودا طبيعي بالنسبة لسعره في الفئة الاقتصادية دي، بس للأسف البلاستيك هنا لامع يعني هيبقي معرض للخدوش والتبصيم بصورة كبيرة، وكمان بروز الفريم خفيف شوية، بس من خلال الجراب اللي جاي في علبة الموبايل هيقدر يحافظ عليه إلى حدٍ ما أو أي جراب تاني.

ثانيًا التصميم الخارجي:

تصميم الكاميرات:

الكاميرا الأمامية، هنا موجودة في البنش هول، أعلى الشاشة على الشمال مع وجود فلاش مزدوج من نوع ليد فلاش.

الكاميرات الخلفية هنا 4 كاميرات، وبييجوا بشكل جديد على إنفنكس، وبفريم عريض شوية، هتلاقي جوه الفريم خمس دوائر، أربعة منهم للكاميرات والخامسة للفلاش…

 الكاميرات بارزة شوية، ودا هيختفي بمجرد إنك تركب الجراب اللي في علبة الموبايل، أو زي ما قوانا قبل كدا أي جراب تاني المهم تحافظ على الكاميرات كويس.

 

تصميم
تصميم موبايل infinix HOT 10

 

الأبعاد والألوان:

الموبايل بييجي بأبعاد 171.1×77.6×8.9 ملم، ودا هيكون صعب إنك تمسكه بإيد واحدة.

 وزن الموبايل 195 جرام، ودا أكيد وزن خفيف، ومش هيبقى متعب لو استخدمته لفترة طويلة.

أما عن ألوان الموبايل، فهو متوفر بألوان حلوة جدًا وجذابة زي اللون الأسود، والأحمر، والأخضر، والرمادي.

شاشة موبايل infinix HOT 10:

خلينا متفقين إن شـــركة إنفنكس بتهتم دايمًا بإن الشاشة تكون كبيرة، فبالتالي موبايل إنفنكس هوت 10 هو أكبر موبايل اقتصادي من ناحية الحجم في الإيد؛ ودا لإن شاشته كبيرة فعلًا.

الشاشة هنا أكبر شاشة اقتصادية، ولكن فيه نقطة تفوق من إنفنكس هنا، وهي إن الشاشة بتييجي بشكل البنش هول واللي غايبة عن المنافسين وله مسمى تاني، الـ Infinity O، من نوع IPS LCD، بمساحة 6.78 بجودة الـ HD+، بدقة 720×1640 بكسل، ومعدل كثافة بكسلات 264 بكسل لكل إنش.

زي ما اتفقنا على  إن دي أكبر شاشة في الحجم بس في باقي المواصفات زيها زي باقي الموبايلات التانية.

بالنسبة لحواف الشاشة، فهي صغيرة من الجهات الـ3، لكن الحافة السفلية بتييجي بحجم منطقي ومناسب.

 

شاشة موبايل infinix HOT 10
شاشة موبايل infinix HOT 10

 

تجربة المشاهدة على شاشة الموبايل حلوة جدًا مع حجم الشاشة الكبير، وبشكل البنش هول، والألوان فيها مشبعة بس هتلاقيها مايلة أكتر للون الأزرق.

الشيء اللي ماعجبنيش في الشاشة هو درجة السطوع، كانت محتاجة إنها تكون أعلى من كدا شوية بس غير كدا الشاشة كويسة جدًا الصراحة. 

كاميرات موبايل Infinix Hot 10:

الكاميرا الأمامية: 

الكاميرا الأمامية جاية بدقة 8 ميجا بكسل، مع وجود فلاش مزدوج.

الكاميرات الخلفية 4 كاميرات:

الكاميرا الأولى، بتييجي بدقة 16 ميجا بكسل، وهي الكاميرا الأساسية للموبايل.

الكاميرا الثانية، موجودة بدقة 2 ميجا بكسل، وخاصة بالتصوير الماكرو.

الكاميرا الثالثة، دقتها 2 ميجا بكسل، وهي خاصة بعمل العزل والبورتريه.

الكاميرا الرابعة والأخيرة، بتييجي بدقة QVGA، وهي الخاصة بالتصوير في الإضاءة المنخفضة، بالإضافة إلى فلاش رباعي من نوع ليد فلاش.

كما يدعم الجهاز تصوير الفيديوهات بجودة الـ FHD، بدقة 1080 بكسل، بمعدل التقاط 30 إطار في الثانية، ويدعم التصوير الـ HD بجودة 720 بكسل بمعدل التقاط 30 إطار في الثانية.

 

كاميرات موبايل Infinix Hot 10
كاميرات موبايل Infinix Hot 10

 

أول حاجة معجبتنيش في الكاميرات الخلفية، هي شكلها تحس كده إنك ماشي بمجموعة كاميرات في إيدك، وكمان الكاميرات بارزة شوية، ودا هيدي فرصة لتجريح الكاميرا.

بالنسبة لأداء الكاميرا السيلفي، فهو كجودة وألوان كويس جدًا، وكمان التفاصيل فيها جيدة، بس صور الكاميرات في الإضاءة المنخفضة مش هتبقي حلوة، بتكون مضلمة ومفيهاش تفاصيل كتيرة، لكن اللي هيفرق معاك هنا هو التصوير الليلي اللي هيشتغل بواسطة الكاميرا التانية اللي بتشتغل على زيادة الإضاءة وتوضيح تفاصيل الصورة.

خاصية العزل في الكاميرا الخلفية شغالة بشكل كويس فيه تحديد الأطراف بس مش الأفضل طبعًا.

أما بالنسبة للكاميرا الرابعة، فهي كاميرا ماكرو خاصة بتصوير الحاجات عن قرب، واحنا شايفين إنه مكنش ليها لازمة؛ لإن مفيش ناس كتير بيسخدموها.

بس عمومًا ما تتوقعش أداء أعلى من كدا في الفئة السعرية دي. 

 البصمة والزيادات:

 البصمة:

البصمة موجودة في ضهر الموبايل كالعادة في تصميم الموبايلات، وكمان الموبايل بيدعم بصمة الوجه، اللي من خلال تجربتنا ليهم الـ2 لقينا إن الأداء هنا كويس وسريع.

الموبايل بيدعم بعض المستشعرات:

1.مستشعر التقارب.

2.مستشعر التسارع.

3.مستشعر البوصلة.

4.مستشعر جيروسكوب اللي بيشتغل عن طريق السوفت وير، الخاص بتشغيل الواقع الافتراضي الـ VR. 

الجهاز يدعم وجود شريحتين اتصال من النوع Nano Sim، وكذلك يدعم وجود كارت ميموري، يعمل على زيادة المساحة التخزينية بسعة تصل إلى 512 جيجا بايت.

بالإضافة إلى إن الموبايل بيدعم شبكات الجيل الثاني، الثالث، والرابع،

الموبايل بييجي بنظام تشغيل أندرويد 10. 

دا إلى جانب دعم الموبايل راديو FM.

كمان الموبايل بيدعم الاتصال السريع بالواي فاي بترددات الـ b/g/n\ac\a، ويدعم أيضًا خاصية الهوت سبوت، والـ Wi-Fi Direct.

كما يدعم البلوتوث بإصدار 5.0.

ويدعم موقع تحديد الـ GPS.

بطارية موبايل Infinix Hot 10:

البطارية هنا بتييجي بسعة تصل إلى 5020 مللي أمبير، ودا حجم كبير، يعني هتفضل شغالة معاك لفترة طويلة جدًا من غير أي تقصير، بس العيب هنا قوة الشحن اللي لا تتعدى الـ 10 وات، وبالتالي الجهازهياخد وقت طويل في شحنه.

 

بطارية موبايل Infinix Hot 10
بطارية موبايل Infinix Hot 10

 

أداء موبايل Infinix Hot 10:

إحنا أكتر حاجة بنبص عليها في أي جهاز، هي أداء الموبايل…

 تعالوا نشوف إيه الجديد هنا في الأداء!

اهتمت الشركة في الجهاز دا بشكل مختلف بالأداء؛ علشان يقدم أفضل استخدام على الإطلاق، فالمعالج هنا من شركة ميديا تيك الجديد الـ Helio G70 والذي يصدر مخصوصًا للألعاب، وبييجي بتكنولوجيا الـ 12 نانو.

أما عن المعالج الرسومي، فهو من نوع Mali-G52 2 EMC2 وهو هو نفس المعالج اللي استخدام في هاتفي الـ ريلمي C3، والـ إنفنكس نوت 10.

يدعم الموبايل هنا أيضًا وضع تعزيز أداء الألعاب عن طريق وضع الـ Game Mode؛ علشان يقدم أفضل أداء ممكن.

بالرغم من إن الأداء في الجهاز د هو هو نفس الأداء اللي موجود في إنفنكس هوت 10، وهو بردو الأداء الموجود في ريلمي C3 إلا إن الأداء في إنفنكس أسرع؛ علشان بييجي مع واجهة إنفنكس…

فالموبايل هنا بييجي بنظام تشغيل أندوريد 10، بواجهة إنفنكس اللى هي XOS، وبالرغم من إنها مفيهاش مميزات كتيرة، بس دا بيخليها واجهة خفيفة جدًا وبينعكس دا على الأداء في التصفح، والسرعة، وفي فتح التطبيقات.

 

أداء موبايل Infinix Hot 10
أداء موبايل Infinix Hot 10

 

تجربة اللعب على الموبايل دا كويسة جدًا، بس وأنت بتلعب على إعدادات متوسطة، بالإضافة إلى إن نظام التبريد في الجهاز حلو ومش تحس بأي سخونة في الجهاز وأنت بتلعب عليه. 

فتح علبة موبايل Infinix Hot 10:

موبايل Infinix Hot 10.

هاند فري.

كتيب الضمان والتعليمات يشرح كيفية استخدام الجهاز.

اسكرينة بلاستيك لحماية الجهاز لحد ما تجيب واحدة أفضل منها.

رأس شاحن بقوة 10 وات، ودا هيخلي شحن الموبايل  بطيء نوعًا ما.

دبوس معدني لفتح مكان الشريحة والكارت الميمورى.

جراب موبايل شفاف.

كابل USB من نوع Micro USB، ودا نوع قديم. 

سعر موبايل Infinix Hot 10:

السعر الموبايل حوالي 2200 جنيه مصري للنسخة 64 جيجا، مع 4 جيجا رام.

وأيضًا حوالي 2350 جنيه مصري للنسخة 128 جيجا، مع 4 جيجا رام.

من الجدير بالتوضيح؛ علشان نبقوا منصفين هو إن الشركة اهتمت هنا بالمساحة، سواء النسخة 64 أو 128 والـ2  يُعتبروا كويسين جدًا.

الرأي النهائي في موبايل Infinix Hot 10:

المميزات:

تصميم الموبايل شيك ورقيق، وألوانه أفضل ألوان.

المعالج هنا من الأشياء اللي اهتمت الشركة بيها؛ علشان تقدم أداء ممتاز وقت اللعب على الموبايل.

شاشة الجهاز كبيرة كعادة إصدارات إنفنكس.

وبالنسبة للبطارية، فهي بتييجي بحجم كبير، ودا هيخليها تستمر لأطول فترة ممكنة.

بالإضافة إلى إن الموبايل بيدعم تشغيل شريحتين اتصال، ويوجد به كارت ميموري بسعة 512.

العيوب:

قوة الشحن بطيئة.

الشاشة بجودة HD، ودي جودة قليلة.

منفذ Micro USB من النوع القديم، ودي حركة متكررة جدًا في معظم الموبايلات اللي نزلت السنة دي.

مفيش في الجهاز ميكروفون ثانوي، اللي بيعمل على منع الضوضاء وقت استخدام الموبايل.

وكمان أداء الكاميرا السيلفي مش الأفضل.

الخلاصة:

لو أنت مش مهتم بالتصوير يبقى الموبايل يعتبر صفقة كويسة جدًا بالنسبة لسعر المعروض. 

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *