Honor 9X Pro| المراجعة والمواصفات
موبايل Honor 9X Pro

خلونا نبدأ بلقاء تمهيدي مع موبايل جديد وهو موبايل Honor 9X Pro…

معروف عن شركة هواوي، وهونر إنها كانت ونركز علي كانت بتقدم موبايلات حلوة أوي، ودا كان بس علشان يشدوا العميل بأي طريقة، فنزلوا سعر موبايلاتهم بالنسبة للإمكانيات الموجودة وبقت فرصة ذهبية أكيد…

شوفنا من الموبايل دا نسخة قبل كده وهي هونر 9x، بس دا مختلف شوية، تقريبًا صححوا فيه كل العيوب، والأخطاء اللي كانت موجودة في موبايلاتهم.

خلينا بس الأول نتكلم عن خدمة “اختار موبايلك“، إزاي تختار موبايلك، أنت لو مش عارف تختار إيه أو محتار إيه اللي ممكن تشترية وإيه لأ، إحنا هنا هنساعدك في اختيار الموبايل المناسب، بس كل اللي عليك إنك تبعت المواصفات والإمكانيات اللي عايزها تكون في موبايلك، وإحنا هنقدم لك التفاصيل الكاملة بخصوص الموبايل الأنسب ليك ولظروف شغلك أو إحتيجاتك عامةً.  

علشان منطولش عليكم تعالوا نشوف إيه هي مميزات وعيوب هونر 9x pro بشكل أوضح من كدا، ونتعرف على الموبايل بصورة أفضل.

 تصميم موبايل Honor 9X Pro:

أولًا خامات الموبايل:

ضهر الموبايل مصنوع من الزجاج، والحواف من المعدن اللي يخليك تحس بالفخامة، دا غير إن ملمس الموبايل بقى أحسن من النسخة اللي فاتت، ودا كان من ضمن الأخطاء اللي الشركة صححتها، وخلت التصميم  ميزة في موبايل Honor 9X Pro.

ثانيًا التصميم الخارجي:

تصميم الكاميرات:

الكاميرا الأمامية هنا، بتييجي بشكل الـPOP-UP، وبتشتغل عن طريق سلايدر خاص بالسلفي.

الكاميرات الخلفية، وهي ثلاث كاميرات، مع فلاش أحادي من نوع ليد فلاش، وفيه حاجة حلوة هنا هي إن الكاميرات بروزها خفيف جدًا، ودا أكيد مفيد؛ علشان هيقلل فرصة تجريح الكاميرا بشكل كبير.

 

 تصميم موبايل Honor 9X Pro
تصميم موبايل Honor 9X Pro

 

الأبعاد والألوان: 

  • الموبايل بييجي بأبعاد 163.1×772.2×8.8 ملم.
  •  وزنه 206 جرام، ودا وزن كبير، ومتعب جدًا لو استخدمت الموبايل لفترة طويلة، سواء كنت هتستخدمه في الشغل أو في وقت لعبك علي الجهاز.

 شاشة موبايل Honor 9X Pro:

  • الشاشة هي كاملة الوجه، من نوع LTPS IPS LCD بدون أي أخطاء أو خدوش، هي مش أحسن نوع على الإطلاق بس كشكل وحجم هتعجبك جدًا.
  • الشاشة بتييجي بأبعاد العرض الجديدة بنسبة 19:5:9.
  • الشاشة بتييجي بمساحة 6.59 إنش، بجودة الـ FHD+، بدقة 1080×2340 بكسل. 

 

 شاشة موبايل Honor 9X Pro
شاشة موبايل Honor 9X Pro

 

الشاشة يُعتبر متصححش فيها حاجة خالص، وهي مش أفضل نوع بالنسبة للفئة السعرية اللي هي فيها، وبتكلم هنا عن زوايا الرؤية، اللي تعتبر مش حلوة خالص، والأسود فيها مش أحسن حاجة كنوع.

بس الميزة اللي هتعجبك فيها إنها بتييجي من غير نوتش.

كاميرات موبايل Honor X9 Pro:

الكاميرا الأمامية: 

الكاميرا الأمامية، بتييجي بدقة 16 ميجا بكسل، بفتحة عدسة F\2.2، ودا في سلايدر خاص بالسيلفي.

موجود في الموبايل ثلاث كاميرات خلفية هنتكلم على كل واحدة منهم بالتفصيل: 

الكاميرا الأولى، دي كاميرا أساسية للموبايل تم تصميمها بدقة 48 ميجا بكسل، بفتحة عدسة F\1.8.

الكاميرا الثانية، هي الكاميرا الخاصة بتصوير ULtra Wide، بدقة 8 بكسل، بفتحة عدسة F\2.4.

الكاميرا الثالثة، هي كاميرا خاصة بعمل العزل والبورتريه، بدقة 2 ميجا بكسل، وفتحة عدسة F\2.4، وكمان مع فلاش أحادي من نوع ليد فلاش.

 

كاميرات موبايل Honor X9 Pro
كاميرات موبايل Honor X9 Pro

 

الكاميرات الخلفية أداءها كويس جدًا وبتطلع صور حلوة أوي مع ألوان جميلة، وبتظهر تفاصيل كويسة.

عاجبنا أوي كمان التصوير الليلي بالموبايل دا. 

الكاميرا الأمامية معجبتنيش أوى الصراحة علشان بتخفي حاجات من تفاصيل الوجه، وما بتبينش الصورة على حقيقتها.

تصوير الفيديو معجبنيش أوى بيعمل زوم كده معرفش إيه الفكرة هنا بس المهم، هي بجودة الـ HD، بدقة 1080 بكسل، ومعدل التقاط 30 إطار في الثانية الواحدة.

البصمة والزيادات:

البصمة:

في الموبايل دا بتييجي بشكل مختلف، البصمة موجودة في الجانب الأيمن مدمجة بزرار الباور، وهي أسرع، وعملية كمان أكتر من البصمة اللي بتكون في ضهر الموبايل، وكاستخدام شيك الصراحة عجبتني أوى على الأقل كتغيير. 

الموبايل بييجي ببعض المستشعرات، زي:

  1. مستشعر البوصلة.
  2. مستشعر التقارب.
  3. مستشعر التسارع.
  4. مستشعر الجيروسكوب.

لو إنت بتحب تسجل ريكوردات، مكالمات، أوبتصور فيديو وعاوز كوالتي صوت عالية، فالموبايل فيه ميكروفون إضافي خاص لمنع الضوضاء وقت استخدامك للموبايل.

الموبايل يدعم تشغيل راديو الـ FM.

ويدعم أيضا شريحتين من نوع Nano SIM، كما يدعم زيادة المساحة بوضع كارت ميموري، بسعة تصل إلى 512 جيجا بايت.

ويدعم الموبايل شبكات الـ 2G، و 3G، و4G.

الجهاز كمان فية تبريد مائي في نسخة الباور؛ علشان تحافظ على درجة حرارة البطارية لما تييجي تلعب على الموبايل ألعاب تقيلة زي لعبة بابجي.

يوجد منفذ 3.5 ملم خاص بمنفذ الهاند فري.

أيضًا يدعم منفذ USB من نوع Type C، ودا نوع كويس جدًا، وكمان بيدعم خاصية الـ OTG.

بالإضافة إلى دعم الموبايل للاتصال السريع بالواي فاي بترددات a\b\ac\g\n، والهوت سبوت، وأيضًا يوجد به تحديد الموقع الجغرافي الـ Gps، مع دعمه لأنظمة الملاحة الأخرى الـ A-GPS, GLONASS, BD.

البلوتوث هنا بأحدث وأرقى إصداراته، وهو الإصدار الخامس بالإضافة لدعمه خاصيتي الـ A2DP, LE.        

بطاريه موبايل Honor 9X Pro:

البطارية في موبايل Honor 9X Pro بتييجي بسعة 4000 ملي أمبير، ودا حجم كبير يعني هتقعد معاك فترة طويلة، وهتساعدك علشان تقدر تواصل شغلك من غير ما الموبايل يفصل منك حتى وقت لعبك عليه، بالإضافة لشاحن بقوة 10 وات.

 

بطاريه موبايل Honor 9X Pro
بطاريه موبايل Honor 9X Pro

 

 

أداء موبايل Honor 9X Pro:

نييجي بقي لأهم حاجة موجودة في الجهاز، وهي أداء الموبايل عامل ازاي!

الموبايل بيقدم أداء منافس لأحسن موبايل نازل في الفئة المتوسطة واللي هو ريدمي XT.  

الجهاز بييجي بمعالج من أقوى المعالجات لهواوي وقتها في الفئة المتوسطة؛ لأنه من نوع Hisilicon Kirin 810، بتكنولوجيا 7 نانو.

 الموبايل 256 جيجا ذاكرة داخلية، مع ذاكرة عشوائية 6 جيجا بايت، ودي ميزة مفيهاش كلام وحاجة عظيمة طبعًا.

 للأسف الموبايل لا يدعم خدمات جوجل بس هيبهرك بحاجات تانية.  

وكمان فيه معالج رسومي من نوع Mail-G52.

 

أداء موبايل Honor 9X Pro
أداء موبايل Honor 9X Pro

 

الأداء هنا بالنسبة للوقت اللي كان نازل فيه واللى هو بداية 2020 ممتاز ولا تعليق عليه من ناحية التصفح اليومي والتنقل بين التطبيقات بس تطبيقات إيه ومفيش خدمات جوجل أصلًا، ما علينا هنقدم لها حلول بعدين…

 بالنسبة للألعاب زي لعبة بابجي، هتحس وأنت بتلعبها بفرق كبير، والموبايل مش هيهنج معاك، وبالتالي نقدر نقول إن أداء الموبايل كويس بالنسبة للفئة السعرية اللي هو فيها.

فتح علبة موبايل Honor 9X Pro:

موبايل Honor 9X Pro.

شاحن بقوة 10 وات، ودا هيخلي الموبايل ياخد وقت في الشحن شوية، ودي حاجة مملة الصراحة.

كابل USB من نوع Type-C.

جراب شفاف للموبايل لحمايته من أي جروح.

كتيب التعليمات والضمان لحل أي مشكلة في الموبايل.

اسكرينة موجودة على شاشة الموبايل، وبتكون من البلاستيك يعني مش هتحمي الموبايل من أي خدوش خالص.

دبوس معدني لفتح مكان الشريحة والكارت الميمورى.

الهاند فري.

سعر موبايل Honor 9X Pro:

سعر الجهاز حوالي 4000 جنيه مصري للنسخة الـ 256، ودي أكيد من غير أي كلام طبعًا مساحة ضخمة وهاتخليه يكسب بوينت إنه يكون صفقة مثالية للي هيشتري الموبايل، وأكيد مفيد جدًا للي بيستخدمه في الشغل؛ لأنه هيبقى محتاج يخزن عليه حاجات كتيرة طبعًا ومساحة الموبايل الكبيرة هاتخدمك، وهتقدر تشبع لك الاحتياج دا.

الرأي النهائي في موبايل Honor 9X Pro:

المميزات:

البطارية 4000 مللي أمبير، يعني كويسة جدًا وهتفضل شغالة معاك لفترة طويلة.

تصميم شيك جدًا.

خامات عالية وممتازة.

شبكة الاتصال قوية.

العيوب:

الشحن بطيء شوية لأن الشحن بييجي بقوة 10 وات.

الكاميرا مش الأفضل في الموبايل.

مفيش خدمات جوجل.

الوزن تقيل، ودا هيبقى متعب في الاستخدام لفترات طويلة.

الخلاصة:

من الآخر، الموبايل صفقة مثالية بالنسبة للأداء، المساحة، والبطارية، والسعر…

أيوة مفيش خدمات جوجل بس دي تقدر تنزلها عادي، وبكدا يبقي هونر قدمت حاجة محترمة الصراحة.   

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *