Honor 9C| المراجعة والمواصفات
Honor 9C

خلونا نبدأ مرجعتنا النهاردة مع Honor 9C…

قدمت هونر موبايل جديد ينتمي لموبايلات الفئة الاقتصادية وهو هونر 9C، الذي يُعتبر النسخة الأحدث من هونر 8C مع تغيير وتطوير في بعض الأشياء فيه علشان يكون النسخة المطلوبة، حيث تطورت فيه الكاميرا مع زيادة مساحة الموبايل، بس كعادة سلسلة شركات هونر إنها بتصدر موبايلاتها من غير أي خدمات جوجل.

بس تعالوا نشوف يا تري فيه أي جديد في الموبايل دا ولا زي اللي قبله، دا اللي هنعرفه من خلال مراجعتنا للموبايل بشكل أفضل ونعرف إيه هي مميزاته وإيه هي عيوبه، وهل يا ترى يستحق الشراء أم لا!

لو بتدور على موبايل بإمكانيات ومواصفات معينة، ومحتار إيه اللي ممكن تشتريه وإيه لأ، إحنا هنا بنقدملك خدمة “اختار موبايلك“، واللي بتعرف من خلالها كل التفاصيل اللي بتخص أي موبايل أنت بتدور عليه، كل اللي عليك تعمله، هو إنك تكتب المواصفات والإمكانيات اللي تحب تشوفها في الموبايل اللي عايز تشتريه وإحنا هنقدم لك أكتر موبايل مناسب ليك.  

تصميم موبايل Honor 9C:

أولًا خامات الموبايل:

كالمعتاد في شركات هونر، جودة وخامة التصنيع بتيجي من البلاستيك سواء كان في ضهر الموبايل أو في الإطار، يعني خامة التصنيع ومتانته من البلاستيك.

طبعًا يا جماعة أحنا شايفين إن البلاستيك هيبقى سهل إنه يتجرح بسرعة، بالإضافة إلى إنه بيبصم بسهولة من أقل شيء، فبالتالي لازم تحافظ عليه من أقل حاجة وتكون حاطه في جراب طول الوقت، مش زي طبعًا إنه يكون مصنوع من الزجاج وعليه طبقة حماية، بس مش مشكلة أوي بالنسبة للفئة السعرية اللى هو نازل فيها.

ثانيًا التصميم الخارجي:

تصميم الكاميرات:

 الموبايل بييجي بكاميرا أمامية موجودة في ثقب أعلى يسار الشاشة، أما بالنسبة للكاميرا الخلفية فهي ثلاثية موجودة في إطار بارز شوية عن ضهر الموبايل، بالإضافة إلى وجود فلاش أحادي خارج الإطار من نوع ليد فلاش.

احنا بنشوف إن تصميم الكاميرات هنا مش حلو، بارز شوية عن ضهر الموبايل، ودا هيدي فرصة أكبر لتجريح الكاميرات.

 

تصميم موبايل Honor 9C
تصميم موبايل Honor 9C

 

 

الأبعاد والألوان:

الموبايل بييجي بأبعاد 159.81×76.13×8.13 ملم، ودا هيساعدك في إنك تقدر تشيل الموبايل بإيد واحدة بس.

وزن الموبايل هنا 175جرام، ودا وزن خفيف جدًا يعني هتقدر تستخدمه لفترات طويلة من غير أي تعب، ودا هيبقي مفيد ومناسب أكتر للفئة اللي بتستخدم موبايلها كتير في الشغل.

الموبايل موجود بالألوان المعتادة وهي الأسود، والأزرق.  

شاشة موبايل Honor 9C:

هونر غيرت النوتش الكبير اللي كان في الشاشة وعملته بشكل الثقب، أو ليها اسم تاني وهو الـ (Full View)، وكمان بتيجي من نوع الـ IPS LCD، بجودة الـ HD، وبمساحة 6.30، واللي تمثل نسبة 90 % من إجمالي مساحة واجهة الموبايل، وبدقة 720*1560بكسل،  وبمعدل كثافة بكسلات 269 بكسل لكل إنش.

وكمان الشاشة بتدعم أبعاد العرض الـ 19.5:9 لعرض أكبر محتوى ليها سواء وقت مشاهدتك للفيديوهات أو وقت اللعب على الجهاز، بالإضافة إلى إنها بتدعم نظام الـ Dark Mode، يعني تحويل النظام بالكامل إلى اللون الأسود. 

وكمان تقدر تلغي الثقب من الإعدادات لو أنت مش حابب شكله.

 

شاشة موبايل Honor 9C
شاشة موبايل Honor 9C

 

 

الشاشة هنا بالنسبة لدقتها، تعتبر مش أعلى حاجة بس هتقدملك أداء كويس من حيث الألوان؛ لإنها بتيجي مشبعة وواضحة بنسبة كبيرة، وبردو الكلام والتفاصيل والأيقونات هيكونوا واضحين عليها بشكل كويس.

بالإضافة إلى إن درجة السطوع في الشاشة، معقولة أوي بالنسبة للتعامل مع الشاشة تحت أشعة الشمس المباشرة، لكن للأسف الشاشة معلهاش أي لاصق للشاشة من أي نوع بس بييجي في العلبة اسكرينة بلاستيك، وما بتقدرش تحمي الموبايل من أي حاجة.

أما بالنسبة لحواف الشاشة وأطرافها، فهي صغيرة بنسبة كبيرة، ودا هيخليك تحس إن الموبايل من قدام عبارة عن شاشة وبس، لكن حجم الشاشة، حوافها ودقتها المعقولة هيخلوك تكون مبسوط وأنت بتلعب على الموبايل، أو وأنت بتتفرج على أي فيديوهات عليه.

كاميرات موبايل Honor 9C:

الكاميرا الأمامية: 

بتيجي بدقة 8 ميجا بكسل، بفتحة عدسة F\2.0.

الموبايل فيه 3 كاميرات خلفية:

الكاميرا الأولى، هي كاميرا أساسية في الموبايل، بدقة 48 ميجا بكسل، وبفتحة عدسة F\1.8.

الكاميرا الثانية، وهي خاصة بالتصوير الواسع، وبتيجي بفتحة عدسة F\2.4، ودقة 8 ميجا بكسل.

أما الكاميرا الثالثة، فهي خاصة بعمل العزل والبورتريه، بدقة 2 ميجا بكسل، وبفتحة عدسة F\2.4، مع وجود فلاش أحادي من نوع ليد فلاش.

 

كاميرات موبايل Honor 9C
كاميرات موبايل Honor 9C

 

 

العيب الأول هو تصميم الكاميرات نفسه، جاي بارز شوية عن ضهر الموبايل ودا هيدي فرصة كبيرة لتجريح الكاميرا.

أما بالنسبة لأداء الكاميرات، فهي بصفة عامة هتقدملك أداء كويس يعني بالنهار الصور اللي هتاخدها، الألوان هاتكون فيها كويسة جدًا وتفاصيل الصورة هتبقى كتيرة وواضحة، وكمان بالنسبة للتصوير في إضاءة منخفضة أو التصوير بالليل، بردو الأداء هيكون حلو، وفيه تفاصيل إلى حدٍ ما كويسة، ودا علشان موجود في الجهاز العدسة الواسعة ووضع الـ (Super Night Mode).

 وبالنسبة للكاميرا الخاصة بعمل العزل والبورتريه فهي هتقدر تحدد لك الأطراف بشكل كويس إلى حدٍ ما، ودا الطبيعي في الفئة السعرية اللي الموبايل نازل فيها.

أما عن تصوير الفيديوهات، فأنت تقدر تصورها بجودة الـ FHD، بدقة 1080 بكسل، بمعدل التقاط 30 و 60 إطار في الثانية الواحدة، وكمان يدعم الموبايل التصوير بطيء الحركة Slow Motion، بمعدل 480 إطار في الثانية الواحدة.

نييجي بقى للكاميرا الأمامية، اللي هتديك أداء وألوان كويسة في إضاءة النهار، أما في الليل فالألوان والتفاصيل وكمان الجودة هتقل جدًا. 

البصمة والزيادات:

البصمة:

البصمة في ضهر الموبايل زي باقي الموبايلات مفيش أي اختلاف، وكمان الموبايل يدعم خاصية Face Unlock، واللي ليها مسمى تاني هو بصمة الوجه، وبتشتغل عن طريق الكاميرا الأمامية.

الموبايل بييجي ببعض المستشعرات، منها:

  • مستشعر الجيروسكوب الخاص بنظارات الواقع الإفتراضي الـ VR.
  • مستشعر التقارب.
  • مستشعر البوصلة.
  • مستشعر التسارع.

الموبايل يدعم منفذ الـ 3.5 ملم الخاص بالهاند فري، ودي نقطة معتادة من مجموعة شركات هونر.

يدعم الموبايل راديو الـ FMوالـ NFC.

يدعم وجود شريحتين اتصال مع وجود كارت ميموري؛ لزيادة المساحة بسعة تخزينية تصل إلى 512 جيجا بايت.

يدعم شبكات الجيل الثاني، الثالث، والرابع.

 نظام تشغيل الموبايل أندرويد 9.

يدعم الموبايل الاتصال السريع بالواي فاي بترددات الـ b/g/n، كما يدعم أيضًا خاصيتي الـ Wi-Fi Direct, والهوت سبوت.

ويدعم البلوتوث بإصدار 5.0.

كما يدعم موقع تحديد الـ GPS؛ ليسهل معرفة الأماكن لدى البعض. 

 بطارية موبايل Honor 9C:

البطارية هنا بتيجي بسعة 4000 مللي أمبير، ودا حجم كويس جدًا وهيكمل معاك اليوم كله، بس للأسف البطارية مبتدعمش الشحن السريع لأن الشاحن بقوة 10 وات بس.

 

 بطارية موبايل Honor 9C
بطارية موبايل Honor 9C

 

 

أداء موبايل Honor 9C:

الموبايل بييجي بمعالج هواوي في الفئة المتوسطة الـ Kirin 710A، ودي متكررة نوعًا ما في الموبايلات، وبييجي بتكنولوجيا الـ 14 نانو.

أيضًا مع معالج رسومي من نوع Mali-G51 MP4.

 كما يدعم الموبايل الأداء الرسومي عن طريق الـ GPU Turbo 3.0 للحصول على أداء جيد وقت اللعب على الجهاز.

المعالج الموجود في الجهاز دا هيقدم لك أداء كويس، ومن خلاله تقدر تستخدم تطبيقات السوشيال ميديا من غير ما تقابلك أي مشاكل في الموبايل، أما بالنسبة للألعاب فهو متاح ومناسب للألعاب الخفيفة، والألعاب التقيلة هايشغلها معاك بردو بس الأفضل إنك تشغلها على إعدادات أقل؛ علشان متوجهش أي مشاكل أو تهنيج وأنت بتلعب.

 

أداء موبايل Honor 9C
أداء موبايل Honor 9C

 

فتح علبة موبايل Honor 9C:-

موبايل هونر 9C.

هاند فري.

كتيب ضمان وتعليمات يشرح كيفية استخدام الجهاز.

اسكرينة تم وضعها بشكل مسبق على الموبايل، وبتكون من البلاستيك يعني مش هتحمي الموبايل من أي حاجة.

رأس شاحن بقوة 10 وات، ودا هيخلي شحن الموبايل بطيء نسبيًا.

دبوس معدني لفتح مكان الشريحة.

جراب موبايل شفاف.

سعر موبايل Honor 9C:

سعر الجهاز حوالي 2450 جنيه مصري للنسخة الـ 64 مع 4 جيجا رام، ودي مساحة كويسة بالنسبة لسعر الجهاز.

الرأي النهائي في موبايل Honor 9C:

المميزات:

أداء المعالج نقدر نقول عليه كويس نوعًا ما في هذه الفئة السعرية ولكن مش الأفضل.

أداء الكاميرات حلو أوي وخصوصًا من الكاميرا الخلفية، وفي التصوير الليلي.

الشاشة هنا بتيجي بشكل الثقب، ودا يعتبر ميزة في الفئة الاقتصادية دي، ولكن للأسف بجودة HD فقط، ودي جودة قليلة جدًا.

العيوب:

مفيش خدمات جوجل بلاي.

مفيش لمبة إشعارات.

الجهاز لا يدعم الشحن السريع، وعلشان كده هيحتاج إلى وقت طويل لشحنه ( حوالي ساعتين ونصف )، ودا إهدار للوقت وخصوصًا لو كان الشخص اللي هيشتريه هيستخدمه في شغل معين.

منفذ الـ USB من النوع القديم، كان هيبقى أفضل لو جه من النوع الـ Type C.

يعتبر الهاتف نسخة طبق الأصل بدون أي جديد من هاتف هواوي Y7P الموجود بالفعل في الأسواق، ودي طبعًا حاجة هتضر بسمعة الشركة.

ارتفاع سعر الهاتف؛ لأن هو نفس سعر Honor 9X Lite بس من غير خدمات جوجل، وخامات الزجاج اللي كانت هتبقى أفضل من البلاستيك.

انخفاض صوت الموبايل.

الخلاصة:

أكيد لاحظنا إن عيوب الموبايل أكتر من مميزاته، ولو أنت ناوي تشتري الموبايل لاستخدامه في الشغل أو لو أنت مهتم بخدمات جوجل، فاحنا ما ننصحكش بالموبايل دا، إنما لو أنت مهتم بالتصوير والألعاب، فاحنا شايفين إن الجهاز كويس نوعًا ما بالنسبة للفئة اللي نازل فيها.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *