سامسونج A21s| المراجعة والمواصفات
سامسونج A21s

لما شركة سامسونج نزلت موبايل سامسونج A21s، حصل انقلاب ودوشة حوالين الموبايل دا، ياترى ليه؟

الحقيقة إن الموبايل نزل مصر وتم تسعيره بسعر وحش جدًا بالنسبة للإمكانيات اللي بيقدمها للمستخدمين، في حين إن نفس إمكانياته تقدر تلاقيها في موبايلات تانية عند المنافسين وبسعر أقل.

 الموبايل جاي بمعالج جديد كانت أول مرة تقدمه في الفئة دي من الأسعار، بس بالنسبة لأدائه مع سعره محدش كان هيقبل بيه، خلينا نشوف ليه…

تصميم موبايل سامسونج A21s:

أولًا خامات الموبايل:

تصميم الموبايل بالكامل من البلاستيك البولي كاربونيت، سواء من الضهر أو الفريم، كما يوجد لوجو سامسونج في ضهر الموبايل تحت شوية، وبصمة الإصبع كمان في الضهر من فوق…

الخامات تعتبر معقولة، والبولي كاربونيت بقى شائع جدًا في السوق خلاص ومش من الغريب نشوفه في الفئة دي.

 

تصميم موبايل سامسونج A21s
تصميم موبايل سامسونج A21s

 

ثانيًا التصميم الخارجي:

تصميم الكاميرات:

الكاميرات الخلفية الأربعة موجودة في بوكس فوق على شمال الموبايل ومعاهم الفلاش، تصميمها مختلف شوية وبيدي جاذبية أكتر لضهر الموبايل.

التصميم كويس مضايقنيش، والكاميرات عمومًا بقى فيها تطور ملحوظ اليومين دول في أشكال التصميمات وأنواعها، ولسة هنشوف كتير أكيد الفترة الجاية.

أبعاد الموبايل:

  • أبعاد الموبايل ظريفة وهي 163.7×75.3×8.9 مم.
  • بييجي سامسونج A21s بوزن حوالي 192 جرام، الوزن ده يعتبر معقول ومش هيضايقك أوي وأنت شايله وبتستخدمه.

شاشة موبايل سامسونج A21s:

  • شاشة متوسطة ونقدر نقول مش أحسن حاجة من سامسونج، من نوع PLS TFT.
  • الشاشة بتييجي بحجم 6.5 بوصة، بدقة 720×1600 بيكسل، مع جودة HD+ أيضًا مع كثافة بيكسلات 270 بيكسل لكل بوصة، وأبعاد العرض 20:9، والشاشة كاملة والسيلفي في  شمال الشاشة من فوق.

 

شاشة موبايل سامسونج A21s
شاشة موبايل سامسونج A21s

 

للأسف شاشة الموبايل مش مقتنع بيها بشكل كبير؛ عشان بتييجي بجودة HD بس واللي بتقدم جودة ميتقالش عليها أكتر من مقبولة بسبب الأداء الضعيف للألوان والتفاصيل واللي بتخلي معظم الفيديوز والألعاب متوفرلكش أحسن تجربة، بالرغم من وجود شاشات أموليد FHD في سامسونج عادي جدًا.

كاميرات موبايل سامسونج A21s:

الكاميرا الأمامية:

الموبايل هنا بييجي بكاميرا سيلفي بدقة 13 ميجا بيكسل، بفتحة عدسة F/2.2، وتصوير الفيديوهات بجودة 1080p@30fps.

الكاميرا هنا مقبولة ومتعتبرش أقل من المنافسين، ولكن الكاميرا مقبولة لو بتصور في إضاءة عالية أو متوسطة، غير كدا للأسف هتكون سيئة جدًا.

كمان الكاميرا الأمامية فيها عيب زعلني جدًا وهو خاصية العزل، الخاصية دي غير مستقرة في الصور، وبالتالي هتلاقي معظم الصور أطرافها مش متحددة كويس وفيه عزل في أماكن المفروض ميكونش فيها عزل أصلًا، مثلًا لو بتاخد صورة سيلفي ممكن تاكل حتة من شعرك!

الكاميرات الخلفية:

عبارة عن أربع كاميرات مع بعض في بوكس واحد مع الفلاش، تصميمها جذاب وشيك عاجبني شخصيًا.

بس تعالى نتكلم عنهم بالتفصيل بردو…

  • عندك الكاميرا الأولى بتصور بدقة 48 ميجا بيكسل، بفتحة عدسة F/2.0.
  •  التانية بدقة 8 ميجا بيكسل، بفتحة عدسة F/2.2، وهي Ultra Wide للتصوير العريض وبنشوفها حاليًا في معظم الموبايلات. 
  • الكاميرا التالتة دقتها 2 ميجا بيكسل، بفتحة عدسة F/2.4، ودي كاميرا ماكرو علشان الناس اللي بتحب التفاصيل.
  • نيجي بقى للكاميرا الرابعة واللي بتصور بدقة 2 ميجا بيكسل، بفتحة عدسة F/2.4  ومُخصصة للعزل.

 

كاميرات موبايل سامسونج A21s
كاميرات موبايل سامسونج A21s

 

وبالمناسبة الكاميرات الخلفية بالذات بتقدملك أداء قوي وممتاز، عجبتني جدًا، وتفاصيلها حلوة حتى لما بنعمل زوم، وكان الأداء حلو جدًا جدًا لما استخدمنا الكاميرا الـ 48 ميجا.

الألوان بتطلع مظبوطة جدًا وجودتها حلوة في الظروف العادية، والإضاءة كمان لو كانت قليلة ده مش هيأثر بشكل كبير على الصور، ودا عجبني بصراحة في الكاميرات.

طبعًا اختيارك لموبايلك بيتوقف على حاجات كتير جدًا وتفضيلات شخصية، وغالبا بتختار موبايلك حسب شوية حاجات زي:

الميزانية، والاستخدام، والحاجات اللي أنت محتاجها في الموبايل من كاميرا مثلًا وخلافه!

علشان كدا إحنا بنقدملك خدمة “اختار موبايلك” اللي فيها بنساعدك تختار الموبايل المناسب ليك بناء على الحاجات اللي أنت محتاجها واللي أنت بتقولنا عليها ودا تقدر تعمله من هنـــــــــــــــــا

نكمل بقى مع الموبايل بتاعنا…

البصمة والزيادات: 

البصمة:

سامسونج A21s بييجي ببصمة في الضهر زي ما قولنا، وبيدعم تقنية الـ Face Unlock.

يعني تقدر تفتحه ببصمة الوجه أو الأصابع عادي جدًا، ودي خاصية خلاص بقت موجودة في معظم الموبايلات الجديدة ومريحة جدًا وأنا شخصيًا بفضلها في أي موبايل علشان سرعة الاستجابة والفتح السريع بمجرد ما الموبايل بيتعرف على الوش المسجل عنده.

المستشعرات:

  1. مستشعر التسارع.
  2. مستشعر الجيروسكوب.
  3. مستشعر التقارب.
  4. مستشعر البوصلة.

الموبايل هنا فيه كام ميزة عجبوني ودي حاجة بشوفها حلوة في سامسونج بصراحة، وهي إن الموبايل ده بييجي باختيارات متعددة في الألوان يعني تقدر تختار اللون المناسب ليك بسهولة عكس موبايلات كتير بتكون إصداراتها محدودة، كمان الموبايل فيه ميزة تسجيل المكالمات، الميزة اللي بيدور عليها ناس كتير أوي وبيحبوا إنها تكون موجودة في موبايلاتهم..

ألوان الموبايل اللى بيتوفر بيها هي اللون الأسود، الأزرق، والأزرق، وكمان الأحمر والأبيض.

يدعم الموبايل وجود البلوتوث بالإصدار 5.0، مع خاصيتي الـ A2DP, LE.

يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.

أما عن الواي فاي في موبايل سامسونج M21 فهو يدعمه بترددات الـ b/g/n، كما يدعم الـ Dual-band, Wi-Fi Direct, hotspot.

الموبايل جاي بأحدث نظام تشغيل Android 10، مع واجهة سامسونج الأحدث الـ One UI 2.0.

يدعم الموبايل شبكات الـ 4G،والـ 3G، وكمان الـ 2G.

أم بالنسبة لمنفذ الـ USB فييجي من النوع الأحدث واللى هو الـ Type C، بالإضافة لدعمه إلى الـ OTG.

يدعم الموبايل امكانية تشغيل شريحتين اتصال في نفس الوقت من نوع Nano Sim، مع وجود كارت ميموري بسعة تخزينية تصل إلى 512 جيجا بايت في منفذ مخصص له.

الوبايل جاي بذاكرة صلبة بسعة 64 أو 128 جيجا بايت، من نوع eMMC 5.1،أيضًا مع ذاكرة عشوائية بسعة 4 جيجا بايت، من نوع LPDDR4X.

صوت الموبايل:

  • الموبايل مزود بميكروفون ثانوي بيعزل أي دوشة حواليك لما تستخدمه سواء كنت بتصور أو بتتكلم فيه أو بتسجل، ودا لما جربناه كان كويس، صحيح مكانش الأفضل بس يفضل كويس جدًا في الفئة السعرية دي.
  • موجود في الموبايل منفذ الـ 3.5 ملم للهاند فري، واللي مبقاش موجود اليومين دول كتير، واتجهت معظم الشركات لإلغائه حتى في الفئات المتوسطة والاقتصادية.
  • ضيف على كده خاصية Dolby Atmos اللي بتخلي صوت الموبايل نقي وواضح أكتر بكتير من الموبايلات اللي مش موجودة فيها.

أداء موبايل سامسونج A21s:

أما عن أداء الموبايل فهو جاي بمعالج سامسونج الجديد الـ Exynos 850، بتكنولوجيا 8 نانو، مع معالج رسومي Mali G52.

كلنا عارفين إن سامسونج مشهور عنها إن السوفت وير بتاعها بيكون تقيل شوية، وبيكون ثابت عند درجة معينة من السرعة، واللى هو مش سريع أوي ومش بطيء بردو يعني بين البينين كدا، ولكن مع تجربة الموبايل دا بشكل مكثف شوية لقينا الموضوع ده مش موجود والموبايل كان سلس معانا جدًا في الاستخدام والواجهة بتاعته كانت ممتازة.

 

أداء موبايل سامسونج A21s
أداء موبايل سامسونج A21s

 

المعالج قوي في الألعاب اللي بتحتاج إمكانيات عالية زي ببجي call of duty، الألعاب صحيح مش بتشتغل على أعلى إعدادات ليها ولكن كانت التجربة مرضية بالنسبة لموبايل في الفئة دي.

بطارية موبايل سامسونج A21s:

بطارية حجمها 5000 مللي أمبير، وبتشحن بقوة 15 وات عن طريق منفذ USB Type C، يعني شحنه متوسط السرعة مش هياخد وقت كبير أوي منك، وكمان البطارية كبيرة هتفضل معاك طول اليوم لو بتستخدمه بشكل كبير، ولو من عشاق PUBG هتلاقي أداء حلو أوي من البطارية معاك بردو.

 

بطارية موبايل سامسونج A21s
بطارية موبايل سامسونج A21s

سعر موبايل سامسونج A21s: 

نزل موبايل سامسونج A21s مصر بشكل رسمي، وكان سعر البيع وقتها للمستهلك 3400 جنيه مصري، وسعر الاستلام من التوكيل 3150 جنيه مصري.

السعر حاليًا لموبايل سامسونج A21s:

حوالي 2850 جنيه مصري لنسخة 64 جيجا مع 4 جيجا رام.

ولنسخة 128 جيجا مع 4 جيجا رام حوالي 3200 جنيه مصري.

محتويات علبة موبايل سامسونج A21s:

  1. موبايل سامسونج A21s.
  2. شاحن بقوة 15 وات.
  3. كابل الـ USB وبييجي من نوع الـ Type C.
  4. كتيب يشرح كيفية استخدام الموبايل، والضمان التعليمات.
  5. دبوس معدني.
  6. الهاند فري.

الرأي النهائي في موبايل سامسونج A21s:

سامسونج مقدمة موبايل من خامات بلاستيك بتصميم تقليدي من تصميماتها، بس مقبول بشكل كبير خصوصًا بالألوان الكتير اللي بتقدمها.

بالنسبة للشاشة زي ماقولنا هي مش أحسن شيء، أو مش هتبقى راضي عنها تماًما لأنها بتييجي HD بس، وكانت ممكن تقدم شاشات أموليد FHD وفرق السعر مش هيكون كبير تقريبًا كدا 600 جنيه مصري، زي Galaxy M31 واللي بيتفوق بشكل كبير جدًا عن موبايل سامسونج A21s.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *