شركة فيفو مع بداية دخولها لمصر كانت بتحاول السيطرة على الفئة الاقتصادية بموبايلات بسيطة زي الـ فيفو Y91C واللي هنراجعه النهاردة بالتفصيل علشان نشوف هل فعلًا الموبايل ده يستاهل ولا لأ وهل يرقى لتوقعاتنا من شركة عملاقة زي فيفو ولا لأ.
خلونا نبدأ المراجعة عشان نعرف كل دا، بس قبلها حابين نفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك“، واللي بيقدمها موقــــع ناس فـــونـــز وهي خدمة هتساعدك في إنك تختار الجهاز المناسب ليك، عن طريق ترشيحنا ليك بِناءًا على طلبك واللي انت عايزه ومحتاجه يكون متوفر في جهازك من مواصفات وإمكانيات؛ علشان ببساطة تكون قادر تختار الجهاز اللي اتعمل لإشباع احتياجاتك و يتناسب مع ميزانيتك من غير أي ولا قلق ولا حيرة.
ويلا نبدأ مراجعتنا بتصميم الموبايل…
تصميم موبايل فيفو Y91c:
أولا خامات الموبايل:
خامات بلاستيكية متوسطة بشوفها مناسبة في الفئة السعرية دي لأنه بعد كل حاجة موجه للطبقة الاقتصادية فأكيد مع الخامات دي يعتبر كويس.
- ضهر الموبايل بلاستيكي من البلاستيك اللامع؛ البلاستيك اللامع شبيه بالزجاج ولكن أكيد معرض أكتر للخرابيش والخدوش لأنه في الأول والآخر بلاستيك، بييجي بكاميرا واحدة موجودة في ضهر الموبايل في شكل دائري ظريف على الشمال من فوق وتحتها فلاش صغير على شكل مربع، تصميم مقبول وعملي بالنسبة ليا.
- الفريم بلاستيك: مفيش تغيير في الخامة هي هي نفس خامات الموبايل العادية.
ثانيًا التصميم الخارجي:
- تصميم الكاميرات: زي ما قولنا قبل كدا هي كاميرا واحدة فوق في تصميم دائري عادي غير مميز وتحتها فلاش مربع في تصميم منفصل عن الكاميرا واللي بنشوفه تصميم مميز في الفئة دي.
- أبعاد الموبايل: الموبايل بييجي بأبعاد ظريفة 155.11×75.09×8.28 ملم، ووزن 163.5 جرام واللي يعتبر خفيف جدا ومناسب للاستخدام الطويل بدون تعب أو احتمال لإنك تتضايق من مسكته.
شاشة موبايل فيفو Y91c:
شاشة فيفو Y91C بتيجي من نوع IPS LCD وده نوع كويس في الفئة دي، مع كاميرا أمامية على هيئة نوتش الـ Water Drop وبتيجي بمساحة 6.22 إنش مع جودة الـ HD+ ودقة 720×1520 بكسل بمعدل كثافة للبكسلات 270 بكسل في كل إنش، وبتدعم الشاشة أبعاد العرض بنسبة 19:9 وطبعًا ممكن تلغي أزرار التحكم وتستخدم الايماءات وخلاص علشان تستمتع بتجربة كاملة للشاشة بشكل أفضل بحيث تحتل الشاشة نسبة 88.6% من مجمل الواجهة الأمامية.
كاميرات موبايل فيفو Y91c:
الكاميرا بتقدم أداء جيد في الفئة السعرية دي ولكن مش الأفضل هنلاقي مجموعة من الهواتف بتقدم أداء أفضل منه ولكن مش هتواجه مشاكل كتيرة بالنسبة للألوان جيدة وتوزيع الضوء في الصور جيد ولكن فيالفئة السعرية دي وهناك بدائل أفضل منه في الفئة دي .
الكاميرا الأمامية:
- هي كاميرا وحيدة موجودة في النوتش الووتر دروب في الموبايل من فوق، الكاميرا الأمامية تأتي بدقة 5 ميجا بكسل بفتحة عدسة F/1.8 واللي تعتبر مقبولة في الفئة السعرية دي.
الكاميرات الخلفية:
الكاميرا الخلفية لموبايل فيفو Y91C هي بردو كاميرا واحدة بس بدقة 13 ميجا بكسل بفتحة عدسة F/2.2 مع فلاش أحادي من نوع الليد فلاش.
مع شوية مميزات تانية زي:
- الموبايل بيدعم تصوير الفيديوهات بجودة مقبولة وهي الـ FHD بدقة 1080 بكسل وبمعدل التقاط كويس 30 إطار في الثانية.
- يدعم التصوير بجودة أقل وهي الـ HD بدقة 720 بكسل وبمعدل التقاط 30 إطار في الثانية.
- يدعم التصوير بجودة أقل بردو وهي 480 بكسل وبمعدل التقاط 30 إطار في الثانية.
البصمة والزيادات:
البصمة:
الجهاز بييجي من غير بصمة اصبع يعني الحل قدامك تعمل باسورد أو تفتح ببصمة الوجه المرفقة في النوتش اللي في أعلى الشاشة، البصمة هنا متوسطة السرعة يعني مش حلوة أوي ولا وحشة أوي، بس إنك تلاقي أصلا بصمة وجه في الفئة دي ده شيء كويس.
المستشعرات
- مستشعر التقارب.
- مستشعر التسارع.
- مستشعر البوصلة.
- مستشعر الـ Gyroscope.
- مستشعر الضوء.
وكمان الموبايل فيه بعض الخصائص زي:
- راديو FM.
- يدعم الـ OTG.
- يدعم شريحتي اتصال.
- يدعم الـ 4G وده ممتاز في الفئة دي.
- يدعم الميموري كارد حتى 256 جيجا بايت وليه منفذ لوحده يعني مش هتضحي بشريحة من الـ2.
- الموبايل محافظ على منفذ السماعات الـ 3.5 ملم.
- متوفر بـ3 ألوان مختلفة وظريفة “أسود، أزرق، أحمر”.
أداء موبايل فيفو Y91c:
طبعًا أداء الموبايل نفسه مش من المتوقع إنه يكون أحسن حاجة ولكنه مقبول جدا في الفئة السعرية دي، الموبايل بييجي بمعالج كويس من شركة ميديا تيك من نوع Helio P22 بتكنولوجيا 12 نانو وهو نفس المعالج الموجود في الـ Infinix S5 وموبايل الـ Realme C2 وموبايل الـ Oppo A1k مع معالج رسوميات من نوع PowerVR GE8320.
بطارية موبايل فيفو Y91c:
البطارية في موبايل فيفو Y91C هي بطارية عملاقة وهي ميزة الموبايل تقريبًا وبتيجي بسعة ضخمة 4030 مللي أمبير واللي تخليك مش محتاج تشحن الموبايل لفترات طويلة جدا حتى مع الاستخدام التقيل.
سعر موبايل فيفو Y91c:
السعر هنا هو نقطة القوة التانية من فيفو في الموبايل ده ولما قولنا هو نازل يسيطر على الفئة الاقتصادية مكانش مجرد كلام، ده بيظهر بشكل واضح في التسعير من شركة فيفو وهو حوالي 1700 جنية لنسخة الموبايل الـ 32 جيجا مع 2 جيجا رام.
الرأي النهائي في موبايل فيفو Y91c:
الموبايل كموبايل اقتصادي يعتبر مزيج متوازن، حاجة كدا تحسسك إنك شايل موبايل غالي في نفس الوقت فئة اقتصادية، شركة فيفو شركة قوية في عالم الموبايلات وكون إنك تقدر تمتلك جهاز منها بالسعر ده هو فرصة ممتازة وأفضل من البدائل في نفس الفئة.
وأخيرًا شركة فيفو تعتبر شركة مبتدأة في السوق المصري، فخلينا ننتظر منها الأحسن خلال الإصدارات الجاية ليها.