هونر 9X| المراجعة والمواصفات
Honor 9X

خلونا نبدأ مرجعتنا مع موبايل جديد وهو هونر 9X…

شركة هونر من بعد ما نزلت موبايل الــ هونر 8X زي ما تقول كده كسلت إنها تعمل أبديت للموبايل بعدها بسنة زي باقي الشركات أو تنزل حاجة جديدة، بس في الحقيقة هي قعدت فترة كويسة إلي حد ما، وبعدها نزلت موبايل هونر 9X.

في البداية كدا خلوني أكون صريح معاكم، الموبايل دا مفيش فيه جديد أوي، أو مفيهوش أي حاجة مبهرة إحنا مشوفنهاش قبل كده في موبايلات، بس الموبايل بيرجَع الثقة للناس اللي اشترت الــ 8X، ونفسها في موبايل جديد بس بنفس اللوك والشركة وهكذا…

“خدمة اختار موبايلك“، إحنا هنا كخبراء هنقدم لك كل التفاصيل اللي تحب تعرفها عن أي موبايل؛ علشان تقدر تختار موبايلك الأنسب من حيث الإمكانيات والمواصفات اللي عايزها تكون في الجهاز الخاص بيك…

كل اللي عليك بس، إنك تكتب المواصفات وإيه هي إمكانياتك وقدرتك الشرائية، واحنا هنقدم لك الموبايل الأنسب ليك بكل التفاصيل اللي أنت عايزها تكون في موبايلك.

تعالوا نشوف في الجديد في الموبايل دا ولا لأ، وإيه هي مميزاته وعيوبه، وهل يستحق الشراء أم لا!

تصميم موبايل هونر 9X:

أولًا خامات الموبايل:

لو فاكرين خامات تصنيع هونر 8X، الموبايل دا كانت خامات التصنيع بتاعته كويسة جدًا، وكانت من الزجاج، والماتريال نضيفة جدًا عن الموبايلات الموجودة في الفئة السعرية بتاعته، بس للأسف هنا خامة تصنيع ومتانة الموبايل بتييجي من البلاستيك…

ولكن دا ميخليناش نقول إن الموبايل مش قوي أو متين بالعكس الموبايل قوي ومتين جدًا، و بيتحمل الصدمات؛ علشان هونر معوضة النقص في مواصفات الموبايل بأنها استخدمت خامات كويسة جدًا في تصنيع الموبايل جعلته قوي ومتين. 

يعني لو أنت مش بتحب الأجهزة البلاستيكية ومعتقد إنها مش عملية، أحب أقولك اطمن؛ لأن خامات تصنيع الموبايل من البلاستيك بس استخدموا خامات وجودة كويسة عند التصنيع…

الصراحة كنت أتمنى خامات الجهاز تكون مصنوعة من الزجاج، كان هيبقي شكله ألطف من كدا، بس عادي الملمس هنا كويس نقدر نقول عليه مقبول بالنسبة للفئة السعرية اللي هو فيها.

ثانيًا التصميم الخارجي:

تصميم الكاميرات:

الكاميرات الخلفية هنا ثلاث كاميرات، مع وجود فلاش أحادي من نوع ليد فلاش، وأكتر حاجة عجبتني في الكاميرات هي إن بروزهم خفيف جدًا جدًا، ودا هيقلل فرصة تجريح الكاميرا مقارنةً بـ هونر 8X، وباقي المنافسين اللي كانوا موجودين في الفئة السعرية دي.

الكاميرا الأمامية بتييجي هنا بشكل الـPOP-UP، وبتشتغل عن طريق سلايدر، وتعتبر بقت موجودة كدا في كتير من الموبايلات، ومحدش اشتكى منها، يعني اطمن من ناحيتها خالص.

 

تصميم موبايل هونر 9X
تصميم موبايل هونر 9X

 

الأبعاد والألوان:

أبعاد الموبايل:163.5 *77.3 * 8.8 مللي متر.

أكتر حاجة مبسوطين منها هي إن وزن الموبايل 196.8 جرام، ودا وزن خفيف جدًا، وسهل إنك تشيله لفترة طويلة، ودا هيكون مفيد جدًا وأنت بتستخدمه في الشغل لفترات طويلة ومش هايتعبك.

ألوان الموبايل هنا الأسود، والأزرق وهي ألوان معتادة مفيش فيها حاجة مميزة.

شاشة موبايل هونر 9X: 

الشاشة هنا كاملة من غير أي نوتش، أو ثقوب، ودا اختلاف من ضمن الاختلافات عن هونر 8X. 

 

شاشة موبايل هونر 9X
شاشة موبايل هونر 9X

 

الشاشة من نوع (LTPS IPS LCD )، بمساحة 128، ودي طبعًا مساحة كويسة جدًا، بجودة الـ FHD، بدقة 1080×2340 بكسل، بمعدل كثافة 391 بكسل، وهي نفس شاشة موبايل Huawei Y9 Prime من غير أي أبديت فيها. 

كاميرات موبايل هونر 9X:

الكاميرا الأمامية:

بتييجي هنا بدقة 16 ميجا بكسل، وبفتحة عدسة F\2.2. 

الكاميرا الخلفية:

الموبايل فيه ثلاث كاميرات بس جاي فيه ميزة حلوة أوي، وهي إن الكاميرا مش بارزة عن الموبايل، ودا هيقلل فرصة تجريح الكاميرا، هنتكلم عن كل كاميرا بالتفصيل:

الكاميرا الأولى، هي الكاميرا الأساسية في الموبايل بدقة 48 ميجا بكسل، بفتحة عدسة F\1.8.

أما عن الكاميرا الثانية، فهي بدقة 8 ميجا بكسل، ودي خاصة بتصوير Uitra Wide اللي هو التصوير الليلي، لاحظت حاجة مهمة هنا وإحنا بنستخدم الكاميرا، وهي كل ما الإضاءة تقل بتبقي الصور سيئة الصراحة.

نييجي بقي للكاميرا الأخيرة، وهي خاصة بعمل البورتريه والعزل، وتحديد الأطراف العظيم جدًا في الموبايل دا، مع وجود فلاش أحادي من نوع ليد فلاش، وبتييجي بدقة 2 ميجا بكسل.

بالنسبة لتصوير الفيديوهات، فهي بتكون بجودة FHD، بدقة 1080 بكسل، بمعدل التقاط 60 أو 30 إطار في الثانية الواحدة.

مع وجود ميكروفون إضافي خاص بعمل العزل للضوضاء وقت استخدام الموبايل.

 

كاميرات موبايل هونر 9X
كاميرات موبايل هونر 9X

 

الصور في الإضاءة بتاعة النهار، طبيعي بتطلع حلوة والألوان جميلة، وفيها تفاصيل إلى حدٍ ما كويسة، بس الكاميرا السيلفي مش أحسن حاجة يعني ألوان البشرة بتطلع باهتة شوية فيها بس هي إلى حدٍ ما كويسة.

 أما عن برنامج السيطرة على الإضاءة، فهو كويس بس مش أحسن حاجة في الفئة السعرية اللي هو فيها.

موضوع البورتريه أو العزل بردو مفيش فيه مشكلة وتحديد الأطراف فيه كويس.

نفس الكلام في تصوير الزاوية الواسعة هي بتطلع صور حلوة بس كل ما الإضاءة تقل، الصور بتطلع سيئة جدًا للأسف.

البصمة والزيادات:

البصمة:

بتيجي البصمة في ضهر الموبايل، بس للأسف الموبايل هنا مفيهوش خاصية الـ Face Unlock يعني بصمة الوجه.

الموبايل بييجي ببعض المستشعرات تعالوا نشوف إيه اللي موجود في موبايل هونر 9X:

  1. مستشعر التقارب.
  2. مستشعر البوصلة.
  3. مستشعر التسارع.
  4. مستشعر جيروسكوب الذي يعمل على تشغيل نظارات الواقع الافتراضي الـ VR.

يدعم الموبايل الاتصال السريع بالواي فاي بترددات الـ a\b\ac\n\g. 

كما يدعم الهوت سبوت، ومواقع تحديد GPS.

وأيضًا يدعم الموبايل البلوتوث بأحدث إصدار، وهو الإصدار الخامس، بالإضافة لدعمه خاصيتي الـ ET، و A2DP.

كما يدعم وجود ميكروفون إضافي خاص بعمل العزل للضوضاء وقت استخدام الموبايل.

ويدعم موبايل هونر 9 إكس أيضًا منفذ الـ 3.5 ملم الخاص بالهاند فري.

أما عن كابل الـ USB فهو بييجي من نوع Type C.

بطارية موبايل هونر 9X:

البطارية هنا  بسعة 4000 مللي أمبير، ودا حجم كبير، وكمان ميزة كويسة جدًا لاستخدام الموبايل لفترة طويلة، والشحن هنا هيبقي سريع؛ لأن الكابل من نوع الـ Type C، بالإضافة لقوة شاحن بـ 10 وات.

 

بطارية موبايل هونر 9X
بطارية موبايل هونر 9X

أداء موبايل هونر 9X:

أعتقد إن أهم شيء بيلفت نظر المشتري هو أداء الموبايل عامل ازاي! الموبايل هنا بييجي بمعالج هواوي القديم في الفئة المتوسطة وهوKirin  710F، اللي شفناه كذا مرة قبل كدا، بس دا ما يمنعش إن المعالج  كويس، وبتكنولوجيا 12 نانو.

وكمان مع معالج رسومي Mali-G51 MP4.

أما عن نظام التشغيل، فهو بييجي بنظام Android 9.0 Pie، مع واجهة الـ EMUI 9.1.

 

أداء موبايل هونر 9X
أداء موبايل هونر 9X

 

فتح علبة موبايل هونر 9X:

موبايل هونر 9X.

شاحن بقوة 10 وات.

كابل USB من نوع  Type C، ودي أكتر حاجة أنا مبسوط إني لقيتها الصراحة هتخلي الشحن سريع.

جراب ضهر شفاف لحماية الموبايل من أي خدوش.

كتيب التعليمات والضمان لمواجهة أي مشكلة ممكن تقابلك في الجهاز.

اسكرينة تم وضعها بشكل مسبق على شاشة الموبايل وبتكون من البلاستيك ومش هتحمي الموبايل نهائيًا.

دبوس معدني لفتح مكان الشريحة.

هاند فري.

سعر موبايل هونر 9X:

خلي بالك الموبايل هنا موجود بنسختين:

الأولى، بتكون بسعر حوالي 3500 جنيه مصري لنسخة 128 جيجا مع 6 رام. 

والثانية، 64 جيجا مع 4 رام.

الرأي النهائي في موبايل هونر 9X:

المميزات:

تصميم الموبايل شيك وحديث مع انعكاس حرف الـ X على ضهر الموبايل.

نقدر نقول عليه مقبول بالنسبة لسعره المعروض.

شاشته كاملة من غير أي خدوش أو ثقوب، وبتقدم أداء كويس جدًا.

البطارية هنا سعتها 4000، ودا حجم كبير هيخليها تقدر تصمد لفترة طويلة عند الاستخدام.

شبكة الموبايل قوية، وسريعة الاتصال.

العيوب:

مفيش لمبة إشعارات ولا بصمة وجه.

خامات التصنيع من البلاستيك.

مفيش خاصية لتطوير الفيديوهات 4K.

أداء المعالج كويس بس مش الأفضل بالنسبة لفئة الموبايل السعرية.

أداء الكاميرا السيلفي مش حلو، وخصوصًا في التصوير الليلي.

الشركة ما قالتش أي شيء حول وجود طبقة حماية على الشاشة، ولكن يوجد بالشاشة اسكرينة للحماية.

الخلاصة:

احنا شايفين إن تصميم الموبايل شيك، ولو أنت مش مهتم بالكاميرا والتصوير، أعتقد الموبايل هيكون تجربة مقبولة بالنسبة لسعره، ومساحته، وأداء البطارية الخاصة بيه.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *