مراجعة موبايل سامسونج نوت 10 لايت
سامسونج نوت 10 لايت

كل جهاز موبايل أيًا كانت ماركته إيه ليه مميزات وعيوب حسب كل شخص محتاج إيه من الجهاز اللي هيشتريه، والجهاز اللي هنتكلم عن مراجعته وتفاصيله النهارده هو سامسونج نوت 10 لايت.

فالجهاز دا هو النسخة الأصغر من note 10 السابق، بس مع تقليل الأداء والاهتمام بأداء الكاميرا أكتر، بالإضافة لدعم الجهاز دا للقلم الـ S Pen

وتفاصيل كتير هنوضحهالك عن سامسونج نوت 10 لايت من حيث المميزات والعيوب، والرأي العام في الموبايل بعد التجربة المفصلة ليه.

تصميم موبايل سامسونج نوت 10 لايت: 

 

تصميم موبايل سامسونج نوت 10 لايت
تصميم موبايل سامسونج نوت 10 لايت

 

أولا خامات الموبايل:

خامة الموبايل دا من البولي كربونيت يعني بلاستيك، ولكن الفريم في الموبايل معدني، فدا مخلي وزنه تقيل بيوصل تقريبًا لـ 200 جرام.

ثانيا التصميم الخارجي:

تصميم الكاميرات:

موجود في موبايل سامسونج نوت 10 لايت 3 كاميرات خلفية مرصوصين في مربع بارز نوعًا ما عن ضهر الموبايل، بالإضافة لوجود فلاش أحادي من نوع ليد فلاش.

بالنسبة للكاميرا الأمامية فهي موجودة في الموبايل على هيئة نوتش أعلى الشاشة.

أبعاد الموبايل:

الموبايل بييجي بأبعاد 163.7×76.1×8.7 ملم.

ووزن الموبايل يقدر بـ 199 جرام.

شاشة موبايل سامسونج نوت 10 لايت:

شاشة جهاز سامسونج نوت 10 لايت كاملة مسطحة بدون انحناءات، من نوع Super AMOLED، ودي شاشة تشبع الألوان فيها ممتاز، وكمان حوافها بسيطة جدًا، ومساحتها 6.7 إنش بجودة الـ FHD+، وبدقة 1080×2400 بكسل، بمعدل كثافة بكسلات 394 بكسل لكل إنش، وتدعم الشاشة أبعاد العرض بنسبة 20:9، وتحتل من الواجهة الأمامية 86.6%.

شاشة الجهاز دا كمان بتدعم خاصيتي الـ Always on display والـ HDR. 

الكاميرا الأمامية، بتيجي في ثقب أعلى الشاشة، وشوفنا طبعًا الديزاين ده كتير من سامسونج واللي بتطلق عليه الـ Infinity O.

 

شاشة موبايل سامسونج نوت 10 لايت:
شاشة موبايل سامسونج نوت 10 لايت

 

طبعًا شاشة الموبايل هنا ممتازة من حيث الألوان، وتشبعها وإظهار التفاصيل والسطوع، وكانت تجربة لذيذة للشاشة وأنا بتفرج على فيديوز أو حتى لما كنت بجرب الموبايل وأنا بلعب عليه.

كاميرات موبايل سامسونج نوت 10 لايت:

الكاميرا الأمامية:

دقتها 32 ميجا بكسل، بفتحة عدسة F/2.2.

الكاميرات الخلفية في الموبايل دا هي كاميرات ثلاثية…

الكاميرا الأولى، بتييجي بدقة 12 ميجا بكسل، بفتحة عدسة F/1.8، وهي الكاميرا الأساسية للموبايل، وتدعم المثبت البصري الـ OIS.

والكاميرا الثانية، بتييجي بدقة 12 ميجا بكسل، بفتحة عدسة F/2.4، وهي الخاصة بالتقريب الـ Telephoto، بجودة 2X، بالإضافة لدعم للمثبت البصري الـ OIS أيضًا.

الكاميرا الأخيرة، دقتها 12 ميجا بكسل، بفتحة عدسة F/2.2، وهي الخاصة بالتصويرالعريض الـ Ultra Wide مع فلاش خلفي أحادي من نوع ليد فلاش، بالإضافة لإن الجهاز دا بيدعم تصوير الفيديوهات بجودة الـ 4K، بدقة 2160 بكسل، بمعدل التقاط 30 و60 إطار في الثانية، وكمان يدعم التصوير بجودة الـ FHD، بدقة 1080 بكسل، بمعدل التقاط 30 و60 إطار في الثانية، أيضًا بيدعم التصوير بجودة الـ HD، بدقة 720 بكسل، بمعدل التقاط 960 إطار في الثانية.

 

كاميرات موبايل سامسونج نوت 10 لايت
كاميرات موبايل سامسونج نوت 10 لايت

 

الكاميرات هنا بعض الناس ممكن متعجبهاش ولكن التجربة كانت مختلفة شوية، التجربة بتاعتنا أثبتت إن اللي جرب غير اللي سمع أو شاف، لأن الكاميرات لوهلة تبان إنها ضعيفة شوية ولكن بالتجربة أثبتت العكس، الموبايل غير إنه بيطلع ألوان محترمة جدًا وتفاصيل ممتازة بييجي بنايت مود ممكن يشتغل على كل العدسات عادي جدًا وبيطلع ألوان كويسة جدًا وتفاصيل حلوة بليل، فكانت تجربة كويسة جدًا للكاميرات.

البصمة والزيادات:

البصمة:

  • بصمة الموبايل غير عملية وغير سريعة للأسف دا لأنها ضوئية وتوجد أسفل الشاشة، وبسبب كبر حجمه بيكون فيه صعوبة في الوصول لبصمة الإصبع.
  • أيضًا مزود ببصمة للوجه بتشتغل طبعًا عن طريق الكاميرا الأمامية، واللي كان استخدامها ألطف من استخدام بصمة الإصبع بالنسبة ليا.

المستشعرات:

  1. مستشعر التقارب.
  2. مستشعر الجيروسكوب.
  3. مستشعر التسارع.
  4. مستشعر البوصلة.

أما عن القلم:

 فهو بلاستيكي ووزنه خفيف وبيشحن جوا جسم الموبايل، يعني مستحيل يفصل…

 ومن أهم مميزاته:

الكتابة على شاشة الموبايل وهي مطفية يعني مش لازم تشغله لو مستعجل وعايز تفكر نفسك بحاجة تقدر تعمل كل دا بسهولة وبسرعه.

تقدر تفعل وضع الترجمة الفورية فيه، وبمجرد ما تقف على الكلمة بيتم ترجمتها وطبعًا بالنسبة للي بيحتاجوا يترجموا كتير الأوبشن دا خيالي بالنسبالهم.

الزرار الموجود في القلم ليه نفس استخدامات الزرار الموجود في الهاند فري، فتقدر من خلاله تاخد صور، تفتح تطبيق معين، تتحكم في تشغيل الأغاني وهكذا…

الأوبشن الأحلى بقى إنك تقدر تقص جزء من الشاشة تكتب عليه حاجة وتبعتها لحد في نفس الوقت.

كدا تقريبًا عرفنا كل استخدامات القلم وأنت اللي تقدر تحدد هو بالنسبالك مهم أد إيه شكلًا ومضمونًا.

تقنيات الاتصال:

يدعم الموبايل وجود ميكروفون إضافي خاص بمنع الضوضاء وقت استخدامك للموبايل سوات وقت المكالمات أو التسجيل.

بييجي البلوتوث بالإصدار الخامس، مع دعمه لخاصيتي الـ A2DP.

يدعم الموبايل تحديد الموقع الجغرافية الـ GPS، بالإضافة إلى دعمه الـ A-GPS, GLONASS, GALILEO, BDS.

أما عن الواي فاي في موبايل سامسونج نوت 10 لايت فهو يدعمه بترددات الـ b/g/n/ac/a، كما يدعم الـ Dual-band, Wi-Fi Direct, hotspot.

يدعم الموبايل منفذ الـ 3.5 ملم الخاص بسماعات الاذن.

منفذ الـ USB من النوع الأحدث واللى هو الـ Type C.

الموبايل جاي بأحدث نظام تشغيل Android 10، مع واجهة سامسونج الأحدث الـ One UI 2.

ألوان الموبايل اللى بيتوفر بيها هي اللون الأبيض، الأسود، وكمان الأحمر.

يدعم الموبايل شبكات الـ 4G،والـ 3G، وكمان الـ 2G.

يدعم الموبايل امكانية تشغيل شريحتين اتصال في نفس الوقت، بالإضافة لوجود كارت ميموري تصل سعه إلى 512 جيجا بايت.

أداء موبايل سامسونج نوت 10 لايت:

أما عن الأداء فبييجي بمعالج سامسونج الرائد الـ Exynos 9810، بتكنولوجيا 10 نانو، مع معالج رسومي من نوع Mali-G72 MP18 فهو نفس المعالج الموجود في هاتفي الـ Note 9 والـ S10 Plus، فالمعالج يقدم أداء ممتاز بلا أدنى شك.

لكن بالنسبة للأداء الرسومي… ببجي اتشتغلت على Ultra HDR، واللعبة شغالة بكفاءة مش بتهنج زي النوت 9 مثلًا.

كول أوف ديوتي مش اللي كانت غريبة شوية واشتغلت على إعدادات جرافيك High، بس ودا كان غريب لأن المفروض المعالج بيشغلها عادي على إعدادات أعلى من كدا، ولكن بالرغم من كدا كانت شغالة كويس.

 

أداء موبايل سامسونج نوت 10 لايت
أداء موبايل سامسونج نوت 10 لايت

 

طبعًا المعالج بيقدم أداء قوي جدًا في كل حاجة مش بس الألعاب بس، كمان بيعالج الصور بشكل استثنائي وبيقدر يدير عمليات كتير مع بعض من غير مشاكل.

بطارية موبايل سامسونج نوت 10 لايت:

البطارية سعتها 4500 مللي أمبير، وبتدعم  الشحن السريع 25 وات، لكن هنا سامسونج معملتش حساب استهلاك المعالج العالي اللي كان محتاج بطارية أكبر من كدا شوية بصراحة، ولكن سرعة الشحن هنا تشفع لسعة البطارية القليلة لأنها بتشحن بسرعة جدًا.

 

سامسونج نوت 10 لايت:
بطارية موبايل سامسونج نوت 10 لايت

سعر موبايل سامسونج نوت 10 لايت:

السعر الحالي للموبايل هو 7600 جنيه مصري.

محتويات علبة موبايل سامسونج نوت 10 لايت:

  1. موبايل سامسونج نوت 10 لايت.
  2. شاحن بقوة 25 وات.
  3. كابل الـ USB من نوع Type C.
  4. كتيب التعليمات مع الضمان يشرح كيفية استخدام الموبايل.
  5. دبوس معدني لفتح مكان شريحتي الاتصال.
  6. هاند فري بمنفذ الـ 3.5 ملم.
  7. جراب لحماية ضهر الموبايل من أي خدوش.
  8. اسكرينة بلاستيك تم وضعها بشكل مسبق على شاشة الموبايل.
  9. منفذ OTG.
  10.  قلم الـ S Pen.

الرأي النهائي في موبايل سامسونج نوت 10 لايت:

بعد كل التوضيح لإمكانيات، ومواصفات الجهاز دا بالتفصيل نقدر نقول إن الجهاز كويس جدًا، ولكنه مش كويس في الفئة بتاعته أو أنا غير مقتنع بيه في الفئة دي كجهاز قوي، والشاشة بتاعته هي اللي شفعت ليه بين المنافسين في الفئة دي ولكن سامسونج نوت 10 لايت بيتميز بوجود القلم معاه واللي يعتبر شاذ شوية في الفئة دي، ودي كانت لمصلحة الجهاز ورفعت من مبيعاته بشكل ملحوظ جدًا، فلو أنت مش مهتم بالقلم بتاع سامسونج والحصول على تجربة بريميم بسعر قليل ويهمك الأداء أكتر فمنصحكش بالموبايل دا.

لو بتفكر في موبايل جديد ومحتار في الأجهزة الموجودة في السوق حاليًا فأنا بقترح عليك تنهي الحيرة دي عن طريق خدمة “اختار موبايلك” واللي بيقدمها موقعنا ناس فونــز  ودي خدمة متخصصة بنقدمهالك علشان نساعدك توصل للموبايل اللي بيناسبك من غير ما تشغل دماغك، كل اللي عليك هتضغط هنـــــــــــا… وتبعتلنا المواصفات اللي تحبها تكون موجودة في موبايلك، والميزانية بتاعتك وهنقترح عليك الأفضل بالنسبة ليك.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *