مراجعة موبايل Xiaomi Redmi Note 9

نبدأ مراجعة جديدة بموبايل جديد من شركة شاومي وهو موبايل Xiaomi Redmi Note 9…

في كل مرة تم فيها الإعلان عن موبايل جديد من شاومي في الفئة المتوسطة لازم يحصل صراع سواء كان الصراع على تسعير الموبايل، أو على الإمكانيات، وكمان الصراع على عيوب الموبايل…

والنهاردة زي ماتعودنا، إننا هناخد الموبايل ونعمله مراجعة كاملة هنشرح فيها كل التفاصيل اللى بتخص موبايل Xiaomi Redmi Note 9، ونعرف أيه هي مميزات وعيوب الموبايل، وهل فعلا يستحق أنك لما تفكر تشتري موبايل جديد تفكر فيه ولا لأ؟

دا اللى هنعرفه في نهاية المراجعة.

بس قبل أي حاجة وقبل ما ندخل في شرح الموبايل، وعلشان لا تحتاروا ولا تدوروا كتير تعالوا أعرفكم وأقدم لكم أجدد خدماتنا اللى مش هتلاقيها اتعملت عن حد تاني، وهي خدمة “اختار موبايلك”، واللي بيقدمها موقع نــاس فــونز الخدمة دي من خلالها تقدر تعرف كل حاجة عن أي موبايل أنت عاوزه، وكمان من خلالها تقدر تكتب مواصفات الموبايل اللى نفسك تشتريه، والإمكانية السعرية اللي أنت عاوزها، وإيه العيوب اللى مش هتقدر تشوفها في الموبايل وإحنا هنرشحلك أنسب موبايل ليك بكل المواصفات اللى أنت عاوزها تكون فيه، علشان نسهل عليك الموضوع.     

تصميم موبايل Xiaomi Redmi Note 9:

أولًا خامات الموبايل:

بالنسبة لتصميم الموبايل فهو بييجي بخامات من البلاستيك بالكامل سواء من الضهر أو الفريم.

ثانيًا التصميم الخارجي:

تصميم الكاميرات:

الموبايل بيييجي بـ 4 كاميرات خلفية مرصوصين في شكل مربع، بارز عن ضهر الموبايل ودا هيساعد كتير في تخريج الكاميرات لكن الجراب بيغطي بروز الكاميرات، بالإضافة لوجود فلاش أحادي من نوع ليد فلاش موجود خارج المربع.

أما بالنسبة للكاميرا الأمامية فهي موجودة في شكل ثقب أعلى يسار الشاشة.

 

 

أبعاد الموبايل: 

الموبايل بييجي بأبعاد 162.3×77.2×8.9 ملم.

مع وزن 199 جرام، ودا وزن خفيف يعني مش هيتعبك لو استخدمته لفترة طويلة من الوقت.

شاشة موبايل Xiaomi Redmi Note 9:

الشاشة بتيجي بشكل الثقب الـ Dot Display، وهو ثقب الكاميرا الأمامية اللي زي ماقولنا قبل كدا انه بييجي أعلى يسار الشاشة.

الشاشة بتيجي من نوع IPS LCD، بمساحة 6.53 إنش، بجودة الـ FHD+، بدقة 1080×2340 بكسل، بمعدل كثافة بكسلات 395 بكسل لكل إنش، بالإضافة لوجود طبقة حماية من نوع Corning Gorilla Glass من الجيل الخامس، كما تحتل الشاشة نسبة 83.5% من الواجهة الأمامية، وأيضًا تدعم الشاشة الأبعاد الجديدة بنسبة 19.5:9 لكي تعرض محتوى أكبر في الفيديوهات ولعب الألعاب، كما يمكنك إلغاء أزرار التحكم للاستمتاع بحجم الشاشة الكاملة، واستخدم الإيماءات بدلًا منها، بالإضافة لدعم الشاشة لوضع الـ Dark Mode، ودي طبعًا بقت ميزة كتير من الناس بقى بيدور عليها دلوقتي وخصوصًا بعد ما كتير من الناس استخدمها ولاقه إنها مريحة جدَا للعين، وميزة أن الشركة تواكب رغبة مستخدميها دا شئ مهم جدَا يجعلها تستحوذ على السوق في ظل المنافسة الشرسة بين كتير من الشركات.

 

 

نيجي لتجربة الشاشة واللى أول ميزة فيها هي جودة الشاشة الـ FHD+، وكمان مع ثقب السلفي واللي طبعًا تعتبر ميزة زي ما قولنا وخصوصًا إنها نازلة في فئة سعرية أقل من الـ 3000.

بالنسبة لدرجة سطوع الشاشة فهي مقبولة بالنسبة للفئة السعرية، لا هي عالية أوي ولا هي أوطي حاجة.

كاميرات Xiaomi Redmi Note 9:

الكاميرا الأمامية:

بتييجي بدقة 13 ميجا بكسل، وبفتحة عدسة F/2.3، كما تدعم الكاميرا الأمامية أكتر من وضع زي، البورتريه، ووضع AI beautify.

الكاميرا الخلفية في الموبايل كاميرا رباعية…

الكاميرا الأولى، تيجي بدقة 48 ميجا بكسل، بفتحة عدسة F/1.8، وهي الكاميرا الأساسية في الموبايل.

الكاميرا الثانية، بتيجي بدقة 8 ميجا بكسل، بفتحة عدسة F/2.2، ودي بتكون خاصة بالتصوير الواسع.

الكاميرا الثالثة، ودي دقتها 2 ميجا بكسل، بفتحة عدسة F/2.4، وهي الخاصة بتصوير الماكرو. 

الكاميرا الرابعة والأخيرة، دقتها 2 ميجا بكسل، وفتحة عدستها F/2.4، ودي خاصة بالعزل، وطبعًا مع فلاش أحادي من نوع ليد فلاش.

يدعم الموبايل تصوير الـ ،FHD بدقة 1080 بكسل، بمعدل التقاط 30 إطار في الثانية، وأيضًا التصوير الـ HD بدقة 720 بكسل، بمعدل التقاط 30 إطار.

كما يدعم التصوير الـ Slow Motion، بجودة الـ HD، بمعدل التقاط 120 إطار في الثانية.

بالنسبة لأداء الكاميرا فهو مرضي جدًا، الصراحة قدمت المتوقع منها وزيادة، يعني معالجة الصور بقت أحسن بكتير من الاصدار القديم، التفاصيل مظبوطة، الألوان كويسة.

وبالنسبة للعدسات الماكرو والعدسات التانية الموجودة في الكاميرات يعتبر الصراحة مفيش فيها أي جديد نقوله.

ندخل على كاميرا السلفي اللى محصلوش أي تطوير كبير عن الاصدار اللى قبله، يعني الكاميرا هنا هتطلعلك صور عادية جدًا.

البصمة والزيادات:

البصمة:

الجهاز يدعم مستشعر البصمة، وبتيجي بشكلها التقليدي في ضهر الموبايل، بس دا ميمنعش أن أداءها كويس جدًا وسريع، كمان بيدعم خاصية الـ face unlock من خلال الكاميرا الأمامية. 

يدعم الموبايل أيضًا عدة مستشعرات أخرى زي:

• مستشعر البوصلة.
• مستشعر التسارع.
• مستشعر التقارب.
• مستشعر الجيروسكوب الخاص بنظارات الواقع الافتراضي الـ VR.

الواي فاي بييجي بترددات الـ a/b/g/n/ac، وبيقدم أداء قوي جدًا، بالإضافة إلى دعم للـ Dual-band, Wi-Fi Direct, hotspot.

البلوتوث بييجي بإصدار الخامس، مع دعمه لخاصيتي الـ A2DP, LE.

الجهاز يدعم الـ GPS بالإضافة إلى دعمه لأنظمة ملاحة أخرى زي الـ  A-GPS, GLONASS, BDS, NavIC.

أما عن منفذ الـ USB، بييجي من النوع الحديث الـ Type C.

بالنسبة لنظام التشغيل، فهو من النوع الأحدث android 10 مع واجهة الـ MIUI 11.

يدعم الموبايل تشغيل شريحتين اتصال من نوع Nano Sim، كما يدعم إمكانية زيادة المساحة التخزينية عن طريق كارت ميموري بسعة تخزينية تصل إلى 512 جيجا بايت.

كما يدعم شبكات الجيل الثاني الـ 2G، والجيل الثالث الـ 3G، والجيل الرابع الـ 4G.

الموبايل يدعم  منفذ الـ 3.5 ملم الخاص بسماعات الأذن.

الموبايل متوفر باللون الأبيض، والرمادي، وكمان الأخضر.

أداء Xiaomi Redmi Note 9:

الموبايل بييجي بمعالج Helio G85، بتكنولوجيا 12 نانو.

أيضًا مع معالج رسومي من نوع Mali-G52 MC2، لكي يكون أول موبايل بييجي بالمعالج دا.

يتوفر الموبايل بأكتر من إصدار من الذاكرة الصلبة، والذاكرة العشوائية: 

الإصدار الأول، بييجي بذاكرة صلبة بسعة 64 جيجا بايت، من نوع eMMC 5.1، مع ذاكرة عشوائية من نوع LPDDR4X، بسعة 3 جيجا بايت.

بالنسبة للإصدار الثاني، فهو بييجي بذاكرة صلبة بسعة 128 جيجا بايت، من نوع eMMC 5.1، مع ذاكرة عشوائية من نوع LPDDR4X، بسعة 4 جيجا بايت.

 

 

بالنسبة لأداء الموبايل في الألعاب فهو هيؤدي أداء كويس في الألعاب الخفيفة، أما بالنسبة للألعاب التقيلة زي بابجي فهي بتشتغل على ihd، وتعتبر تجربة مقبولة، بس الأفضل إنك تنزلها على ميدم جرافك.

يعني أداء الموبايل في العموم كويس وخصوصًا في فئة أقل من فئة الـ 3000 جنية مصري، بس بردو تعتبر مقدمتش نقلة نوعية بالنسبة للموبايلات المنافسة.

بطارية موبايل Xiaomi Redmi Note 9:

سعة البطارية 5020 مللي أمبير، ودي سعة كبير وهايلة في استخدام الشخص سواء كان في الشغل أو لعب الألعاب على الموبايل، أيضًا مع دعمها للشحن بقوة 18 وات، وكمان بتدعم الشحن العكسي بقوة 9، والشاحن اللى بييجي في العلبة بقوة 22.5 وات.

 

محتويات علبة موبايل Xiaomi Redmi Note 9: 

1. موبايل Xiaomi Redmi Note 9.
2. إسكرينة لحماية الشاشة تم وضعها بشكل مسبق على شاشة الموبايل وبتكون من البلاستيك.
3. رأس الشاحن بقوة 22.5 وات.
4. كابل الـ USB نوع الـ Type C.
5. جراب ظهر شفاف لحماية الموبايل من الخرابيش.
6. دبوس معدني لفتح مكان شريحتي الاتصال، والكارت الميمورى.
7. كتيب التعليمات يوضح كيفية استخدام الموبايل.
8. كتيب ضمان.

  سعر موبايل Xiaomi Redmi Note 9:

الجهاز متوفر في الأسواق بسعر 2750 جنيه مصري، للنسخة 64 جيجا، مع 3 جيجا رام.

بالنسبة للنسخة الثانية 128، مع ذاكرة عشوائية 4، بيكون سعرها 3050 جنيه مصري.

الرأي النهائي في موبايل Xiaomi Redmi Note 9:

المميزات:

• يدعم الموبايل تشغيل شريحتين، وكارت ميموري في نفس الوقت.
• تصميم شيك و جديد من شاومي.
• البطارية تصمد لفترة طويلة خلال اليوم فهي بسعة كبيرة تصل إلى 5020 مللي أمبير.
• أداء قوي من الكاميرا الخلفية.
• معالج ميديا تيك الـ Helio G85 جيد في تشغيل الألعاب.
• شاشة بشكل ثقب أفضل من السابق مع دقة الـ FHD+ تؤدي أداء جيد.
• نظام التشغيل الأحدث من أندرويد 10، مع واجهة شاومي الـ MIUI 11.

العيوب:

• مفيش لمبة إشعارات.
• التصميم من البلاستيك للأسف.
• مفيش هاند فري.
• لا يدعم التصوير بجودة الـ 4K.
• لا يدعم راديو الـ FM.
• أداء كاميرا السلفي ضعيف.
• يتم شحن الموبايل في حوالي ساعتين ونصف.

الخلاصة:

زي ما متعودين في الخلاصة أننا بنقول رأينا النهائي عن الموبايل ككل، الصراحة احنا شايفين أن الموبايل بيقدم مميزات كويسة جدًاوحصوصًا في الفئة السعرية اللي نازل فيها الموبايل، سواء كان أداءه من حيث الكاميرا، أو بطارية الموبايل الشديدة، وتصميمة الجميل.

بس اللي معجبناش في الموبايل دا هو أداء كاميرا السيلفي وشوية العيوب اللي ذكرناهم فوق، بس نرجع ونقول دا كله مقبول بالنسبة للفئة السعرية

اللي نازل فيها موبايل Xiaomi Redmi Note 9.

بص بصة علي: سعر و مواصفات شاومي Redmi 10C