مراجعة موبايل Oppo reno 4 Pro
Oppo reno 4 Pro

 كل جهاز موبايل أيًا كان نوعه ليه مميزات وليه عيوب حسب كل شخص محتاج إيه من الجهاز اللي هيشتريه، والجهاز اللي هنتكلم عن مراجعته وتفاصيله النهاردة هو Oppo reno 4 pro، الجهاز دا يعتبر من أجهزة الفئة المتوسطة العُليا من Oppo بتصميمه المتميز وقدرة الشحن المتطورة والخرافية فيه بتميزه عن باقي إصدارات السلسلة، ودا اللي هنوضحه أكتر مع كل مواصفات، وإمكانيات الجهاز دا بالتفصيل؛ عشان تقدر تقرر قيمة الجهاز إيه بالنسبالك وتعرف الفرق بينه وبين الإصدارات المنافسة، والأخرى من نفس السلسلة…

قبل ما ندخل في المراجعة خليني أعرفك على خدمة “اختار موبايلك” واللى بيقدمها مــوقــع نـاس فــونــز، الخدمة دي عن طريقها تقدر إنك تدخل ميزانيتك وإمكانيات الموبايل اللي محتاجها وإحنا هنرشحلك موبايل مناسب ليك ونوفر عليك الحيرة اللي ممكن تقابلك في السوق اليومين دول.

نرجع لمراجعتنا…

تصميم موبايل Oppo reno 4 Pro:

 

تصميم موبايل Oppo reno 4 Pro
تصميم موبايل Oppo reno 4 Pro

 

أولًا الخامات:

الخامات في الجهاز دا من البلاستيك زيها زي إصدارات سلسلة الرينو السابقة كلها، ودا سبب بيميَز الجهاز بخفة وزنه أكتر من غيره وبيكون عملي أكتر ومش بيبصم وحتي لو استخدمته من غير cover فشكله هيفضل عصري ومميز.

ثانيا التصميم الخارجي: 

الضهر فيه بروز قوي للكاميرا الرباعية المترتبة بالطول في خط مستقيم. 

وأبعاده 160.2 ×73.2×7.7 ملم.

 مع وزن 161 جرام بس.

ودا يعتبر أخف وزن جهاز في سلسلة الرينو ودا بيمكَن المستخدم من حمله بإيد واحدة ولفترات طويلة من غير أي صعوبة.

مع وجود طبقة حماية على الشاشة من نوع Corning Gorilla Glass الجيل الخامس.

ويتوفر الجهاز باللون الأزرق المط، الأبيض، وباللون الأسود كمان.

شاشة موبايل Oppo reno 4 Pro: 

شاشة الجهاز دا من نوع Super AMOLED بمساحة 6.5 إنش بجودة الـ FHD+ بدقة 1080×2400 بكسل بمعدل كثافة بكسلات 402 بكسل لكل إنش.

الشاشة هنا كمان بتدعم معدل تحديث عالي 90 Hz، دا وبالإضافة لدعمها للـ HDR 10، وبتشغل نسبة 92.01% من الواجهة الأمامية للجهاز، بلس إن أبعاد العرض فيها بنسبة 20:9 ودا بيخلي محتوى العرض على الشاشة مميز فبيكون أكبر وأوضح من المعتاد.

الشاشة منحنية من الأطراف على هيئة الثقب ودا بيديها لمسة جمالية ساحرة…

بالإضافة إلى إنها بتقدم تجربة ممتازة من حيث الألوان والسطوع والحدة، فهي تدعم 16 مليون لون بالإضافة لخاصية اللمس المتعدد، يعني الجهاز بيضمنلك أداء شاشة عالي الجودة، مريح للعين، وبشكل أنيق متميز.

 

شاشة موبايل Oppo reno 4 Pro
شاشة موبايل Oppo reno 4 Pro

كاميرات موبايل Oppo reno 4 Pro:

الكاميرا الأمامية هنا دقتها 32 ميجا بكسل بفتحة عدسة F/2.4 K  وبتدعم أكتر من ميزة منها:

 تصوير الفيديوهات بجودة الـ FHD بدقة 1080 بكسل بمعدل التقاط 30 إطار في الثانية.

 التصوير بجودة الـ HD بدقة 720 بكسل بمعدل التقاط 30 إطار في الثانية.

تصوير الـ Slow Motion بجودة الـ FHD بدقة 1080 بكسل بمعدل التقاط 120 إطار في الثانية.

التصوير بجودة الـ HD بدقة 720 بكسل بمعدل التقاط 240 إطار في الثانية الواحدة.

أما عن الكاميرا الخلفية فهي تأتي بكاميرا رباعية حيث:

 الكاميرا الأولى: ودي الأعلى دقة، فدقتها 48 ميجا بكسل بفتحة عدسة F/1.7 بمستشعر من نوع Sony IMX 586 وهي طبعًا الكاميرا الأساسية للهاتف.

  الكاميرا الثانية: ودي دقتها 8 ميجا بكسل بفتحة عدسة F/2.2 بمستشعر من نوع Hynix Hi 846، ودي بتكون مختصة بالتصوير الواسع. 

 الكاميرا الثالثة: ودي بقا دقتها 2 ميجا بكسل بفتحة عدسة F/2.4، بس بمستشعر من نوع OmniVision OV02B10 وهي خاصة بالتصوير الماكرو.

 الكاميرا الرابعة: ودي آخر كاميرات الجهاز، دقتها 2 ميجا بكسل بفتحة عدسة F/2.4 بمستشعر من نوع GC02M1B، وهي الخاصة بالتصوير المونو وعمل العزل.

وطبعًا مع فلاش أحادي من نوع ليد فلاش كالعادة مع ميكروفون ثانوي خاص بالعزل.

كما تدعم الكاميرا الخلفية أيضًا مايلي:

تصوير الفيديوهات بجودة الـ 4K بدقة 2160 بكسل بمعدل التقاط 30 إطار في الثانية.

التصوير بجودة الـ FHD بدقة 1080 بكسل بمعدل التقاط 30 و 60 إطار في الثانية.

التصوير بجودة الـ HD بدقة 720 بكسل بمعدل التقاط 30 و 60 إطار في الثانية.

الكاميرا هنا بتقدم تجربة مميزة جدا، ووقت التجربة الفعلية كنت قاعد مندهش من جمال الصور وأداء الكاميرات ولكن لو هنقيس أداء الكاميرات ده بالنسبة لسعر الجهاز فهنا لازم نقف شوية!

 

كاميرات موبايل Oppo reno 4 Pro
كاميرات موبايل Oppo reno 4 Pro

 

الكاميرات زي ما قولت حلوة، بتقدم أداء عالي، ولكن هي هي نفس كاميرات الـ Reno 4 العادي!

أنت متخيل جهازين مختلفين في الفئة السعرية اختلاف كبير يقدمولك نفس الأداء مع زيادات خفيفة جدا في معالجة الألوان لصالح النسخة البرو في حاجة مهمة زي الكاميرات؟

طبعًا دي كارثة تقنية بكل المقاييس ولا يمكن أتقبلها.

البصمة والزيادات: 

البصمة هنا هي بصمة مدمجة بالشاشة، من أسرع المستشعرات اللي جربتها تقريبًا في البصمات المدفونة تحت الشاشة كانت البصمة دي، بييجي الجهاز كمان ببصمة الوجه اللي بقت أساسية دلوقتي في أي جهاز ومبقاش ينفع جهاز ينزل من غيرها.

يدعم أيضًا الجهاز عدة مستشعرات أخرى منها:

مستشعر التسارع 

مستشعر القرب

مستشعر البوصلة

ومستشعر الجيروسكوب، ودا بيكون خاص بتشغيل نظارات الواقع الافتراضي الـ VR.

منفذ الـ USB بييجي من نوع الـ Type C واللي بيدعم خاصية الـ OTG اللي بتشغل أي USB Driver على موبايلك.

الجهاز زي أي جهاز تاني في فئته بيدعم الـ GPS كما يدعم أنظمة الملاحة الأخرى مثل الـ A-GPS, GLONASS, GALILEO, BDS, QZSS, GNSS 

الموبايل بيدعم إمكانية تركيب شريحتين اتصال من نوع Nano Sim، بالإضافة لشبكات الجيل التاني الـ 2G والجيل التالت الـ 3G والجيل الرابع الـ 4G.

الموبايل يدعم الواي فاي بترددات الـ a/b/g/n/ac بالإضافة لدعم الـ Dual-band, Wi-Fi Direct, hotspot.

البلوتوث اللي موجود في الموبايل بييجي بإصدار 5.1، بالإضافة لدعم الـ A2DP, LE, aptX HD.

الموبايل جاي بنظام التشغيل الأحدث أندرويد 10 مع واجهة Oppo  الأحدث الـ Coloros 7.2.

صوت موبايل Oppo reno 4 Pro:

الجهاز بييجي بمنفذ الـ 3.5 ملم الخاص بالهاند فري ودي ميزة بالنسبة ليا لأن أنا دايمًا بفضل استخدام السماعات السلكية في بعض الحاجات زي الألعاب مثلا.

 الجهاز كمان بيدعم خاصية الـ Dolby Atmos علشان يقدملك تجربة صوتية أفضل من خلال سماعات الأذن.

العيب الوحيد اللي خلاني محسش بتجربة متكاملة مع الموبايل ده هو إنه مش بيدعم السماعات الستيريو.

أداء موبايل Oppo reno 4 Pro:

 

أداء موبايل Oppo reno 4 Pro
أداء موبايل Oppo reno 4 Pro

 

 معالج الجهاز دا من شركة كوالكوم من نوع Snapdragon 720G، ثماني النواة، تكنولوجيا 8 نانو.

طبعًا معالجات سناب دراجون معروفة بأدائها العملاق واللي بتقدر تعلي أي موبايل بييجي بيها، بس أنا بصراحة بشوف المعالج ده هنا كان محتاج يعلى شوية.

الجهاز بييجي بذاكرة صلبة بسعة 256 جيجابايت من نوع UFS 2.1 دا بالإضافة لذاكرة عشوائية بسعة 8 جيجابايت من نوع LPDDR 4x.

بالإضافة لإمكانية زيادة المساحة التخزينية عن طريق كارت ميموري حتى سعة 256 جيجابايت، يعني سعته التخزينية هتكون ضخمة جدًا.

يأتي أيضًا بنظام التشغيل الأحدث Android 10 مع واجهة Oppo الأحدث الـ Coloros 7.2.

ويدعم الجهاز الواي فاي بعيد المدى ودي ميزة مهمة جدًا وبتسهل على المستخدم حاجات كتير.

الأداء هنا لأول مرة ممكن نقول عليه كويس من أوبو في الفئة المتوسطة، وكويس جدا إن أوبو بدأت تستخدم معالجات سناب دراجون في الفئة دي، ويا ريت لو تفضل أوبو تستخدم المعالجات دي على طول في الموبايلات بتاعتها.

بطارية موبايل Oppo reno 4 Pro:

البطارية تأتي بسعة 4000 مللي أمبير مع دعمها للشحن السريع بقوة 65 واط عن طريق الـ Super VOOC 2، مما يُمكنك من شحن البطارية في وقت قصير جدًا يصل إلى حوالي 36 دقيقة فقط ودا يعتبر وقت قياسي جدًا.

أما بالنسبة لأداء البطارية في الألعاب فهو مش أد كدا، وللأسف الأداء عمومًا بيضعف عند تشغيل الـ 90 هرتز.

 

بطارية موبايل Oppo reno 4 Pro
بطارية موبايل Oppo reno 4 Pro

 

فتح علبة موبايل Oppo reno 4 Pro:

  • موبايل Oppo Reno 4 Pro.
  • سكرين تم وضعها بشكل مسبق على شاشة الموبايل.
  • رأس الشاحن ويأتي بقوة 65 وات0.
  • سلك USB من نوع Type C.
  • دبوس معدني.
  • سماعات الأذن وتأتي بمنفذ الـ 3.5 ملم.
  • كُتيب التعليمات يوضح كيفية إستخدام الموبايل.
  • ضمان الموبايل.
  • جراب ظهر لحماية الموبايل.

سعر موبايل Oppo reno 4 Pro: 

سعر الموبايل فى السوق المصري حاليا 8990 جنيه مصري.

الرأي النهائي في موبايل Oppo reno 4 Pro:

المميزات:

  • ذاكرة صلبة وعشوائية كبيرة أكثر من كافية لجميع ملفاتك وتطبيقاتك.
  • منفذ Type C مع دعمه للشحن السريع بقوة 65 وات.
  • شاشة ممتازة فهي Super AMOLED تقدم تجربة ممتازة من حيث الألوان والسطوع مع معدل تحديث عالي 90 هرتز و حواف قليلة و إنحناء بسيط في أطراف الشاشة.
  • يدعم تشغيل شريحتين وكارت ميموري في نفس الوقت بدون الاستغناء عن أحدهما .
  • تصميم جميل وعصري مع وزن خفيف وسمك أقل وهو أشيك بمراحل مقارنتا مع الـ Reno 3 Pro السابق.
  • كعادة أوبو البصمة المدمجة بالشاشة سريعة وعملية جدًا.

العيوب:

  • سلسلة الرينو مرتفعة السعر بصورة كبيرة.
  • السماعات الخارجية لا تأتي بصوت ستيريو.
  • لا يدعم التصوير الـ 4K بمعدل التقاط 60 إطار في الثانية  فقط بـ 30 إطار في الثانية.
  • يأتي الهاتف مصنوع من البلاستيك بالرغم من سعره المرتفع .
  • إذا تقبلنا فكرة استخدام معالج Snapdragon 720G في الرينو 4 العادي فلماذا تم إستخدامه هنا أيضاً .
  • تم الإستغناء عن كاميرا التقريب ولا نعلم لماذا فقد كانت تقدم أداء ممتاز في Oppo Reno 3 Pro السابق.
  • أداء ضعيف من البطارية خصوصًا مع تشغيل الـ 90 هرتز.

الخلاصة:

مفيش شك إن إمكانيات الجهاز ممتازة جدًا، لكن بالنسبة للسعر فهو غالي بزيادة وهو دا المعروف عن سلسلة الرينو عمومًا، لكن اللي يخليني أقول كدا أكتر مع الجهاز دا هو إن خامات الجهاز دا من البلاستيك، والمعالج مع إن أداءه جيد جدًا إلا إنه بالنسبة للسعر يعتبر مش أحسن حاجة…

 ودا طبعًا مقارنةً بالإصدارات المنافسة الموجودة في السوق سواء من Oppo أو من أي شركات منافسة. 

غير الكاميرا اللي عملالنا أزمة بصراحة في الأداء بتاعها، فلو أنت بتفكر تشتري الموبايل ده فأحنامش برشحلك خالص إنك تشتريه وبنصحك تشوف المنافسين في الفئة دي وتشوف كمان المنافسين في الفئات الأقل اللي ممكن تقدملك أداء مماثل أو أعلى.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *