كل جهاز موبايل أيًا كانت ماركته ليه مميزات وعيوب حسب كل شخص محتاج إيه من الجهاز اللي هيشتريه، والجهاز اللي هنتكلم عن مراجعته وتفاصيله النهاردة هو Oppo reno 3، فالجهاز دا جديد في الفئة المتوسطة من Oppo بسعة بطاريته الضخمة، وإضافات الكاميرا المبهرة، وتصميمه العصري…
اتميز عن غيره في سلسلة الـ Reno، ودا اللي هنوضحه أكتر مع كل مواصفات وإمكانيات الجهاز من حيث كل حاجة فيه بالتفصيل عشان تقدر تقرر الجهاز قيمته إيه بالنسبالك وتعرف الفرق بينه وبين الإصدارات من الشركات التانية ومن باقي إصدارات السلسلة.
قبل ما نبدأ المراجعة خلينا نعرفكوا على خدمة “اختار موبايلك“، واللى بيقدمها مــوقــع نـاس فــونــز، الخدمة دي تقدر من خلالها إنك تدخل ميزانيتك والإمكانيات اللي أنت محتاجها في الموبايل وإحنا هنرشحلك الموبايل المناسب ليك ونوفر عليك الحيرة اللي هتقابلك في بحر الموبايلات اللي بقى مالي السوق حاليًا كل اللي عليك تضغط هنـــــا…
نرجع لمراجعتنا…
تصميم موبايل Oppo reno 3:
أولًا خامات الموبايل:
كعادة سلسلة الـ Oppo reno خامات الجهاز دا من البلاستيك اللامع، ودي ميزتها خفة الوزن والشكل الحلو، طبعًا الجهاز بيكون معرض للبصمات والخربشة بشكل كبير للأسف ولكن بالنسبة لسعره ف ده مش هيضايقك أوي.
ثانيًا التصميم الخارجي:
أبعاد الجهاز دا 160.2×73.3×7.9 ملم مع وزن 170 جرام…
ودا وزن خفيف جدًا بالإضافة لكونه رفيع في الحجم، ودا بيمكن المستخدم من حمله بإيد واحدة بكل سهولة على عكس باقي الأجهزة المنافسة وطبعًا فيه بروز للكاميرات الخلفية في الضهر بالرغم من إن مكنش فيه بروز للكاميرات الخلفية في إصدار Oppo reno 2f.
وبالنسبة لألوان الإصدارات فالجهاز متوفر بألوان “الأزرق، الأسود، والأبيض”.
شاشة موبايل Oppo reno 3:
الشاشة في الجهاز دا من نوع AMOLED وبتيجي بمساحة 6.4 إنش بجودة الـ FHD+ بدقة 1080×2400 بكسل بمعدل كثافة بكسلات 411 بكسل لكل إنش.
أما أبعاد العرض فيها 20:9 ودا بيخلي عرض المحتوى عليها أوضح وأكبر، دا وبالإضافة إلى إنها تشغل مساحة 90.8% من الواجهة الأمامية للجهاز وتقدر تستخدم الإيماءات بدل أزرار التحكم عشان تستمتع بحجم الشاشة كامل ودي ميزة بشوفها مميزة شاشة جهازOppo reno 3عن شاشات أي إصدارات تانية.
بالإضافة إلى إن الشاشة هنا النوتش فيها من نوع الـ water drop notch، يعني نوتش بشكل قطرة الماء ودا ميزته إنه بيقلل حجم الحواف وبيدي شكل مميز وعصري للشاشة عند تشغيل الفيديوهات مثلا…
لكن البعض بيشوف إن وجود النوتش أيًا كان نوعه إضافة مش لطيفة للشاشة، يعني هي مسألة استخدام أو تجربة شخصية.
يعني نقدر نقول بالإضافة لإن الشاشات الـ Amoled من أجود أنواع الشاشات، في جودتها وأدائها وتشبع ألوانها بيكون فوق الممتاز، فهي تدعم 16 مليون لون ودا بيخلي أدائها في السطوع والحدة حقيقي أداء ساحر وتجربة الألوان في Oppo reno 3 حيوية وطبيعية وخلابة.
كاميرات موبايل Oppo reno 3:
الكاميرا الأمامية:
دقتها 44 ميجا بكسل وفتحة عدستها F/2.4، دا وبالإضافة لميزة دعمها للتصوير في الإضاءات الضعيفة من خلال وضع الـ Ultra Night Selfie.
الكاميرا الخلفية كاميرا رباعية حيث:
تأتي الكاميرا الأولى: بدقة 48 ميجا بكسل بفتحة عدسة F/1.8 وهي الكاميرا الأساسية وفعلًا أدائها أكتر من رائع، يمكن أدائها أحسن من كاميرا reno 3 pro.
الكاميرا الثانية: ودي دقتها 13 ميجا بكسل بفتحة عدسة F/2.4، ودي خاصة بالتقريب أو الزوم لحد 5X هايبرد بدقة نوعًا ما جيدة جدًا، و 20X ديجيتال مش الأفضل بس تظل ميزة كويسة.
الكاميرا الثالثة: دقتها أقل شوية 8 ميجا بكسل وفتحة عدسة F/2.2، وبتكون خاصة بالتصوير الواسع.
أما الكاميرا الرابعة: فدقتها 2 ميجا بكسل بفتحة عدسة F/2.4، وهي الكاميرا الخاصة بالتصوير الأبيض والأسود مع فلاش من نوع ليد فلاش.
بالإضافة لدعم الكاميرات الخلفية أيضًا التصوير الـ Ultra Dark Mode.
وبالنسبة لتصوير الفيديوهات:
فالكاميرا بتدعم تصوير الفيديوهات بجودة الـ 4K بدقة 2160 بكسل بمعدل التقاط 30 إطار في الثانية،
بالإضافة لدعمها التالي:
التصوير بجودة الـ FHD بدقة 1080 بكسل بمعدل التقاط 30 و 60 إطار في الثانية.
التصوير بجودة الـ HD بدقة 720 بكسل بمعدل التقاط 30 و 60 إطار في الثانية.
تصوير الفيديوهات الـ Ultra Steady Video 2.0 بجودة أفضل وتثبيت خرافي في تصوير الفيديوهات بدون اهتزاز، ودا عن طريق المثبت الإكتروني الـ EIS والعدسات فائقة الاتساع.
أداء تصوير الفيديوهات ساحرة وحرفيًا بجودة سينمائية أكاديمية بدون استخدام مؤثرات خارجية إضافية.
وطبعًا أداء الكاميرات الخلفية والأمامية بتقدملنا أداء تصوير ساحر خلاب وبدقة فائقة حتى في الإضاءات الضعيفة.
طبعًا الموبايل بيقدم تجربة شايفها مش بطالة في نقطة الكاميرات، السيلفي كانت تجربتها حلوة، الكاميرات الخلفية كان فيه أحسن من كدا ومش الأفضل في الفئة للأسف.
البصمة والزيادات:
بصمة الجهاز دا أسفل الشاشة مخفية، ومع الوزن الخفيف للجهاز وسُمكه الرفيع دي ميزة بتخلي البصمة سهلة سريعة وعملية أوي…
دا وبالإضافة كمان لدعمه خاصية الـ face unlock بصمة الوجه من خلال الكاميرا الأمامية طبعًا.
دعم الجهاز لمستشعرات أخرى زي:
- مستشعر التسارع
- مستشعر التقارب
- مستشعر البوصلة
- ومستشعر الجيروسكوب الخاص بتشغيل نظارات الواقع الافتراضي الـ VR.
الجهاز بيدعم ميزة display off clock لتسهيل عرض المعلومات على شاشة القفل وهي مغلقة، ودا تعويض عن عدم وجود لمبة إشعارات في الجهاز.
من مميزات Oppo reno 3 هنا وضع متعدد المستخدمين، ودا وضع بيحفظ جميع ملفاتك وبياناتك في أمان، بحيث إنه بيمكنك من إنك تعمل خمس مساحات مستقلة للمستخدمين، أساسيين، فرعيين، زوار…
وكل مساحة مستخدمة محمية بكلمة سر للحفاظ على الخصوصية.
الموبايل بيدعم إمكانية تركيب شريحتين اتصال من نوع Nano Sim.
الموبايل بيدعم شبكات الاتصال الجيل التاني الـ 2G والجيل التالت الـ 3G والجيل الرابع الـ 4G.
الواي فاي بييجي بترددات الـ a/b/g/n/ac بالإضافة لدعمه إلى الـ Dual-band, Wi-Fi Direct, hotspot.
بالنسبة لخاصية الـ GPS، فالموبايل بيدعمها بالإضافة لأنظمة الملاحة الأخرى زي الـ A-GPS, GLONASS, GALILEO, BDS.
الموبايل بيدعم البلوتوث بإصدار 5.0 مع دعمه لخاصيتي الـ A2DP, LE.
منفذ الـ USB من النوع الأحدث الـ Type C، بالإضافة لخاصية الـ OTG بالتالي تقدر تشغل أي USB Driver على موبايلك.
الموبايل بييجي بنظام تشغيل أندرويد 10 مع واجهة Oppo الأحدث الـ Coloros 7.
صوت موبايل Oppo reno 3:
الجهاز بيدعم منفذ الـ 3.5 ملم الخاص بسماعات الأذن.
الجهاز مدعوم بتقنية dolby atoms اللي بتقدم تجربة صوتية فوق الممتازة بنقاء bit/192kHz-24، السماعات الخارجية تدعم الصوت الاستريو والجهاز بيقدم أداء صوتي نقي وعميق وعالي جدًا.
أداء موبايل Oppo reno 3:
سعة الذاكرة الصلبة في الجهاز 128 جيجابايت من نوع UFS2.1 مع ذاكرة عشوائية بسعة 8 جيجابايت من نوع LPDD4X، دا وبالإضافة إلى إمكانية زيادة سعة المساحة عن طريق كارت ميموري.
الجهاز بيجي بأحدث نظام تشغيل android 10 مع واجهة Oppo الأحدث coloros 7.
أما بالنسبة للأداء، فمعالج الجهاز من نوع Helio p90 ثماني النواة من شركة ميديا تيك بتكنولوجيا 12 نانو مع معالج رسومي PowerVR GM 9446والمعالج هنا أداؤه بصراحة فوق الممتاز؛ لأنه أقوى بفرق بسيط من الـ Helio P70 الموجود في Oppo reno 2f.
طبعًا تجربة المعالج هي تجربة عبثية لو تمت مقارنته مع أجهزة تانية في نفس الفئة، المعالج ده صحيح كويس ولكن لا يرقى للفئة اللي هو فيها، يعني مثلا أدائه متواضع جدا في اللألعاب زي ببجي اللي بيشغلها على High أقصى حاجة وبتقطع منه كمان، ما بالك بقى لو جربت تشغل لعبة تقيلة زي فورت نايت مثلا!
بطارية موبايل Oppo reno 3 :
بطارية الجهاز دا ليثيوم بوليمر غير قابلة للإزالة سعتها 4025 مللي أمبير، وتدعم الشحن السريع بقوة 20 واط بتقنية الـ Vooc Flash Charge 3.0ودا بيمكن المستخدم من شحنها خلال 70 دقيقة ودي مدة شحن تعتبر سريعة نسبيًا.
بالإضافة لدعم الجهاز بعض المميزات اللي بتحافظ على استهلاك البطارية زي تحويل الشاشة للوضع الأسود.
عمر البطارية مقبول نوعًا ما وأداؤها كويس، وممكن تصمد ليومين أو أقل على حسب الاستخدام.
فتح علبة موبايل Oppo reno 3:
- موبايل Oppo Reno 3.
- سكرين تم وضعها بشكل مسبق على شاشة الموبايل.
- رأس الشاحن ويأتي بقوة 20 وات.
- كابل الـ USB من نوع Type C.
- دبوس معدني.
- سماعات الأذن وتأتي بمنفذ الـ 3.5 ملم.
- كُتيب التعليمات يوضح كيفية استخدام الهاتف.
- ضمان.
- جراب ظهر.
سعر موبايل Oppo reno 3:
سعرOppo reno 3 4490 جنيه مصري في السوق حاليا.
الرأي النهائي في موبايل Oppo reno 3:
المميزات:
- يدعم التصوير الـ 4K مع دعم وضع Ultra Steady المميز لزيادة تثبيت الفيديوهات ولكن بجودة 1080p.
- شاشة اموليد تقدم أداء ممتاز في تشبع الألوان.
- ذاكرة صلبة وعشوائية كبيرة تكفي لملفاتك وتطبيقاتك.
- استجابة مستشعر البصمة المدمج بالشاشة سريعة جداً وتعمل بشكل موثوق.
- يدعم تشغيل شريحتين اتصال وكارت الميموري في نفس الوقت.
- وزن الهاتف خفيف وسهل.
- الكاميرا السيلفي تقدم أداء جيد كما هو معتاد من أوبو فهي الأشهر في السيلفي.
- يدعم كاميرا مخصصة للزوم .
- البطارية تعمل لفترة طويلة وتدعم الشحن السريع بقوة 20 وات ويمكنك شحنها خلال 70 دقيقة.
العيوب:
- الكاميرا الخلفية بارزة عن ظهر الموبايل.
- خامات الهاتف من البلاستيك وكان يفضل أن يأتي من الزجاج مثل الـ Reno 2F السابق أو حتى مثل الأجهزة المنافسة.
- بالرغم من أن المعالج يقدم أداء جيد في المهام اليومية ولعب الألعاب ولكنه ليس الأقوى في فئته السعرية .
- شكل نوتش الشاشة قديم نسبيًا.
- يفتقد الهاتف إلى لمبة الاشعارات ولكن يدعم ميزة Display Off Clock لعرض ايقونات الاشعارات على الشاشة المغلقة .
- لا يعتبر الهاتف تطوير جذري عن الجيل القديم Reno 2F الا بوجود عدسة سيلفي أفضل وعدسة مخصصة للزوم ولكن مع تنازل كبير في الخامات التي أصبحت من البلاستيك بعد أن كانت من الزجاج .
الخلاصة:
طبعًا بعد ما وضحنا كل إمكانيات ومواصفات الجهاز تقريبًا مانقدرش ننكر إن المميزات فيه أكتر وتهم فئة كبيرة من المستخدمين، اللي بالنسبالهم هيكون جهاز فوق الممتاز للاستخدام بالنسبة لسعره الاقتصادي نوعًا ما بالإضافة لإن إضافات الكاميرا ميزت الإصدار دا وأنا شخصيًا برشحه عن reno 3 pro لأنه نفس المعالج مع اختلاف بسيط في الإمكانيات بس طبعًا بسعر أقل.
كتحليل عام: الموبايل ده كويس لكن غير مناسب لكذا فئة زي الجيمرز مثلًا أو الناس اللي بتستخدم الموبايل استخدام تقيل، هيكون كويس معاك لو بتدور على تصفح واستخدامات ومهام خفيفة على مدار اليوم.