أعلنت شركة ريلمي عن موبايلها الجديد ريلمي 6i اللي نزل بعد ريلمي 6، اللي بسبب ارتفاع سعره قررت الشركة إنها تنزل بموبايل تاني أقل في السعر وبإمكانيات نقدر نقول إنها ممتازة بالنسبة للسعر دا، وهو موبايل ريلمي 6i اللي هنتكلم عنه النهاردة…
هنلاحظ إن موبايل ريلمي 6i شبيه بموبايل ريلمي C3 في أكتر من حاجة منها، التصميم، والخامات، والأبعاد، والماسكة في الإيد…
يمكن الفرق بس إن موبايل ريلمي 6i بييجي بلون جديد وبيكمل شوية حاجات، ومميزات كانت مفقودة في موبايل ريلمي C3.
نقدر نقول إن الموبايل بصراحة من الموبايلات المحترمة لما تيجي تقارن إمكانياته وسعره مع المنافسين في الفئة السعرية دي!
قبل ما نكمل كلامنا ونبدأ في مراجعة الموبايل دا، تعالوا نتكلم عن خدمة حلوة جدًا بنقدمهالك وهي خدمة “اختار موبايلك” واللي بيقدمها موقــــع ناس فـــونـــز، الخدمة دي لأي حد بيفكر يشتري موبايل جديد أو بيرشح لحد تاني موبايل يناسب احتياجاته…
باختصار كل اللي عليك، هو إنك تعرفنا بالتفصيل إيه المميزات اللي عايزها في الموبايل بتاعك وإيه العيوب اللي مش حاببها تكون فيه وتحدد لنا كمان رينج السعر للموبايل اللي محتاجه؛ واحنا هنرشحلك الاختيار الأنسب ليك.
بس كده ونرجع نكمل كلامنا عن موبايل النهاردة وهو ريلمي 6i.
تصميم موبايل ريلمي 6i:
أولًا خامات الموبايل:
الموبايل بييجي بخامات من بلاستيك مط سواء من الضهر، أو في الفريم، وهتلاحظ وجود خطوط بالطول في ضهر الموبايل.
الموبايل كشكل وتصميم ممكن يكون كويس لبعض الأشخاص، بس شخصيًا التصميم دا مش عاجبنا أوي.
بالمناسبة، ريلمي بتقول إن الموبايل دا مضاد للخدوش وصعب يتخدش.
التصميم الخارجي:
تصميم الكاميرات:
- كاميرا السيلفي على هيئة نوتش بحرف الـ U في نص الشاشة.
- الكاميرات الخلفية الأربعة فوق بعض في نافذة بشكل طولي كدا، وهنتكلم عنهم بالتفصيل في باقي المراجعة…
أبعاد الموبايل:
- الموبايل بييجي بأبعاد 164.4x75x8.95 ملم.
- وزن الجهاز 195 جرام، يعني وزنه معقول جدًا ومتوزع كويس ومش هيتعبك وأنت ماسكه في إيدك خالص.
شاشة موبايل ريلمي 6i:
- شاشة ريلمي 6i من نوع الـ IPS LCD، وعليها طبقة حماية من نوع Corning Gorilla Glass الجيل الثالث، وبشكر ريلمي على إنها حريصة جدًا على توفير طبقة حماية للشاشة في معظم أجهزتها، غير إن الشاشة بييجي معاها اسكرينة كمان.
- تصميم الشاشة جاي على هيئة الـ Water Drop.
- مساحة الشاشة 6.5 إنش، وبتمثل حوالي 89.8% من حجم الواجهة الأمامية للموبايل.
- الشاشة بتيجي بجودة الـ HD+ بدقة 720×1600 بكسل، بمعدل كثافة 269 بكسل لكل إنش.
- ميزة لطيفة في الشاشة هنا، هي إنها بتدعم وضع الـ Eye Care Mode، الوضع دا بيساعدك تتجنب أي أشعة ضارة على عينك، خصوصًا لو بتستخدم الموبايل لفترات طويلة بالذات بالليل.
الشاشة فيها نوتش بشكل حرف الـ U لكاميرا السيلفي، والحواف السفلية هنلاحظ إنها كبيرة شوية.
للأسف الشاشة مش موجود فيها لمبة إشعارات، دا مش عيب كبير وممكن يكون الموضوع مش فارق مع كتير من الناس.
عندي تعليق على اللمس في الشاشة، وهو تقل استجابة زر المسح، واللي أحيانًا بيعلق.
ألوان الشاشة مش أحسن حاجة لإنها بجودة الـ HD+، بس مقبولة نوعًا ما، وكنت أتمنى لو ييجي بشاشة FHD+ خصوصًا إن فيه موبايلات تانية في نفس الفئة السعرية دي بشاشة FHD+.
كاميرات موبايل ريلمي 6i:
الكاميرا الأمامية:
- كاميرا السيلفي بدقة 16 ميجا بكسل بفتحة عدسة F/2.0.
بالنسبة لأداء كاميرا السيلفي، فهو كويس جدًا في الفئة دي، أينعم الصور فيها نعومة شوية، بس نرجع نقول إن أدائها كويس في تصوير الفيديوهات، وعمل العزل.
الكاميرا الخلفية:
الموبايل بييجي بكاميرا خلفية رباعية:
- الكاميرا الأولى: دي الكاميرا الأساسية في الموبايل بدقة 48 ميجا بكسل، بفتحة عدسة F/1.8.
- الكاميرا التانية: بدقة 8 ميجا بكسل بفتحة عدسة F/2.3، ودي الكاميرا الخاصة بالـ Ultra wide أو التصوير الواسع.
- الكاميرا التالتة: بدقة 2 ميجا بكسل، وبفتحة عدسة F/2.4، ودي كاميرا الماكرو.
- الكاميرا الرابعة: بدقة 2 ميجا بكسل، وبفتحة عدسة F/2.4، ودي الكاميرا الخاصة بعمل العزل، وتصوير البورتريه، بالإضافة إلى فلاش أحادي من نوع ليد فلاش.
تصوير الفيديوهات بيكون 4K بجودة الـ FHD، وبدقة 1080 بكسل بمعدل التقاط 30 فريم في الثانية، وكمان بيدعم الجهاز تصوير الـ HD بدقة 720 بكسل، بمعدل التقاط 30 فريم في الثانية.
كمان تقدر تصور فيديو slow motion، بس هتلاحظ إن عدد الفريمات قليل جدًا، وبالتالي الأداء في الفيديو هيكون مش حلو خالص.
عمومًا شركة ريلمي من الشركات اللي تقدر تاخد منها كاميرات محترمة وأنت مطمن، وعلشان كدا الكاميرات في ريلمي 6i إجمالًا نقدر نقول إنها كويسة، والمثبت البصري كويس، وبتطلع صور حلوة نوعًا ما.
البصمة والزيادات:
البصمة:
بالنسبة لجزيئة الأمان، بنلاقي إن الموبايل بيدعم مستشعر البصمة في الضهر، بالإضافة إلى دعمه خاصية الـ Face Unlock.
تجربة البصمة كويسة جدًا، وبتستجيب بسهولة وكذلك الـ Face Unlock برده، سريعة ومفيش عليها أي تعليق سلبي.
المستشعرات:
- مستشعر التسارع.
- مستشعر التقارب.
- مستشعر البوصلة.
- مستشعر الجيروسكوب.
الزيادات:
- الموبايل فيه FM راديو، ودي حاجة كويسة للناس اللي بتحب تستخدمه.
- الموبايل بيدعم شبكات الـ 2G، والـ 3G، والـ 4G.
- فيه خاصية حلوة أوي في الموبايل وهي الـ GPS، يعني لو بتحتاج الخاصية دي في شغل أو غيره، ريلمي 6i هيساعدك فيها.
- الواي فاي بييجي بتردد الـ b/g/n، غير إن الموبايل بيدعم الـ Dual-band, Wi-Fi Direct, hotspot.
- الموبايل بياخد شريحتين اتصال، مع كارت ذاكرة خارجي في منفذ منفصل.
كمان الموبايل نزل بأكتر من لون منهم: اللون الأبيض، والأخضر.
صوت الموبايل كويس أوي وواضح ومُجسم، ومفيش عليه أي تعليق سلبي.
الموبايل مزود بمدخل الـ 3.5 ملم الخاص بسماعات الأذن، بس للأسف مفيش سماعات أذن بتيجي مع الموبايل، وهنا هتكون مضطر إلى إنك تشتري أنت السماعات.
حاجة تانية وتُعتبر عيب في الموبايل للأسف، وهي إن الموبايل مش موجود فيه مايك ثانوي، لعزل الضوضاء وأي صوت جنبك لو كنت في شارع أو في مكان زحمة.
أداء موبايل ريلمي 6i:
- معالج الموبايل من نوع MediaTek Helio G80 بتكنولوجيا 12 نانو، وهو معالج ثماني النواة.
- معالج رسومي من نوع Mali-G52 2EEMC2، وبكدا يكون موبايل ريلمي 6i هو أول موبايل ييجي بالمعالج دا.
- النسخة الأولى بذاكرة داخلية سعتها 64 جيجا بايت، مع رامات 3 جيجا بايت.
- النسخة التانية بذاكرة داخلية سعتها 128 جيجا بايت، مع رامات 3 جيجا بايت.
- نوع الذاكرة الداخلية eMMC 5.1، والذاكرة العشوائية من نوع LPDDR4x، ودا في النسختين من الموبايل.
تقدر تزود مساحة الذاكرة الداخلية لحد 256 جيجا بايت بالكارت الميموري.
معالج موبايل ريلمي 6i هو النقطة الكويسة في الموبايل، ودا معالج جديد وأول مرة ينزل لموبايلات الفئة الاقتصادية دي.
أداء المعالج في الألعاب كويس جدًا وبيشغل الألعاب على أعلى Graphic، أداؤه قوي وبيكون موجود أصلًا في موبايلات في فئة الـ 5000 جنيه.
مش هتلاقي تقطيعات من الجهاز سواء في الألعاب، أو أثناء الاستخدام العادي وهنا نقدر نقول لو أنت جيمر، فالموبايل ده هيبسطك أوي من ناحية الأداء.
بطارية موبايل ريلمي 6i:
- بطارية ريلمي 6i حجمها 5000 مللي أمبير وده طبعًا حجم كبير في الفئة السعرية دي.
- البطارية بتدعم الشحن السريع مع شاحن قوته 18 وات، والـ USB بييجي من النوع الأحدث وهو الـ Type – C.
- وميزة كويسة جدًا في الموبايل دا وهي وجود خاصية الشحن العكسي في بطارية الجهاز، يعني تقدر تستخدم الموبايل كـ باور بانك وتشحن بيه أي حاجة تانية.
بطارية ريلمي 6i أحد أهم الأسباب اللي تخليك تشتري الموبايل، بطارية ضخمة 5000 مللي أمبير في فئة الـ 3000 جنيه، نترجم الكلام دا بإن البطارية هتقدر تفضل معاك حوالي 10 ساعات استخدام، وترجع تشحنها في ساعة و10 دقايق، أو ساعة 15 دقيقة تقريبًا بس…
يعني تقضيها لعب جيمز بقى وشغل واستخدام براحتك طول اليوم، وبعدين تشحنها في وقت قليل زي ما وضحنا، يعني بطارية جبارة ودي ميزة قوية جدًا في الموبايل.
محتويات علبة موبايل ريلمي 6i:
إسكرينة لحماية الشاشة تم وضعها بشكل مسبق على شاشة الموبايل وبتكون من البلاستيك.
رأس الشاحن بقوة 18 وات.
كابل الـ USB نوع الـ Type C.
جراب ظهر شفاف لحماية الموبايل من الخرابيش.
دبوس معدني.
كتيب التعليمات يوضح كيفية إستخدام الموبايل.
سعر موبايل ريلمي 6i:
النسخة الأولى بمساحة تخزين 64 جيجا مع 3 جيجا رام، بسعر 2850 جنيه.
النسخة التانية بمساحة تخزين 128 جيجا مع 4 جيجا رام، بسعر 3200 جنيه.
الرأي النهائي في موبايل ريلمي 6i:
المميزات:
- الموبايل بييجي بنظام التشغيل الأحدث.
- ذاكرة صلبة وعشوائية أكثر من كافية لجميع تطبيقاتك وملفاتك.
- يدعم تشغيل شريحتين وكارت ميموري في نفس الوقت.
- البطارية تعمل لفترة طويلة خلال اليوم بفضل سعتها الكبيرة، مع دعمها للشحن السريع بقوة 18 وات.
- مستشعر البصمة في ظهر الموبايل يعمل بشكل جيد من حيث سرعة الاستجابة.
- كاميرا خلفية تقدم اداء جيد في تصوير الصور.
- أداء قوي بفضل معالج ميديا تيك الـ G80، واللي هيكون أكثر من ممتاز في الألعاب.
العيوب:
- الحافة السفلية للشاشة ما زالت كبيرة.
- مفيش هاند فري.
- للأسف الشاشة بدقة HD+ بس.
- مفيش لمبة إشعارات.
- لا يدعم ميكروفون ثانوي لعزل ضوضاء الصوت.
- لا يدعم تصوير فيديوهات بجودة 4k.
الخلاصة:
ريلمي 6i موبايل محترم مفيهوش نقاش؛ لإن عندك مميزات كتيرة في الموبايل، أهمهم طبعًا البطارية القوية، والمعالج الجبار من ميديا تيك وأخيرًا، الكاميرات اللي بتعمل معالجة حلوة للصور نوعًا ما.
في النهاية، احنا شايفين إن موبايل بالإمكانيات دي وبالسعر دا فرصة كويسة جدًا.
وننصح باختيار ريلمي 6i لأي شخص بيفكر يشتري موبايل في فئة الـ 3000 جنيه.