خلونا نبدأ مراجعة النهاردة مع موبايل realme C12…
شركة realme توسعت في إصداراتها من سلسلة الـ C، وهي سلسلة كل إصداراتها من الفئة الإقتصادية المتوسطة، وجهاز realme C12، اللي هنتكلم عنه إنهارده قدر يتميز عن إصدارات كتير منافسة ليه…
الجهاز بييجي ببطارية ضخمة، وأداء كاميراته الممتازة خلاه ورقة رابحة لشركته وعشان كدا هنعمل مراجعة شاملة عن كل إمكانيات ومواصفات الجهاز عشان تقدر تفرق بين الإصدار دا وأي إصدار مشابه ليه من حيث السعر والمواصفات، لكن قبلها خلونا نفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك“، واللي بيقدمها موقــــع ناس فـــونـــز، ودي خدمة هتساعدك في إنك تختار الجهاز المناسب ليك، عن طريق ترشيحاتنا، واللي بتكون بِناءًا على طلبك واللي أنت عايزه ومحتاجه في جهازك؛ ودا علشان تكون ببساطة قادر تختار الجهاز اللي اتعمل لإشباع احتياجاتك ويتناسب مع قدرتك الشرائية من غير أي تردد.
ويلا نبدأ مراجعتنا بتصميم الموبايل…
تصميم موبايل realme C12:
أولًا خامات الموبايل:
الخامات في الجهاز كله سواء ضهر أو فريم من البلاستيك العالي الجودة واللي بيتميز بخشونته، يعني لو هتستخدم الجهاز من غير Cover مش هيبصم ولا يتخدش معاك وكمان هو مقاوم للأتربة والمياه لكن اللي هي على هيئة رذاذ.
ثانيًا التصميم الخارجي:
تصميم الكاميرات:
كاميرات الموبايل الخلفية 3 كاميرات في شكل مربع بارز نوعًا ما عن ضهر الموبايل، بالإضافة لوجود فلاش أحادي من نوع ليد فلاش موجود في نفس المربع.
أما بالنسبة للكاميرا الأمامية في موجودة في شكل نوتش صغير أعلى الشاشة.
أبعاد الموبايل:
- الجهاز بيجي بأبعاد 164.5×75.9×9.8 ملم.
- وزن الجهاز 209 جرام.
مع وجود طبقة حماية من نوع Corning Gorilla Glass الجيل التالت، الجهاز متوفر بألوان الأزرق، والأحمر، بتصميم أنيق وعملي.
شاشة موبايل realme C12:
شاشة realme C12 بتيجي من نوع IPS LCD، على شكل النوتش ال water drop notch، ودا نوتش مابياخدش من حيز الشاشة لإنه بحجم قطرة الماء.
مساحة الشاشة هنا 6.5 إنش بجودة الـ HD، وبدقة 720×1600 بكسل، يعني بمعدل كثافة بكسلات 270 بكسل لكل إنش، وبتشغل نسبة 88.7% من الواجهة الأمامية للجهاز.، بالإضافة إلى دعمها أبعاد العرض بنسبة 19:5:9.
الشاشة كتصميم تقليدي شوية، لكن كأداء فالشاشة تقييمها جيد جدًا، دا لأن سطوعها وتشبع الألوان فيها حتى تحت أشعة الشمس المباشرة هايل، ومش هتقابل أي مشاكل فيها…
وطبًعا مع حجمها الكبير وسرعة أدائه، وسلاستها هتقدملك تجربة مشاهدة لأي محتوى بشكل ممتع ومضمون الجودة والدقة.
كاميرات موبايل realme C12:
الكاميرا الأمامية:
بتيجي بدقة 5 ميجا بكسل، بفتحة عدسة F/2.0.
ثانيًا الكاميرا الخلفية وهي كاميرا ثلاثية حيث:
الكاميرا الأولى، بتيجي بدقة 13 ميجا بكسل، وفتحة عدستها F/2.2، وهي الكاميرا الأساسية في الموبايل.
أما عن الكاميرا الثانية، ودي بتيجي بدقة 2 ميجا بكسل، وفتحة عدسة F/2.4، وبتكون خاصة بالتصوير الأبيض، والاسود.
الكاميرا الثالثة والأخيرة، ودقتها 2 ميجا بكسل، بفتحة عدسة F/2.4، وهي الخاصة بالماكرو.
بالإضافة لوجود فلاش أحادي من نوع ليد فلاش .
الكاميرا بتدعم تصوير الفيديوهات بجودة الـ FHD، وبدقة 1080 بكسل، بمعدل التقاط 30 إطار في الثانية.
بالإضافة لدعمه التصوير بجودة الـ HD، بدقة 720 بكسل، بمعدل التقاط 30 إطار في الثانية.
نقدر نقول هنا إن أداء الكاميرات في التصوير العادي حقيقي مبهر بالنسبة لجهاز من الفئة السعرية دي، فتوازن الألوان والتفاصيل والدقة في الصور بتكون حرفيًا فائقة…
ودا طبعًا بالنسبة للتصوير في الإضاءات العالية النهارية، أما في الإضاءات المنخفضة فهتلاقي الكاميرا بتكافح عشان جودة وتفاصيل الصور ماتقلش، لكن في المقابل الصور بتطلع ناعمة جدًا أو تحس فيها بهتان خفيف لكن بجودة حلوة بردو هتعجبك.
وكمان أداء الكاميرا في تصوير الفيديوهات جيد جدًا لأنه بيكون بجودة عالية FHD، ودقة فائقة الوضوح.
البصمة والزيادات:
البصمة:
الجهاز بيدعم مستشعر البصمة وبتيجي في ضهر الجهاز، ودا كالعادة مكان عملي وسريع ليها، بالإضافة لدعمه لخاصية الـ face unlock عن طريق الكاميرا الأمامية.
يدعم الجهاز أيضًا عدة مستشعرات أخرى زي:
- مستشعر التقارب.
- مستشعر البوصلة.
- مستشعر التسارع.
الجهاز بيمكنك من تشغيل شريحتين إتصال، وكارت ميموري في نفس الوقت.
منفذ الـ USB بييجي من النوع القديم الـ Micro USB، مع دعمه لخاصية الـ OTG.
دعم الجهاز لشبكات الاتصال ال 4G ،3G ،2G.
وبالنسبة لترددات الواي فاي فهو بيدعمها بترددات الـ b/g/n، ودا بجانب دعمه إلى خاصية الـ hotspot، لكن بعد تجربة الجهاز اكتشفنا إن أداء الواي فاي فيه بطئ ومش أحسن حاجة.
أما البلوتوث فبييجي بإصدار 5.0، مع دعمه للـ A2DP ،LE ،aptX.
الجهاز بيدعم الـ GPS وبيكون سريع ودقيق، بجانب دعمه لأنظمة ملاحة تانية زي الـ A-GPS ،GLONASS ،BDS.
الجهاز لا يحتوي على لمبة إشعارات، ولا حتى بديل ليها، لكن بالنسبة لكل أجهزة الفئة دي بقا الطبيعي عدم وجودها.
نظام التشغيل في الجهاز هو الأحدث الـ Android 10، مع واجهة ريلمي الـ Realme UI.
الجهاز بيدعم منفذ 3.5 ملم الخاص بسماعات الأذن، لكن مبيجيش مع الموبايل في العلبة معاه سماعات أذن كعادة أغلب إصدارات سلسلة الـ C من realme.
الجهاز كمان مبيدعمش الميكروفون الثانوي الخاص بعزل الضوضاء والدوشة، ودي حاجة بتقلل جدًا من جودة الصوت في المكالمات وتسجيل الفيديوهات.
وبم إن أداء الصوت للجهاز مش عالي بس جودته كويسة، فنقدر نقول إن تجربة الصوت بشكل عام في realme C12 مش أحسن حاجة لكنها مُرضية إلى حد ما.
أداء موبايل realme C12:
سعة الذاكرة الصلبة للجهاز 64 جيجا بايت، وهي من نوع eMMC 5.1، مع ذاكرة عشوائية بسعة 3 جيجا رام من نوع LPDDR4X.
بالإضافة لدعمه لإمكانية زيادة السعة التخزينية عن طريق كارت ميموري في منفذ منفصل.
أما بقا بالنسبة للأداء فالمعالج ثماني النواه من شركة ميديا تيك، من نوع Helio G35، وبييجي بتكنولوجيا الـ 12 نانو مع معالج رسومي PowerVR GE8320.
المعالج في الاستخدامات اليومية الخفيفة سلس وسريع جدًا، لكنه مش أقوي حاجة بالنسبة لإصدارات الفئة المتوسطة خصوصًا إن أداءه في الألعاب التقيلة إلى حدٍ ما كويس، فلعبة زي بابجي مثلًا هتقدر تلعبها بأداء حلو أوي بس مش أحسن حاجة، لأن افتقاد الجهاز لمستشعر الجيروسكوب هيخلي اللعبة تقطع معاك ويقلل من جودة أدائها.
بطارية موبايل realme C12:
البطارية سعتها ضخمة جدًا 6000 مللي أمبير، وبتدعم الشحن السريع بقوة 10 وات.
بس إحدى أهم مميزات البطارية هنا، هي دعمها لخاصية الشحن العكسي “reverse charging” عن طريق الـ OTG، اللي بتمكنك من استخدام الجهاز كباور بانك أو كمصدر للطاقة.
بالإضافة لإن إستهلاك المعالج للبطارية استهلاك بسيط جدًا بيحافظ على طاقتها خلال فترة طويلة من اليوم.
فتح علبة موبايل realme C12:
موبايل realme C12.
اسكرينة تم وضعها بشكل مسبق ع الجهاز وبتكون من البلاستيك.
رأس شاحن بقوة 10 وات.
كابل الـ USB L من نوع Micro USB.
دبوس معدني لفتح مكان الشريحة.
كتيب التعليمات والضمان.
سعر موبايل realme C12:
سعر الجهاز 2390 جنيه مصري، أي ما يعادل 155 دولار أمريكي.
الرأي النهائي في موبايل realme C12:
المميزات:
يدعم الموبايل تشغيل شريحتين، وكارت ميموري في نفس الوقت.
بطارية كبيرة جدًا تصمد معابلك لفتة طويلة.
يدعم مستشعر البصمة.
أحدث نظام تشغيل متوفر حالياً، مع واجهة ريلمي المطورة مباشرةً من العلبة.
شاشة كبيرة تقدم أداء مرضي بالإضافة لوجود طبقة حامية.
العيوب:
مفيش لمبة للأشعارات.
قوت الشحن ضعيفة.
لا يدعم الميكروفون الثانوي الخاص بعزل الضوضاء أثناء استخدامك للموبايل بوجه عام.
لا تحتوى علبة الموبايل على سماعات الاذن أو جراب لحماية الموبايل.
منفذ الـ USB بييجي من النوع القديم الـ Micro USB.
الخلاصة:
الجهاز دا بعد ماوضحنا كل إمكانياته وصفاته عرفنا إن مافيش فرق كبير بينه وبين كل إصدارات سلسلة الـ C من realme، تقريبًا كل إصدارات السلسلة عبارة عن تكرار للمواصفات مع تغيرات طفيفة في إمكانيات الجهاز وتصميمه الخارجي…
لكن بشكل عام مانقدرش ننكر إن أداء realme C12 متناسب جدًا مع سعره الاقتصادي، وهيكون مُرضي جدًا لكل المستخدمين من كل الفئات.