شركة realme أطلقت إصدار جديد بسعر من أغلى أسعار كل إصداراتها الجديدة، وهو Raelme x3 super zoom، ونقدر نقول إن نقطة قوة الجهاز ده جاية من اسمة، كمان الجهاز دا مبني على إصدار الـ realme 6 pro، وبضعف سعره تقريبًا، فهل إمكانياته جبارة للدرجة اللي تخليه أغلى إصدارات الشركة وهل فيه توازن ما بين الإمكانيات اللي فيه وما بين سعره!
دا اللي هنعرفه من خلال مراجعتنا الشاملة للجهاز كالعادة…
لكن قبل المراجعة خلوني أفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك” واللي بيقدمها موقــــع ناس فـــونـــز، ودي خدمة هتساعدك في إنك تختار الجهاز المناسب ليك، عن طريق ترشيحاتنا واللي بتكون بِناءًا على طلبك واللي أنت محتاجه يكون في جهازك؛ وده علشان تكون ببساطة قادر تختار الجهاز اللي اتعمل لإشباع احتياجاتك ويتناسب مع قدرتك الشرائية من غير أي تردد.
ويلا نبدأ مراجعتنا بتصميم الموبايل…
تصميم موبايل Raelme x3 super zoom:
أولًا الخامات:
- خامات الجهاز هنا من الزجاج في ضهر الموبايل، مع فريم من البلاستيك، وهي نفس خامات وفريم الـ realme 6 pro تقريبًا ومفيش فرق واضح بينهم.
ثانيًا التصميم الخارجي:
- الجهاز بييجي بأبعاد 163.8×75.8×8.9 ملم.
- وزن الجهاز 202 جرام، بالإضافة إلى توافر طبقة حماية من نوع Corning Gorilla Glass الجيل الخامس على شاشة الجهاز.
مع وجود بروز في الضهر، للكاميرات الخلفية اللي بتيجي، علي شكل بيضاوي، هو تصميم أنيق للجهاز لكن مش مختلف كتير عن باقي الإصدارات السابقة.
والجهاز متوفر بألوان الأبيض والأزرق.
شاشة موبايل Raelme x3 super zoom:
- الشاشة هنا من نوع IPS LCD، بتيجي بشكل الثقب المزدوج.
- مساحة الشاشة 6.6 إنش بجودة الـ FHD ودقة 1080×2400 بكسل، بمعدل كثافة بكسلات 399 بكسل لكل إنش.
- أبعاد العرض في الشاشة 20:9 مع دعمها لمعدل التحديث الـ 120Hz ويمكنك التنقل إلى الـ 60Hz؛ للحفاظ على استهلاك البطارية.
- الشاشة بتشغل نسبة 90.5% من الواجهة الأمامية ودي نسبة كبيرة جدًا،
بالإضافة إلى أنها بتمكنك من استخدام الإيماءات للحصول على أفضل تجربة استخدام بأكبر مساحة ممكنة للشاشة.
نوع الشاشة مع شكل الحواف السفلية مش أحسن حاجة بالنسبة لجهاز من الفئة السعرية دي، لكن يشفعلها التردد العالي جدًا اللي بيخلي تجربة المشاهدة خيالية فعًلا ومتناغمة أكتر مع البروسيسور، وحقيقي أداء الشاشة هنا من أهم وأكبر مميزات الجهاز دا، الألوان تكاد تكون طبيعية جدًا.
كاميرات موبايل Raelme x3 super zoom:
أولًا الكاميرا الأمامية وهي كاميرا ثنائية حيث:
الكاميرا الأولى:
بتييجي بدقة 32 ميجا بكسل وبفتحة عدسة F/2.5، بمستشعر من نوع Sony IMX616.
الكاميرا الثانية:
- بتيجي بدقة 8 ميجا بكسل وفتحة عدستها F/2.2 ودي بتكون خاصة بالتصوير الواسع، بالإضافة إلى دعمها لتصوير الفيديوهات بحد أقصى بجودة الـ FHD بدقة 1080 بكسل، بمعدل التقاط 30 إطار في الثانية.
ثانيًا الكاميرا الخلفية وهي كاميرا رباعية حيث:
- الكاميرا الأولى:
بتيجي بدقة 64 ميجا بكسل بفتحة عدسة F/1.8 بمستشعر من نوع Samsung GW1، وهي الكاميرا الأساسية طبعًا.
- الكاميرا الثانية:
بتيجي بدقة 8 ميجا بكسل بفتحة عدسة F/3.4، ودي بتكون الخاصة بالتقريب ( بيرسكوب ) زوم 5X حقيقي وبتوصل لـ 60 X عن طريق السوفت وير وتدعم المثبت البصري الـ OIS؛ للحفاظ على دقة الصورة في حالة التقريب.
- الكاميرا الثالثة:
ودي دقتها 8 ميجا بكسل بفتحة عدسة F/2.3، وهي الخاصة بالتصوير الواسع.
- الكاميرا الرابعة والأخيرة:
- دقتها 2 ميجا بكسل وفتحة عدستها F/2.4 ودي خاصة بالتصوير الماكرو، وطبعًا مع فلاش أحادي من نوع ليد فلاش .
أما بقا تصوير الفيديوهات:
فالجهاز يدعم تصوير الفيديوهات بجودة الـ 4K بدقة 2160 بكسل، بمعدل التقاط 30 و 60 إطار في الثانية.
بالإضافة إلى دعم الجهازللتصوير الـ FHD بدقة 1080 بكسل، بمعدل التقاط 30 و 60 إطار في الثانية، وأيضًا التصوير الـ HD بدقة 720 بكسل بمعدل التقاط 30 و 60 بكسل.
نقدر نقول هنا في أداء الكاميرات في الإضاءات العالية أو النهارية إن صورها من نوع الصور المريحة للعين، ودا بسبب مدى تشَُبع الصور هنا بالألوان والتفاصيل وكمية الوضوح والدقة اللي فيها…
وفعلًا أداء الكاميرات خيالي حتى مع الزوم وحتى الـ 20x، الصورة بتفضل محتفظة بتفاصيلها وجودتها لدرجة كبيرة.
لكن بالنسبة لأداء العدسة الماكرو، فبصراحة الأداء ضعيف جدًا ولا يُقارن بأداء أي عدسة ماكرو من الأجهزة المنافسة.
أما بقا التصوير في الإضاءات الداخلية، فبيظهر فيه ضعف تفاصيل الصور لكن بجودة نقدر نقول عليها ما زالت ممتازة، وكذلك برده بالنسبة للتصوير الليلي.
وعن أداء الكاميرا في تصوير الفيديوهات في realme x3 super zoom، فالأكيد إنها هتضمنلك تجربة تصوير فيديوهات فائقة الوضوح والثبات وبجودة عالية جدًا حقيقي، وكمان بوضع الـ 4K، بالإضافة إلى جودة صوت حلوة فعلًا أوي، يعني من الآخر تجربة تصوير الفيديوهات هنا هتكون مُرضية ليك بدرجة كبيرة.
البصمة والزيادات:
- الجهاز يدعم مستشعر البصمة، وبتيجي مدمجة في زر الباور، ودا بيخليها سريعة وعملية وسهلة جدًا، كمان بيدعم خاصية الـ face unlock من خلال الكاميرا الأمامية.
يدعم الجهاز أيضًا عدة مستشعرات أخرى زي:
- مستشعر البوصلة.
- مستشعر التسارع.
- مستشعر التقارب.
- مستشعر الجيروسكوب الخاص بنظارات الواقع الافتراضي الـ VR.
الواي فاي بييجي بترددات الـ a/b/g/n/ac، وبيقدم أداء قوي جدًا، بالإضافة إلى دعم للـ Dual-band, Wi-Fi Direct, hotspot.
البلوتوث بييجي بإصدار 5.0 مع دعمه لخاصيتي الـ A2DP, LE.
الجهاز يدعم الـ GPS بالإضافة إلى دعمه لأنظمة ملاحة أخرى زي الـ Dual-band A-GPS ،GLONASS ،BDS ،GALILEO ،QZSS.
وكعادة ريلمي مفيش لمبة إشعارات في الجهاز ولا موجود أي بديل ليها، لكنه يدعم الـ NFC.
أما عن منفذ الـ USB، فبييجي من النوع الحديث الـ Type C.
وبالنسبة لنظام التشغيل، فهو من النوع الأحدث android 10 مع واجهة ريلمي الـ Realme UI.
الجهاز بيدعم الميكروفون الثانوي الخاص بعزل الضوضاء أثناء استخدام الجهاز، ودا بيكون مسؤول عن إدخال صوت معين بعيدًا عن باقي الأصوات حواليه سواء في المكالمات أو في تسجيل الفيديوهات.
السماعات الخارجية للأسف ما بتجيش بصوت ستيريو.
الجهاز لا يدعم منفذ الـ 3.5 ملم الخاص بسماعات الأذن.
الجهاز يدعم برنامج اتصال Google، وده بيخليه يفقد دعمه لخاصية تسجيل المكالمات…
لكن تجربة أداء الصوت عمومًا، نقدر نقول إنها ممتازة وحلوة أوي، باستثناء إن الصوت مش ستيريو بس.
أداء موبايل Raelme x3 super zoom:
سعة الذاكرة الصلبة في الجهاز256 جيجا بايت من نوع UFS 3.0، مع ذاكرة عشوائية بسعة 12 جيجا بايت من نوع LPDDR4x.
وللأسف الجهاز لا يدعم إمكانية زيادة السعة التخزينية عن طريق كارت ميموري.
أما بقى بالنسبة للأداء، فالمعالج ثماني النواة من شركة كوالكوم من نوع Snapdragon 855 Plus بتكنولوجيا 7 نانو، مع معالج رسومي من نوع Adreno 640، بالإضافة إلى دعم الجهاز للتبريد السائل، الـ liquid cooling؛ للحفاظ على درجة الحرارة أثناء استخدام الجهاز لفترات طويلة.
الشركة هنا استخدمت أقوى معالج داعم لشبكات الجيل الرابع، ودي أهم مميزات الجهاز هنا، مع ترددات الشاشة العالية ونوع الذاكرة التخزينية بالإضافة لنوع السوفت وير المستقر، الـ 12 جيجا رام هيخلوا الأداء وهمي حرفيًا.
ودا سواء في أداء المهام الخفيفة أو التقيلة زي الألعاب اللي بتشتغل بأعلى جرافيك بكل سلاسة وسهولة من غير أي تقطيع في الفريمات، الموبايل فعلًا تقدر تصنفه موبايل جيمينج للمحترفين.
أما نظام التبريد في الجهاز، فهو مش أحسن حاجة، لإن الجهاز بيسخن شوية مع الاستخدام خصوصًا في الإضاءة العالية وأثناء تشغيل الـ 120 هرتز، ودا كمان مع سحب طاقة البطارية بسرعة.
بطارية موبايل Raelme x3 super zoom:
سعة البطارية 4200 مللي أمبير مع دعمها للشحن السريع الـ Dart Charge بقوة 30 وات.
البطارية هنا سعتها تعتبر صغيرة، لكن بتصمد لفترة 6 ساعات خلال اليوم، شاشة مفتوحة ودي تعتبر مدة صمود وأداء مقبولين.
للأسف البطارية ما بتدعمش هنا الشحن اللاسلكي وبتشحن بشاحن قوة 30 وات من 0 لـ 100% في مدة ساعة.
محتويات علبة موبايل Raelme x3 super zoom:
إسكرينة لحماية الشاشة تم وضعها بشكل مسبق على شاشة الموبايل وبتكون من البلاستيك.
رأس الشاحن بقوة 30 وات.
كابل الـ USB نوع الـ Type C.
جراب ظهر شفاف لحماية الموبايل من الخرابيش.
دبوس معدني.
كتيب التعليمات يوضح كيفية إستخدام الموبايل.
كتيب ضمان.
سعر موبايل Raelme x3 super zoom:
الجهاز متوفر في الإسواق بسعر 8500 جنيه، أي ما يعادل 550 دولار أمريكي.
الرأي النهائي في موبايل Raelme x3 super zoom:
المميزات:
- تصميم عصري وجذاب مع خامات محترمة جداً.
- البطارية تصمد لفترة عمل طويلة خلال اليوم، مع دعمها للشحن السريع بقوة 30 وات.
- أداء قوي من الـ Snapdragon 855 Plus بسعر رخيص.
- كاميرات سيلفي مميزة، مع كاميرا خلفية مخصصة للزوم تصل الي 60X.
- شاشة كبيرة بحواف قليلة بخلاف الحافة السفلية تقدم تجربة ممتازة، مع دعمها إلى الـ 120Hz لأداء سلس.
العيوب:
- لا يدعم الشحن اللاسلكي.
- السماعات الخارجية لا تأتي بصوت ستيريو.
- الموبايل غير مقاوم للماء والغبار بشكل رسمي.
- لا يدعم إمكانية تركيب كارت ميموري للأسف.
- لا يدعم الموبايل منفذ الـ 3.5 ملم الخاص بالهاند فري.
- شكل الثقب المزدوج كبير جداً في الشاشة بالمقارنة بالموبايلات المنافسة.
- كنا نتوقع أن الشاشة تيجي من نوع AMOLED زيمعظم موبايلات الفلاج شيب، وزي الإصدار السابق الـ Realme X2 Pro.
- ضعف أداء الكاميرا الخلفية الرئيسية في التصوير الليلي.
الخلاصة:
سعر وأداء Raelme x3 super zoom بالنسبة للأسعار اللي من الفئة السعرية دي في الشركات المنافسة يُعتبر مش أغلى حاجة، لكن بالنسبة لإصدار realme 6 pro، فالاختلاف في المواصفات بينهم بسيط لكن السعر يُعتبر الضعف، وعشان كدا بنعمل مراجعتنا على كل الإصدارات؛ علشان تقدر تعرف الفرق بين الأجهزة وتحدد إيه هو الجهاز الأنسب ليك أكتر، حسب اختيارك لإن في النهاية دي حاجة بترجع لاستخدام كل شخص عن التاني وميوله واحتياجه.