مراجعة موبايل Nokia C3
Nokia C3

جهاز النهاردة من نوكيا من الفئة المتوسطة أو الاقتصادية اسمه Nokia C3، ودا جهاز أول ما هتشوفه هتحس إنك رجعت بالزمن شوية وتفتكر إنه إصدار قديم جدًا للشركة…

بس عشان نعرف إيه قيمة الجهاز دا وهل هو قديم فعلًا ولا لا!

 هنعمل لكم مراجعة شاملة عنه كالعادة وهنعرض في المراجعة دي كل إمكانيات ومميزات وعيوب الجهاز دا، ونعرفكم كل مواصفاته عشان تكونوا قادرين تقارنوا ما بينه وما بين الإصدارات المنافسة ليه في نفس الفئة السعرية دي.

لكن قبلها حابب أفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك“اللي بيقدمهالك موقع نــاس فــونز ودي خدمة هتساعدك في إنك تختار الجهاز المناسب ليك، عن طريق ترشيحاتنا اللي بتكون بِناءًا على طلبك واللي انت عايزه ومحتاجه، وعلشان تكون ببساطة قادر تختار الجهاز اللي اتعمل لإشباع احتياجاتك و يتناسب مع ميزانيتك من غير أي قلق ولا حيرة.

ويلا نبدأ مراجعتنا بتصميم الموبايل…

تصميم موبايل Nokia C3:

 

تصميم موبايل Nokia C3
تصميم موبايل Nokia C3

 

أولًا الخامات:

  •  الخامات هنا كعادة أجهزة نوكيا في الفئة السعرية دي من البلاستيك المتين سواء في الضهر أو في الفريم.

ثانيًا التصميم الخارجي:

  •  الجهاز بييجي بأبعاد 159.9x77x8.69 ملم
  •  وزن الجهاز  يقدر بـ 184.5 جرام، ودا طبعًا وزن تقيل إلى حد ما كعادة كل إصدارات نوكيا.

وبالنسبة للشاشة، فمفيش أي إعلان رسمي عن وجود أي طبقة حماية من أي نوع

عليها.

زي ما إحنا متعودين من نوكيا، التليفون جاي بخامات تصنيع ممتازة جدا، أينعم كلها من البلاستيك البولى كاربونيت، لكنة بلاستيك قوي ومتين جدا هيستحمل معاك الخبطات، والوقعات بشكل كبير، البلاستيك هنا بلاستيك مطفي فية لمعة خفيفة جدا بتدي شكل جمالي للتليفون.

كمان الجهاز بيتوفر بألوان الأزرق، والذهبي وبشكل عام نقدر نقول إن شكل التصميم الخارجي فيه قديم شوية وأنت هتحس بدا أول ما تشوفه.

شاشة موبايل Nokia C3:

  • الشاشة من نوع IPS LCD وبتييجي بالتصميم القديم بمساحة 5.99 إنش بجودة الـ HD+ بدقة 720×1440 بكسل، يعني بمعدل كثافة بكسلات 269 بكسل لكل إنش.
  • الشاشة هنا تدعم 16 مليون لون، بالإضافة إلى دعمها لأبعاد عرض بنسبة 18:9 ودي برده نسبة أبعاد قديمة شوية، بالإضافة إلى إنها بتشغل نسبة 75.2% من حجم الواجهة الأمامية للجهاز.

 

شاشة موبايل Nokia C3
شاشة موبايل Nokia C3

 

جودة وأداء الشاشة دي في المطلق نقدر نقول إنها مقبولة أو متواضعة، لكن بالنسبة لسعر الجهاز فهتكون مُرضية للمستخدم بشكل كبير…

دا وبالإضافة إلى إن تشبع الألوان والحدة فيها بصراحة حلوين جدًا، مع سطوع وحجم ممتازين يقدروا يضمنولك تجربة مشاهدة أي محتوى سواء فيديوهات أو تصفح عادي بشكل ممتع ومريح.

كاميرات موبايل Nokia C3:

أولًا الكاميرا الأمامية:

  • بتييجي بدقة 5 ميجا بكسل، بفتحة عدسة F/2.4.

ثانيًا الكاميرا الخلفية وهي كاميرا واحدة:

  •  وبتييجي بدقة 8 ميجا بكسل بفتحة عدسة F/2.0، مع فلاش أحادي من نوع ليد فلاش.

ثالثًا تصوير الفيديوهات:

  •  يدعم الجهاز تصوير الفيديوهات بجودة الـ FHD بدقة 1080 بكسل، بمعدل التقاط 30 إطار في الثانية.

 بالإضافة إلى دعمه التصوير بجودة الـ HD بدقة 720 بكسل، بمعدل التقاط 30 إطار في الثانية. 

 

كاميرات موبايل Nokia C3
كاميرات موبايل Nokia C3

 

أداء الكاميرات معقول إلى حد ما في الإضاءات العالية النهارية، ودرجة تشبع الألوان والتفاصيل اللي فيها كافيين لدرجة تخليك تاخد صور حلوة في الرحلات أو لتوثيق اللحظات الجميلة بجودة مقبولة.

وبالنسبة لأداء تصوير الفيديوهات، فهو أحسن من أداء التصوير العادي؛ لأن الكاميرا هنا بتدعم التصوير بجودة عالية تقدر تضمنلك دقة وجودة أفضل.

وطبعًا في الإضاءات الضعيفة مفيش داعي لتقييم جودة الصور والفيديوهات؛ لإنك هتلاحظ إنها مقبولة، بس نرجع ونقول إن دا المتوقع أو العادي بالنسبة لجهاز من الفئة السعرية دي.

البصمة والزيادات:

  • الجهاز يدعم مستشعر البصمة، والبصمة بتيجي في ضهر الجهاز، دا وبالإضافة إلى دعمه لخاصية الـ Face unlock.

يدعم الجهاز أيضًا عدة مستشعرات أخرى زي:

  •  مستشعر التقارب.
  • مستشعر التسارع.

منفذ الـ USB ودا بييجي من النوع  القديم الـ Micro USB.

أما الواي فاي، فبييجي هنا بترددات الـ Wi-Fi 802.11 b/g/n بالإضافة إلى دعمه للـ hotspot.

الجهاز يدعم ال GPS بشكل سريع ويُعتمد عليه، ودا بجانب دعمه لـ A-GPS

الجهاز بييجي بأحدث إصدار، وهو الـ Android 10.

يدعم الجهاز تشغيل شريحتين وكارت ميموري في نفس الوقت، بالإضافة إلى دعمه لشبكات الاتصال الجيل الثاني الـ 2G. والجيل الثالث الـ 3G، والجيل الرابع الـ 4G.

الجهاز بييجي معاه Cover شفاف بخامة كويسة؛ علشان تحافظلك على الضهر من الصدمات والخدوش.

صوت موبايل Nokia C3:

الجهاز يدعم منفذ الـ 3.5 ملم الخاص بسماعات الأذن.

وكعادة نوكيا في سماعاتها الخارجية، الصوت عالي وواضح وبيؤدي أداء فعلاً ممتاز.

أداء موبايل Nokia C3:

 

أداء موبايل Nokia C3
أداء موبايل Nokia C3

 

  • سعة الذاكرة الصلبة في الجهاز 16 جيجا بايت، وبتييجي من نوع EMMC 5.1 مع ذاكرة عشوائية بسعة 2 جيجا رام.

بالإضافة إلى دعم الجهاز لإمكانية زيادة السعة التخزينية، عن طريق كارت ميموري لحد 128 جيجابايت.

أما بقا بالنسبة للأداء، فالمعالج ثماني النواة من شركة Unisoc، ومن نوع SC9863A بتكنولوجيا الـ 28 نانو ، بالإضافة إلى معالج رسومي من نوع IMG8322.

أداء المعالج هنا متواضع أو مقبول نوعًا ما في الاستخدامات اليومية الخفيفة زي مشاهدة الفيديوهات أو تصفح الإنترنت، أما لو هتستخدمه استخدام تقيل زي الألعاب أو فتح أكتر من تطبيق في نفس الوقت، فالجهاز مش هيكون الأنسب ليك وهيتقل معاك ويهنج منك جدًا.

بطارية موبايل Nokia C3:

  • سعة البطارية 3040 مللي أمبير، من نوع ليثيوم أيون قابلة للإزالة، ومع إن المواصفات دي ما عدتش موجودة  في أجهزة كتير حاليًا، إلا إنها تعتبر ميزة هتساعدك تغير البطارية لو حصلها أي حاجة.

وبشكل عام نقدر نقيم أداء وسعة البطارية بإننا نقول عليهم إنهم متوسطين إلى حدٍ ما، وتقدر البطارية تصمد معاك لفترات طويلة خلال اليوم، بالإضافة إلى إنها بتشحن من صفر لـ 100% خلال ساعتين أو أقل، بشاحن قوة شحنه 5 وات، ودي مدة شحن تُعتبر كويسة ومش طويلة.

 

بطارية موبايل Nokia C3
بطارية موبايل Nokia C3

سعر موبايل Nokia C3:

  • سعر الجهاز 1500 جنيه مصري، أي ما يعادل 100 دولار تقريبًا.

فتح علبة موبايل Nokia C3:

  • جهاز Nokia C3.
  • شاحن بقوة 5 وات.
  • سلك USB من نوع Micro USB.
  • جراب ظهر.
  • كُتيب التعليمات.

الرأي النهائي في موبايل Nokia C3:

المميزات:

  • خامات التصنيع ممتازة زي ما اعتدنا من نوكيا.
  • يأتي بإصدار اندرويد 10 من العلبة مباشرة.
  • شاشة بدقة الـ HD+ تقدم أداء مقبول في فئتها.
  • يدعم تشغيل شريحتين وكارت ميموري في نفس الوقت.
  • يدعم مستشعر البصمة ويقدم أداء لا بأس به بالإضافة إلى الـ Face Unlock.

العيوب:

  • المعالج يقدم أداء ضعيف ولكن هو دا المتوقع بالأسعار الاقتصادية فلابد من رفع ميزانيتك قليلا لتحصل على أداء أفضل.
  • منفذ USB من النوع القديم الـ Micro USB.
  • شاشة بالشكل القديم في حين توجد هواتف بتصميم الثقب والنوتش.
  • البطارية بتقدم أداء متوسط مش الأفضل.
  • مش هنقدر نضمن تحديث الموبايل بسبب عدم قدومه ضمن الـ Android One ولكن ما زال مقبول فهو ليس بإصدار Go Edition.

الخلاصة:

بعد ما وضحنا تفاصيل وإمكانيات الجهاز وعرفنا كل مميزاته وعيوبه، نقدر نقول إن Nokia C3 ما بيتميزش عن Nokia 2.3 بحاجة  زيادة غير دعمه لمستشعر البصمة، بالإضافة إلى إن الجهازين في نفس الفئة السعرية تقريبًا مع اختلافات بسيطة جدًا،

في النهاية، بما إن الجهازين متشابهين أوي هرشحهم لفئة كبار السن أو للأشخاص اللي اعتمادها على الموبايلات قليل، وفي الحالة دي بس هيقدر الموبايل يأدي معاهم أداء مناسب جدًا وهيعجبهم ويعيش معاهم كتير كمان.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *