شركة نوكيا أطلقت حفل عالمي في مصر تحديدًا لجهازها Nokia 2.3 من الفئة الاقتصادية، ودا إن دل على شيء فيدل على اهتمام شركات الـ smart phones بالسوق المصري، وعلى إن الجهاز دا يهم بسعره وإمكانياته فئة كبيرة من الناس اللي بالنسبالهم هيكون Nokia 2.3 هو الإصدار الأنسب ليهم…
وعلشان كدا هنوضح كل تفاصيل وامكانيات الجهاز، من حيث مميزاته وعيوبه والتصميم بتاعه؛ علشان نقدر نعرف هل هو أحسن إصدارات نوكيا في الفئة الاقتصادية دي ولا لأ، وهل موجود منافس ليه في السوق بنفس سعره وإمكانياته ولا لأ!
خلونا نبدأ المراجعة عشان نعرف كل دا، بس قبلها حابين نفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك” اللي بيقدمهالك موقع نــاس فــونز وهي خدمة هتساعدك في إنك تختار الجهاز المناسب ليك، عن طريق ترشيحنا ليك بِناءًا على طلبك واللي انت عايزه ومحتاجه يكون متوفر في جهازك من مواصفات وإمكانيات؛ علشان ببساطة تكون قادر تختار الجهاز اللي اتعمل لإشباع احتياجاتك و يتناسب مع ميزانيتك من غير أي ولا قلق ولا حيرة.
ويلا نبدأ مراجعتنا بتصميم الموبايل…
تصميم موبايل Nokia 2.3:
خامات الموبايل:
كعادة نوكيا الخامات في الجهاز دا من البلاستيك المتين، مع فريم من المعدن حوالين الجهاز ودا بيزود من متانة وجودة خامات الجهاز.
تصميم الكاميرات:
هنلاقي هنا التصميم تقليدي شوية.
اتصممت الكاميرات في منتصف الموبايل على شكل بيضاواي في وضع أفقي.
وهنتكلم عنها بالتفصيل أثناء المراجعة.
التصميم الخارجي:
- الجهاز بييجي بأبعاد 157.69×75.41×8.68 ملم.
- وزن الجهاز يُقدر بـ 183 جرام ومُزوَد بحواف دائرية.
يتوفر بألوان الأخضر، والأسود وكذلك باللون الذهبي الأنيق.
أما بالنسبة للشاشة، فمفيش أي إعلان رسمي عن وجود طبقة حماية عليها من أي نوع، لكن بييجي عليها الاسكرين العادية للحماية من الخدوش.
شاشة موبايل Nokia 2.3:
- الشاشة من نوع IPS LCD بمساحة 6.2 إنش بجودة الـ HD+ بدقة 720×1520 بكسل، يعني بمعدل كثافة بكسلات 271 بكسل لكل إنش.
- الشاشة بتيجي بشكل النوتش اللي من نوع الـ water drop notch، واللي بنشوفه لأول مرة على شاشات نوكيا عمومًا.
- تدعم الشاشة أبعاد العرض بنسبة 19:9 وتشغل نسبة 80.7% من مساحة الواجهة الأمامية للجهاز، ودا بيخلي محتوى عرضها كبير وواضح إلى حدٍ ما.
دا بالإضافة إلى دعمها خاصية اللمس المتعدد لحد 5 نقاط.
أما بقا بالنسبة لأدائها، فهو زيه زي أداء أي شاشة من الفئة المتوسطة دي من حيث حدة الألوان وتشبعها اللي بيكون كويس جدًا، وجودتها في السطوع مقبولة، وكمان هتقدر تتعامل معاها تحت ضوء الشمس المباشر من غير مشاكل، ولكنها مش أحسن حاجة، للأسف الموبايل لا يدعم مستشعر ضوء فهتضطر تظبط نسبة سطوع الشاشة بشكل يدوي، كمان زوايا الرؤية فالشاشة كويسه جدًا.
ويعتبر العيب اللي واضح أوي في الشاشة هنا، هو ضخامة الحواف السفلية؛ لأنها طبعًا بتدي شكل قديم لتصميم الشاشة من حيث الشكل.
كاميرات موبايل Nokia 2.3:
أولًا الكاميرا الأمامية:
تأتي بسعة 5 ميجا بكسل بفتحة عدسة F/2.4، مع فلاش خلفي من نوع ليد فلاش.
ثانيًا الكاميرا الخلفية ودي كاميرا ثنائية حيث:
- الكاميرا الأولى:
تأتي بدقة 13 ميجا بكسل بفتحة عدسة F/2.2.
- الكاميرا الثانية:
دي بتييجي بدقة 2 ميجا بكسل لعمل العزل والبورتريه، وقامت شركة نوكيا بتوفير وضع Recommended Shot؛ لالتقاط عدة صور متتاليه وإنتاج صورة واحدة أفضل، من حيث الدقة والتفاصيل بنظام الذكاء الاصطناعي الـ AI.
أما بالنسبة لتصوير الفيديوهات:
فالجهاز يدعم تصوير الفيديوهات بجودة الـ FHD بدقة 1080 بكسل، بمعدل التقاط 30 إطار في الثانية. بالإضافة إلى دعمه التصوير بجودة الـ HD بدقة 720 بكسل، بمعدل التقاط 30 إطار في الثانية.
أداء الكاميرات بشكل عام بالنسبة لجهاز من الفئة السعرية دي هايل، والصور في الإضاءات العالية درجة الحدة وتشبع الألوان فيها بيكون حلو جدًا وبكمية تفاصيل مقبولة، دا بجانب وضع الـ recommended short، اللي بياخد كذا صورة في اللقطة الواحدة ويدمجهم مع بعض علشان يقدملك صورة كلها تفاصيل و وضوح وبدقة عالية كمان.
وبالنسبة للصور في الإضاءات الضعيفة، فطبعًا جودة الصور بتقل وبيبان التشويش فيها بصورة ملحوظة، لكن دا العادي بالنسبة لجهاز من الفئة دي.
البصمة والزيادات:
- الجهاز لا يدعم مستشعر البصمة، بس بيدعم خاصية الـ face unlock عن طريق الكاميرا الأمامية.
- بالإضافة إلى دعمه مستشعرات التسارع والتقارب بس، يعني نقدر نقول إنه فقير في المستشعرات بصفة عامة.
- الـ GPS في الجهاز، دقته وسرعته حلوة أوي وتقدر تعتمد عليه، دا إلى جانب دعم الجهاز لأنظمة ملاحة تانية زي الـ A-GPS GLONASS ،BDS.
أما منفذ الـ USB، بييجي من النوع القديم الـ Micro Usb.
وللأسف مفيش هنا لمبة إشعارات، ولا موجود حتى أي بديل ليها.
أما عن الواي فاي، فبييجي بترددات الـ b/g/n مع دعمه لخاصية الـ hotspot.
صوت موبايل Nokia 2.3:
يدعم الهاتف منفذ الـ 5 ملم الخاص بسماعات الأذن ويأتي في الأعلى، بالإضافة إلى دعمه للراديو FM ووصلات الـ OTG؛ لتشغيل أي USB Driver على الجهاز.
والسماعات الخارجية بتييجي في الجانب الأيمن للجهاز، ودا مكان ممتاز لسماعة خارجية؛ لأنها بتخلي الصوت أعلى وأوضح أيًا كنت بتمسك الجهاز من أي وضع.
أداء موبايل Nokia 2.3:
سعة التخزين الصلبة 32 جيجابايت، مع ذاكرة عشوائية 2 جيجا رام.
أما عن الأداء، فالمعالج هنا رباعي النواة من شركة ميديا تيك من نوع
MT 6761 Helio A22، مع معالج رسومي من نوع PowerVR GE8320.
المعالج هنا يعتبر مقبول مش أكتر؛ ودا لإنه من النوع القديم شوية، لكن بيقدملك أداء سلس وبسيط، مادام استخدامك للجهاز خفيف زي تصفح تطبيقات السوشيال ميديًا وأي استخدامات تانية يومية بسيطة…
أما في الألعاب، فممكن يأدي أداء كويس نوعًا ما بس بأقل مستوي جرافيك، وبرده هتقابل تقطيع في الفريمات وتهنيج، فنصيحتي ليك لو أنت جيمر، أكيد مش هو ده الجهاز المناسب لاستخدامك.
فتح علبة موبايلNokia 2.3:
- هاتف Nokia 2.3.
- شاحن عادى.
- سلك USB من نوع مايكرو microUSB 2.0.
- الضمان ودليل المستخدم.
- اداة لإخراج شريحتى الإتصال.
- سماعات هاند فرى.
بطارية موبايل Nokia 2.3:
سعة البطارية هنا كبيرة بتوصل لـ 4000 مللي أمبير من نوع ليثيوم بوليمر، غير قابلة للإزالة مع شاحن بقوة 5 وات.
وبالنسبة لأداء البطارية، فهي بتقدم أداء حلو جدًا وتقدر تصمد معاك لفترات طويلة خلال اليوم، لكن بيتم شحنها من صفر لـ 100% في 3 ساعات، ودي تعبتر مدة شحن طويلة أوي، بس دا لأنها لا تدعم الشحن السريع.
سعر موبايل Nokia 2.3:
سعر الجهاز 1550 جنيه مصري، أي ما يعادل تقريبًا 100 دولار أمريكي.
الرأي النهائي في موبايل Nokia 2.3:
المميزات:
- كاميرات الموبايل الخلفية تعرض الصور، والفديوهات بدقة FULL HD.
- الموبايل متوفر بذاكرة داخلية متوسطة بسعة 32 جيجا وذاكرة عشوائية تُعتبر مناسبة فى حدود الفئة السعرية للهاتف بسعة 2 جيجا بايت رام.
- الشاشة بها كثاف بكسلات متوسطة بسعة 271 بكسل لكل بوصة.
- الموبايل يمكن ترقيتة الى اندرويد 10 كيو.
العيوب:
- الموبايل لا يدعم منفذ الشحن usb السريع 2.0, Type-C 1.0.
- الموبايل لا يدعم خاصية الشحن السريع.
الخلاصة:
جهاز بالإمكانيات دي والسعر الاقتصادي الحلو جدًا دا، هكون أول المرشحين ليه لكل الفئات اللي يهمها جهاز للاستخدام اليومي الخفيف…
يعني ما دام استخدامك للموبايل بعيدًا عن الإستخدام التقيل، فالجهاز دا هيعيش معاك، وهيتحمل كتير سواء من حيث الخامات أو من حيث الإمكانيات وهيعجبك أداؤه جدًا.