الجهاز اللي هنتكلم عنه النهارده من نوكيا من الفئة المتوسطة أو الاقتصادية، Nokia 3.4 بسعره الاقتصادي وخاماته المتينة والقوية اللي تُعتبر من أفضل خامات أجهزة الفئة المتوسطة، لفت انتباهنا إلى إننا نوضح كل تفصيلة فيه، سواء إمكانيات أو مميزات وعيوب وكل شيء لازم نعرفه عنه؛ علشان نقدر نفرق بينه وبين الإصدارات التانية من الفئة دي من نفس الشركة أو من الشركات المنافسة.
نتمني مراجعتنا للجهاز تكون مُفصلة ومُرضية ليكم، بس قبلها خلوني أفكركم بخدمة تهمكم وهتساعدكم أكتر في اختيار الجهاز المناسب لكل حد بيفكر يشتري جهاز جديد، وهي خدمة “اختار موبايلك” اللي بيقدمهالك موقع نــاس فــونز وهتساعدك في إنك تختار الجهاز المناسب ليك عن طريق ترشيحنا ليك بِناءًا على طلبك واللي انت عايزه ومحتاجه في جهازك من مواصفات وإمكانيات؛ علشان ببساطة تكون قادر تختار الجهاز اللي اتعمل لإشباع احتياجاتك ومناسب لميزانيتك من غير أي ولا قلق ولا حيرة.
ويلا نبدأ مراجعتنا بتصميم الموبايل…
تصميم موبايل Nokia 3.4:
أولًا الخامات:
خامات الجهاز هنا من البلاستيك عالي الجودة والمتانة، ودا أفضل خامات الأجهزة اللي من الفئة السعرية دي وبيكون عملي جدًا وبيتحمل استخدامه من غير Cover من غير ما الضهر يتأثر، لكن بيكون مُعرض لتغيير لون الضهر والإطار بعد استخدامة لمدة كبيره بدون الجراب.
ثانيًا التصميم الخارجي:
- تصميم الجهاز عصري ومميز وألوانه مبهجة جدًا، فهو متوفر بألوان الأسود الفحمي، والغسق، واللون الأزرق البحري.
- أبعاد الجهاز 161x76x8.7 ملم .
- وزنه 180 جرام، ودا وزن تقيل نسبيًا.
ومفيش أي إعلان رسمي عن وجود طبقة حماية على الشاشة، لكن بتيجي مع الجهاز اسكرينة عادية لحماية الجهاز من الخدش والتجريح.
شاشة موبايل Nokia 3.4:
- الشاشة من نوع IPS LCD، بتيجي بشكل الثقب ومساحتها 6.39 إنش بجودة الـ HD و بدقة 720×1560 بكسل يعني بمعدل كثافة بكسلات 269 بكسل لكل إنش.
- الشاشة بتدعم أبعاد عرض19.5:9، مع دعمها للوضع المظلم الـ Dark Mode؛لتحويل الشاشة إلى اللون الأسود.
- الشاشة هنا حجمها كبير، لكن جودتها HD بس ودي جودة منخفضة طبعًا مقارنةً بجودة وأداء شاشات الأجهزة المنافسة، دا وبالإضافة إلى إن معدل البكسلات فيها ضعيف أو مقبول نوعًا ما…
والميزة اللي خلت أداء الشاشة دي أحسن شوية، هي إن سطوعها حلو جدًا وتشبَُع الألوان فيها قوي.
كاميرات موبايل Nokia 3.4:
الكاميرا الأمامية:
- بتييجي بدقة 8 ميجا بكسل.
الكاميرا الخلفية ودي كاميرا ثلاثية حيث:
- الكاميرا الأولى:
ودي دقتها 13 ميجا بكسل، وهي الكاميرا الأساسية طبعًا.
- الكاميرا الثانية:
ودي بتييجي بدقة 5 ميجا بكسل، وبتكون خاصة بالتصوير الواسع.
- الكاميرا الثالثة:
ودي بتكون دقتها 2 ميجا بكسل، ودي الخاصة بالعزل مع فلاش أحادي من نوع ليد فلاش.
وبشكل عام نقدر نقول إن جودة ودقة أداء الكاميرات عالي، بالرغم من إن مثلًا دقة الكاميرا الخلفية 13 بكسل بس، لكن تشبعها بالتفاصيل والألوان والوضوح بيكون جيد وبيقدم أداء مُرضي للمستخدم ودا طبعًا في النهار أو في الإضاءات العالية.
أما في الإضاءات الضعيفة، فجودة الصور ووضوحها والتفاصيل فيها بتقل جدًا ويمكن دا العادي بالنسبة لأجهزة الفئة السعرية دي، بس غالبًا مش كلهم.
البصمة والزيادات:
الجهاز بيدعم مستشعر البصمة ودي بتيجي في ضهر الجهاز يعني عملية وسهلة، دا إلى جانب دعمه لخاصية الـ face unlock من خلال الكاميرا الأمامية.
يدعم أيضًا عدة مستشعرات أخرى منها:
- مستشعر التسارع.
- مستشعر التقارب.
- مستشعر الجيروسكوب، ودا خاص بتشغيل نضارات الواقع الافتراضي الـ VR.
لكنه للأسف، مابيدعمش مستشعر البوصلة يعني مش هيكون قادر يحدد أي اتجاهات.
نظام تشغيل الهاتف هو النظام الأحدث Android 10، وسيتم تحديثه إلى Android 11 أول ما يكون متوفر ودي ميزة حلوة جدًا ومش موجودة كتير في أي إصدار بنشوفه من الفئة دي.
الواي فاي بيجي بترددات الـ b/g/n ، بالإضافة إلى دعم الجهاز لخاصية الـ hotspot .
أما عن منفذ الـ USB فبييجي من النوع الحديث الـ Type C
صوت موبايل Nokia 3.4:
- الجهاز بيدعم الميكرفون الثانوي الخاص بعزل الضوضاء، ودا بيكون مسؤول عن إدخال صوت معين بعيدًا عن باقي الأصوات والدوشة حواليه زي صوت الهوا مثلًا، ودا بيكون أثناء استخدام الهاتف سواء في المكالمات أو تسجيل الفيديوهات.
- الجهاز كمان بيدعم منفذ الـ 3.5 ملم الخاص بسماعات الأذن، بالإضافة لدعمه للراديو FM.
أداء موبايل Nokia 3.4:
سعة الذاكرة الصلبة 64 جيجابايت من نوع eMMC 5.1، مع ذاكرة عشوائية بسعة 4 جيجابايت.
بالإضافة إلى دعم الجهاز لإمكانية زيادة السعة التخزينية عن طريق كارت ميموري حتى سعة 512 جيجابايت.
أما بالنسبة للأداء، فالمعالج ثماني النواة من شركة كوالكوم ويأتي من نوع Snapdragon 460، بتكنولوجيا الـ 11 نانو مع معالج رسومي من نوع Adreno 610.
نقدر نقيم الأداء هنا ونقول إنه هيقدملك تجربة استخدام يومي سلسة وسريعة، بالإضافة إلى أداء ألعاب تقييمه من جيد لـ جيد جدًا حسب الجودة اللي بتلعب عليها، وده لإن المعالج قديم ومش بيقدم أداء رسمي بشكل قوي.
بطارية موبايل Nokia 3.4:
سعة بطارية الجهاز 4000 مللي أمبير غير قابلة للإزالة، مع شاحن بقوة 10 وات بس.
ودا بيخلي شحن البطارية بطيء جدًا وبيخليها تاخد مدة طويلة على ما يتم شحنها بشكل، تقريبا بتاخد 3 ساعات علشان يتم شحنها كاملة.
بس كأداء، فهي بتصمد لفترة طويلة خلال يوم كامل من الاستخدام.
فتح علبة موبايل Nokia 3.4:
- جهاز Nokia 3.4.
- لاصقة حماية بلاستيكية.
- الشاحن بقوة 10 وات.
- الـ USB من نوع Type C.
- غطاء ظهر شفاف.
- سماعات أذن.
- دبوس معدني.
- كتيب التعليمات.
- الضمان.
سعر موبايل Nokia 3.4:
سعر الجهاز 2500 جنيه مصري، أي ما يعادل 160 دولار أمريكي.
الرأي النهائي في موبايل Nokia 3.4:
المميزات:
- ما زالت خامات نوكيا هي الأفضل في الفئة الاقتصادية.
- يدعم كاميرا التصوير الواسع.
- تصميم عصري مع ألوان متعددة.
- يأتي بمنفذ الـ USB الأحدث الـ Type C.
- يدعم تشغيل شريحتين وكارت ميموري في نفس الوق .
- بطارية مقبولة تكفي للاستخدام الطويل خلال اليوم بأكمله ولكنها ليست الأكبر بالنسبة للمنافسين.
- أحدث نظام تشغيل مع ضمان تحديثه لاندرويد 11 فور توفره.
- شاشة كبيرة بشكل الثقب ولكن للأسف بجودة منخفضة HD+ فقط.
العيوب:
لا يدعم البوصلة فلن تستطيع معرفة الاتجاهات.
لم يتم استخدام كاميرات مميزة في فئته السعرية خصوصًا الكاميرا السيلفي.
شاشة HD+ بدلاً من FHD+ مثل الـ Redmi 9 على الأقل.
المعالج يقدم أداء متوسط فهو ليس الأقوى حالياً في فئته السعرية.
الحافة السفلية للشاشة ما زالت كبيرة ولم يتم العمل على تقليلها وجعلها أصغر.
قدرة الشحن الـ 10 واط ضعيفة جداً لشحن الهاتف لذلك ستحتاج إلى وقت كبير للشحن.
بنفس السعر تستطيع شراء Nokia 5.3 بمعالج أقوى وبنفس المواصفات تقريبًا.
الخلاصة:
طبعًا بعد ما وضحنا كل تفاصيل الجهاز واتعرفنا على مميزاته وعيوبه وإمكانياته بشكل كامل نقدر نديله تقييم نوعًا ما جيد، ودا لإن فيه أجهزة تانية من نفس الفئة السعرية وبإمكانيات وأداء أحسن بكتير…
فعلى سبيل المثال أنا أرشح نسخة Nokia 5.3 من نفس الفئة السعرية عن الجهاز دا؛ ودا لإن طبعًا إمكانياته وسعره متوازيين بشكل كويس و بأداء أقوي وأحسن كمان.