Honor 9A| المراجعة والمواصفات
Honor 9A

نبدأ المراجعة مع Honor 9A…

كلنا عارفين المشاكل اللي بتمر بيها شركة هواوي والشركات التابعة ليها زي شركة هونر، واللي أثرت على عدم وجود موبايلات ليها في السوق من فترة كبيرة، بس رجعت تاني بموبايلات نزلت في الفئة الاقتصادية زي هونر 9C، هونر 9A، واللي هو نازل في أقل فئة سعرية للموبايلات وبسعر حوالي 2500 جنيه مصري تقريبًا، بس يا تري مقابل السعر دا هناخد إمكانيات كويسة تخلي الموبايل يستحق الشراء ولا لأ!

دا اللي هنعرفه من خلال مراجعتنا دلوقتي، يلا بينا نشوف الجهاز عامل إزاي وإيه هي مميزاته وعيوبه وهل يستحق الشراء أم لا!

قبل ما أبدأ المراجعة خلوني أشرح لكم خدمة سهلة وبسيطة وهي خدمة “اختار موبايلك“، الطبيعي إن أي حد لما ييجي يشتري موبايل بيكون محتار ومتلخبط شوية بس مع الخدمة دي خلاص مفيش أي حيرة تاني؛ لأن كل اللي عليك تعمله هو إنك تكتب المواصفات اللي عايز تشوفها في الموبايل اللي هتشتريه، وتحدد إيه هي الإمكانيات اللى أنت حابب تلاقيها فيه، وإحنا هنقدم لك كل التفاصيل ونعرض لك أنسب موبايل ليك بالإمكانيات والمواصفات المرغوب فيها.

تصميم موبايل Honor 9A:

أولًا خامات الموبايل:

الموبايل بييجي بجودة وخامات تصنيع كاملة من البلاستيك، وكمان الإطار من البلاستيك، بس دا طبعًا واضح ومقبول في الفئة السعرية اللى هو نازل فيها، لكنه مش مبرر إنه كشكل مش شيك، بالعكس شكله حلو ويبان عليه من شكله إنه غالي وقيم مش رخيص، بس ضهر الموبايل فيه لمعة بسيطة كده، ودا للأسف ممكن يعرضه للتبصيم.

ثانيًا التصميم الخارجي:

تصميم الكاميرات:

طبعًا اللي بتغير شكل الموبايل هي هيئة تصميم الكاميرات، فالكاميرات الخلفية في الموبايل ده 3 كاميرات موجودين في شكل مستطيل طولي، وكمان مع فلاش أحادي من نوع ليد فلاش.

أما بالنسبة للكاميرا الأمامية، فهي موجودة في أعلى الموبايل، واللي هنتكلم عنها بالتفصيل بعدين.

 

تصميم موبايل Honor 9A
تصميم موبايل Honor 9A

 

الأبعاد والألوان:

أبعاد الموبايل هنا 159.1×74.1×9 ملم.

وزن الموبايل 185 جرام، ودا أكيد وزن خفيف ومش هيبقى متعب لما تستخدمه لفترة طويلة من الوقت.

الموبايل موجود في السوق المصري باللون الأسود، والأخضر، والأزرق، واحنا شايفين إن الألوان هنا مش مميزة أوي تعتبر هي هي الألوان اللي موجودة في معظم  إصدرات الموبايلات اللى في السوق.

شاشة موبايل Honor 9A:

الشاشة بتيجي هنا بشكل النوتش من النوع الـ Water Drop، من نوع IPS.

مساحة الشاشة 6.3 إنش، بجودة الـ HD، ودي جودة قليلة، بدقة 720×1600 بكسل، بمعدل كثافة بكسلات 278 بكسل لكل إنش.

تحتل الشاشة من الواجهة الأمامية نسبة 81.3%، كما أن الشاشة هنا تدعم أبعاد العرض الجديدة بنسبة 20:9 عشان تقدم أكبر محتوى ليها سواء في مشاهدة الفيديوهات أو الألعاب وكمان التصفح اليومي.

 

شاشة موبايل Honor 9A
شاشة موبايل Honor 9A

 

بالنسبة للحواف الموجودة في أسفل الشاشة فهي كبيرة نسبيًا، أما الحواف الجانبية فهي كويسة، والشاشة عمومًا كويسة ومقبولة بالنسبة للفئة السعرية الموجودة فيها، واستجابة اللمس سريعة وممتازة، دا بالإضافة إلى إن السطوع كويس جدًا.

كاميرات موبايل Honor 9A:

الكاميرا الأمامية: 

الكامير الأمامية بتيجي بدقة 8 ميجا بكسل، بفتحة عدسة F\2.0.

الكاميرات الخلفية 3 كاميرات:

الكاميرا الأولى، هي كاميرا أساسية في الموبايل، بدقة 13 ميجا بكسل، وبفتحة عدسة F\1.8.

الكاميرا الثانية، هي الكاميرا الخاصة بالتصوير الواسع، بفتحة عدسة F\2.2، ودقة 5 ميجا بكسل.

أما بالنسبة للكاميرا الثالثة، فهي الكاميرا الخاصة بعمل العزل والبورتريه، وبتيجي بدقة 2 ميجا بكسل، بفتحة عدسة F\2.4، مع وجود فلاش أحادي من نوع ليد فلاش.

كما يدعم الموبايل تصوير الفيديوهات بجودة الـ FHD، بدقة 1080 بكسل، ومعدل التقاط 30 إطار في الثانية الواحدة.

 

كاميرات موبايل Honor 9A
كاميرات موبايل Honor 9A

 

بالنسبة لأداء الكاميرا، فاحنا شايفين إنها متوسطة، أو أقل من المتوسطة بس على العموم، هي في الإضاءة العالية ممتازة وفي التصوير الليلي الأداء ممكن نعتبره مقبول.

بالنسبة لجودة تصوير الفيديوهات، مش حلوة أوي  بس هترضي المستخدم اللى طالب موبايل في الفئة السعرية دي.

البصمة والزيادات:

البصمة:

البصمة هنا كعادتها تقليدية، موجودة في ضهر الموبايل مفيش فيها أي اختلاف بس بالنسبة لأدائها، فمن خلال تجربتنا نقدر نقول لكم إنها سريعة.

وكمان الجهاز فيه خاصية الـ Face Unlock، واللى ليها مسمى تاني هو بصمة الوجه، وهي كمان الأداء الخاص بيها كويس.

الموبايل بييجي فيه بعض المستشعرات، زي:

  • مستشعر التقارب.
  • مستشعر التسارع.

دعم الموبايل راديو الـ FM ،NFC، واللي من المميز إنها تكون موجودة في موبايلات في الفئة السعرية دي.

وجود شريحتين اتصال، مع وجود كارت ميموري لزيادة المساحة.

دعم شبكات الجيل الثاني، الثالث، والرابع.

نظام تشغيل الموبايل أندرويد 10، مع عدم وجود خدمات جوجل.

يدعم الموبايل الميكروفون الثانوي أيضًا، الذي يعمل على عزل الضوضاء وقت استخدام الموبايل عمومًا. 

كما يدعم الجهاز الاتصال السريع بالواي فاي بترددات الـ b/g/n، ويدعم خاصيتي الـ Wi-Fi Direct, والهوت سبوت.

ويدعم أيضًا البلوتوث بإصداره الخامس.

بالإضافة إلى أنه يدعم موقع تحديد الـ GPS؛ ليسهل معرفة الأماكن لدى البعض. 

بطارية موبايل Honor 9A:

البطارية هنا حكاية، بتيجي بسعة 5000 مللي أمبير، ودا حجم كبير جدًا جدًا؛ لأنك بكدا مش هتحتاج لشحن كتير، والموبايل هيساعدك على إنه يفضل شغال معاك لأطول فترة ممكنة من غير ما يفصل منك.

 

بطارية موبايل Honor 9A
بطارية موبايل Honor 9A

أداء موبايل Honor 9A:

الموبايل بييجي بمعالج من شركة ميديا تيك من نوع Helio P22، بتكنولوجيا 12 نانو.

وكمان مع معالج رسومي من نوع PowerVR GE8320.

 

أداء موبايل Honor 9A
أداء موبايل Honor 9A

 

أداء الموبايل كويس وسريع كمان في التصفح، فاحنا بنعتبره أداء مرضي بالنسبة للألعاب، وخصوصًا في الفئة السعرية دي. 

أما بالنسبة للألعاب التقيلة، فالأداء ممكن نقول عليه إنه مقبول شوية، بس أكيد في العموم، وفي الفئة السعرية اللي الموبايل نازل فيه ما توقعش أداء أعلى من كدا.

فتح علبة موبايل Honor 9A:

موبايل هونر 9A.

هاند فري.

كتيب ضمان وتعليمات يشرح كيفية استخدام الموبايل.

اسكرينة تم وضعها بشكل مسبق على الموبايل.

رأس شاحن بقوة 10 وات، ودا هيخلي شحن الموبايل بطيء نسبيًا.

دبوس معدني لفتح مكان الشريحة.

جراب موبايل شفاف.

كابل USB من نوع Micro USB، ودا نوع قديم. 

سعر موبايل Honor 9A:

سعر الجهاز حوالي 2500 جنيه مصري للنسخة الـ 64 مع 3 جيجا رام، ودي مساحة كويسة بالنسبة لسعر الجهاز.

الرأي النهائي في موبايل Honor 9A:

المميزات:

بطارية قوية جدًا تعمل لفترة طويلة وقت استخدام الموبايل في العمل أو أثناء الألعاب.

جودة وخامات التصنيع المستخدمة في الهاتف كويسة مع تصميم راقي.

الموبايل يدعم تشغيل شريحتين اتصال، وكارت ميموري في الوقت نفسه.

نظام تشغيل الجهاز أحدث نظام تشغيل، أندرويد 10.

يدعم  الموبايل مستشعر البصمة، وبييجي في ظهر الهاتف، وأيضًا يدعم خاصية بصمة الوجه.

الموبايل ليه ذاكرة كبيرة وهتكون كافية لمعظم تطبيقاتك وملفاتك بشكل عالي وممتاز.

يعتبر الموبايل أرخص الموبايلات الداعمة لخاصية NFC.

العيوب:

مفيش خدمات جوجل، ونركز على دي علشان اللى هيشتري الموبايل دا وهو مهتم بخدمات جوجل، الموبايل مش هيكون لذيذ معاه بجد.

قوة شحن البطارية 10 وات وده هيخلي الموبايل ياخد مدة طويلة على ما يشحن.

لا يدعم الجهاز مستشعر الجيروسكوب.

ومفيش لمبة إشعارات كمان.

منفذ USB الخاص بالجهاز قديم من نوع Micro USB كالعادة.

المعالج قديم نسبيًا بردو، موجود في معظم الهواتف الاقتصادية.

وبيقدم أداء نقدر نقول عليه مقبول في الاستخدام اليومي، لكن في الألعاب بيقدم أداء ضعيف، وخصوصًا مع وجود منافسين من شاومي، وريلمي اللي بينافسوا بمعالجات أحدث زي ريدمي 9، وريلمي C3i.

يعتبر الهاتف نسخة طبق الأصل من هواوي Y6P بدون أي جديد يُذكرk ودي عادة هونر في معظم منتجاتها.

الخلاصة:

الموبايل بيقدملك أداء كويس لو هتستخدمه للشغل، ودا علشان البطارية والمساحة، ووزن الموبايل وغيرة من مميزات تانية.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *