Honor 8A | المراجعة والمواصفات
Honor 8A

نبدأ بلقاء تمهيدي مع موبايل Honor 8A…

كل موبايل أيًا كانت ماركته إيه ليه مميزات وعيوب، ويختلف كل شخص عن التاني حسب الإمكانيات والمواصفات اللي محتاج أنها تكون في الجهاز الخاص بيه، بس النهاردة معانا موبايل جديد من شركة هونر…

وهو هونر 8A وطبعًا هو النسخة الأصغر للـ 8C، وزي ما كل الناس عارفة هونر هي شركة تابعة لهواوي، والصراحة بتعمل موبايلات كويسة جدًا، وكمان الموبايل يعتبر الأرخص سعرًا، ودا علشان يكون مناسب للفئة السعرية اللي هو فيها، وبييجي ينافس Realme C1، مع تطور في الشاشة والكاميرا وهكذا…

يلا نشوف إيه هي تفاصيل الموبايل بشكل أوضح من كدا.

بس قبل ما أبدأ المراجعة خلوني أشرح لكم خدمة سهلة وبسيطة وهي خدمة “اختار موبايلك“، الطبيعي إن أي حد لما ييجي يشتري موبايل بيكون محتار ومتلخبط شوية بس مع الخدمة دي خلاص مفيش أي حيرة تاني؛ لأن كل اللي عليك تعمله هو إنك تكتب المواصفات اللي عايز تشوفها في الموبايل اللي هتشتريه، و تحدد إيه هي الإمكانيات اللى أنت حابب تلاقيها فيه، وإحنا هنقدم لك كل التفاصيل ونعرض لك أنسب موبايل ليك بالإمكانيات والمواصفات المرغوب فيها.

تصميم موبايل Honor 8A:

أولًا خامات الموبايل: 

خامات التصنيع هنا من البلاستيك، بس كشكل شيك.

يعتبر التصميم هنا أول حاجة إيجابية في الموبايل.

أما بالنسبة للحواف، فالحافة السفلية كبيرة شوية ومكتوب عليها هونر، والحافة العلوية والحواف اللي جنب الشاشة يمين وشمال بردو مساحتهم كبيرة، ولكن نقدر نقول عليهم إنهم مقبولين جدًا بالنسبة لسعر الموبايل المعروض.

بالنسبة للنوتش ممكن تلغيه من الإعدادات لو أنت مش حابب شكله.

ثانيًا التصميم الخارجي:

تصميم الكاميرات:

الكاميرات هنا تصميمها عادي مفيهوش أي حاجة مميزة، الكاميرا الأمامية موجودة في ثقب أعلي الشاشة.

أما بالنسبة للكاميرا الخلفية فهي كاميرا واحدة موجودة في شكل دائرة مع وجود فلاش أحادي من نوع ليد فلاش. 

وهنتكلم بعدين عن شرح الكاميرات بالتفصيل.

 

تصميم موبايل Honor 8A
تصميم موبايل Honor 8A

 

الأبعاد والألوان:

أبعاد الموبايل 156.28×73.5×8.0 ملم يعني تقدر تمسك الموبايل بإيد واحدة وتقدر توصل لكل أبعاد الشاشة.

وزن الموبايل 150جرام، ودا وزن خفيف جدًا وسهل تستخدمه وتشيله بإيد واحدة لفترة كبيرة ومش هيبقى متعب.

الموبايل يتوفر بعدة ألوان زي، اللون الأسود، والأزرق، والذهبي، والأحمر، كلها ألوان مميزة وشيك.

شاشة موبايل Honor 8A:

الشاشة هنا بتيجي بنوتش نفس الموجود في موبايل Mi Play، وهي من نوع IPS.

مساحة الشاشة 6.9 إنش، بجودة الـ HD+ ألوانها ممتازة والإضاءة كمان كويسة، بدقة 720×1560 بكسل، بمعدل كثافة بكسلات 283 بكسل لكل إنش.

 

شاشة موبايل Honor 8A
شاشة موبايل Honor 8A

 

أداء الشاشة هنا كويس، وكمان الألوان حلوة جدًا، وزوايا الرؤية والإضاءة تحت ضوء الشمس كويسة، وأكتر حاجة بتميز الشاشة هنا هي أبعادها، بس الشاشة مش جاي عليها طبقة حماية، لكن فيه اسكرينة على الموبايل، ومع ذلك الشاشة مازالت مش أفضل حاجة فى الموبايل. 

كاميرات موبايل Honor 8A:

الكاميرا الأمامية: 

الكاميرا الأمامية بتييجي بدقة 8 ميجا بكسل، بفتحة عدسة F\2.0.

الكاميرا الخلفية:

بتيجي بدقة 2 ميجا بكسل، بفتحة عدسة F\2.4، مع وجود فلاش أحادي من نوع ليد فلاش.

يدعم الموبايل تصوير الفيديوهات بجودة الـ FHD، بدقة 1080 بكسل، ومعدل التقاط 30 إطار في الثانية الواحدة.

 

كاميرات موبايلات Honor 8A
كاميرات موبايلات Honor 8A

 

الكاميرا بتدي أداء معقول في إضاءة النهار، بس معالجة الصور في الموبايل دا محتاجة تتحسن أو ينزل سوفت وير يحسن الموضوع دا، ولكن بالنسبة للفئة الاقتصادية اللي هي فيها كويسة.

بالنسبة للتصوير الليلي، فالكاميرا في الموبايل دا مش أفضل حاجة، ودا المتوقع، وطبعًا مفيش بورتريه في الصورة لأن هي كاميرا واحدة.

بالنسبة للكاميرا الأمامية، هي مش حلوة أوي ومش بيطلع فيها تفاصيل كتير ولكن تعتبر مقبولة.

البصمة والزيادات:

البصمة:

البصمة هنا بتيجي في ضهر الموبايل، وكمان فيه خاصية الـ Face Unlock يعني بالعربي كدا بصمة الوجه اللي بتشتغل عن طريق كاميرا السيلفي.

مع استخدام البصمة، والـ Face Unlock في الجهاز دا عملية وسريعة جدًا بالنسبة للفئه السعريه اللي بنتكلم عنها دي البصمة هنا تقليدية كالعادة في مع معظم الموبايلات مفيهاش أي اختلاف، أما بالنسبة لبصمة الوجه فهي أصبحت شيء معتاد في تصميم الموبايلات. 

الموبايل بيدعم بعض المستشعرات، زي:

  • مستشعر التقارب.
  • مستشعر التسارع.
  • .مستشعر الضوء.
  • مستشعر البصمة.

الموبايل يدعم منفذ الـ 3.5 ملم الخاص بالهاند فري، وموجود في أعلى الموبايل.

يدعم الموبايل راديو الـ FM.

الموبايل يدعم تشغيل شريحتين اتصال من نوع Nano Sim، مع وجود كارت ميموري لزيادة المساحة.

يدعم شبكات الجيل الثاني، الثالث، والرابع.

الموبايل بييجي بأحدث نظام تشغيل أندرويد 9.0، مع أحدث واجهة هواوي، بإصدار EMUI 9.0.

وكمان صوت الموبايل جيد جدًا، عالي وواضح، ودي دايما حاجات الناس بتبقي عايزة تعرفها، بس محدش بيقول عليها. 

يدعم الموبايل الاتصال السريع بالواي فاي بترددات الـ b/g/n، وأيضًا يدعم خاصيتي الـ Wi-Fi Direct، والهوت سبوت.

ويدعم أيضًا البلوتوث بإصدار 4.2.

 كما يدعم موقع تحديد الـ GPS؛ ليسهل معرفة الأماكن لدى البعض، إضافةً إلى أنظمة الملاحة الـ A GPS ،Glonass ،Beidou.

بطارية موبايل Honor 8A:

البطارية بتيجي هنا بسعة عادية، وهي 3020 مللي أمبير، ودا حجم مقبول، الشحن مش سريع بياخد حوالي 3 ساعات شحن، ودي مشكلة كبيرة للفئة اللي بتستخدم الموبايل في الشغل؛ علشان هتحتاج وقت كبير جدًا في الشحن فمش هيبقى الموبايل مناسب ليك إطلاقًا.

 

بطارية موبايل Honor 8A
بطارية موبايل Honor 8A

أداء موبايل Honor 8A:

الجهاز بييجي بمعالج من شركة ميديا تيك من نوع Helio P35 MT6765، بتكنولوجيا الـ 12 نانو، فهو نفس المعالج الموجود في الـ Mi Play وهنا المعالج أفضل من المعالج القديم الموجود في النسخة القديمة من موبايل هونر 7A.

الموبايل كمان بييجي بمعالج 8 نانو مقسم على وحدتين، الأولى 4 نانو بسرعة 2.3GHz Cortex A53، الثانية 4 نانو، لكن بسرعة 1.8GHz Cortex A53، بس لما نييجي للألعاب زي بابجي مثلًا نقدر نقول إن الأداء مقبول بس مش الأفضل.

كمان في الجهاز معالج رسومي بييجي من نوع PowerVR GE8320.

 

أداء موبايل Honor 8A
أداء موبايل Honor 8A

 

الموبايل هنا أداؤه معقول، مش الأفضل طبعًا لأن ساعات بحس بتهنيج واحنا بتنقل بين التطبيقات، دا غير إن الواجهة بتاعة هونر تقيلة شوية.

بالنسبة للمعالج الرسومي، فهو صالح للألعاب الخفيفة بس إنما الألعاب التقيلة زي لعبة بابجي بشغلها على أقل إعدادات ليها، لكن الموبايل مناسب جدًا لاستخدام وسائل التواصل الاجتماعي.  

فتح علبة موبايل Honor 8A:

 موبايل هونر 8A.

هاند فري.

كتيب ضمان وتعليمات بأكثر من لغة؛ لشرح كيفية استخدام الموبايل.

اسكرينة تم وضعها بشكل مسبق على الموبايل وبتكون بلاستيك.

رأس شاحن بقوة 5 وات، ودا هيخلي شحن الموبايل بطيء جدًا.

دبوس معدني لفتح مكان الشريحة.

جراب موبايل شفاف.

كابل USB من نوع Micro USB، ودا نوع قديم بالإصدار الثاني. 

سعر موبايل Honor 8A:

سعر الجهاز حوالي 1950 جنيه مصري للنسخة الـ 32 مع 2 جيجا رام، ودي مساحة كويسة بالنسبة لسعر الجهاز، وممكن تزود المساحة بكارت ميموري، بالإضافة لوجود الشريحتين.

بالنسبة للنسخة التانية، هي 64 جيجا مع 3 جيجا رام وسعر الموبايل للنسخة دي حوالي 2150 جنيه مصري.

الرأي النهائي في موبايل Honor 8A:

المميزات:

يعتبر الموبايل دا أحدث نظام تشغيل مع أحدث واجهة من هواوي.

كما يدعم مستشعر البصمة، وبصمة الوجه.

وبالنسبة لمساحة الشاشة الخاصة بيه، فهي كبيرة بالمقارنة مع سعر الجهاز.

إلى جانب دعم الموبايل وجود شريحتين وكارت ميموري في الوقت نفسه.

وصوت الجهاز عالي وقوي.

إضافةً إلى إن الجهاز هنا بييجي بمعالج MT6765 Helio P35، وهو معالج كويس نوعًا ما في الأداء مقابل سعر الجهاز المعروض.

العيوب:

الشحن بطيء جدًا، ودا لأن قوة الشحن 5 وات بس.

لا يوجد مستشعر جيروسكوب، وبالتالي مش هيبقى موجود الـ VR.

سعة البطارية قليلة جدًا.

كاميرات الموبايل مش الافضل ، لكنها عملية، كمان الكاميرات مش بتدعم البورترية ولا العزل.

شكل الشاشه وجودتها مش أفضل حاجه، وبنشوف بردو أن الوانها مش أفضل حاجة.

الخلاصة:

لو مش هتستخدم الموبايل في شغلك، يبقى هيديك أداء كويس في تصوير الفيديوهات والألعاب، أما بالنسبة لمساحة الجهاز فدي نقدر نقول عليها مقبولة بالنسبة لسعره المعروض.

التعليقات
اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *