من فترة أعلنت شركة شاومي عن الموبايل الحماسي Mi 10T، واللي نزل بإمكانيات جبارة وأثبتت بيه شاومي جملتها الشهيرة “قيمة مقابل سعر” وقالت لكل المنافسين مين يقدر ينافسني؟
شاومي ركزت جدًا في إمكانيات الموبايل اللي بتقدمه ده، زي الشاشة اللي جاية بتردد عالى بيوصل لـ 144 هيرتز، علشان تعيش تجربة ممتعة جدًا وأنت بتلعب جيمز أو بتتفرج على أي حاجة في الشاشة، والمعالج القوي من كوالكوم سناب دراجون 865، ومجموعة مميزات كده بتخلي الموبايل ده عليه إقبال كبير من المستخدمين، يا ترى إيه هي المميزات دي!
ده اللي هنعرفه من خلال مراجعة موبايل Mi 10T…
تصميم موبايل Mi 10T:
أولًا خامات الموبايل:
- ضهر الموبايل من الزجاج، وعليه طبقة من Corning Gorilla Glass الجيل الخامس.
- الفريم من المعدن لامع شوية، فيه إنحناءات من الجنب، بس مسطح تمامًا من تحت، يعني لو بتتفرج على فيديو تقدر تثبته على المكتب، أو أي سطح مستوي وتتفرج براحتك من غير ما تحتاج تمسكه بإيدك ودي حاجة لطيفة جدًا بالنسبالي.
التصميم الخارجي:
تصميم الكاميرات:
- الكاميرات الخلفية في نافذة على شكل مستطيل، تصميمها غريب شوية بس شايفه لطيف، وبروزها من الضهر واضح جدًا، بس الجراب بيقلل بروزها شوية.
أبعاد الموبايل:
- الموبايل بييجي بأبعاد 165.1×76.4×9.33 ملم.
- وزن الجهاز 216 جرام.
الموبايل تقيل وشاشته كبيرة، بس مسكته في الإيد ممتازة، وهتحس إنك شايل موبايل محترم وتقفيله كويس جدًا.
شاشة موبايل Mi 10T:
- حجم الشاشة 6.67، بتغطي معظم واجهة الموبايل مع ثقب كاميرا السيلفي شمال الشاشة من فوق.
- الشاشة من نوع IPS LCD.
- الشاشة بتيجي بجودة الـ FHD+ بدقة 1080×2400 بكسل بمعدل كثافة بكسلات 395 بكسل لكل إنش.
- الشاشة جاية بتردد عالي بيوصل لـ 144Hz هيرتز.
- تدعم الشاشة لأبعاد العرض بنسبة 20:9، يعني هتلاقي محتوى أكبر ومتعة أكتر خلال مشاهدة الفيديوهات.
- موجود على الشاشة طبقة حماية من نوع Corning Gorilla Glass الإصدار الخامس، وبتدعم الشاشة أكثر من وضع زي وضع الـ Reading mode 3.0 ووضع الـ Sunlight display 3.0 بالإضافة لخاصية الـ HDR 10.
شاشة Mi 10T بتكون بتردد 144 هيرتز، يعني بقى عندك 144 فريم في الثانية، وأي حركة بتحصل في الموبايل بتكون بسلاسة جدًا من غير أي تقطيعات، وهتلاقي تجربة أفضل بمراحل لو بتلعب جيمز أو بتستخدم شاشة الموبايل عمومًا.
عارف إن الشاشة هنا مش أموليد وIPS LCD لكنها فعلًا جاية بخامات كويسة والألوان تركيزها كويس بردو، واللون الأسود مش قالب على رمادي كده، خامات الشاشة فعلًا نضيفة ومحترمة مش زي خامات الشاشة في موبايلات شاومي اللي بـ 2000 و3000 جنيه.
صحيح إن شاشات الأموليد أفضل من شاشة الـ IPS LCD، المستوى ده من شاشات الـ IPS LCD مقبول جدًا بالنسبالي.
كاميرات موبايل Mi 10T:
الكاميرا الأمامية:
- الكاميرا الأمامية بدقة 20 ميجا بكسل بفتحة عدسة F/2.2 بمستشعر من نوع Samsung S5K3T2.
- بالنسبة لتصوير الفيديوهات الكاميرا الأمامية بتصور بجودة الـ FHD بدقة 1080 بكسل بمعدل التقاط 30 فريم في الثانية، وكمان بتدعم التصوير بجودة الـ HD بدقة 720 بكسل بمعدل التقاط 30 و 120 فريم في الثانية.
الكاميرات الخلفية:
-الموبايل بييجي بكاميرا خلفية ثلاثية.
- الكاميرا الأولى والأساسية في الموبايل بدقة 64 ميجا بكسل بفتحة عدسة F/1.9 بمستشعر من نوع Sony IMX 682.
- الكاميرا التانية بتييجي بدقة 13 ميجا بكسل بفتحة عدسة F/2.4 ودي الكاميرا الخاصة بالتصوير الواسع Ultra wide.
- الكاميرا التالتة بدقة 5 ميجا بكسل بفتحة عدسة F/2.4، ودي الكاميرا الخاصة بتصوير الماكرو بالإضافة لفلاش أحادي من نوع ليد فلاش.
الكاميرات الخلفية بتدعم تصوير الفيديوهات بجودة الـ 8K بمعدل التقاط 24 و 30 فريم في الثانية، وتدعم التصوير بجودة الـ 4K بدقة 2160 بكسل بمعدل التقاط 30 و60 فريم في الثانية، والتصوير بجودة الـ FHD بدقة 1080 بكسل بمعدل التقاط 30 و 60 فريم في الثانية وأخيرًا، تدعم التصوير بجودة الـ HD بدقة 720 بكسل بمعدل التقاط 30 فريم في الثانية.
حاجة كمان وهي إن الكاميرات بتدعم التصوير الـ Slow Motion بجودة الـ FHD بدقة 1080 بكسل بمعدل التقاط 120 و 240 و960 فريم في الثانية الواحدة، وتدعم التصوير بجودة الـ HD بدقة 720 بكسل بمعدل التقاط 120 و 240 و960 فريم في الثانية الواحدة.
الخلاصة من الكلام ده كله، ومن خلال تجربتي للكاميرات، لقيت معالجة الصور مش حلوة نوعًا ما، مع الإضاءة الضعيفة تفاصيل الصورة كلها بتختفي.
بس لما نزلت جوجل كاميرا أخدت بيه صور خرافية من الكاميرا الأساسية بتفاصيل وديناميك رينج كلهم ممتازين، والكلام ده لكاميرا السيلفي كمان، بس للأسف الكاميرا الـ Ultra wide مش بتشتغل مع جوجل كاميرا.
البصمة والزيادات:
البصمة:
البصمة مدمجة مع زر الباور، أدائها سريع جدًا وبتشتغل معاك بكل سلاسة، وفيه أوبشن حلو أوي إنك تبرمج البصمة بالضغط عليها مش باللمس، لو مش عايز الموبايل يفتح بالغلط وأنت بتخرجه من جيبك أو حاجة.
المستشعرات:
- مستشعر التسارع.
- مستشعر التقارب.
- مستشعر البوصلة.
- مستشعر الجيروسكوب.
- مستشعر الضغط الجوي.
الموبايل يدعم الـ IR Blaster، بمعنى إنك تقدر تتحكم في أي أجهزة كهربائية بتدعم الريموت بالموبايل.
صوت موبايلMi 10T:
من أهم الأسباب اللي تخليك تشتري الموبايل هو وجود سماعات ستيريو فيه، بعكس أي موبايل تاني موجود في نفس الفئة السعرية.
السماعة الخارجية العادية وسماعة المكالمات، هتسمع منهم صوت مجسم، عالي، وواضح، يعني هتلاقي تجربة سماعات حلوة أكتر وممتعة جدًا.
أداء موبايل Mi 10T:
- معالج كوالكوم سناب دراجون 865.
- دقة التصنيع 7 نانومتر.
- المعالج ثماني النواة.
- معالج رسومي أدرينو 650 وده نفس المعالج الموجود في الـ Mi 10 والـ Oppo Find X2 Pro.
- مساحة التخزين 128 جيجا بايت من نوع UFS 3.1، مع رامات 8 جيجا بايت من نوع LPDDR 5.
المعالج هنا مش بيستهلك كتير من البطارية، وهيسد معاك أوي سواء كنت بتلعب جيمز كتير أو بتشتغل على الموبايل أو تصفح، أي حاجة هتعملها على الموبايل ده عمومًا، المعالج ده مش هيقصر معاك نهائي، خلطة كده من معالج جبار مع شاشة 144 هيرتز هتلاقي تجربة خرافية وسلاسة رهيبة.
لعبة PUBG كانت شغالة كويس جدًا من غير تقطيع أو تهنيج في الجهاز، إجمالًا سواء في لعب استخدام عادي المعالج كان جبار في الأداء وبسطني أوي، وملاحظتش أي سخونية في الموبايل.
بطارية موبايل Mi 10T:
- بطارية الموبايل بتيجي بسعة 5000 مللي أمبير.
- البطارية من الليثيوم بوليمر، وغير قابلة للإزالة، مع دعمها للشحن السريع بقوة 33 وات.
بطارية كبيرة هتقضي معاك اليوم كامل بدون ما تحتاج انك تشحنها مرة واتنين في اليوم زي الموبايلات اللي بنفس السعر ده.
لما جيت أشحن البطارية من 3% لـ 70% أخدت مني 33 دقيقة بس، وده رقم ممتاز جدًا.
فتح علبة موبايل Mi 10T:
سكرين للموبايل.
رأس شاحن بقوة 33 وات + كابل USB – type c.
جراب ضهر للموبايل.
يوجد تحويلة من منفذ type c الي 3.5 ملم.
دبوس معدني + كُتيب التعليمات.
سعر موبايل Mi 10T:
سعر النسخة الـ 128 جيجا مع رامات 8 جيجا بايت حوالي 6700 جنيه مصري.
الرأي النهائي في موبايل Mi 10T:
المميزات:
يدعم شبكات الجيل الخامس الـ 5G.
يدعم تصوير الفيديوهات بجودة الـ 8K.
يدعم لمبة اشعارات.
تصميم مميز وعصري جدًا مع خامات محترمة جدًا.
سماعات خارجية بصوت ستيريو لتقديم تجربة صوتية مميزة.
بطارية تقدم أداء مميز خلال اليوم فلن تحتاج إلى شحنها أكثر من مرة.
أحد أفضل وأرخص الشاشات التي تدعم الـ 144Hz لتقديم أداء مميز جًدا ولكن بجودة IPS.
يمكنك التحكم في الأجهزة الكهربائية عن طريق هاتفك بفضل الـ IR Blaster.
أحد أقوى الهواتف التي يمكنك الحصول عليها فالمعالج يقدم أداء مميز جدًا بالأخص في الألعاب الثقيلة فهو أفضل معالج لدى كوالكم حاليًا وهو أرخص هاتف حاليًا بهذا المعالج الرائد.
العيوب:
وزن الموبايل ثقيل نسبيًا.
لا يدعم عدسة الكاميرا الزوم الـ Telephoto.
الكاميرا الخلفية بارزة بشكل ملحوظ عن ضهر الموبايل.
يفتقد الهاتف إلى منفذ الـ 3.5 ملم الخاص بسماعات الأذن.
لا يدعم إمكانية زيادة المساحة التخزينية عن طريق كارت ميموري كما أن أكبر نسخة من الهاتف بـ 128 جيجا مساحة داخلية فقط.
كنا نطمح أن يأتي الهاتف بشاشة AMOLED لتقديم أداء أكثر تميزًا.
ضعف أداء الكاميرا السيلفي في التصوير الليلي.
الخلاصة:
موبايل بإمكانيات ممتازة مع سعر شايف إنه كويس جدًا جدًا، وبقت شاومي منفردة بالموبايل ده في المنافسة على الفئة المتوسطة.
يبقى عندك كده بطارية ضخمة وممتازة، وشاشة 144 هيرتز، ومعالج قوي جدًا، وسعر ملوش أي منافس في السوق، بالتالي لو بتفكر تشتري موبايل من الفئة السعرية؛ بنصحك بموبايل Mi 10T قيمة مقابل لا شيء فعلًا.
بالمناسبة أحب أفكرك بخدمة “اختار موبايلك” اللي بيقدمها موقع نــاس فــونــز ليك علشان لو عايز تشتري موبايل ومحتار وسط الماركات الكتيرة الموجودة في الأسواق.
كل اللي هتعمله إنك تعرفنا بالمميزات اللي يهمك وجودها في الموبايل، والعيوب اللي مش عايزها فيه، ودورنا نساعدك تعرف الموبايل الأنسب ليك.