مراجعة موبايل Mi 10T pro
Mi 10T pro

 أعلنت شركة شاومي عن زوج من الموبايلات اللي إحنا بنسميها قاتل الفلاج شيب واللي بتبهرنا شاومي بيها من وقت للتاني…

موبايلات Mi 10T والـ Mi 10T Pro، ومع المقارنة هنلاقي إن Mi 10T pro هو الأفضل بمراحل بسبب التوليفة القوية اللي عملتها شاومي في الكاميرا بتاعته واللي بتستخدم فيها الأداء الممتاز لمعالج كوالكوم الـ Snapdragon 865، والبطارية الضخمة 5000 مللي أمبير، والكاميرا الخلفية الـ 108 ميجا بكسل…

 من الآخر، شاومي قدمت موبايل بمزايا حلوة جدًا، وأعتقد إن وجودك في المراجعة دي أكيد لأنك بتفكر تشتري موبايل ومحتار!

فأنا أنصحك تجرب خدمة “اختار موبايلك” اللي بيقدمها موقع نــاس فــونــز واللي هتساعدك في اختيار أنسب موبايل ليك في السوق من حيث الإمكانيات والسعر اللي يناسبك.

مطلوب منك بس توضح المميزات اللي بتدور عليها في الموبايل، والعيوب اللي تتمنى متلاقيهاش في موبايلك، وإحنا هنرشحلك الموبايل اللي يناسبك مع عرض كل تفاصيله اللي تهمك معرفتها كل اللي عليك أضغط هنـــــا

دلوقت هنكمل مراجعة الموبايل  ونعرف إيه اللي شاومي قدمته في الموبايل من مميزات وإيه النتيجة اللي لقيناها مع تجربة الموبايل!

تصميم موبايل Mi 10T pro:

 

تصميم موبايل Mi 10T pro
تصميم موبايل Mi 10T pro

 

أولًا خامات الموبايل:

خامات الضهر من الزجاج، وعليه طبقة حماية من Corning Gorilla Glass الجيل الخامس، لما تبص فيه هتشوف انعكاسك فيه كأنه مراية.

الفريم معدني من الألومنيوم.

تقفيل الجهاز كويس جدًا بخامات نضيفة، بس أنصحك تركبله جراب متين؛ علشان الضهر ده لو اتكسر هيكلفك كتير جدًا.

التصميم الخارجي

تصميم الكاميرات:

تصميم الكاميرات واخد شكل المستطيل، كاميرا كبيرة وتحتها كاميرتين صغيرتين، تصميم مختلف وداخل في التريند بتاع 2020…

إحنا شايفين تصميم جميل، وجذاب للعين ومش منفر ولا حاجة.

أبعاد الموبايل:

  • أبعاد الموبايل 165.1×76.4×9.33 ملم.
  •  وزن الجهاز 218 جرام، الموبايل تقيل وهتحس بكدا أول ما تمسكه في إيدك ولكن الوزن ده بيدل على مدى قوة الموبايل في الفئة دي بصراحة ولو كان أتقل أنا متأكد إن كنت هشتريه بردو.

الموبايل تصميمه وحجمه مناسب، وشيك جدا، الموبايل تحفة بصراحة، زي ما أطلقت عليه شاومي، ماستر بيس.

شاشة موبايل Mi 10T pro:

سلسلة الـMi 10T جاية بشاشة IPS LCD مش AMOLED هتقولي طيب ليه كده؟

هقولك لو حطوا شاشة AMOLED يبقى الـMi 10 اللي هو الموبايل الرائد بتاعهم هيبقى موقفه ايه؟

ما هو لازم يقللوا حاجة علشان يقدروا ينزلوا بالسعر وإحنا هنا مش بنبرر إحنا بنوضحلك طريقة تفكير الشركة وحرية الاختيار ترجع ليك حسب أولوياتك.

ولكن شاومي مش حاطة أي شاشة IPS LCD هي حاطة واحدة من أنضف الشاشات الـIPS LCD اللي ممكن تشوفها…

  • الشاشة من نوع IPS LCD بمساحة 6.67 إنش.
  •  جودة الشاشة FHD+ بدقة 1080×2400 بكسل بمعدل كثافة بكسلات 395 بكسل لكل إنش.
  • تدعم الشاشة تردد عالي بمعدل 144 هيرتز، والتردد دا بيخلي الشاشة بتسبق صابعك وبمجرد ما بتحرك صابعك على الشاشة، الجهاز بياخد الأوامر وهتلاقي سلاسة حلوة جدًا هنا في الاستخدام.
  •  وكمان الشاشة بتدعم خاصية الـ HDR 10، وتدعم أبعاد العرض بنسبة 20:9، يعني هتعرضلك محتوى أكبر سواء وأنت بتتفرج على فيديوهات أو بتلعب جيمز على الموبايل، أو بتتصفح عادي على النت.
  • الشاشة عليها طبقة حماية من نوع Corning Gorilla Glass الجيل الخامس.
  • الشاشة بتدعم أكتر من وضع زي الـ Reading Mode 3.0 والـ Sunlight Display 3.0.
  • الشاشة عادية ومسطحة يعني مش منحنية.

ألوان الشاشة كويسة وأعلى درجات الإضاءة بتاعتها 600 شمعة، وأقدر أقولك إن الشاشة كويسة ومقبولة وهتلاقي الألوان درجة تشبعها معقول جدا، كمان هتلاقي درجة سطوعها مقبول تحت ضوء الشمس متقلقش منها خالص؛ مش هتضايقك زي الشاشات الـIPS LCD العادية، السطوع متوسط 500 شمعة وبيصل لحد 650 شمعة وده رقم محترم جدًا، وبالتأكيد هو أقل شوية من سطوع الشاشات الـAMOLED الرائدة.

هي بس درجة تشبع الألوان بتاعتها أقل شوية من الـSuper AMOLED ده طبيعي ومنطقي، ومستحيل حد يطلع يقولك إنها بنفس كفاءة الـ Super AMOLED.

كمان تقدر تعدل على ألوان الشاشة نفسها وممكن تشغل وضع RGB، اللى بيشغلك الألوان الأقرب للدرجة الطبيعية بنسبة كبيرة ممكن توصل لـ 99%.

 

شاشة موبايل Mi 10T pro
شاشة موبايل Mi 10T pro

 

لو كنت متعود على الشاشات الأموليد ممكن تتضايق شوية، بس لو العكس الشاشة هتعجبك وهتلاقيها حلوة والإضاءة فيها كويسة وكذلك عرض الفيديو بتاعها حلو، وحجمها الكبير ساعد جدًا في الجزئية دي.

الشاشة ممكن تاخد 7 من 10، وكنت أتمنى لو نوع الشاشة يبقى أموليد، الموبايل ده لو كان فيه شاشة سوبر أموليد، كان هيبقى أحسن من Mi 10 نفسه؛ بس إحنا وضحنالك الجزئية دي من شوية.

كاميرات موبايل Mi10T pro:

الكاميرا الأمامية:

  • كاميرا السيلفي بدقة 20 ميجا بكسل، بفتحة عدسة F/2.2 بمستشعر من نوع Samsung S5K3T2.

تدعم الكاميرا الأمامية تصوير الفيديوهات بجودة الـ FHD بدقة 1080 بكسل، بمعدل التقاط 30 فريم في الثانية، وكمان بيدعم الجهاز التصوير بجودة الـ HD بدقة 720 بكسل، بمعدل التقاط 30 و120 فريم في الثانية.

الكاميرات الخلفية:

الموبايل فيه 3 كاميرات خلفية:

  • الكاميرا الأساسية بتيجي بدقة 108 بكسل بفتحة عدسة F/1.7، بمستشعر من نوع Samsung HMX.
  • الكاميرا التانية بتيجي بدقة 13 ميجا بكسل بفتحة عدسة F/2.4، ودي الكاميرا الخاصة بالتصوير العريض Ultra wide بزاوية 123 درجة، ودي زاوية قوية جدًا.
  • أما الكاميرا التالتة، فدقتها 5 ميجا بكسل بفتحة عدسة F/2.4 ودي الكاميرا الخاصة بالتصوير الماكرو، بالإضافة إلى فلاش أحادي من نوع ليد فلاش. 

الكاميرات بتصور الفيديوهات بجودة الـ 8K  مش الـ 4K بمعدل التقاط 30 فريم في الثانية، ولما تعمل زوم في تصوير الفيديو، هتلاقي تفاصيل أكتر وأوضح فيه.

أول ما تمسك الموبايل وتصور بيه هيصورلك صور 16 ميجا بكسل مش 108 ميجا بكسل، بس لو أنت حابب تصور بالـ 108 ميجا بكسل، هتلاقيه أوبشن في الكاميرا هتضغط عليه وتصور بالـ 108 ميجا بكسل، وتعمل زوم من غير ما تفقد تفاصيل كتيرة في الصورة.

إلى جانب إن التثبيت الإلكتروني هنا كان واضح جدًا.

 

كاميرات موبايل Mi10T pro
كاميرات موبايل Mi10T pro

 

بالنسبة لتجربة الكاميرات، فكانت خُرافية وبتطلع صور بتفاصيل واضحة وواقعية، والألوان طبيعية ولون البشرة طبيعي بدرجة كويسة بردو، ومش بتعمل تجميل زيادة عن اللزوم اللي بيخفي التفاصيل، والوضوح من الصور.

الفكرة هنا إن السوفت وير قدر يعالج الصور بشكل أفضل سواء في التصوير في النهار أو بالليل.

البصمة والزيادات:

البصمة:

بصمة الموبايل جانبية مُدمجة  في زر الباور، واستجابتها سريعة وسلسلة جدًا، والأنيميشن مش بيعلق معاك في البصمة خالص.

المستشعرات:

  • مستشعر التسارع. 
  • مستشعر القرب.
  • مستشعر البوصلة.
  • مستشعر الجيروسكوب.
  • مستشعر الضغط الجوي.

الجهاز بيدعم خاصيتي الـ NFC، وIR واللي بتهتم شاومي بيهم في الفترة الأخيرة بشكل كبير.

صوت موبايل Mi 10T pro:

صوت Mi 10T pro واضح ونقي جدًا وفيه سماعتين، السماعة الأساسية اللي موجودة تحت، والسماعة التانية اللي بتشتغل كسماعة مكالمات ثانوية، فبتلاقي الصوت مجسم ومتوزع كويس أوي.

للأسف، مفيش مدخل الـ 3.5 ملم يعني مش هتعرف تحط السماعات، بس شاومي معوضه ده بإنه بيجي معاه في العلبة وصلة تحويل من USB Type C للـ 3.5 مللي.

أداء موبايل Mi10T pro: 

  • معالج كوالكوم الرائد الـ Snapdragon 865 بتكنولوجيا الـ 7 نانو.
  •  معالج رسومي من نوع Adreno 650، وهو نفس معالج الـ Xiaomi Mi 10T العادي.
  • الذاكرة صلبة بسعة 256 جيجا بايت من نوعUFS 3.1، مع ذاكرة عشوائية بسعة 8 جيجا بايت من نوع LPDDR 5.

مفيش مكان علشان تركب كارت ذاكرة خارجية في النسختين، لكن هتعرف بس تركب خطين في الموبايل يعني من الآخر المعالج ده يقدر يعملك كل حاجة…

تقدر تلعب عليه ألعاب كتيرة وتفتح حوالي 5 ألعاب وتحطهم في الباك جراوند وتلعب على واحدة منهم، ولو أنت واحد جيمر هتقدر تفوز بسهولة على اللي بيلعب قدامك بسبب أداء الموبايل الرهيب…

الجهاز هيبقى بسرعة الصاروخ؛ بفضل المعالج القوي اللي في الموبايل وتردد الشاشة اللي بيوصل لـ 144 هيرتز، هيكون معاك جهاز بأداء جبار سواء في الاستخدام اليومي العادي أو في الألعاب من غير أي تهنيج أو تقطيع فى الموبايل.

 

أداء موبايل Mi10T pro
أداء موبايل Mi10T pro

بطارية موبايل Mi 10T pro:

البطارية تأتي بسعة 5000 مللي أمبير، مع دعم الجهاز للشحن السريع بقوة 33 وات.

البطارية كبيرة، وهتديلك أداء قوي وتفضل معاك فترة طويلة لغاية ما تحتاج تشحنها مرة تانية.

فيه عيب هنا، وهو إن الشاحن بقوة 33 وات ودا موجود في الفئة السعرية  المتوسطة زي 3000 جنيه من موبايلات شاومي، فكنت أتمنى لو يعلى عن كده ويوصل لـ 40 وات مثلًا.

البطارية بتشحن بالكامل في حوالي ساعة و20 دقيقة، وهتفضل معاك حوالي 8 ساعات ونص من الاستخدام المتواصل من شغل أو تصفح على مواقع السوشيال وهتقل شوية مع الاستخدام في الألعاب والمهام التقيلة.

 

بطارية موبايل Mi 10T pro
بطارية موبايل Mi 10T pro

 

فتح علبة موبايل Mi 10T pro:

  •  .Xiaomi Mi 10T Proجهاز 
  • لاصقة حماية.
  • شاحن بقوة 33 وات.
  • سلك USB من نوع Type C.
  • تحويلة لمنفذ الـ Type C إلى الـ 3.5 ملم.
  • جراب ظهر شفاف.
  • دبوس معدني.
  • كتيب التعليمات.

سعر موبايل Mi 10T pro:

  • سعر الموبايل للنسخة 256 جيجا مع 8 جيجا رام بسعر 8400 جنيه.
  •  سعر الموبايل للنسخة الـ 128 جيجا مع 8 جيجا رام بسعر 7000 جنيه.

الرأي النهائي في موبايل Mi 10T pro:

المميزات:

  • يدعم تصوير الفيديوهات الـ 8K.
  • دعم شبكات الجيل الخامس.
  • خامات محترمة جدًا كعادة شاومي من هواتفها الرائدة مع تصميم شيك جدًا.
  • أداء قوي جدًا بفضل المعالج الرائد الـ Snapdragon 865 وبالفعل اداء الهاتف ممتاز إلي اقصى درجة.
  • أحد أفضل وأرخص الشاشات الـ LCD بمعدل تردد 144Hz مع سطوع عالي ومحترم وهي من أسرع الشاشات الموجودة في فئته السعريه.
  • كاميرا الخلفية الأساسية الـ 108 ميجابكسل تقدم أداء مميز جًدا.
  • يدعم لمبة اشعارات.
  • البطارية تقدم أداء ممتاز خلال اليوم فلن تحتاج إلى شحنها أكثر من مرة حتى مع تشغيل معدل التردد العالي.
  • سماعات خارجية بصوت ستيريو لتقديم تجربة صوتية مميزة.
  • يمكنك التحكم في الأجهزة الكهربائية عن طريق هاتفك من خلال الـ IR Blaster.

العيوب:

  • وزنه ثقيل.
  • لا يدعم الشحن اللاسلكي ولكن هذه الميزة تغيب عن معظم الهواتف المنافسة بنفس السعر فلا مشكلة.
  • لا يأتي مقاوم للماء أو الغبار.
  • كاميرا التصوير الواسع لا تقدم الأداء الأفضل.
  • لا يدعم منفذ الـ 3.5 ملم الخاص بسماعات الأذن.
  • لا يمكنك زيادة المساحة التخزينية عن طريق كارت ميموري.
  • كنا نطمح أن يأتي بشاشة AMOLED مع معدل تحديث 90hz حتى فالشاشة الأموليد هي المفضلة لدى معظم المستخدمين.
  • سرعة الشحن الـ 33 واط جيدة ولكننا كنا نطمح في شاحن أسرع ويتم شحن الهاتف في أقل من ساعة.
  • ضعف أداء الكاميرا السيلفي في التصوير الليلي.
  • الفرق بين الـ Mi 10T Pro والعادي هو فقط مستشعر الكاميرا الخلفية الرئيسية و مساحة التخزين.

الخلاصة:

بنشوف إن الجهاز ده  تحفة زي ما شاومي أطلقت عليه فعلًا ويستحق كل جنيه هتدفعه فيه بشرط إنك تكون فاهم أنت بتشتري إيه، يعني نسخة البرو اللي بنتكلم عنها دي مبتختلفش حاجة خالص عن نسخة الموبايل العادية غير في الكاميرا تقريبًا، فلو أنت محتاج الكاميرا اللي في الموبايل ده فهتكون صفقة ممتازة بالنسبة ليك، لكن لو مش محتاج الكاميرا فبرشحلك النسخة العادية بقوة.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *