من فترة مش كبيرة أعلنت شركة إنفنكس عن النسخة الجديدة من سلسلة الـ Note، وهو الـ infinix Note 7 Lite، والشركة وقتها نزلت كمية كبيرة من الأجهزة للحجز المسبق، والإقبال عليها كان كبير، بدرجة إن تم سحب الكمية كلها، وبصراحة الموبايل كان يستاهل، بس الغريب هنا واللي أول مرة يحصل، هو إن إنفنكس نزلت النسخة الـ Lite من الـ Note 7 بسعر ومواصفات أقل…
وعلشان كده هنعرف في مراجعة النهاردة كل مواصفات وإمكانيات النسخة الـ Lite، وبردو هنعرف هل الفرق في المواصفات بين النسخة دي و بين النسخة العادية يستاهل فرق السعر دا ولا لأ!
بس قبل ما أبدأ في أي حاجة خلوني أعرفكم بالخدمة الجديدة اللي بنقدمها، وهي خدمة “اختار موبايلك”،واللي بيقدمها مــــــوقع نـــاس فـون، واللي من خلالها تقدر تكتبلنا كل المميزات والمواصفات اللي عايز تشوفها في الموبايل اللي نفسك تشتريه، وإحنا هنقدملك شرح مفصل عن أنسب موبايل ليك بالتفاصيل المطلوبة وكمان بالسعر المناسب ليك، بس كل اللي عليك إنك تضغط هنــــــا…
تصميم موبايل infinix Note 7 Lite:
أولًا خامات الموبايل:
الخامات هنا مفيش فيها أي جديد، يعني كعادة شركة إنفنكس في إنتاج موبايلاتها، خامات موبايل infinix Note 7 Lite بتييجي من البلاستيك اللامع واللي هيكون معرض للخرابيش والجروح وكمان للتبصيم الكتير، بس ممكن نحافظ عليه من كل دا من خلال الجراب اللي بييجي في العلبة مع الموبايل أوي أي جراب تاني.
ثانيًا التصميم الخارجي:
الكاميرا الأمامية بتييجي في شكل ثقب أعلى الشاشة، مع وجود فلاش أمامي.
أما بالنسبة للكاميرات الخلفية، فهي موجودة في شكل فريم مستطيل في الجانب الشمال، يشتمل الفريم المستطيل على أربع كاميرات مع وجود فلاش رباعي قوي على يمين الكاميرات، وبيكون مكون من أربع قطع من نوع ليد فلاش.
بس للأسف الكاميرات الخلفية هنا بتييجي بارزة شوية عن جسم الموبايل، ودا هيعرضها أكتر للجروح والخرابيش، بس أنت ممكن تحافظ عليها وتركب جراب الموبايل اللي جاي في العلبة أو تشتري واحد تاني المهم تحافظ علي الموبايل.
إحنا بس بنقدملك كل الحلول المناسبة وأنت عليك تختار الأنسب ليك.
الأبعاد والألوان:
- الموبايل هنا جاي بأبعاد 165.4×76.8×8.75 ملم.
- وزن الجهاز 158 جرام، الموبايل يتميز بإن وزنة مناسب جدا، يعني مش هتقابل أي مشاكل في الاستخدام لفترات طويلة، أو حتي أثناء اللعب.
- ألوان الموبايل باللون الأخضر وباللون البنفسجي وباللون الأسود، وهيجميلة وجذابة بس يعتبر مفيش فيها اختلاف أوي، يعني هي هي نفس الألوان المتكررة في إصدارات إنفنكس وإصدارات الشركات التانية.
شاشة موبايل infinix Note 7 Lite:
- الشاشة هنا بتييجي بشكل الثقب الصغير، والشركة أطلقت اسم تاني عليه وهو الـ Infinity O، وبتييجي من نوع TFT LCD، بمساحة 6.6 إنش بجودة الـ HD+، بدقة 720×1600 بكسل، بمعدل كثافة بكسلات 266 بكسل لكل إنش.
- تدعم الشاشة هنا أبعاد العرض الجديدة بنسبة 20:9، وده هيبقي كويس جدًا للفئة اللي بتحب تتفرج كتير على الفديوهات، أو الألعاب، ودا بيوضح لنا قد إيه الشركة بتهتم برغبة المستخدمين.
- هنا فيه ميزة حلوة وهي إنك ممكن تلغي أزرار التحكم من الإعدادات وتستخدم الإيماءات، وكدا هتقدر تستخدم مساحة أكبر من الشاشة.
- الشاشة هنا كمان بتدعم التحول إلى الوضع المظلم بالكامل الـ Dark Theme، واللي بتدور علية ناس كتير دلوقتي بعد ما جربوة سواء كان في الوتساب أو غيرة… وحبوه جدًا، وهنا قالت الشركة إن الشاشة تحتل مساحة 90.5% من الواجهة الأمامية للموبايل.
- الشاشة هنا تختلف شوية عن شاشة الـ Lite، والاختلاف هنا في إنها صغيرة بالنسبة للنسخة الـ Lite بس مش بالنسبة للموبايلات التانية، فهي ما زالت كبيرة.
- بالنسبة لحواف الشاشة، فهي بتييجي بحواف دائرية وبكرفات من الضهر بس دا علشان تقدر تمسك الموبايل كويس في إيدك.
بس للأسف مفيش هنا أي طبقة حماية على شاشة الموبايل، ولكن فيه اسكرينة من البلاستيك بتييجي في علبة الموبايل، والألوان هنا درجة التشبع فيها مش كبيرة أوي وبالنسبة للأيقونات، والكلام المكتوب على الشاشة، فهتظهروا بشكل كويس بس مش هيكونوا أفضل حاجة، ولإن دقة الشاشة قليلة شوية، فمستوى الرؤية تحت أشعة الشمس المباشرة مش هيبقى كويس خالص، بس المميز هنا هو إن الشاشة كبيرة، وحوافها تُعتبر صغيرة مع الثقب الموجود في أعلى الشاشة.
على العموم، احنا شايفين الشاشة كويسة ومقبولة بالنسبة لسعر الموبايل المعروض.
كاميرات موبايل infinix Note 7 Lite:
الكاميرا الأمامية:
- الكاميرا الأمامية جاية بدقة 8 ميجا بكسل، مع وجود فلاش أمامي وتدعم الذكاء الاصطناعي.
الكاميرات الخلفية 4 كاميرات…
- الكاميرا الأولى، بتييجي بدقة 48 ميجا بكسل، وهي الكاميرا الأساسية للموبايل، وبفتحة عدسة F\1.8.
- الكاميرا الثانية، بتييجي بدقة 2 ميجا بكسل، وبفتحة عدسة F\2.4، وخاصة بالتصوير الماكرو.
- الكاميرا الثالثة، دقتها 2 ميجا بكسل، وهي خاصة بعمل العزل والبورتريه، بفتحة عدسة F\2.4.
- الكاميرا الرابعة والأخيرة، بتييجي بدقة QVGA، وهي الخاصة بالتصوير في الإضاءة المنخفضة، بالإضافة إلى وجود فلاش رباعي من نوع ليد فلاش.
يدعم الموبايل تصوير الفيديوهات بجودة الـ FHD، بدقة 1080 بكسل، بمعدل التقاط 30 إطار في الثانية، ويدعم التصوير الـ HD، بجودة 720 بكسل بمعدل التقاط 30 إطار في الثانية.
الكاميرا الخلفية هنا بتقدم أداء كويس جدًا في الاضاءات النهارية، الشاشة هتقدملك أدء كويس جدًا بالنسبة لضوح ألوانها وتفاصيلها، هتلاحظ إن في الاضاءات الضعيفة الجودة بتقل وبيظهر تشويش في الصورة؛ ودا علشان فتحة العدسة الواسعة، وكمان علشان الموبايل مبيدعمش وضع الـ Super Night Mode، وتقدر كمان باستخدام كاميرا الماكرو تاخد صور بجودة عظيمة، وبكمية تفاصيل كتيرة…
أما بقى بالنسبة لوضع العزل والبورتريه، فالموبايل بيقدر يحدد أطراف الصور ويعزل الخلفية بشكل كويس ومقبول جدًا، ودا طبعًا في نطاق الفئة السعرية اللي هو موجود فيها.
نييجي بقى لتصوير الفيديوهات، هتلاحظ إن جودة الفيديوهات هتكون مهزوزة شوية، ودا لأن الموبايل مبيدعمش التثبيت الإلكتروني.
بالنسبة للكاميرا الأمامية، يُعتبر نفس الكلام ينطبق عليها يعني في إضاءة النهار هتقدملك أداء كويس لكن في الإضاءة المنخفضة، الجودة والتفاصيل هتقل معاك بشكل طبيعي.
البصمة والزيادات:
البصمة:
البصمة هنا كسرت القاعدة زي ما بيقولوا، يعني احنا بنشوفها في معظم الموبايلات في ضهر الموبايل، بس في الموبايل دا البصمة موجودة في جنب الموبايل مدمجة بزر الباور، وكمان الموبايل يدعم خاصية الـ Face Unlock وتُسمى بالعربي بصمة الوجه، اللي أصبحت معتادة في تصميم أي موبايل دلوقتي.
مع استخدامي للبصمة، بصراحة أداءها كويس جدا، وسريعة، يعني مش هتواجه أي مشاكل فيها.
الموبايل بيدعم بعض المستشعرات:
1.مستشعر التقارب.
2.مستشعر التسارع.
3.مستشعر البوصلة.
4.مستشعر جيروسكوب اللي بيشتغل عن طريق السوفت وير، الخاص بتشغيل الواقع الافتراضي الـ VR.
الجهاز يدعم وجود شريحتين اتصال من النوع Nano Sim، وكذلك يدعم وجود كارت ميموري؛ لإمكانية زيادة المساحة بسعة تصل إلى 256 جيجا بايت.
بالإضافة إلى إن الموبايل يدعم شبكات الجيل الثاني، الثالث، والرابع.
وبييجي بنظام تشغيل أندرويد 10، مع واجهة إنفنكس الأحدث الـ XOS 6.0.1 .
دا إلى جانب دعم الموبايل لراديو FM.
كمان الموبايل يدعم الاتصال السريع بالواي فاي بترددات الـ b/g/n\ac\a، ويدعم أيضًا خاصية الهوت سبوت، والـ Wi-Fi Direct.
كما يدعم البلوتوث بإصدار 5.0
ويدعم موقع تحديد الـ GPS.
الموبايل يدعم منفذ الـ 3.5 ملم الخاص بالهاند فري، وكمان يدعم خاصية الـ DTS Audio، اللي بتساعد الجهاز في إنه يقدم تجربة صوتية ستيريو مميزة.
أما عن منفذ الـ USB، كالعادة هو من النوع التقليدي الـ Micro USB بالإصدار الثاني بجانب دعم الموبايل لخاصية الـ OTG.
بطارية موبايل infinix Note 7 Lite:
البطارية هنا حجمها كبير جدًا يعني هتقعد معاك يوم كامل؛ لأنها بسعة 5000 مللي أمبير، بس للأسف الموبايل هنا مبيدعمش الشحن السريع؛ ودا لأن قوة الشحن الخاصة بها 10 وات بس، ودا هيخلي شحن الموبايل بطيء شوية، يعني الموبايل بيشحن من 0 إلي 100% خلال ساعتين و40 دقيقة.
أداء موبايل Infinix Note 7 Lite:
الموبايل هنا بييجي بمعالج من شركة ميديا تيك من نوع Helio P22، بتكنولوجيا 12 نانو، وهو نفس معالج الموجود في الـ سامسونج A10s، والـ Realme C2، والـ Oppo A1k.
أما بالنسبة للمعالج الرسومي، فهو بييجي من نوع PowerVR GE8320.
وبالنسبة لأداء الموبايل، فهو هيقدملك أداء مُرضي وكويس بس في استخدام المهام اليومية الخفيفة زي تطبيقات السوشيال ميديا، وكمان هتقدر تفتح أي تطبيقات في الخلفية وتتنقل بينهم بكل سهولة من غير أي تهنيج في الموبايل، بس يُستحسن إنها متكونش تطبيقات تقلية أوي.
أما بالنسبة لأداء الموبايل في الألعاب، فهو كالعادة هيقدم أداء كويس في استخدامك للألعاب الخفيفة والمتوسطة من غير أي تهنيج في الموبايل بس أكيد في الألعاب التقيلة، هتلاقي تهنيج في الموبايل وسقوط في فريمات الجهاز وهكذا…
من الآخر ومن غير أي مجاملة في الكلام، احنا شافين إن المعالج مش كويس أوي في الفئة السعرية دي، يعني هيقدملك أداء متواضع جدًا، بس لو أنت عاوز موبايل يقدملك أداء كويس بالذات في الألعاب يبقي هتشوف حاجة تانية أكيد.
فتح علبة موبايل infinix Note 7 Lite:
موبايل infinix Note 7 Lite.
هاند فري.
كتيب ضمان وتعليمات يشرح كيفية استخدام الجهاز.
اسكرينة بلاستيك لحماية الجهاز لحد ما تجيب واحدة أفضل منها.
رأس شاحن بقوة 10 وات، ودا هيخلي شحن الموبايل بطيء نوعًا ما.
دبوس معدني لفتح مكان الشريحة والكارت الميمورى.
جراب موبايل شفاف.
كابل USB من نوع Micro USB، ودا نوع قديم.
سعر موبايل Infinix Note 7 Lite:
سعر الموبايل هنا حوالي 2300 جنيه مصري لنسخة 128 جيجا بايت، مع 4 جيجا رام.
الرأي النهائي في موبايل Infinix Note 7 Lite:
المميزات:
مستشعر البصمة سريع وبييجي بشكل جديد.
يدعم الموبايل تشغيل شريحتين اتصال وكارت ميموري؛ لزيادة المساحة في الوقت نفسه.
يعتبر الموبايل من أرخص الموبايلات اللي بمساحة 128.
صوت الموبايل عالي وقوي في الفئة السعرية دي.
أداء الكاميرا يُعتبر أداء مقبول بالنسبة لسعر الموبايل المعروض.
حجم بطارية كبير وكذلك الشاشة كبيرة زي ما اتعودنا من شركة إنفنكس.
العيوب:
لا يدعم الموبايل كاميرا التصوير الواسع.
منفذ USB بييجي من النوع القديم الـ Micro USB، يعني كالعادة مفيش جديد.
جودة تصوير الفيديوهات بالموبايل دا مش حلوة.
قوة الشحن ضعيفة.
خامات الموبايل من البلاستيك اللامع.
أداء المعالج متواضع.
الكاميرا الخلفية بارزة بشكل كبير عن ضهر الموبايل.
الخلاصة:
من الآخر، لو أنت مش مهتم بالأداء ومش مدمن ألعاب، فالموبايل يُعتبر صفقة كويسة جدًا ليك…
يعني الموبايل صفقة كويسة في أداء أي غرض باستثناء اللعب والشغل التقيل عليه.