نبدأ مراجعة النهاردة مع موبايل infinix HOT 9…
في الفترات الأخيرة شركة إنفنكس نزلت موبايلات كتير في مصر، وبالأخص في الفئات الاقتصادية واللي إحنا عملنا مراجعات على معظمهم بس النهاردة انضم لسلسة الـ HOT من إنفنكس، موبايل جديد اسمه infinix HOT 9 اللي هنتكلم عنه بالتفصيل دلوقتي.
علشان ماخدش من وقتكم كتير تعالوا ندخل على مراجعة الموبايل ونشوف إيه هي مميزاته وإيه هي عيوبه!
بس خلوني الأول أكلمكم عن الخدمة اللي بنقدمهالكم هنا، وهي خدمة “اختار موبايلك”، واللي بيقدمها مــــــوقع نــــاس فــون، الموبايلات بيختلف اختيارها على حسب الشخص اللي عايزها؛ لأن كل شخص بيبقى عايز مواصفات وإمكانيات معينة في الجهاز اللي ناوي يشتريه، وهنا تقابلك مشكلة وهي اختيار جهاز واحد من بين كل الأجهزة الموجودة في السوق دي، وتتساءل ياتري إيه الموبايل الأنسب بالنسبالى!
هنا ييجي دورنا إحنا، كل اللي عليك هو إنك تكتب كل المواصفات والإمكانيات اللي عايز تشوفها في الموبايل بتاعك وهتلاقي كل التفاصيل موجودة ومن هنــــــــــــــا… تقدر توصل لأنسب موبايل ليك.
تصميم موبايل infinix HOT 9:
أولًا خامات الموبايل:
زي ما اتعودنا من سلسلة الـ HOT من إنفنكس على إن خامات التصنيع بتبقى من البلاستيك اللامع.
بس احنا هنا شايفين إن التصميم كشكل حلو، ومناسب بالنسبة للفئة السعرية اللي هو نازل فيها، التعليق الوحيد هو إن خامات التصنيع هنا من البلاستيك اللامع، واللي هيدي فرصة كبيرة لتبصيم الموبايل، ولكن ممكن نعالج النقطة دي بالجراب السليكون اللي بييجي مع الموبايل أو أي جراب تاني.
ثانيًا التصميم الخارجي:
تصميم الكاميرات:
الموبايل فيه أربع كاميرات خلفية مرصوصين في شكل مستطيل بس المميز هنا، هو إن بروز الكاميرات خفيف جدًا، ودا يعتبر ميزة ممتازة من إنفنكس؛ علشان دا مش هيدي الفرصة لتجريح الكاميرا، وهيساعد إفي حمايتها من أي خدوش أو تجريح، وكمان فيه فلاش ثلاثي من نوع ليد فلاش.
أما بالنسبة للكاميرا الأمامية، فهي بتييجي في شكل دائرة في الجنب الشمال من الموبايل في أعلى الجهاز، المهم هنتكلم عن شرح الكاميرات بالتفصيل بعدين.
الأبعاد والألوان:
الموبايل هنا بييجي بأبعاد 165.4×76.8×8.8 ملم.
وزن الموبايل هنا 185 جرام، ودا أكيد وزن خفيف، وهيبقى سهل في التعامل، ومريح لو استخدمته لفترات طويلة.
الموبايل هنا بييجي بألوان مميزة وجذابة زي:
اللون الأخضر، واللون البنفسجي وكمان اللون الأسود، والأزرق.
شاشة موبايل infinix HOT 9:
الشاشة في موبايل إنفنكس بتييجي بشكل الثقب زي اللي شوفناه قبل كدا في الـ infinix S 5، نوع الشاشة IPS LCD، بمساحة 6.6 إنش بجودة الـ HD+ بدقة 720×1600 بكسل، بمعدل كثافة بكسلات 268 بكسل لكل إنش.
الشاشة هنا بتدعم الأبعاد الجديدة وهي 20:9.
الشاشة دايما بتكون حاجة مهمة جدًا عند الناس اللي بتشتري موبايلات في الفئة الاقتصادية، وبالرغم من إن الشاشة هنا من حيث المواصفات والشكل ما قدمتش جديد، بس تجربتنا معاها واللي شوفناها في التصميم بالرغم من إن جودتها HD+، بس بالنسبة للناس اللي بتستخدمها في مشاهدة اليوتيوب والأفلام، وكمان الألعاب فهي هتأدي أداء مرضي جدًا.
العيب اللي في شاشة إنفنكس، هو إن مستوى السطوع بتاعها مش أفضل حاجة، ودا طبعًا هيأثر على الأداء وقت استخدمها في الشمس، بس عمومًا هي كويسة بالنسبة للفئة السعرية اللي هي فيها.
بالنسبة للحواف، فهي تعتبر مقبولة وبييجي فيها من الأعلى ثقب واللي أكيد شوفناه في الفترات الأخيرة في كتير من الموبايلات.
كاميرات موبايل infinix HOT 9:
الكاميرا الأمامية:
بتييجي بدقة 8 ميجا بكسل، وتدعم الذكاء الاصطناعي.
الموبايل بييجي بـ4 كاميرات خلفية:
الكاميرا الأولى، بتييجي بدقة 16 ميجا بكسل، وهي كاميرا أساسية للموبايل.
الكاميرا الثانية، هي كاميرا خاصة بتصوير الماكرو، وبتييجي بدقة 2 ميجا بكسل.
الكاميرا الثالثة، بتييجي بدقة 2 ميجا بكسل، وخاصة بعمل العزل والبورتريه.
الكاميرا الرابعة، وهي عبارة عن مستشعر “Low light camera “ للتصوير في الإضاءة المنخفضة، مع وجود فلاش ثلاثي من نوع ليد فلاش.
الموبايل يدعم تصوير الفيديوز بجودة الـ FHD، بدقة 1080 بكسل، بمعدل التقاط 30 إطار في الثانية الواحدة.
بالنسبة للكاميرا الأساسية، فطول ما أنت بتصور بيها في إضاءة النهار، هتلاقي النتائج اللي طالعة منها كويسة جدًا، وفيها تفاصيل إلي حدٍ ما كويسة، لكن الاستخدام بتاعها في الإضاءات المنخفضة أو التصوير بالليل، فالنتائج مش هتبقي حلوة أوي.
أما الكاميرا الأمامية، فهو هو نفس الكلام اللي بينطبق على الكاميرا الأساسية بينطبق عليها.
وبالنسبة للكاميرات التانية، فأنا حسيتها كاميرات تسويقية مش أكتر من كده، يعني محستش بوجود فرق وأنا بتصور بيها خالص.
البصمة والزيادات:
البصمة:
البصمة هنا بتييجي بالشكل التقليدي اللي يعتبر بقى موجود في كل الموبايلات، واللي من خلال تجربتنا معاها كانت سريعة، وكمان فيه بصمة الوجه اللي بردو أصبحت معتادة في تصميم أي موبايل، ومن خلال تجربتنا مواجهنيش معاها أي مشاكل.
الموبايل بيدعم بعض المستشعرات:
مستشعر التسارع.
مستشعر التقارب.
مستشعر البوصلة.
مستشعر الجيروسكوب، وهو خاص بنظارات الواقع الافتراضي الـ VR.
يدعم الموبايل الميكروفون الثانوي الخاص بعزل الضوضاء وقت استخدام الموبايل بصفة عامة، وكمان الموبايل يدعم منفذ الـ 3.5 ملم الخاص بسماعات الأذن، وموجودة في الأسفل بجانب الـ USB.
يدعم أيضًا الواي فاي بترددات الـ a/b/g/n/ac/ax، بالإضافة لدعمه للهوت سبوت، “Dual-band, Wi-Fi Direct”.
البلوتوث يأتي بالإصدار الأحدث الـ 5.0، كما يدعم الـ A2DP, LE.
أداء موبايل infinix HOT 9:
الأداء في الموبايل دا بييجي بمعالج من شركة ميديا تيك الحديث من نوع Helio A25، بتكنولوجيا 12 نانو.
أما عن المعالج الرسومي، فهو من نوع PowerVR GE8320، والمعالج الرسومي هنا هو نفسه اللي الموجود في إنفنكس هوت 8 القديم والـ Honor 8A.
وكمان الموبايل بيدعم وضع تعزيز أداء الألعاب عن طريق الـ Game Mode.
هوت 8 هنا بييجي بذاكرة من نوع 5.1 EMMC، بذاكرة 64 جيجا، وذاكرة عشوائية 4 جيجا رام.
إنفنكس هنا لما قررت تغير المعالج غيرت الاسم بس؛ علشان هي عملت معالج بيدي نفس الأداء اللي كان موجود في الموبايلات التانية.
4 جيجا رام، و64 جيجا مع المعالج دا هيأدوا أداء مش سيء بس في المهام اليومية، بمعنى إنك هتقدر تستخدم الموبايل بشكل طبيعي جدًا في السوشيال ميديا، ومشاهدة اليوتيوب، وغيره… وكمان خلال استخدامك ليه في الألعاب الخفيفة، لكن بالنسبة للألعاب التقيلة زي بابجي، فالموبايل هيشغلها علشان الـ 4 جيجا رام بس على أقل جودة ليها، ويُفضل إنك تستخدم النسخة الـ Lite علشان تشتغل معاك كويس.
بالنسبة لتجربة الموبايل في الصوت، فالصوت عالي جدًا وممتاز علشان جاي من ستريو بتقنية الـ DTS Audio.
في النهاية وبشكل عام المعالج الموجود مع الـ 4 جيجا رام، هيكون مناسب جدًا طول ما أنت بتستخدم الموبايل في المهام اليومية، إنما لو هتشتري الموبايل للألعاب التقيلة، فالموبايل مش هيبقي مناسب أبدًا لحاجة زي دي.
بطارية موبايل infinix HOT 9:
البطارية هنا بتييجي بسعة 5000 مللي أمبير، ودا أكيد من غير أي كلام حجم كبير وهيساعدك في إنك تستخدم الموبايل لفترات طويلة، وقوة الشحن هنا 10 وات، ودا هيخلي الشحن بطيء نسبيًا، ومنفذ الشحن من نوع Micro USB، ودا نوع قديم جدًا.
سعر موبايل infinix HOT 9:
السعر لنسخة 64 جيجا، مع 4 جيجا رام حوالي 2000 جنيه مصري.
الرأي النهائي موبايل infinix HOT 9:
المميزات:
تصميم جميل وبشكل حديث مع ألوان جذابة.
تجربة الصوت عالية وممتازة.
البطارية بتستمر لفترة طويلة من غير ما تفصل.
البصمة هنا سريعة ومقبولة مقارنةً بسعر الموبايل.
وجود شريحتين اتصال، وكارت ميموري في نفس الوقت .
الشاشة هنا كبيرة على شكل الثقب شبه الموبايلات الأغلى منه في السعر.
الجهاز جاي بأحدث نظام تشغيل أندرويد 10 مع واجهة إنفنكس الـ XOS 6.
العيوب:
منفذ الـ USB بييجي بنوع قديم جدًا وهو Micro USB.
الشحن بياخد وقت طويل، ودا علشان قوة الشحن 10 وات.
مفيش في الموبايل ميكروفون إضافي خاص بعزل الضوضاء وقت استخدام الموبايل.
فيه موبايلات تانية دلوقتي بمعالج أقوى في نفس الفئة السعرية اللي بييجي فيها الـ Hot 9 ريلمي C3.
الخلاصة:
من الآخر لو مش ناوي تستخدم الموبايل في الألعاب والتصوير، فالموبايل هيقدم لك أداء كويس جدًا بالنسبة للبطارية والمساحة، وأعتقد إنه صفقة كويسة جدًا بالنسبة لسعره المعروض في الفئة السعرية دي.