مراجعة موبايل سامسونج A11
سامسونج A11

قدرت شركة سامسونج إنها تنتج موبايل سامسونج A11 لتطوير نسخة أحدث وأفضل من Samsung Galaxy A10s، مع شاشة ثقب Infinity O، ومع كاميرا خلفية ثلاثية، أيضًا مع منفذ Type C، وبطارية بسعة 4000 مللي أمبير.

خلينا نشوف ونتعرف على المواصفات الموجودة في الجهاز وإيه هي أهم مميزاته وعيوبه؟!

وهل فعلًا يستحق نشتريه ونقيمه من ضمن الأفضل في فئته حاليًا في السوق ولا لأ؟ 

دا اللي هنشوفه دلوقتي في مراجعة الموبايل سامسونج A11…

تصميم موبايل سامسونج A11:

أولا خامات الموبايل:

بنشوفها مختلفتش كتير في التصميم عن المعتاد في الفئة السعرية دي، وأعتقد سامسونج مأبدعتش في التصميم بالشكل الكافي المرة دي، وممكن دا بيرجع لإن الموبايل أصلًا اقتصادي فموارد الشركة بتكون محدودة شوية.

استخدمت سامسونج البلاستيك في تصنيع الموبايل بالكامل في الفئة الجديدة اللي أصدروها. 

 

تصميم موبايل سامسونج A11
تصميم موبايل سامسونج A11

 

ثانيًا التصميم الخارجي:

تصميم الكاميرات:

طورت شركة سامسونج من طريقة تصميمها للشكل الخارجي لـ سامسونج A11 ودا كان عن طريق تنفيذها لكاميرا ثلاثية على شمال ضهر الموبايل واللي بشوفها خطوة كويسة من سامسونج في الفئة السعرية دي علشان تقدر تنافس من جديد.

أبعاد الموبايل:

  • أما الأبعاد اللي بييجي بيها الموبايل فهي 8×76.3×161.4.
  • بشوف إن وزنه كويس ومناسب ودا بيخليه خفيف في الإيد وبييجي بوزن 177 جرام. 

شاشة موبايل سامسونج A11:

الشاشة هنا جاية على شكل الثقب أو زي ما بتسميها سامسونج الـ Infinity O،  كمان سامسونج وفرت الشاشة، من نوع TFT LCD، بمساحة 6.4 إنش، بجودة الـ HD+ بدقة 720×1560 بيكسل، واللي بتييجي بمعدل كثافة بيكسلات يساوي 268 بيكسل لكل إنش، وتدعم أبعاد العرض بنسبة 19.5:9.

الشاشة بتدعم السطوع التلقائي بالإضافة لدعمها إلى الوضع الأسود الـ Dark Mode لتحويل الموبايل بالكامل إلى اللون الأسود مع التحكم الكامل في حجم ونوع الخط المعروض على الشاشة.

وكمان تقدر تلغي  أزرار التحكم علشان تستمتع بشاشة كاملة عن طريق استبدال الأزرار بالإيماءات والتحكم الكامل في الموبايل عن طريق الإيماءات.

 

شاشة موبايل سامسونج A11
شاشة موبايل سامسونج A11

 

وطبعا تصميم الشاشة هنا كان من ضمن المميزات اللي أبهرتنا بيها شركة سامسونج لأن من الصعب إنك تلاقي موبايل بشاشة ثقب في فئته السعرية دي، وبيقدم تجربة الشاشة الكاملة بالشكل دا. 

قبل ما نبدأ في مراجعة الكاميرات خلينا نتكلم عن خدمة “اختار موبايلك”، واللي بيقدمها موقع نـاس فـــونـز علشان نساعدك في اختيار أنسب موبايل ليك، كل اللي عليك تعمله إنك تبعتلنا الميزانية بتاعتك وأهم احتياجاتك في الموبايل وإحنا هنرشحلك أحسن موبايل ليك، اضغط هنـــــا… علشان تشوف خدمة اختار موبايلك.

نكمل مراجعتنا…

كاميرات موبايل سامسونج A11:

الكاميرا الأمامية:

هي كاميرا وحيدة موجودة في شكل ثقب فوق على شمال الموبايل، بدقة 8 ميجا بكسل، ودي بتيجي بفتحة عدسة f\2.0.

الكاميرات الخلفية:

طورت شركة سامسونج من طريقة تصميمها للشكل الخارجي للجهاز بتاعنا هنا سامسونج A11 ودا كان عن طريق تغييرها لتصميم الكاميرا زي ما قولنا فوق، مكان الكاميرات بارز بشكل بسيط عن ضهر الموبايل، خلينا نشوف مراجعة الكاميرات التلاتة مع بعض…

  • الكاميرا الأولى،هي الكاميرا الأساسية للموبايل، بدقة 13 ميجا بيكسل، وبفتحة عدسة f\1.8.
  • الكاميرا الثانية للموبايل، ودي تخصصت للتصوير الواسع، بدقة 5 ميجا بكسل، وبفتحة عدسة f\2.2.
  • الكاميرا التالتة والأخيرة للموبايل، ودي كاميرا متخصصة في العزل والبورتريه مع فلاش أحادي من نوع ليد فلاش.
  • الكاميرات بتدعم خاصية الــ live focus للعزل بشكل فوري في نفس اللحظة، بالإضافة إلى إمكانية عمل زوم أو تقريب حتى 8 مرات.

مع شوية مميزات تانيه زي :

  • الموبايل بيقدر يصور الفيديوهات بجودة الـ FHD بدقة 1080 بكسل، بمعدل التقاط 30 إطار في الثانية.
  • وكمان التصوير بجودة أقل شوية وهي الـ HD  بدقة 720 بكسل، بمعدل التقاط 30 إطار في الثانية.

 

كاميرات موبايل سامسونج A11
كاميرات موبايل سامسونج A11

 

في المجمل حاولت سامسونج إنها تعمل نقلة في موبايلاتها الموجهة للفئة الاقتصادية، وأشهد لسامسونج إنها حطت مجهود كبير في الكاميرات بتاعة الموبايل دا، ولو هنقيم الكاميرات نفسها فالكاميرات في سامسونج A11 بتديك صور كويسة جدا في الفئة دي، والألوان بتاعتها حلوة ممكن لو هنقارنها بموبايلات أعلى منها هتكون أسوأ أكيد ولكن هي كافية جدًا في الموبايل دا بالسعر دا.

البصمة والزيادات:

البصمة:

وسائل الحماية والأمان في الموبايلات حاليًا بتطور بشكل سريع، من مجرد باسورد بعد كدا نمط للحماية والأكثر شيوعًا حاليًا بصمة الإصبع.

الموبايل هنا بيدعم بصمة الإصبع بمستشعر في ضهر الموبايل ولكن سامسونج مكتفتش بمجرد بصمة الإصبع لأ، سامسونج قررت تكون مميزة شوية وأضافت كمان ميزة بصمة الوجه، واللي تقدر بيها تفتح الموبايل بتاعك بمجرد ما تبصله بس فبيقوم بالتعرف عليك والفتح بسرعة، ولكن أنا شخصيًا بفضل بصمة الإصبع التقليدية وكنت شايفها كافية جدًا هنا.

المستشعرات:

  1.   مستشعر التقارب.
  2.   مستشعر التسارع.
  3.   مستشعر الـ Gyroscope.

    4. مستشعر بصمة الإصبع المثبتة في ضهر الموبايل.

    5.  مستشعر الضوء.

صوت الموبايل:

  • تجربة الموبايل في المكالمات كانت سلسة جدًا، يمكن اللي ساعد على كدا وجود ميكروفون العزل اللي بيعزل الضوضاء المحيطة بالشخص وبيفلتر الصوت وبيوصله للشخص التاني نقي بدون أي دوشة حواليك، كمان السماعات قدمت تجربة مميزة الحقيقة ومكنتش متضايق منها.
  • ومن أكتر الحاجات اللي بتعجبني في أي موبايل مهما كان هو وجود مدخل الـ 3.5 ملي للهاند فري، لأن أنا من هواة السماعات السلكية وبفضل دايمًا المدخل التقليدي دا.

الموبايل بيدعم: 

  • شريحتين من نوع Nano sim وده بيديك القدرة إنك تخصص شريحة لشغلك وشريحة خاصة مثلًا أو أيًا كان استخدامك ودي من الحاجات اللي بعتبرها حاجة مميزة في الجهاز.

شبكه الموبايل: 

يدعم الموبايل تشغيل شريحتين إتصال من نوع Nano Sim.

يدعم شبكات الاتصال الجيل الثاني الـ 2G، والجيل الثالث الـ 3G، والجيل الرابع الـ 4G.

أيضًا يدعم الموبايل منفذ الـ 3.5 ملم الخاص بسماعات الاذن.

يدعم الواي فاي بترددات الـ b/g/n، مع دعمه لخاصيتي الـ Wi-Fi Direct, hotspot.

البلوتوث بييجي بإصدار 4.2، مع دعمه لخاصيتي الـ A2DP, LE.

يدعم تحديد الموقع الجغرافي الـ GPS، كما يدعم أنظمة تحديد الملاحة الأخرى مثل الـ A-GPS, GLONASS, GALILEO, BDS.

الموبايل بييجي بنظام تشغيل اندرويد 10، مع واجهة سامسونج الـ One UI 2.0.

يتوفر الموبايل باللون الأسود، وباللون الأبيض، وباللون الأزرق، وباللون الأحمر.

أداء موبايل سامسونج A11:

  • تميز سامسونج A11 إنه جه بمعالج من شركه كوالكم من نوع 450 snapdragon، بتكنولوجيا 14 نانو، مع معالج رسومي من نوع 506 adreno ، ودا كان نفس معالج الـ samsung galaxy m 11، والـ samsung galaxy A20s.
  • الذاكرة الصلبة بتييجي من نوع 5.1 eMMC.
  • ذاكرة داخلية 32 جيجابايت.
  • ذاكرة عشوائية “الرام” 2 جيجابايت.

 

أداء موبايل سامسونج A11
أداء موبايل سامسونج A11

 

وللأسف المعالج هنا قديم شوية دا غير إنه مش الأقوى حاليًا في الفئة السعرية دي.

بطارية موبايل سامسونج A11:

بعتبرها من المميزات التي يتميز بيها الموبايل…

تميزت البطارية بإنها 4000 مللي أمبير مع دعمه للشحن بقوة 15 وات واللي تعتبر حاجة قوية جدًا في الفئة دي!

 

بطارية موبال سامسونج A11
بطارية موبال سامسونج A11

سعر موبايل سامسونج A11:

السعر حوالي 1990 جنيه مصري لنسخة الـ 32 جيجا مع 2 جيجا رام.

محتويات علبة موبايل سامسونج A11:

  1. موبايل سامسونج A11.
  2. شاحن بقوة 15 وات.
  3. هاند فري.
  4. كابل الـ USB من نوع Type C.
  5. دبوس معدني .
  6. كتيب كيفية استخدام الموبايل والضمان.

 الرأي النهائي في موبايل سامسونج A11:

سامسونج قدرت تقدم تحديث كويس جدًا في إصدارها للفئة دي، ولكن على الرغم من وجود مميزات كويسة ومختلفة عن الإصدارات السابقة ليها إلا إن للأسف كان فيه بعض العيوب في الجهاز.

  • نوع الشاشة مش الأفضل.
  • الموبايل بييجي بدون لمبة إشعارات فهتكون محتاج تفتح الشاشة علشان تشوف إشعاراتك.
  • يفتقد إلى مستشعر البوصلة يعني مش هتقدر تعرف كل الاتجاهات اللي بتحتاجها.
  • المعالج قديم بالإضافة إلى أنه مش الأقوى دلوقتي في فئته السعرية.

ولكن بمقارنة الموبايل مع Samsung Galaxy A10s هنلاقي إن الـ سامسونجA11 أفضل في الشاشة، لأن هو صاحب الشاشة الأكبر وشكلها أحدث بسبب ثقب الكاميرا مع إضافة كاميرا خلفية ثالثة للتصوير الواسع وأخيرًا إضافة الشحن السريع 15 وات، ومنفذ الـ Type C هنلاقي إن الموبايل دا ديل كويس جدًا ومتوازن وشكله حلو ولو ميزانيتك قليلة فهو اختيار قوي جدًا في الفئة دي.

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *