مقدمة:

كل جهاز موبايل أيًا كانت ماركته ليه مميزات وعيوب حسب كل شخص محتاج إيه من الجهاز اللي هيشتريه، والجهاز اللي هنتكلم عن مراجعته وتفاصيله النهارده هو سامسونج جلاكسي A01 core …

لما يكون  الشخص اللي محتاج جهاز أهم حاجة فيه الرامات بالنسبة له وآخر همه الكاميرا بس وراح اشترى جهاز مميز بالكاميرا أوي هيبقى بالنسباله الجهاز كله تجربة من أسوأ تجاربه اللي حصلت والجهاز مالوش أي قيمة أو نفع عنده، علشان كدا إحنا هنا علشان نعرف الفرق بين كل أنواع الأجهزة اللي في السوق وكل تفاصيلها وأهم مميزاتها؛ عشان تقدر تختار اللي يناسبك وأنت حاسس إنك كسبان… ودلوقتي هنوضحلك كل حاجه عن سامسونج A01 core  من حيث مميزاته وعيوبه بالتفصيل علشان تقدر تقرر هو بالنسبالك إيه…

تصميم موبايل سامسونج جلاكسي A01 core:

أولًا خامات الموبايل: 

الموبايل دا مصنوع من البلاستيك، والإطار بتاعه أو الفريم كمان بلاستيكي و دا معناه إن لو استخدمته من غير جراب مش هيبصم معاك… ولكن دا بيخليه معرض للخرابيش والخدوش بشكل كبير للأسف، وحتى لو حطيت جراب فلازم تنضف الوجه الداخلي للجراب بشكل كويس جدًا لأن لو دخل تراب تحت الجراب هيسبب خدوش في الموبايل بسهولة.

ثانيًا التصميم الخارجي:

تصميم الكاميرات:

الموبايل موجود فيه كاميرا خلفية واحدة في شكل مستطيل على ضهر الموبايل، بالإضافة لوجود فلاش أحادي من نوع ليدي فلاش.

بالنسبة للكاميرا السلفي فهي موجودة على شكل ثقب أعلى الشاشة.

 

 

أبعاد الموبايل:

 141.1 × 67.5 × 8.6 مم (5.58 × 2.66 × 0.34 بوصة)

الوزن: 150 جرام وهو وزن خفيف يسهل يسهل حمله واستخدامه

الألوان: أسود وأزرق وأحمر.

طبعًا الوزن خفيف جدًا وهو جهاز عملي في النقطة دي لأنك مش هتحس بيه أصلا في جيبك ولا في إيدك حتى لو استخدمته بشكل مطول.

شاشة موبايل سامسونج جلاكسي A01 core:

الشاشة بتييجي من نوع  PLS TFT في الجهاز دا، وهي شاشة كابستيف يعني 16 مليون لون، وحجمها تقريبًا 5.3 بوصة يعني بتمثل 74.5 من حجم الجهاز واللي بشوفها نسبة استحواذ ظريفة في الفئة السعرية دي.

وبالنسبة لدقة الشاشة فهي 720 × 1480 بيكسل، النسب 18:5:9،

 بمعني إنه فيه 311 بكسل في البوصة الواحدة.

 

 

طبعًا دقة الشاشة مش الأفضل ولكن مقارنة بالمنافسين أقدر أقول إنها مقبولة.

كاميرات موبايل سامسونج جلاكسي A01 core:

الكاميرا الأمامية:

بالنسبة للكاميرا السلفي فهي بتييجي بدقة 5 ميجا بكسل، بفتحة عدسة F/2.4.

الكاميرات الخلفية:

هي كاميرا وحيدة بتييجي بدقة 8 ميجا بكسل، بفتحة عدسة F/2.2، مع فلاش أحادي من نوع ليد فلاش.

أيضًا يدعم الموبايل تصوير الفيديوهات بجودة الـ FHD، بدقة 1080، بمعدل التقاط 30 إطار في الثانية.

 

 

طبعًا الكاميرات هنا موجودة لمجرد إن لازم يكون فيه كاميرات، مع ذلك بيقدم أداء مقبول في التصوير تحت ظروف معينة وهو جهاز اقتصادي فمش موجه لفئة المهتمين بالتصوير أصلًا في المقام الأول.

البصمة والزيادات:

لا يدعم البصمة للأسف.

المستشعرات:

1. مستشعر التقارب.
2. مستشعر التسارع.

• الشبكات الي بيدعمها هي: GSM / HSPA / LTE.
• الواي فاي: Wi-Fi 802.11 b/g/n, Wi-Fi Direct, hotspot.
• بلوتوث بييجي بالإصدار الخامس، مع دعمه لخاصية الـ A2DP ،LE.
• يدعم الموبايل  راديو الـ Fm. 
• الشريحة الأولى والثانية من نوع Nano Sim.
• يدعم شبكات الاتصال الجيل الثاني الـ 2G، والجيل الثالث الـ 3G، وكمان الجيل الرابع الـ 4G.
• الموبايل بييجي بنظام تشغيل أندرويد 10 بإصدار Go edition، مع واجهة One UI 2.1.
• يدعم الجهاز أيضًا منفذ الـ 3.5 ملم الخاص بسماعات الأذن، واللي لازم يكون موجود في الفئة السعرية دي عمومًا.

أداء موبايل سامسونج جلاكسي A01 core:

الموبايل بييجي بمعالج من شركة ميديا تيك من نوع MT 6739، بتكنولوجيا الـ 28 نانو، مع معالج رسومي من نوع PowerVR GE8100

 

 

المستخدم للجهاز دا لازم يبقى عارف إنه آخره هيتصفح التطبيقات ويشوف فيديوهات يعني كل الاستخدامات الخفيفة، يعني ماينفعش يتوقع أداء قوي أوي في الألعاب ولا التصوير.

بطارية موبايل سامسونج جلاكسي A01 core:

• سعة البطارية في الجهاز3000 ملي أمبير، ليثيوم بوليمر، غير قابلة للإزالة.
• الجهاز بيقعد يشحن البطارية مدة طويلة بسبب قدرة الشحن الضعيفة، بس بتقدر تقعد معاك لفترة مقبولة خلال اليوم.
• طبعا الجهاز دا مش هينفع استخدامه للألعاب زي بابجي وفورتنايت وكول أوف ديوتي، وغيرها لضعف الذاكرة العشوائية للجهاز “الرام”. 

 

سعر موبايل سامسونج جلاكسي A01 core:

سعر الموبايل حاليًا في السوق المصري حوالي 1199 جنيه مصري للنسخة 16 جيجا مع 1 جيجا رام.

محتوايات علبة موبايل سامسونج جالاكسي A01 core:

1. موبايل سامسونج جلاكسي A01 core.
2. شاحن بقوة 3.5 وات.
3. كابل الـ USB من نوع Micro USB.
4. كتيب التعليمات مع الضمان يشرح كيفية استخدام الموبايل.
5. دبوس معدني لفتح مكان شريحتي الاتصال.

الرأي النهائي في موبايل سامسونج جالاكسي A01 core:

من وجهة نظري ورأيي الشخصي أنه جهاز ممتاز بالنسبة لسعره الاقتصادي جدًا، فهو موفر مميزات كتير تناسب الاستخدام الطبيعي والخفيف لأي شخص مش مهتم بالألعاب أو التصوير، يعني باستثناء الاهتمامين دول هيكون جهاز عملي، واقتصادي ممتاز فعلًا.

لو أنت محتار المفروض تشتري موبايل إيه وعاوز مواصفات معينة في الموبايل بميزانية معينة فخدمة “اختار موبايلك” من ناس فونز هتساعدك تشتري الموبايل اللي نفسك فيه لما تبعتلنا ميزانيتك ومحتاج إيه في الموبايل، عن طريق ترشيح أفضل جهاز ممكن بالمواصفات اللي أنت حددتها؛ اضغط هنـــــــا للدخول لخدمة اختار موبايلك.