موبايل ريلمي اللي عمل ضجة كبيرة أول ما نزل السوق، وهو موبايل ريلمي 6 ودي مش حاجة غريبة على سلسلة الريلمي، الشركة اللي دخلت السوق المصري وتفوقت على كتير من المنافسين بأسعار أجهزتها المناسبة.
إيه بقى حكاية الموبايل ده وإيه إمكانياته ومميزاته!
دا اللي هنعرفه من خلال مراجعة الموبايل، بس قبل ما نبدأ مراجعة خليني أفكرك بخدمة “اختار موبايلك” واللي بيقدمها موقــــع ناس فـــونـــز، واحدة من الخدمات اللي بنقدمهالك؛ علشان نقدر نساعدك في اختيار الموبايل الأنسب ليك بعد ما تعرفنا المميزات اللي بتحتاج وجودها في الموبايل بتاعك والعيوب اللي بتحاول تتجنبها فيه.
دلوقتي خلينا نكمل مراجعة الموبايل اللي معانا النهاردة وهو الريلمي 6 ونبدأ بتصميم الموبايل…
تصميم موبايل ريلمي 6:
أولًا خامات الموبايل:
جسم الموبايل سواء الضهر أو الفريم من البلاستيك البولي كاربونيت، وأتمنى من ريلمي تتخلص من الخامات دي وتقدملنا خامات أفضل من المعدن والزجاج.
عمومًا الموبايل كشكل وتصميم وتدرج ألوان على الضهر، شايفه حلو وجذاب جدًا.
جسم الموبايل طبعًا مقاوم لرذاذ وقطرات المياه.
التصميم الخارجي:
تصميم الكاميرات:
- الموبايل فيه أربع كاميرات خلفية فوق بعض بشكل رأسي.
- الكاميرا السيلفي موجودة في ثقب شمال الشاشة من فوق.
أبعاد الموبايل:
- وزن الموبايل 191 جرام.
- أبعاد الموبايل 162.1×74.8×8.9 ملم.
الموبايل وزنه كويس مش تقيل أوي ولا خفيف، فهو في المتوسط ومش هيضايقك وأنت ماسكه.
شاشة موبايل ريلمي 6:
- شاشة ريلمي 6 من نوع IPS LCD.
- حجم الشاشة 6.5 إنش.
- الشاشة عليها طبقة حماية Gorilla Glass 3.
- الشاشة بدقة 1080×2340 بكسل، بجودة FHD+ مع أبعاد عرض 20:9 وكثافة البكسلات 405 بيكسل لكل إنش.
- الشاشة هنا بتيجي بتردد 90 هرتز…
لقيت نعومة كدا في لمسات الشاشة، سواء كان أثناء اللعب أو خلال التصفح وغيره، والنعومة دي بتحسسك إن أداء الموبايل دا سلس، ودي إضافة قوية جدًا.
الشاشة Sharp أوي، وتقريبًا نفس الشاشات اللي ريلمي بتستخدمها بقالها كام سنة، نفس الألوان والحدة، وأنا مش معترض على أداء الشاشة هي كويسة، بس كنت أتمنى أشوف تغيير في الشاشة في الإصدار دا.
تجربة مشاهدة الفيديوهات على الشاشة دي مفيش فيها أي مشكلة، وكمان فيه ميزة عجبتني جدًا، وهي الـ OSIE، اللي بتمكنك من إضافة تعديلات على ألوان الفيديوهات في اليوتيوب ونتفليكس إذا حبيت.
الكاميرا السيلفي موجودة في ثقب شمال الشاشة من فوق، لاحظت إن الثقب اللي هنا كبير شوية، بس أعتقد إنهم عملوا كده علشان يكون فيه شوية اختلاف وتميز في شكل الموبايل، وكمان لاحظت نفس الحواف الكبيرة اللي ما اتغيرتش، واللي كانت في الريلمي 2 برو.
كاميرات موبايل ريلمي 6:
الكاميرا الأمامية:
- كاميرا السيلفي في الموبايل بتييجي بدقة 16 ميجا بكسل، بفتحة عدسة
F/2.0 وتدعم HDR والتصوير البانوراما، وتدعم أيضًا تصوير الفيديوهات بجودة الـ FHD بدقة 1080 بكسل بمعدل التقاط 30 إطار في الثانية.
أداء كامير السيلفي كويس جدًا، خصوصًا بالنهار هتطلع صور رهيبة بتفاصيل ممتازة وواضحة جدًا، وبالنسبة لدرجة لون البشرة فبيكون الأفضل في ريلمي 6، بالمقارنة مع أداء كاميرات موبايلات الفئة المتوسطة.
حتى في تصوير الفيديوهات، الكاميرا بتصور 4K، والألوان فيها بتكون ممتازة وSharp، ومشكلة الفيديو بس هنا هي إنه مفيش أي تثبيت بصري ودي حاجة مزعجة شوية الصراحة.
الكاميرات الخلفية:
الموبايل فيه كاميرا خلفية رباعية:
- الكاميرا الأولى وهي الكاميرا الأساسية بدقة 64 ميجا بكسل، بفتحة عدسة F/1.8 وبمستشعر Samsung Bright GW1.
- الكاميرا التانية بدقة 8 ميجا بكسل بفتحة عدسة F/2.3، وهي Ultra Wide للتصوير الواسع.
- الكاميرا التالتة بدقة 2 ميجا بكسل بفتحة عدسة F/2.4، وهي كاميرا ماكرو للتصوير عن قُرب.
- الكاميرا الرابعة، وهي بتصور بدقة 2 ميجا بكسل بفتحة عدسة F/2.4.
تجربتي للكاميرا لاحظت إن ريلمي ظبطت كل المشاكل اللي كانت موجودة في ريلمي XT، واللي كانت بتحمر الوشوش في الصور والتفاصيل كانت أقل من الواقع ، لكن كل المشاكل دي اتحلت ومبقتش موجودة، أداء الكاميرا الاساسية في التصوير الثابت محترم جدا، وحتى لما تعمل زوم لحد 2x و 5x، رغم إنهم تقريب سوفت وير لكن نتايجهم كانت مرضية جدا، في تسجيل الفيديو مينفعش تنقل من الكاميرا الاساسية الي الكاميرا ال Ultra Wide، سواء بتصور Ultra Wide بس أو كاميرا اساسية بس.
العيب الوحيد اللي لاحظتة في تسجيل الفيديو مش ثابت أوي، لكن المعلومة اللي عندي إن الموبايل هيوصلة تحديث سوفت وير هيحسن ثبات الفيديو.
في المجمل تجربة الكاميرات احنا راضيين عنها جدًا.
البصمة والزيادات:
البصمة:
- موجود في الموبايل بصمة جانبية بتكون مدمجة في زر الباور، أدائها كان سريع وكويس جدًا، ومكنش فيه أي مشكلة وأنا بتعامل معاها، بالإضافة إلى إن الموبايل بيدعم الـ Face Unlock أو الفتح عن طريق الوجه.
المستشعرات:
- مستشعر التسارع.
- مستشعر التقارب.
- مستشعر البوصلة.
- مستشعر الجيروسكوب.
البلوتوث يأتي بإصدار 5.0 مع دعمه لخاصيتي الـ A2DP, LE.
يدعم تحديد الموقع الجغرافي الـ GPS مع دعمه لأنظمة الملاحة الأخرى مثل الـ A-GPS, GLONASS, BDS.
الواي فاي يأتي بترددات الـ b/g/n مع دعمه إلى الـ Dual-band, Wi-Fi Direct, hotspot.
أما عن منفذ الـ USB فيأتي من النوع الأحدث الـ Type C.
كما يحتفظ الهاتف بمنفذ الـ 3.5 ملم الخاص بسماعات الاذن.
الموبايل يدعم تركيب شريحتين اتصال من الجيل الرابع، مع إمكانية إضافة كارت ميموري بحجم يصل إلى 256 جيجا بايت.
الموبايل بينزل بلونين بس، اللون الأزرق واللون الأبيض.
صوت موبايل ريلمي 6:
صوت السماعات الخارجية عالي جدا ونقي، وهي سماعة وحيدة بتكون أسفل الموبايل ناحية اليمين.
أداء موبايل ريلمي 6:
- معالج ميدياتك Helio G90T ثماني النواة.
- دقة تصنيع 12 نانو ميتر، وقوته بتوصل لـ 2.05 جيجا هيرتز.
- المعالج رسومي من نوع Mali-G76 MC4، ودا نفس المعالج اللي كان موجود في موبايل نوت 8 برو.
- النسخة الأولى بذاكرة داخلية سعتها 64 جيجا بايت من نوع UFS 2.1، مع رامات 4 جيجا بايت.
- النسخة التانية بذاكرة داخلية سعتها 128 جيجا بايت من نوع UFS 2.1، ورامات 8 جيجا بايت.
المعالج كقدرات قدر يحقق أرقام عالية جدًا مع المقارنة بموبايل ريلمي 5 برو اللي كان بييجي بمعالج سناب دراجون 712، ومع المقارنة برده بالمنافسين من سامسونج وغيرها، هنلاقي معالج ريلمي 6 تفوق عليهم كلهم.
أداء المعالج دا في الـ Graphics وفي الألعاب ممتاز جدًا، وجربته في ألعاب تقيلة زي PUBG كان شغال كويس جدًا برده ومن غير ملاحظة أي سخونة فيه، فما تقلقش من الجزئية دي خالص؛ لإن الجهاز حتى لو سخن هيسخن معاك بنسبة قليلة خالص تكاد تكون لا تُذكر.
بالنسبة للأداء في المهام اليومية، فالموبايل هيعجبك جدا ومش هتلاقي أي مشاكل، ولا تهنيجات أثناء تنقلك بين التطبيقات أو غيرة.
بطارية موبايل ريلمي 6:
- بطارية الموبايل من نوع ليثيوم بوليمر.
- حجم البطارية 4300 مللي أمبير، وبتدعم الشحن السريع بقوة 30 وات.
بطارية الموبايل فضلت معايا فترة كويسة جدًا، من 6-7 ساعات استخدام متواصل.
هتلاقي في السوفت وير إعدادات تساعدك تتحكم بالظبط في استهلاك البطارية، وتخلي الجهاز يحافظ على استهلاك البطارية بطريقة ممتازة.
بصراحة أنت ما ينفعش تقلق من حتة استهلاك البطارية من ريلمي 6؛ لإن معاك شاحن 30 وات، بيشحن البطارية 60% في 30 دقيقة فقط، وده وقت قليل وعظيم.
سعر موبايل ريلمي 6:
- النسخة الأولى بمساحة تخزين 128 جيجا، مع رامات 4 جيجا بايت بسعر 3990 جنيه مصري.
- النسخة التانية بمساحة تخزين 128 جيجا مع رامات 8 جيجا بايت، بسعر 4490 جنيه مصري.
الرأي النهائي في موبايل ريلمي 6:
نروح بقى للسؤال المهم، هل موبايل ريلمي 6 يستحق فعلًا إنك تشتريه ولا لأ!
أنا شايف إن إمكانيات الموبايل ممكن ما تبقاش جديدة ولا مبهرة، ونفس الإمكانيات دي كانت موجودة في فئة سعرية أعلى، بس ريلمي قدرت توفرها في فئة سعرية أقل دلوقتي…
وكمان الشاشة بتردد 90 هيرتز يعني كويسة، وأداء الموبايل كويس جدًا برده في الألعاب، وبالنسبة للكاميرات فمجمل أدائها حلو جدًا، وأظن إن الموبايل ده كان هيبقى مثالي ومفيهوش عيب لو كان تصميمه أفضل وأفخم من كده وكان بسعر أقل بـ 100 أو 200 جنيه، لكن مفيش موبايل بإمكانيات متكاملة…
لازم تلاقي عيب كده جايلك من أي حتة، بس أقدر أقولك إن موبايل ريلمي 6 يُعتبر اختيار كويس نوعًا ما.